လမ်းထိပ်တစ်နေရာက ဆိုင်တစ်ဆိုင်တွင် ဇနီးမောင်နှံနှစ်ယောက်မှာ ယခုမှ စျေးဆိုင်တည်ခင်းလို့ပြီးကာ စတင်ချက်ပြုတ်မည်ပြုနေ၏။ ချူယွမ် ခြေလှမ်းများတုံ့ဆိုင်းသွားကာ ထိုအဘိုးအိုတို့အား သွားရောက်မေးမြန်းကြည့်လိုက်သည်။
"ဒီနေရာက လောင်ကျန်းရဲ့ခေါက်ဆွဲဆိုင် ဟုတ်ပါသလား"
"ဟုတ်ပါတယ် သခင်လေး"
ဆိုင်ရှင်အဘိုးအိုက ချူယွမ်အား ပြုံးရွှင်စွာဖြေလာ၏။
"ကျန်းချွမ်ဆိုတာ ကျွန်တော်မျိုးပါပဲ။ ဒီရွှေမြို့တော်ရဲ့ အရသာအရှိဆုံး ခေါက်ဆွဲဆိုင်တွေတောင် ကျွန်တော့်ရဲ့ဆိုင်ကနေ ချက်နည်းနမူနာယူထားရတာပါ "
"ဒါဆိုလည်း ကျွန်တော့်အတွက် ခေါက်ဆွဲတစ်ပွဲလောက် ပြင်ပေးပါဦး ၊ အဘိုး"
ချူယွမ်က ထီးကိုပိတ်လိုက်ကာ ဆိုင်ရှေ့ ထိုင်ခုံပေါ်ထိုင်လိုက်၏။ မိုးရေကြောင့် အေးစက်ကိုက်ခဲနေသော လက်ကိုလည်း နွေးလိုနွေးငြား အာငွေ့နွေးနွေးပေးနေသည်။
"သခင်လေး ရေနွေးကြမ်းသောက်ပါဦးလား။ ဆန်ကနေချက်ထားတာဆိုတော့ ဆန်နံ့သင်းသင်းလေးပါ မွှေးနေတယ်"
အဘွားအိုက လောကွတ်ပျူငှာစွာ ဧည့်ခံလာ၏။
"ဟုတ်ကဲ့၊ ကျေးဇူးတင်ပါတယ်"
ချူယွမ်က ဘေးပတ်ပတ်လည်ကို ကြည့်နေလိုက်ကာ မေးလာ၏။
"ဒီလောက်အေးစိမ့်နေတဲ့ညမျိုးမှာ အလုပ်အကိုင်ရော အဆင်ပြေရဲ့လား"
"သိပ်တော့ အဆင်မပြေပါဘူးဗျာ။ ဒါပေမယ့် နေသားကျနေပါပြီ၊ ကိုယ်တွေ ဆိုင်မဖွင့်တဲ့ညကျမှ ညလုံးပေါက်ခရီးသွားနေရတဲ့လူတွေခမျာ လမ်းမှာ ဗိုက်ဖြည့်စရာ စားစရာတစ်ခွက်တစ်လေတောင် ရှာမတွေ့မှာ စိုးလို့ပါ"
အဘိုးအိုက ပုဇွန်ခြောက်များဖြူးထားသော ခေါက်ဆွဲပန်းကန်အကြီးကြီးကို ချူယွမ်ရှေ့ချပေးလာ၏။
"စားလို့ မဝရင်လည်း ပြောပါနော် သခင်လေး၊ အများကြီး ရှိပါသေးတယ်"
"ကောင်းပါပြီ"
ချူယွမ်ပြုံးလိုက်ကာ ဟင်းရည်တစ်ဇွန်း ခပ်သောက်ကြည့်လိုက်၏။
ВЫ ЧИТАЕТЕ
ဧကရာဇ်ဗျူဟာ [Di Wang Gong Lue]
Любовные романыDi Wang Gong Lue (or) Emperor's Strategy {Myanmar Translation} Author : Yu Xiao Lan Shan
အခန်း - ၆၉ (နှစ်သစ်ကူးည)
Начните с самого начала