قصائد الحب (الجزء الثالث من احببت عنادك)

البارت9

روحت السكن وهي مبسوطه وفرحانه جداً وبتبص ع الدبله بسعاده
شافتها زميلتها في السكن وهي مستغربه سر سعادتها :مالك ي مريم  عماله تتنططي في اي
مريم ابتسمت بسعاده وقربت منها وباستها بفرحه :بقيت خطيبته خلاص
ندي :نائل
مريم هزت راسها وهي مبتسمه بفرحه وقعدت ع طرف السرير قصادها :ايوا هو
ندي :طب وهو معملش خطوبه ليه
مريم :عشان الظروف عنده وكدا مش هيعرف بس هو جابلي الدبله عشان الناس كلها تعرف اني مخطوبه وقال هيعملي فرح كبير
ندي بسخريه:وانتي صدقتي بقاا الكلام دا
مريم استغربت:اه صدقته ..لانه اي الي هيخليه يكدب عليا
ندي :عشان غبيه انا كنت حاسه انو بيتسلي بيكي من الاول بس دلوقتي اتاكدت
هو قال واحده هبله اضحك عليها بكلمتين واجبلها دبله تتبسط بيها عشان اقدر اعمل الي انا عايزه
مريم : بس انا دخلت بيته واتعرفت ع مامته وباباه
ندي :انتي قولتي انك دخلتي بيته وانتي سكرتيره اصلاً يعني مفيش فرق شوفي كام سكرتيره كانت عنده ودخلت بيته وعمل معاها الموضوع دا
مريم بدأ الشيطان يلعب في دماغها وعينيها بتروح وتيجي بقلق ممكن يكون عندها حق :طب اعمل اي دلوقتي
ندي ابتسمت بخبث انها قدرت تقنعها :انا هقولك تعملي اي
بس تسمعي كلامي بالحرف الواحد
مريم هزت راسها :حاضر 
♥️♥️♥️♥️♥️♥️♥️♥️♥️♥️♥️♥️♥️♥️
قاعده في النادي قدام حمام السباحه وهي لابسه مايوه بكيني اسود وحاطه نضاره الشمس ومغمضه عينيها في هدوء واستجمام وحاطه الهاند فري بتسمع ميوزك
فاقت ع حد بيسحب الهاند فري من ودنها شالت النضاره وبصتله واتعصبت اكتر لما شافته ونفخت بضيق :نعم. ممكن اعرف جاي لحد هنا ليه
عمر قعد ع الكرسي قصادها وبيبصلها بغيره وغضب: اي المسخره الي انتي قاعده بيها دي
اسيا بلامبالاه:والله انا قاعده قدام حمام سباحه فا طبيعي اللبس كدا
عمر بغضب:الطبيعي دا في الفيلا عندكوا لكن هنا انتي في نادي والكل بيبص عليكي ويشوف جسمك ي هانم
حط فوطه ع رجليها تداريها وقلع جاكيت بدلته وحطه عليها
وبصلها بتحذير تقومي حالاً تغيري المسخره دي
اسيا بضيق بتشيل الجاكيت :اي دا انت بتخنقني
انا اقعد براحتي ي عمر وانت ملكش حكم عليا واظن رفضي وصلك
عمر ثبت الجاكيت عليها وانحني بجسده ناحيتها وبص في عيونها بقوه :رفضك دا ولا يعنيلي اي شئ ي اسيا
انا هكرر طلبي وعايزك ترفضي ...لان وقتها رد فعلي مش هيعجبك خالص
اسيا بلعت ريقها بتوتر وبتحاول تستجمع شجاعتها الي هربت منها :انا مبتهددش ي عمر  وبردوا مش موافقه
عمر ببرود وقف وبيحط ايديه في جيبه :براحتك ..بس وقتها متزعليش من رد فعلي
اسيا بغضب رمت الجاكيت في وشه ووقفت وبتزقه :انت الي متزعلش من رد فعلي ي عمر
انا لما شوفت خيانتك بعيني كنت مصدومه ومعملتش اي حاجه لكن دلوقتي هاخد حقي
عمر مبتسم باستمتاع وهي بتضربه ع صدره وكانت ضرباتها ضعيفه بالنسبه لقوته وبتزقه لورا  وقف ومسك ايديها وبصلها ببرود :وناويه تاخديه ازاي بقاا
اسيا بصت بطرف عينيها وكان حمام السباحه وراه مباشره خطرت في بالها فكره ورجعت بصتله بمكر :هاخده كدا ي عمر
زقته في حمام السباحه لكن عشان كان ماسك ايديها وقعت معاه
عمر اتعصب :ماشي ي اسيا والله ما هسيبك
بمهاره وسرعه قرب منها وبيشدها لحضنه وهي بتحاول تعافر وتبعد او تزقه تحت المايه لكن مش قادره بسبب قوته  بصلها بغل ومكر وكان الكل بيبص عليهم :انتي دلوقتي في مركز ضعف ..وريني هتقدري تقاومي ازاي
اسيا بغضب :عمر سبني ملكش دعوه بياا
عمر بتصميم وعند:مش هسيبك ي اسيا انا قولتلك انتي ملكي انا مهما عملتي انتي ملكي فاهمه
اسيا بضيق :لا مش فاهمه ..انا ملك نفسي وحره محدش ليه حاجه عندي
عمر بيشيل خصلات شعرها الي ع وشها برقه وبيبصلها بحنيه:حتي لو قولتلك اني بحبك ومحبتش غيرك
اسيا تاهت مع لمسته وصوته الهادي الي قدر يحول القطه الشرسه ل بنت رقيقه وهاديه:انا كمان بحبك اووي ي عمر
عمر ابتسم بثقه انو قدر يخليها تعترف بحبها ليه بسهوله  وبنفس الهدوء والرقه :اعملي حسابك ع انهارده جاي انا واهلي اتقدملك
اسيا بتوهان وهي مغمضه عينيها هزت راسها :حاضر
♥️♥️♥️♥️♥️♥️♥️♥️♥️♥️♥️♥️♥️♥️♥️
في الشركه قاعد ع مكتبه وبيشتغل بتركيز
سمع خبط ع الباب واذن بالدخول
السكرتيره كانت سنداها ودخلت وهو رفع راسه واتفاجئ بيها وقف وهو مندهش وقرب منها وخدها من السكرتيره
عز :اي المفاجاه الغريبه دي اكيد كنتي جايه ل اونكل جاسر
الاء ابتسمت وهي بتلمس ع الحيطه جنبها والايد الاخري ماسكها :لا انا جايه ليك ..اه عديت ع بابا سلمت عليه بس قولت اجيلك ..انت بقالك كام يوم مش بتيجي فا قولت اجي انا
عز ابتسم وهو مبسوط انها واخده بالها من عدم وجوده :تنوري طبعاً في اي وقت   قعدها ع الكرسي وقعد قصادها.  ومعلش لو مكنتش باجي الايام الي فاتت بس الشغل كتير وانا لسه مستلم مبقاليش كتير
الاء مبتسمه بهدوء:عارفه ربنا معاك ..رغم اني زعلت انك سيبت الشرطه بس واضح انك مبسوط هنا اكتر
عز وهو مبتسم:سيبك مني انا المهم انتي تشربي اي الاول
الاء :انا طلبت عصير وطلبتلك القهوه
عز :هههههه طب واشعرفك اني هشرب قهوه
الاء بثقه:لان ببساطه عارفه مواعيد شربك للقهوه وكمان حبك ليها
عشان تعرف بس اني واخده بالي وعارفه انت بتحب اي ومبتحبش اي
عز ابتسم:ماشي ي ستي غلبتيني المرادي
قوليلي بقاا عامله اي
الاء اتنهدت:اهو مفيش جديد
مش بعمل اي حاجه ..قاعده في ضلمه طول حياتي
عز طبطب ع ايديها بحنان :ان شاء الله قريب هتعملي العمليه وتفتحي بس بلاش اليأس دا
الاء بحزن:ان شاء الله
عز :اممممم تحبي تخرجي
الاء:لا انا مش عايزه اعطلك انا جيت بس اطمن عليك
عز وقف وخد جاكيت بدلته :مفيش عطله ولا حاجه انا كدا كدا زهقت من الشغل  يلا بقا خلينا نروح نتغداء في اي مكان
الاء ابتسمت ووقفت معاه :نفسي اكل اكله سمك وقدام النيل
عز ابتسم وسندها :بس كدا من عينيا
مشيت معاه وهو ساندها وخرج
بعد وقت كبيير قاعدين في مطعم النيل وقدامهم جميع انواع السمك وبيأكلها عز بايديه
الاء وهي تمضغ اللقمه :كفايه ي عز انت مكلتش حاجه
عز:متشغليش بالك بيا اهم حاجه انتي
كلي بقاا وبطلي رغي. حط اللقمه في بوقها
الاء :ي ابني انا حساك بتزغط فياا.
عز ضحك: عشان تكبري ..وتربربي ..وتحلوي
الاء ضحكت :هههههههه  قصدك اي بقاا ي سي عز
قصدك ان انا وحشه
عز وهو مبتسم:قطع لسان الي يقول كدا ..انتي مفيش اجمل منك
الاء اتنهدت وهي حاسه بسعاده بوجوده جنبها ع طول :عارف ي عز انا حاسه اني بقالي كتير مضحكتش كدا من قلبي
انا اكتر وقت محتاجه فيه نظري هو دلوقتي
عايزه اتنطط والعب واروح الملاهي ..نفسي اعمل حاجات كتير اووي
عز :طب ماانتي تقدري تعملي كل دا دلوقتي
الاء بحزن :ازاي بقاا وانا مش شايفه
عز :انا معاكي هتعملي كل الي نفسك فيه
الاء :لا انا تقلت عليك اووي كفايه كدا
عز بيضع قطعه من السمك في بوقها بتصميم :مفيش حاجه اسمها كفايه ..هنروح كل مكان نفسك فيه وهنعمل كل الي انتي عايزاه  ..بيقرب قطعه اخري. ..الاول تاكلي عشان نروح
الاء باعتراض :لا انا شبعت الحمدلله
انا مكلتش بالشكل دا قبل كدا وهيطلعلي كرش بسببك
عز ضحك:طب وفيها اي
الاء :لا مش هقدر انا كويس كدا اووي
عز :طيب خلاص هروح اغسل ايدي وارجع احاسب ونمشي
الاء :طيب انا هحاسب
عز بقوه :ليه ماشيه مع سوسن ولا اي اوعي تعملي حاجه زي كدا وانا معاكي ي الاء
الاء استغربت عصبيته :طب وفيها اي ي عز
انا قولت هحاسب انا مش هنتحر
عز بضيق :الكلام دا تقوليه وانتي ماشيه مع واحده صاحبتك
لكن انا راجل لا يمكن اسمح انك تطلعي جنيه وانتي معايا
الاء باستغراب :ليه بقاا مانا لما كنت مع يزيد كنت ساعات بدفع انا
عز اتغيرت ملامحه للغيره والضيق :والله دي حاجه تخصه انا مليش دعوه وثاني مره متجبيش سيرته او سيره اي راجل عامه ي الاء
الاء :انا مستغرباك بجد انت مكبر الموضوع اووي ي عز
عز :اه مكبره لان هو كبير ي الاء  يعني اي تدفعي وانا موجود
لدرجه دي شيفاني مش راجل
الاء :مش قصدي كدا ..بس انت كل مره الي بتدفع قولت ادفع انا مره
عز :لا مش هيحصل وانا الي هفضل ادفع ع طول
الاء :خلاص ماشي ..انا اسفه مقصدش
عز اتنهد :حصل خير
بس انا مليش دعوه كان بيحصل اي وانتي مع يزيد هو بيدفع انتي بتدفعي دا مليش دعوه بيه لكن معايا انا مش هتدفعي جنيه ماشي
الاء:حاضر
عز وقف واردف بهدوء:هقوم اغسل ايدي وارجعلك
الاء :ماشي
مشي عز وبعد وقت رجع وشاف شخص واقف بضهره قصادها وجنبه بنت مكنش عارف يحدد مين دا غير لما قرب وبصله
عز غار بشده لما شافه :انت بتعمل اي هنا وعايز اي
يزيد بابتسامه سمجه:انا جيت بس اسلم عليها لما شوفتها مكنتش اعرف انك معاها
قولت اعرفها بس ع خطيبتي
البنت بتبص ل عز باعجاب ومدت ايديها بدلع:هاااي
عز اتجاهلها وبص ل يزيد بقوه  :امممم واحنا يخصنا في اي نعرف خطيبتك ولا مراتك
لتكون فاكر انك حاجه بالنسبالنا .. ي ابني انت بمجرد ما خرجت برا الفيلا احنا نسينا انت مين اصلاً بدليل اني معرفتكش لما شوفتك من بعيد
فاامور النسوان بتاعتك دي خليهالك احسن وكفايه الاحراج الي سببته لخطيبتك لحد دلوقتي انا بقول كفايه كدا وارجع مكان ما جيت
يزيد اتعصب ووشه احمر من الاحراج والغضب وحتي البنت اتحرجت من تجاهل عز ليها :ع العموم انا جيت اسلم بس عن اذنكوا
عز بقوه وهو مقدرش يمنع غيرته وغضبه :في داهيه
مشي يزيد وعز بيبصله بغضب وغيره لكن فاق ع لمسه ايديها بتترعش بصلها وشاف الدموع متجمعه في عينيها وبتحاول تقف ..مسك ايديها وسندها :حااسبي
الاء دمعت بوجع :عز ممكن تروحني
عز اتوجع عليها ومنها ..عرف انها لسه فيه مشاعر جواها ناحيته عشان كدا اضايقت :ماشي ي الاء
خرجوا برا المطعم وركبوا العربيه واتحركوا وهي بتعيط في صمت ..لمحها بتعيط
وقف العربيه ع جنب ومن غير ما يبصلها بثبات:لسه بتحبيه
الاء استغربت سؤاله وبتمسح دموعها :ليه بتقول كدا
عز بثبات:ردي عليا ي الاء لسه بتحبيه
اصل مستحيل تعيطي وتتوجعي كدا الا لو كنتي لسه بتحبيه وبتفكري فيه
الاء دمعت :عز ارجوك انا مش قادره اتكلم بعد اذنك روحني
عز :ماشي ي الاء هروحك
اتحرك بالعربيه وبعد وقت وصل قدام الفيلا
نزل ودخلها ومقعدش زي كل مره وروح وهي الشغاله طلعتها اوضتها وقعدت انفجرت من العياط وهي موجوعه مش عارفه تحدد مشاعرها وبتفتكر سؤال عز هي فعلاً بتحبه ولسه بتفكر فيه  ولا مبقاش يهمها ..مكنتش عارفه اجابه السؤال
ومحتاره
♥️♥️♥️♥️♥️♥️♥️♥️♥️♥️♥️♥️♥️♥️
دخلت المكتب بهدوء وجديه وحطت الملف قصاده :الملف دا عايز يتمضي ي فندم
نائل بصلها باستغراب :فندم!  اي الدخله الناشفه دي مفيش صباح الخير
مريم بجديه:انا طلعت ملاحظات فيه قبل ماادخله لحضرتك زي ما حضرتك طلبت
نائل مستغرب معاملتها برسميه مبالغ فيها عكس طبيعتها:مالك ي مريم اول مره تعامليني بالرسميه دي في حاجه
مريم :لا طبعاً ي فندم مفيش حاجه
بس طبيعي اعامل حضرتك برسميه لانك مديري
نائل :ودا من امتي ان شاء الله مااحنا كنا كويسين امبارح وكمان احنا شيلنا الالقاب من زمان ومعاملتنا عاديه ليه رجعتي الالقاب وبتتعاملي برسميه كدا
مريم :هو دا الي لازم يحصل ي فندم
نائل وقف وقرب منها :هو اي بقاا الي لازم يحصل مش فاهم
مريم اتوترت وهو بيقرب منها وبترجع خطوات :اني اتعامل كدا
نائل مسك ايديها اليمين ورفعها وبيشاور ع صباعها :فين الدبله ي مريم
مريم بلعت ريقها بتوتر :نسيتها
نائل رفع حاجبه الايسر :متأكده انك نسيتيها
اصل واضح من المعامله ونسيانك للدبله ان فيه حاجه وحاجه كبيره مش معقول تبقي لبساها امبارح وتنسيها انهارده
مريم سحبت ايديها :لا معقول عادي انا عشان مش متعوده عليها فا نسيتها
نائل بهدوء وثبات:ماشي ي مريم هعتبر نفسي مصدقك
بس لو فيه حاجه تاني حابه تقوليها انا ممكن اسمعك لكن لو مفيش يبقي الدبله متتقلعش ماشي
مريم :حاضر
نائل :والطريقه الي بتتكلمي بيها تتغير ولو فيه حد لعب في دماغك الاحسن متسمعيلوش لان انا واثق ان حد لعب في دماغك وخلاكي تتعاملي بالاسلوب دا
بس انا هقولك كلمتين تحطيهم حلق في ودنك
لو سمعتي لحد برا ي مريم انتي كدا بتهدي حياتك بايدك
انا حبيتك كدا فا لما تتصنعي شخصيه مش شخصيتك وقتها حبي ليكي هيقل
انا حبيتك بعيوبك قبل مميزاتك فا متجيش انتي وتزودي الغلط
يعني ينفع اكل يبقي مظبوط وحلو تيجي تحطيله ملح
اكيد طبعاً لا
مريم بتوتر :انا محدش بيلعب في دماغي ولا بيقولي حاجه
نائل بثقه:لا انا متاكد ان حد اتكلم معاكي ي مريم تحويلك المفاجئ دا مش منك دا حد قالك اعملي كدا
متخربيش ع نفسك ي مريم لاني مبحبش البنت الي تسمع كلام غيرها انا عايز شخصيه مريم الي انا اعرفها مش واحده
واحده تانيه ممشياها
مريم :انا محدش ممشيني ي نائل
نائل :لو واثقه من كلامك يبقي هنشوف وهيبان الشخصيه الي انا متعود عليها والشخصيه الي ظهرت فجاه
مريم بتحدي:ماشي هتشوف
نائل ابتسم بثقه:جهزي نفسك عشان هنروح المنتجع نتابع اخر التطورات
مريم :ماشي
خرجت مريم وهو قعد ع الكرسي يتابع عمله
بعد وقت قاعدين في كافيه قريب من مكان المنتجع وبيشربوا عصير
نائل بهدوء:مش هسمح انك تقلعي الدبله تاني وهعتبر انك نسيتي فعلاً بس لو اتكررت تاني ي مريم مش هتلبسيها تاني
انا الي يجي في بالها انها تسبني مستحيل ترجع حتي لو بموت فيها
مريم هزت راسها :حاضر
بس انت بطل تخوفني
نائل :بالعكس ي مريم انا بطمنك وفي نفس الوقت بحاول ابعد الوسواس الي في دماغك وعايز يخرب عليكي
انا بحبك وعايز حياتنا تبقي هاديه وحلوه مش عايز حد يعكرها
بحب البنت الي تبقي ماشيه بتفكيرها وتعمل الي في دماغها مش الي في دماغ غيرها
مريم :انت ليه مصمم ان فيه حد عايز يخرب علينا
نائل :لاني متاكد بس بردوا انتي في ايدك تثبتي غير كدا
مريم :ماشي وانا هثبتلك ان الي في دماغك غلط
نائل بهدوء:هنشوف
خلص اليوم وروحت مريم وهي زعلانه من معاملتها ليه وحست بزعله منها عشان قلعت الدبله
دخلت الاوضه الي بتجمعها هي وندي وبمجرد ما شافتها بصتلها بلهفه
ندي بلهفه :ها عملتي اي
مريم بحزن :زعل مني وحس ان حد قالي اتصرف بالطريقه دي واضايق لما قلعت الدبله
ندي بخبث:بس حلو اوي كدا يبقي كدا خطتنا بتنجح
مريم بصتلها باستغراب :بتنجح ازاي بقولك اضايق مني
ندي :ما دا هيعرفك اذا كان بيحبك وهيستحملك ولا هيزهق لما يلاقيكي اتغيرتي معاه
مريم:هو شايف ان مش دي طريقتي وشك في الموضوع
وقالي لو قلعت الدبله تاني مش هلبسها نهائي حتي لو بيموت فيا
ندي:دا كدا بيخلع بالطريقه وبيمسك في اقل حاجه اوعي تسمعي كلامه وتخافي منه انتي قويه وبعدين مسالتيش نفسك اي الي يخلي واحد غني زي دا يفكر فيكي انتي الا لو لقاكي واحده ضعيفه وغلبانه ومعندهاش خبره فا صعبتي عليه وبيستغل الموضوع لصالحه وشويه وهيقولك تعالي اوريكي الشقه
مريم بنفي:لا نائل مش كدا انا واثقه فيه
ندي بلامبالاه:طيب خليكي واثقه فيه لحد ما تتصدمي وتقولي كلامك صح ي ندي
مريم اتنهدت بتعب وقلق:طب انا اعمل اي دلوقتي انا محتاره
خايفه بالي بعمله اخليه يسبني وفي نفس الوقت خايفه يكون كلامك صح
ندي :عشان كدا بقولك اسمعي كلامي ومش هتندمي
مريم :طيب انا نفذت كل الي قولتيه انهارده اعمل اي تاني
ندي :اول حاجه ادخلي بس اعمليلنا كوبايتين شاي وتعالي انا هظبطك وحتي لو كان بيتسلي هخليه يتجوزك
مريم ملهوفه تسمع وتنفذ كلامها بعد ما وعدتها انها هتقدر تخليها تتجوزه
دخلت المطبخ تعمل الشاي وندي قاعده ع السرير لمحت فونها خدته وطلعت رقم وسجلت الرقم عندها من غير ما تاخد بالها ورجعته مكانه تاني
♥️♥️♥️♥️♥️♥️♥️♥️♥️♥️♥️♥️♥️
في الشاليه الخاص بيه قاعدين ع الرمل قدام البحر وهي نايمه في حضنه ومحاوطها بعضلاته
اميره مستمتعه بجمال المنظر قدامها وجمال اللحظه وهي في حضنه :ادم
كان سرحان ومردش
اميره استغربت وبعدت عن حضنه وبصتله شافته وهو سرحان هزته هزه خفيفه:ادم
ادم فاق وبصلها :هاا ..بتقولي حاجه ي حبيبتي
اميره مستغربه سرحانه:مالك ي ادم سرحان في اي
بكلمك مش بترد عليا
ادم :معلش ي حبيبتي سرحت شويه في الشغل
اميره اضايقت :هو ع طول الشغل دا واخدك مني
يعني حتي في شهر العسل والمفروض واخد اجازه بتسرح في الشغل بردوا
ادم خدها لحضنه وبيلعب في شعرها :متزعليش مني ي حبيبتي
انا مفيش حاجه تقدر تاخدني منك وانتي عارفه ان حتي في الشغل بفكر فيكي انتي
اميره بعبوس:اه بأماره انك سرحان دلوقتي في الشغل وانت معايا
ادم مكنش عايز يقولها هو بيفكر في اي بتحديد عشان ميقلقهاش وفضل انو يتصرف في الموضوع من غير ما تعرف ابتسم بحنان وقرب من خدها وباسها :غصب عني قولتلك والله ..واوعدك ي ستي من دلوقتي مش هسرح ولا هفكر غير فيكي بس انتي بردوا لازم تدفعي الاجره دي
انا مش هفكر غير فيكي
اميره فهمت قصده وابتسمت بخجل :وانا موافقه ادفع الي انت عايزه
ادم وقف وشالها بمكر:حيث كدا بقاا نبدأ المهمه من دلوقتي ومتقلقيش العداد بيعد وهيقولك الباقي انا بردوا مباخدش اكتر من حقي
اميره ضحكت:هههههههه لا امين اووي ي حبيبي
ادم غمزها وهو داخل البحر :طبعاً ي روحي لازم الامانه في العمل وخصوصاً خصوصاً الاتقان في العمل بقاا
اميره وهي مبتسمه:طب انت رايح فين احنا متفقناش ع كدا
ادم بمكر:انا بقاا بتفق
انتي سيبيلي نفسك خالص وانا هظبطك
دخلوا البحر وهي لسه في حضنه وقريبه منه بيبوسها ويبعد ويقرب ويبعد وبيمرر ايديه بحريه ع جسدها وخصرها وتحت التيشيرت بيفك المايوه وبيرفع التيشيرت
اميره دفنت راسها في عنقه بخجل :ادم... انت بتعمل اي احنا في البحر
ادم بلامبالاه ومكمل مهمته :مش هقولك كتير البحر خاص تبع الشاليه يعني مفيش مخلوق ممكن يشوفك ..خليكي واثقه فيا وعارفه ان قبل مااعمل حاجه ببقا واخد بالي كويس اوي ان حتي لو قطه مستحيل اسمح انها تشوفك
اميره متمسكه بيه بخجل :انا فعلاً واثقه فيك بس مكسوفه اووي وكمان انا مش بعرف اعوم
ادم بيمرر ايديه بخبره وثقه:ماانتي سيبيلي نفسك ومتخافيش
انا الي هعوم وهقود كل حاجه ..انتي الي عليكي تسترخي خالص
اميره ابتسمت وهزت راسها وهي لافه ايديها حوالين رقبته :ماشي ..وانا من ايدك دي لايدك دي
ادم ضحك بقوه وغمزها :هههههههههه. اموت فيك انت ي مطيع
♥️♥️♥️♥️♥️♥️♥️♥️♥️♥️♥️♥️
عدي فتره كبيره مش بيكلمها ومش بيروح الفيلا عندهم من ساعه اخر مره
حست بفراغ كبير في حياتها ونفسها يرجع يكلمها ويقعد معاها
وحشها ضحكته ووحشها صوته وكلامه ..كل حاجه فيه وحشتها
قاعده معاها الشغاله وهي عشان قريبه من سنها فا اصدقاء
الاء اتنهدت بحزن :اعمل اي ي نور انا تعبت اووي
نور :لما انتي بتحبيه كدا ليه زعلتي ان يزيد خطب
الاء :انا يزيد ميهمنيش اصلاً
انا زعلت ع نفسي اني حبيت بني ادم زي دا وكنت قيداله صوابعي العشره شمع وفي الاخر باعني بعد ما دمرني ودمر حياتي ودلوقتي هو عايش حياته عادي دا الي واجعني وخانقني لكن انا حبيت عز بجد
والي خلاني متاكده لما بعد مش قادره اعيش من غيره عكس يزيد لما بعد انا قدرت اكمل حياتي لكن عز انا حس ان حياتي وقفت
عز كان بالنسبالي النور الي في عز الضلمه الي انا عايشه فيها ولما اختفي رجعت لعتمتي تاني دمعت بحزن ووجع. وحشني اووي ي نور اووي
نور خدتها في حضنها بتطبطب عليها وهي زعلانه عشانها بتعتبرها اكتر من اخت عمر الاء ما حسستها انها شغاله عندهم بالعكس كانت اختها التانيه :حاسه بيكي والله ي حبيبتي وكمان انا متاكده انو بيحبك هو بس زعل من اخر مره حس انك لسه فيه مشاعر ناحيه يزيد ودا وجعه وخلاه ينسحب من معركه خسرانه هو شايفها كدا
الاء بعدت عن حضنها وهزت راسها بنفي:لا مش خسرانه والله
انا حبيت عز اووي ..حبيته اكتر من حياتي ..كنت فاكره الاول انو مجرد اخ بالنسبالي بس لا اكتشفت اني بحبه
نور :يبقي تعترفيله ي الاء لو بتحبيه روحيله وقوليله الكلام دا
الاء :انتي شايفه كدا ..خايفه يكسفني
نور :انا متاكده انو مش هيعمل كدا قومي انتي بس ظبطي نفسك والبسي فستان شيك كدا وروحيله الشركه وهاتيله هديه
الاء بتفكير:تفتكري هتعجبه المفاجاه
نور : ي بنتي اي راجل بيحب المفاجات فما بالك بقا بواحد بيحب اصلاً
قومي قومي بس يلا
الاء ضحكت:طب براحه يخربيتك هتوقعيني
نور :ههههههه يلا احنا ورانا شغل كتير دا انا هظبطك
قاموا البنتين خدت الاء شاور مع مساعده نور ليها ولبست فستان