ဧကရာဇ်ဗျူဟာ [Di Wang Gong Lue]

အခန်း - ၃၈ (ဆန်းနန်ကျိုး)

"အင်း၊ အဲ့ဒါကြောင့် ဒီလောက်ပဲယူလာခဲ့တာ။ အိပ်မပျော်ဘဲ ဟိုလှိမ့်ဒီလှိမ့်ဖြစ်နေရင် စိတ်သောကတွေတော့ ပြေစေလောက်တယ်"

"မသောက်ရဘူး၊ နောင်လည်း မသောက်ရဘူး"

"အင်း ရတယ်လေ"

သွမ့်ပိုင်ယွဲ့ ဘာမှ ဆက်မငြင်း။ အစကတည်း
က အရက်သောက်ဖို့အတွက် သူလာခဲ့ခြင်းမဟုတ်။

ချူယွမ်က ထိုသားရေအိတ်ကို ပြန်ချထားလိုက်ကာ-

"ပြောပါ။မင်း ကိစ္စတစ်ခုခု ပြောပြချင်နေတာ ရှိနေတယ်မလား"

"အင်း....ဖန်ရှင်းက ထပ်ပြီး လင်းလာပြန်ပြီ"

သွမ့်ပိုင်ယွဲ့က လေးလေးပင်ပင်နှင့် နှိုင်းဆချင့်ချိန်ပြီးဆိုလာ၏။ ချူယွမ်လည်း အံ့သြသွားကာ -

"ဘာလို့လဲ။ ဖန်ရှင်းက မင်းကို အသိအမှတ်ပြုလိုက်ပြီလား"

"......"

ထိုထူပူကျဲ့အကြောင်း သူ ဆက်မပြောချင်ပါလေ။

"အဲ့ဒီတော့ မကောင်းလို့လား"

"မကောင်းတာတော့မဟုတ်ဘူး၊ ဒါပေမယ့် စိတ်ထဲ မပျော်ဘူးကွာ"

သွမ့်ပိုင်ယွဲ့က ခေါင်းကိုက်စွာနှင့် ဖြစ်သမျှအကြောင်းစုံကို ရှင်းပြလေ၏။

ချူယွမ် - "....."

"ကိုယ် ဒီကိစ္စကို သေချာ စုံစမ်းရမယ်"

ချူယွမ်က စဥ်းစားချင့်ချိန်လိုက်ကာ ပြော၏။

"ဒီလိုဆိုရင်တော့ ငါရော၊ မင်းရဲ့ အဲ့ဒီအမျိုးရောက ချောင်ယာလူမျိုးနဲ့ တွေ့ဆုံဖူးတာချင်း တူလို့ပဲနေမှာပါ"

"သူက ကိုယ်နဲ့ အမျိုးမဟုတ်ဘူးဆိုနေ"

သွမ့်ပိုင်ယွဲ့က ချက်ချင်း ငြင်း၏။ ချူယွမ်က သွမ့်ပိုင်ယွဲ့ရင်ဘတ်အား တစ်ချက်ရိုက်လိုက်ကာ -

"နောက်ကပြောတဲ့စကားကိုပဲ အာရုံစိုက်လေ"

"အင်း၊ အဲ့လိုလည်း ဖြစ်နိင်ပါတယ်"

ထိုသို့တွေးတော့မှ သွမ့်ပိုင်ယွဲ့ စိတ်သက်သာရာရသွားသည်။

ထို့နောက် ချူယွမ်က ဆက်ဆို၏။

"ဒါဆိုရင် ဟိုနေ့က ဆိုက်ဖန်းအန်းပြောတဲ့ ၊ ဖန်ရှင်းကိုလင်းအောင်လုပ်နိုင်တဲ့လူမှန်သမျှ ချောင်ယာမှာသေပြီဆိုတဲ့စကားက နည်းနည်းတော့ ဆက်စပ်မှုရှိလာပြီ......။ သြော်၊ ဟုတ်သားပဲ.....နောက်ကိစ္စတစ်ခုရှိသေးတယ်။ မအိပ်ခင် လူလွှတ်ပြီး ငါစုံစမ်းခိုင်းတော့ ဆန်းနန်ကျိုးကိုအုပ်ချုပ်နေတဲ့မြို့စားနာမည်က ယွီရှူးတဲ့၊ သူက ဒီရာထူးရောက်ဖို့ တစ်ဆင့်ချင်းတက်လှမ်းလာခဲ့တဲ့လူပဲ၊ ဘာမှ ထူးထူးခြားခြား စွမ်းဆောင်ထားတာလည်း ရှိသလို ဘာအပြစ်ကြီးကြီးမားမားမှလည်း လုပ်မထားဖူးဘူး၊ မှတ်တမ်းမှတ်ရာအရတော့ ဘာမှရှာမတွေ့ဘူး"