كرونيك : 💕بنت الحي💕

4⃣0⃣

الحلقة 40
علق عليه التلفون ...و عود طلب نيمرو ساجد باش انفذ تعليمات بدر....
-الو مسيو ساجد..تو خرجت من الاجتماع ...رسيل ظهرت ...كلمت واحد من رجالنا الي مع وسيم و قالي الي هوما في *****...صار وقت انك تاخو حقك...
-........
-تهنى مسيو اي حاجة نقلك....
________________
في جنينة المزرعة متاعو الي في الجبل ...البلاصة الوحيدة الي ما يعرفها حد ...و البلاصة الوحيدة الي انجم يعمل فيها الي احب.. الساق عالساق و الجريدة في ايدو ..متهني و مخو مرتاح...الامور ماشية كيما مخططلها هو ...احب اخليهم ياكلو بعضهم ...من غير ما يدخل و امسخ ايديه...مهد الطريق لساجد و وخر لتالي ...بعثو لموتو بساقيه...و صقر نهايتو تكون على ايد الانتربول الامريكي...و هكا يفضالو الجو و يستحوذ على الشريكتين الزوز و الوتلة و المطاعم ... هاذي هي خطتو الي راسمها في بالو ..و قاعد انفذ فيها بالخطوة بالخطوة...فاق من خيالو على صوت بنتو تنادي و هي داخلة من باب البراني ..تصيح و تعيط فرحانة برجوعها من امريكا بعد ما كملت قرايتها....
-بااابا....
وقف مصدوم ..جيتها مكانتش عالبال...و موش وقتها جملة...هي ما تعرف شي على حياة بوها...راسملها صورة الاب المثالي...يعرفها طيبة و بعيدة كل البعد على الي يعمل فيه هو....كبس روحو...و حل ايديه يستقبل فيها...
-بنتي الغالية...نورت
ترمات في حظنو تبوس و تعنق..
-لباس بابا ...توحشتك توحشتك..
-كان ترى انا قداش توحشتك..و ساجد زادا توحشك..
عوجت فمها و دورت وجهها فادة..
-بابا صلي عالنبي مازلت شادد صحيح...متخلينيش نرجع على ثنيتي...
-سيرين(😹😹) ..تعرف الي انا ساي خذيت قراري و معليك كان انك ترضى...خليتلك فترة كبيرة باش تخمم فيها براحتك...اما تو اكهو..هاك كملت قرايتك...و عملت الي حبيت عليه الكل...تو انت باش تقبل بساجد و في اقرب فرصة باش تعرس بيه...
-يا بابا عيشك ..علاه هكا...ملا استقبال عملتهولي...ندمتني الي روحت...
نفخت على قصتها منرفزة ...كتفت ايديها الزوز..هزت حاوجبها تعبر بيهم على الحالة الي هي فيها....
-شوف بابا و الله كيف يبقى اخر انسان في الدنيا و الله لا نعرس بيه...انت قول الي تحب و انا نعمل الي نحب...تعرفني نحبك و نقدرك... اما انك تربطلي حياتي بواحد كيفو...هوني نقلك سامحني ..معندكش الحق تتدخل فيا ...
نزل على ايدو منرفز...يعرف الي بنتو راسها كاسح و الي تحب عليه توصلو...و بالطريقة هاذي باش تفسد عليه المخطط متاعو...هو ناوي اعرسلها بيه..باش كيف اموت على ايدين صقر ...تورث هي الشركات متاعو...و بما انو هو شريك ساجد...اولي قادر يتحكم في الورث متاع بنتو كامل و يستحوذ على كافة الشركات ....واحد كيفو ساقط و واطي مستعد اضحي بحياة بنتو في سبيل الاموال و السلطة..انسان قد ما ياخو و ما يشبع....جبدت فاليجتها و جات تتعدى داخلة للدار...نڨز وقف قدامها مفجوع...
-وين ماشية!!
-شبيك بابا داخلة للدار...(مستغربة فيه)
-اا...اه...لا لا خلي باش نهبطو للفيلا متاع وسط البلاد..(طبس هز تالفون من فوق الطاولة و مفتاح كرهبتو)
-يا بابا تي انا جاية بالذمة للمزرعة ..نحب نريح راسي فيها...يزيني من الجوجمة و الحس متاع المدينة...
-و انا قتلك باش نمشيو ..و تو تو زادة ....
جبدها من كتفها اكركر فيها وراه..خايف لا تشلق بوجود ام و بو صقر في الدار ...تغزرلو داهشة ...تعبو في خطواتو و هي تتخرطف...مفاهمة شي ..اما حست بحاجة غريبة في داخلها ...حست الي بوها مخبي حاجة عليها ..موش عوايدو يمنعها من وجودها في المزرعة...المزرعة الي تبنات على خاطرها....و تكتبت باسمها......
___________________
قاعدة في وسط امها و بوها تبوس و تعنق فيهم...فرحانة بلمتهم...توحشتهم و توحشت ريحتهم و حديثهم...مصدقت ربي سكتو و قصو عالاسلة متاعهم....ترمات في حضن امها...تملي في صدرها بريحتها...يغزرلها و عينيه تلمع ...فرحان لفرحتها...شايخ على منظرها...كل يوم يكتشف جانب جديد فيها...حنينة و صعيبة ....متمردة و ملتزمة مع اهلها و اماليها...قوية مع الي تكرهم...و ضعيفة مع الي تحبهم....تنوقيزة تالفونو رجتعو من سرحتو و عشقتو فيها...شاف نيمرو الشركة...هزو حطو silenceu و رجعو...موش مستعد باش افسد نهارو بخنار الخدمة...عودو طلبوه مرة اخرى..التلفون يشعل و يطفى و هو مطفيهم و معلبالو بيهم...اهتمامو الكل برسيل و والديها...حظورهم بالنسبة ليه اهم من كل شي ...طلبوه مرة و مرة اخرى...فد و حك خشمو بعصب ...تلفتلو تضحك على وجهو كيفاه منرفز و مقلوب...
-صقر ..هز عليهم بالك حاجة اكيدة..
-موش مهم قلتلهم ليوم عطلة و مانيش خادم...معندهم لواش اكلمو فيا....
-هز ولدي بالك صارت حاجة و لازمك تعرفها (تكلم بو رسيل)
قلقلو براسو بمعنى باهي...عدل كوستيمو و وقف خارج يتكلم في الجنينة...عطى باكتافو للدار ..حط ايدو في جيبو و هز عالتالفون...
-الو...
( )
-الوووو....
( )
-الووو
حد ما جاوبو...علق التلفون و جاء راجع داخل للدار....عود التلفون نوقز....هز و العصب اهز فيه و ينفض...
-oui ...نلعبو ولينا ...شكيب تكلم حل فمك لواه طالبني...
-........
-انا قلتلكم ليوم موش جاي ...لواش مكلمني باش تعود تسالني..عود اطلبني و شوف شنعملك .....
علق عليه التليفون و دار راجع للدار...طيرولو طرف الجو الي كان عاملو...حل الباب و دخل ...واقف مشلول الحركة مصدوم مالي يرى فيه....ام رسيل و بوها مكتفين و طايحين في القاعة ...فمهم مغموم و هوما يرعشو ...ام رسيل دموعها شلال...دور راسو الوج عليها قلبو تقبض و تعصر...نڨز فكلو من على فمو...صاح بالقوي ..
-صقر...خطفوها...جاو رجال هزوها...بنتي يا صقر .بنتي خطفوها ...