كرونيك : 💕بنت الحي💕

2⃣9⃣

الحلقة 29
علق التلفون ...كمل لبس دبشو كيما جاء ....خطف مفتاح كرهبتو و خرج يزرب ماشي للشركة متاع ساجد .....
______________
تحس في راسها رزين ...حاجة غامتلها على فمها...بدنها مكبوس و حاجة رابطتلها ايديها...الهواء ضعيف..تحس بروحها موجودة في بلاصة ضيقة....حلت عينيها بالشوية ..الدنيا ضلام و مشافت شي ...مكنها الرعب ...اخر حاجة تتفكرها هي خروجها من الوتيل و راجل ضايع وقفها يسأل فيها...تركزت الكرهبة ..تهزت و تنفضت مع ركزتها...تضرب راسها في السقف...عرفت روحها موجودة في مان متاع كرهبة...زادت تركزت مرة اخرى و المرة هاذي مشات و جات عالشيرتين....سمعت حس كرتوش ....حس كراهب شدو فران قوي...تفجعت و دموعها فيسع هبطو ...تحل المان ..جهرها الضو في عينيها...غمضتهم ...طبس عليها هزها في حملتو..ترعش بين ايديه ميتة بالخوف...تكلم بصوت حنين اطمن فيها...
-متخافش بعثني صقر ليك...
داخل للشركة العصب اهز فيه و ينفض...يتحلف في ساجد و يتوعد..دز باب بيروه...جبد الفرد من جنبو عمرّو و حطو مقابل وجهو..وقف من فوق الكرسي ..
تبسيمة ساخرة على وجهو...هز ايديه اصفقلو..
-براافو العاشق الولهان قدر ينقذ حبيبتو من ايدين الشرير الروسي ههه
-سااااجد ..متجهلنيش..
قدملو بخطوات سريعة ....خطفو من رقبتو و حط الفرد في راسو..
-قول لنسيبك العزيز ...اخمم مرتين قبل ما يحط ايدو على والديا..تعرف علاه؟؟
-علاه تراه!! (يتكلم بدم بارد)
-خاطر بنتو باش تترمل قبل حتى ما تعرس..
تكيس و وجههو زراق و قبل ما يلحق يتكلم جاتو كرتوشة في ساقيه الزوز..ضربو و فيسع ما رجع الفرد حطو في فمو....
-شششش تخرج صوت نقتلك...انشاء الله اكون ميساجي وصل...نحالو الفرد من فمو...دزو بالقوي لطخو عالقاعة ...صاح بالقوي يتلوى من الوجيعة....جبد papier مسح بيها الفرد ...رجعو لبلاصتو و دار خارج ...
-و ..الله ما ندمك يا صقر و رسيل كان نجمت تنقذها المرة هاذي ..نوعدك المرة جاية يوصلك راسها في شكارة...(تكلم و وهو يرعش بالوجيعة)
ضحك ضحكة قوية ودارلو...
-كان تقول بروحك راجل...مس منها شعرة و شوف أنا شنعملك....
قالو هالكلمتين بكل عناد و خرج...
_________________
لامة ايدها على جنابها ...شادة الكرسي و مطبسة راسها.... ساكتة كان النفس طالع هابط...غارقة في افكارها ...الف سؤال ادور في مخها...موش فاهمة شكون الي خطفها...و موش عارفة الشخص الي بجنبها شكون...متجرأتش انها تنطق و تسألو خايفة لا تكون عملتها عندها دور في الي صار...لكنها بطريقة ما هي حاسة بالامان معاه بكل بساطة خاطر نقذها و قالها صقر بعثني ليك.....نوقز تالفونو...هزو و تكلم...
-oui صقر
-......
-اي معايا تهنى...
-........
-علاه؟؟؟ انا كنت ماشي بيها لداري!!!
-......
-مثبت !!
-......
-باهي خويا انت ادرى...
هزت راسها تغزرلو لاول مرة ...عينيها تلمع ملهوفة تحب تعرف صقر شنو قال و شنو ااي صار بعد ما خبّرت الحاكم عليهم.....
-شقالك؟؟(قالتها بصوت ضعيف خايفة)
شد فران قوي ...عمل demi-toure و بدّل الثنية من غير ما يجاوبها...غزرتلو مرعوبة ...بلعت ريقها و كبست على ايديها...
-جاوبني صقر شقالك ؟؟ و انت شكون منين تعرفو؟؟؟
-رسيل تجم تسكت ...منحبش الحديث برشا...و تهنى متخافش مني انا خو صقر الصغير...باش نوصلك لبلاصة و من غادي باش ايجي اهزك هو...
هزت حاجبها مستغربة ...قلبها تقبض و حست بحاجة غمت عليها....ماهيش متفألة للي جاي...رجعت تكات راسها عالكرسي ...عينيها القدام تتأمل في الطريق...شبكت ايدها و سرحت لبعيد في افكارها .............
سندت روحها و قامت...شافت اسم امها تطلب فيها عالتلفون ...مسحت دموعها...هزت و تكلمت بصوت مبحاح غالبتو الغصة...
-امي...لباس
-......
حمحمت تسرح في صوتها...تضيع في امها...
-احمم ...حتى شي امي كنت راقدة..اكا علاه صوتي هكا...
-......
- امي و الله لا ...قتلك كنت راقدة ...
-...............
-صاحبتي !!!! اما صاحبتي ..وقتاش هاذا ؟؟؟
-..........
- اه....ااا.. اي اي امي نعرفها عن طريق صاحبتي وحدة زوالية ... مسكينة تعاركت مع دارهم ياخي خرجوها ...كلمتني صاحبتي و طلبت مني نخليها عندي ...وليت عطيتها عنوانا و قلتلها تمشي تعدي ايامات عندكم هاطر ماك تعرف انا هوني نخدم..((تحكي و داخلة بعضها مفجوعة مالي سمعتو ))...
-.....
-باهي امي باهي نخليك تو لازمني نعلك عندي خدمة تستنى فيا....
علقت على امها من غير متخليها تكمل تحكي ...ضربت جبينها بكف ايدها...نزلت على سنانها مغزلة...طيشت التلفون حلت الدريسنغ خطفت اول حاجة عرضتها لبستها و خرجت راسها اعلى من ساقيها ماشية للصونتر متاع هزار.....اول ما خرجت تبعوها رجالو ...سبقها واحد فيهم و حللها باب الكرهبة الي محطوطة على ذمتها..وقفت مكتفة ايديها ...
-هات المفتاح ماشية وحدي ..منحب حد ارفقني
-مدام الاوامر تقول باش نلازموك كيف ظلك..منجمش مخليك تمشي وحدك...
نفخت بعصب ..معندهاش الوقت باش تناقش ..حياة امها و بوها في خطر ...و لازمها توصل لهزار فيسع....ركبت معاهم ...لحظات و كانت قدام الصونتار جاو الرجال يدخلو معاها...مخلاتهموش...هبطت تجري ...دخلت تصيح و تنادي
لهزار...بدنها لكلو اخض مفجوعة و في نفس الوقت خايفة...خرجتلها من البيرو متاعها...رامية صبعها على فمها تسكت فيها..
-ششش ...متخافش ايجا نفهمك..