كرونيك : 💕بنت الحي💕

1⃣1⃣

لحلقة 11:
خارجة هي و ياه من الحومة الجنب لجنب..العباد لكل مركزة معاهم..الي اطل من الشباك تنسنس و الي حلت باب الدار و خرجت تغزرلهم..التشويش كثر ..و هو بدا افد ..ميحبش حتى مخلوق يحكي عليها..حس روحو غلط لبارح كيف قال راهي تابعتني..تو الكل باش اهزوها في الفام..لكن ما يسكتهم كان هو..وقف في وسط الحي..وقفت معاه تغزرلو مستغربة...شدلها ايدها و قربها ليه..تكلم بصوت عالي فجع بيهم الناس الكل..
-ردو بالكم توصلني كلمة هكا و لا هكا عليها...و لا حتى انكم تخممو بينكم و بين روحكم تحكيو عليها...قسمنا بالله نحرق الحومة بالي فيها الكل..تعرفوني مصعصع و نعملها..
في لحظة البيبان الكل تسكرت ..الشارع الي كان يغلي بحسهم ..ولا خلا و قفار..ضحك على جنب بكلمة منو اصير كان الي احب عليه...تلفتلها شافها كيفاه تغزرلو ضايعة فيه..طبس شوية..و وشوشلها بصوت حنين ..
- محلاك بالروج..
شهقت و دارت دورة صغيرة على روحها..فرحانة بكلامو كالصغار ..
-عجبتك الروب..
-برررشا..اما نقلك شنو الي عجبني اكثر ..
-امم قول ..قول (تحكي ملهوفة و تغزرلو في عينيه )
-الجاكات الدجين الي ساترة روحك بيها...علاش موش مالاول هكا؟؟ لازم تخليني نعيط عليك..
-باهي سامحني..
حط صبعو على فمها ..
-شش مبقاش تقول سامحني ..نحبك صنديدة و قوية كيفي ..
لمعت عينيها..
-صقر تعلمني المصارعة ؟؟
-لا عاد موش لهالدرجة اا قزمة..
-امان.. امانك..عيشك ربي فضلك ..بربي صقر ..
-باهي باهي اس..
-عيشك ..عيشك ...هيا نمشيو تو ..مبقاش بكري لازمنا نقضيو و نروحو قبل القايلة..
دارت و جات ماشية ..جبدها من ايدها دورها ليه..تنهد و تكلم..
-شوف رسيل..انا منعرش نقول لاكم المعسول و الرويق الزايدة متاع ولاد تو ..اما انا الي نعرفو اني باش نحافظ عليك و نحميك ..(جبد السلسة من جيبو لبسهالها)..رسيل انت من اليوم قطعة مني ..عمري لا نوصل نضرك و لا نخلني شكون يقربلك..
-صقر..
-نعم!!
-نحبك
قالتها بصوت حنين ..قطع عليه النفس..زعزعلو كيانو الكل..تبسلمها ابتسامة ساحرة خذاتلها عقلها..تحرك كمل طريقو و جبدها معاه..ماشين الايد في الايد..شاف تاكسي خارج من الحي..زفرلو و طلعو فيه...
الحلقة 12:
تعداو شهرين على بداية علاقتهم ..الناس الكل عرفت بالي هوما coupel ...ولات وين تخرج مالدار لكهم اسلمو و ابشبشو بيها..مقامها ولا من مقامو...عايلاتهم الزوز في بالهم و فرحانين بيهم..و بما انو الدار بجنب الدار..الزوز ولاو يتعشاو و يفطرو ما بعضهم...سالمة و حياة ميعدوش نهار ما غير ما يتقابلو في دار وحدة منهم...بوها و بوه كيف كيف رماو الصحبة على بعضهم...و كيف يتلاقو يجبدوها صحري بحري...صقر فرحان بخدمتو ..ملتزم فيها و اومورو ماشية كيما حب هو..ارتاح لنورهان (امو الحقانية) ..و تفاهم معاها..كانت تعامل فيه بطريقة متميزة على غيرو ..ساعات يستغرب فيها..لكنها فيسع ما تضيعو كيف تقولو راك تفكرني بواحد عزيز عليا...حبّو لرسيل قاعد كل يوم ازيد ...اخاف عليها حتى من النسمة ..مارجها و خانقها بالحزارة و الغيرة متاعو...تمشي بالوقت و تجي بالوقت ..و متخرج من الدار كان ما تتعدى على الردار ...حرّم عليها انواع المكياج الكل...حتى من قرايتها اوصلها هو و ايجيبها هو ...علمها البوكس و ولات مضاربية كيفو...و هذا بالطبيعة بعد مشاور بوها عالحكاية.....
قاعدة في بيتها تمنكر في صوابعها ..قالقة و فادة ..سمعت صوت امها تناديلها...
-رسيل ..رسيل..
-نعم امي ..
-اهبط وصّل هالفيم السخون لدار امك حياة ...
نڨزت جات واقفة..هبطت تجري ساقيها اعلى من راسها..خطفت الصحن من عند امها و طارت عجاجة لدار صقر...دق في الباب ملهوفة ..متوحشتو عالاخر ..عندها نهارين ماشافتوش ..كان غاطس في الخدمة ..يخرج بكري و اروح امّخر..صوتو في التالفون مكفهاش..لازمها تشبع من عينيه و من ريحتو الي تعشقها...
-مرحبا... مرحبا بكنتي السمحة..
هبطت راسها حاشمة..
-عسلامة امي حياة..امي بعثتلك هذا ..
-عيشلي بنيتي يا ربي ..ادخل ..ادخل ..عمك مصطفى يسأل و اعود عليك...
دخلت تتخرطف ..وجها احمر طمطومة...هزت راسها و تلوج بعينيها عليه..ضحكت عليها ..قربتلها توشوش..
-راقد في بيتو ..ليوم يخدم بالعشية..برا اطلعلو ..
-اه ..لا امي حياة منيش نلوج عليه..كنت نلوج على عم مصطفى..
-ههه اي اي بنيتي نفهم فيك ..برا اطلع شوفو قبل... عمك مصطفى موش هارب عليك ..
قالتلها هكا و درات دخلت للكوجينة...ستناتها بعدت عليها و تنطرت كالفوشيكة طالعة لبيتو....