كرونيك : 💕بنت الحي💕

تابع2⃣

خارجة من الدار تتأفأف ...تتعارك هي و حفر الزنقة..تعثرت بالطالون الف عثرة..لابسة روب ruyeé في الnoir و الblanc ..ساك في jaune على كتفها..و لينات كونتر سولي في ايدها...
-افف يا ربي ..هالبلاصة الكلبة ...بدينا من اول نهار..
هاذي هي "رسيل" بنت ال20 سنة طفلة دلولة و شقنوسة...الي تطلبو ايجي لايديها ...متكبرة وخشمها ديما لفوق ...الي اجي في فمها تقولو..متوزنش كلامها قبل ما تحكي..تجرح الناس و نورماال عندها...هزت راسها تقلّب في الحي موش عاجبها حتى طرف ..و كيفاش يعجبها و هي مولودة في فمها مغرفة ذهب...لكن كيما اقولو الدنيا مرة فوق و مرة لوطة...غمضت عينها و حلتها ..لقات روحها بعدت على العز الي عاشت فيه...لمحت بوها في طرف الزنقة ...واقف هو و راجل طويل و عريض ..وجهو ما يتفسرش ..حستو مغصور و داخل بعضو... و اول ما شافت الراجل حط ايدو على كتف بوها طبطبلو.. دار ماشي و خلاه ..تهزت و تنفضت ...ديراكت هزها مخها الي هو اهدد فيه...ماشي و مهبط راسو حاشم من بوه ..ماذابيه ميعملش المشاكل قدامو..هو موش ناقص هم على هم..بوه راجل مريض و ملازموش اقوم من الفرش ..لكن في جرت الطيش متاعو ..قاعد من زنقة لزنقة الوج عليه...زربت خطواتها شقت عليه طريقو ..هبطت عليه كالقضاء المستعجل ..راسو مزال في القاعة ..عينيه تفكسات على الساقين البيض الي قدامو...ريحة برفانها رهوجتو..هز راسو بالشوية...طفلة صغيرة و شبابة..عينيها خضر مايلين للاصفر..شعرها مارون طويل محطوط على جنب..ركز مع كل تفصيل وجهها.. في لحظة فلاها فليان..جبدتلو انتباهو بوسة خال صغرونة فوق شفايفها..تبسم ما غير ما يشعر ....فاق على وضعو مع صوت صياحها ..و صبعها الي دز بيه في كتفو ..
-اسمع يا شسمك...شنو تستخايل روحك باش تحكي مع بابا...هبلت ..ناسي روحك ..تتهدد على الي اكبر منك يا هامل..
نحات صبعها من كتفو و وجهتو في وجهو ..كملت كلامها و هي تهدد فيه ..
- رد بالك نشوفك ادور بابا مرة اخرى واااضح...
خلاتو واقف و مشات و هي باقي تصيح و تحكي وحدها..
-ملا حومة كلبة..امارك و خمّاج بفف مستواايات..
واقف مصدوم...لا نجم ينطق و لا يتحرك..اعود في كلامها بينو و بين روحو..موش مصدق الي سمعو...كبس على ايديه اكنترولي في روحو ..تلفت يغزرلها...واقفة هي و الراجل الي عاونو....نفخ بعصب ..كان جاء طفل راهو كلاه بسنيه..
-بصحتك ..جيت طفلة ..
قالها و دار ماشي لبوه....