كرونيك : 💕بنت الحي💕

5⃣

الحلقة 5:
طلع الصباح ..نهار جديد و روح جديدة..تنطر من الفرش ناشط..لبس شلاكتو و خرج يجري في شرط اكهو...تعدا من قدامو امو ...
-صباح الفل حبّي (قالها من غير حتى ما ياقف)
-صقر ...يا صقر ..
ملحقش باش يسمعها..يزرب في خطواتو ماشي لرشيد الحوانتي ...دخل يلهث للحانوت..ركز ايديه عالكنتوار ..و قعد ياخو في النفس الي تقطع بالجري متاعو...
-صقر يا وليدي ..شبيك تجري...
هز راسو يضحك ...
-رشيد يا غالي ..اي هات هات ..شنية للخدمة الي دبرتهالي...
-احشم اا طفل هكا تقلي رشيد حاف...
-يا عم رشيد كان مجيتش نحبك و نعزك ما نحكيش معاك هكا..(جبدلو راسو و باسو من جبينو) سامحني يا سيدي باهيشي هكا...
-باهي باهي ..اسمعني وليدي ..عندي وحدة حبيبتي لابس بيها عالاخر ..متعرفش طرف خلاها وين..كلمتني هالايامات و قتلي تستحق شكون ثڨة و بديّن ..اكون معاها و يلازمها كيف ظلها ما يفارقها كان وقت النوم ..يعني بلغة اخرا تحب على بوديڨارد ....
هز صبع و حك خشمو..طلع حاجبو و عوج فمو ...
- وانت منين تعرف عباد لاباس عليها عم رشيد ؟؟
-اييه يا وليدي ..انا مكنتش نعرفها هي ...كان عندي واحد حبيبي برشا يخدم شوفار عند بو المرا هاذي ..و اوكا ساعات كيف كان اغيب ..كنت نعوضو انا ..وهكا بقيت متواصل معاها لتو ...
-باهي ..و الشهرية باهية ؟؟
-تهنى معاها باش تشوف العز..اما ..
-اما شنو؟؟
- ملازم حد يعرف الي انت تخدم عندها..حتى مصطفى و حياة متقلهومش..
-وعلاه ؟؟ عم رشيد كان لحكاية فيها هكا و لا هكا ماحشتيش ..مانيش ناقص مشاكل ..
-لا وراس ولدي لا...اما المرا واصلة في البلاد و عندها برشا اعداء ..تخاف على روحها و على رجالها زادا ...
واقفة وراه بالضبط ..حالة فمها تغزرل لظهرو ..كتافو عراض ..الوشم الي على ايدو زايد فيه الشطر..الشرط طايح شوية ..عظام حزامو ظاهرين و مكبوسين..بلعت ريقها ..كان مغطي عليها بجهامتو ..لدرجة انو مشافوهاش حتى كيف دخلت ...هوما يتكلمو و هي ما تسمع في شي ..مركزة كان مع بدنو....هز ايدو عداها على شعرو اخمم يقبل و لا ...ظهرت شوية من وراه..شافها رشيد ..
-تفضل بنتي ..شنو تستحق..
مزالت سارحة فيه و مشلقتش بالراجل اكلم فيها...تلفت وراه ..غزرلها كيفاه لابسة شرط قصير في البلون و خلعة x روز في الروز..عض شفتو بغزول ..حمم و تكلم موجه كلامو لرشيد و هو يغزرلها
- عم رشيد تفاهمنا غدوة نصّبح ..اما بربي قلها لقصير و العرا لا ..
حلت عينيها على وسعهم ..كلامو فيقها من سرحتها ..وجهها فيسع حمار بالحشمة...ڨحرلها على جنب ..هبطت راسها مربوثة..خرج و مع خرجتو خرجت هي ساقيها اعلى من راسها راجعة لدارهم من غير حتى ما تقضي ...و خلاو رشيد كالبهلول مفاهم شي...
خرجت وراه و تعدات قدامو كالفوشيكة تجري ..هز راسو يتفرج فيها كيفاه تجري و تتخرطف ..فد و غزل عليها..مفهمش علاش ..اما لبستها القصيرة و العريانة متعجبوش جملة
..لدرجة انو كان يلقى اشد ادقها بطريحة عليها.
..دخلت لدارهم عروقاتها شرتلة ..و ريقها شايح من الجري..تكات عالباب ترجع في النفس ...سمعت حس الباب تحل بالقوي و تلطخ خرجت تجري من الكوجينة ..وفقت تغزرلها مستغربة...
-وووه بنيتي بعثتك تقضي و لا تسابق..شبي لونك مخطوف ياخي ؟؟
-اه ..لا ..امي شي just فجعني كلب (تحكي و داخلة بعضها)
-يعني مجبتش الخبز ..
-لا امي ما جبتش ..
-الي اعمل عليك ابات متعشي يا رسيل..(قربت منها و دزتها من قدام الباب ) بعد خلي نرى واحد من الصغار نبعثو ..
حلت الباب و اول واحد جاء في وجهها هو صقر...
حشمت عالاول باش تقلو و بعد ولات و ناداتلو..
-بربي عيش ولدي لحظة..
هز راسو غزرلها..تلفت ايمين و ايسار ..ملقى حد عرفها تحكي عليه..قدملها خطوة لباب الدار ..
-نعم !!
-يسترك تجمشي تقضيلي من الحانوت ..بعثت بنتي لكنها خافت من كلب رجعت من غير ما تقضي ..
-اميي (صاحت من وراها)
طلع حاجب و هبط لاخر..كلب ؟؟ ..هكا قال بينو و بين روحو..ضحك على جنب
-ادلل يا ليلا ..شنو نجيبلك..
-زوز خبزات كهو..
هبطت راسها تحل في السطوش باش تمدلو لفلوس..و على هزتو لقاتو dja مشا و خلاها ...تبسمت و تلفتت لبنتها..
- و الله هالطفل برسمي رجّال ..مكذبوش نساء الحي ..
-و انت امي فيسع عملت صحبة معاهم نساء الحي..ياخي كارنا من كارهم..
-يا فتاح يا رزاق ..ايا اسكت عليا هالصباح..خليني ندخل نكمل نحظر الطاولة وانت اقف في الباب استنى الطفل..
امها قالتلها هكا و هي نڨزت من غير ما تشعر وقفت قدام الدار جملة..عينيها على اخر النهج ..تستنى فيه يخرج من الحانوت...موش فاهمة روحها علاه ملهوفة على شوفتو و في نفس تخاف منو و ما تحملوش..لمحتو كيف خرج من الحانوت ...و مع خرجتو كل شي ولا يتحرك بالrolanti ..قلبها طاح و طاح..لين حستو وصل سابع ارض...ايديها عرقت..بدنها خض بكلو ..تبع في مشيتو بالتدقيق..راسو الفوق و عينيه تلمع من بعيد..قطرات عرق هابطة على صدرو من سخانة الطقس...بلعت ريقها ...داخت فيه و مشلقتش حتىى بالطفل يتبولد عليها من الجهة المقابلة لدارهم...ترى فيه يقرب و قد ما يقرب قلبها ازيد يتقبض ..تبعتو بعينيها لين وصل قدامها.. جبدلها ايديها حطلها الخبز ..و دار ديراكت ماشي للطفل.