كرونيك : 💕بنت الحي💕

1⃣4⃣

الحلقة 14:
راقد في غطاية النوم..مهدود و تاعب ...شوية من الخدمة و شوية من سهرانو لوقت مخر في جرت تخرنين مرتو..مالي تتوحم و هي عاملة فيه..متخليه يرقد بجنبها كان ما يدوش مرتين و ثلاثة...سمعت حس الباب ادق بالقوي ..حلت عينيها مفجوعة ...جات تقوم منجمتش ...ثقلت و ولات تتحرك بالسيف...دارت تفيق فيه....
-وليد ...وليد..
-ممم ..
-تي فيق..اسمع الباب ادق..
-تي سيبني ميساء ...ميت نوم راني حرام عليك..
-يا وليد فيق يهديك ..درا شنو صاير في الحي..اسمع صوت التصفير متاع لولاد..
حل عينيه بالقوي..بقى يتصصد في الحس..التصفيرات الي سمعهم هوما اشارات يعملوهم ولاد الحي لبعضهم كدليل على وجود حكاية خطيرة في الحي..الباب زاد قوى دقانو ...نڨز يجرى هابط اشوف شفمة..حل الباب مفجوع..
-وليد..وليد (يحكي و يلهث)
-حمى شفمة؟؟ شصاير..
-رسيل..اجري..القوة العامة و وكيل الجمهورية الوج عليها...
-اه ..شفمة شعملت زادا..و وين هي تو ..؟؟
-في الخربة ..بعثتلها الخبر و حيت نقلك..
-رسيييل
صاحت ميساء من وراه و هي تبكي و ترعش..رجعلها احمل فيها..
-ميساء متخافش عزيزتي..سكر الباب و متحل لحد ...هاني تو نرجع
-وليد ..ما ترجع كان برسيل .
-باهي هدي روحك...
قالها هكا و خرج في سروال اكهو ...يجري ساقيه اعلى من راسو ...لا هامو في برد و لا في المطر ..همو الوحيد عشيرتو الي في خطر....
______
صوت عياطهم يتسمع من طرف الدنيا...الناس لكل تصيح..لكلهم اشجعو و ازفرو...ما تسمع كان اسم برك...
-رسيل...رسيل..رسيل..
واقفة في وسط الحلبة..لابسة سروال دجين نوار..و معاه خلعة بيضاء من فوق...بدنها يغلي و افور..رغم الي الدنيا برد و المطر تصب..حكت خشمها بصبعها...لفت ايديها بالبونداج..تفلت علارض (حاشكم) ..واقف قدامها يرعش ..تحداها و ندم...تبسمتلو بخبث ..هزت صبعها و عملتلو اشارة بيه..
-وريني شعندك (قالتها باستهزاء)
قدملها خطوة خايف..و اول ما هو تحرك نڨزت عليه..خطفتو من رقبتو و بركتو في القاعة..طلعت فوقو ..و طاحت تضرب فيه بكل غل
-هاذي خاطر تحديتني ...(ضربتو بونية على وجهو)...و هاذي خاطر دخلت لحومتي و مشاورتنيش...(ضربتو على فمو)...و هاذي خاطرك بزنست بنت حومتي ..
قتلتلو بالضرب ...باركة فوقو تضرب و تسب فيه..و في لحظة لقات روحها بين فضاء و هوا..دورت راسها تفارع تحب تغزر للي هاززها على كتفو...حلت عينيها على وسعهم وقت شافت الحاكم معبي البلاصة...عضت شفايفها بغزول..و تمتت بالشوية
- نعبو الزهر..و الله وحصلت اا رسيل.
يجري مفاهم شي..قد ما يقرب للخربة قد ما يتفجع من منظر الحاكم الي معبي البلاصة...مدرعات و كراهب انواع و اشكال...وقف مصدوم..يرى في واحد من الاعوان هاززها على كتفو و خارج بيها ..نفخ بعصب ..شعملت رسيل باش وكيل الجمهورية بيدو اهد عليها؟؟...عدى ايدو على شعرو ...تبل في المطر و ولا كالفلوس...قدم بخطوات راكزة ميحبش يعمل مشاكل مع الحاكم خاصة و انو ولا بو عايلة..و هي تفارع و تسب..صاح بالقوي ..
-رسيييل..
سمعت حس عياطو.. تلفتلو تضحك ..
-وليد يظهرلي غلڨت ههه
صاح عليها العون ..ڨحرتلو على جنب ..طبست راسها تغزر للعون الي هاززها..
-عشيري عندي ساقين نمشي بيهم ..تجم تهبطني راهو..
-سكر ...فمك..
صوت جاء من بعيد ..هزت راسها تلوج..شافتو واقف قدام كرهبة عالية كحلة..بلارها فيمي و عليها علم تونس من قدام..راجل طول و عرض و ارتفاع..لابس في الاكحل..منظرو برك يفجع ..الواضح من هيأتو انو حارس شخصي ..حل الباب الكرهبة و عطى اشارة للعون باش اركبها في الكرهبة ..دورت راسها فيسع لوليد..
-وليد ..امي و بابا في أمانتك ..متخافش ماني عاملة شي..نوصل معاهم نفضها و نروح...
ركبولها المينوت في ايديها..ركبوها في الكرهبة و طارو بيها...
-مرحبا رسيل..سامحنا قصيناك على العركة متاعك
تعزرلو مصدومة...موش مصدقة الي وكيل الجمهورية بايدو قاعد بجنبها...تبسمت على جنب ..وخرت روحها تكات لتالي..
-منتصورش روحي عاملة حاجة قوية ..تخلي وكيل الجمهورية بايدو ايجي يعتقلني..
هز حاجبو و عوج فمو..
-ممم ذكية تبارك الله..
-اكيييد ..ايواه فاش نجم نعاونك سيادة الوكيل..
ضحك ضحكة خفيفة...
-خلينا نوصل للبيرو متاعي و بعد للحديث بقية...
-واضح ...اما تعمل مزية نحيلي المينوت..
مد ايدو للحارس الشخصي متاعو خذا منو المفتاح و حللها المينوت..
-Merci (قالتها و هي تتبسم)
غزرلها حاير ..
-رسيل ..تنجم تقلي ..بنية كيفك ..قارية و متثقفة..و فوق هذا تبارك الله شبابة..شتعمل في بلاصة كيف هاكي الخربة..
-ههه كيما شفت ..نترانا..
- تترانا ؟؟ تترانا عالعباد ؟؟ علباك الي تعمل فيه موش قانوني ؟؟
-oui ..في بالي
ضحك بالقوي ...هز راسو يغزر للشوفر متاعو كيفاه حالل فمو و داهش في جرأتها...ستوا روحو و حمحم
- عجبتني..شجاعة و متسكتش بكلمتك...مغلطتش كيف اخترتك ..
غزرتلو مستغربة..
-نعم!!
-نوصلو للبيرو و نفهمك على كل شي...