مشاعر خارج دائره الصمت
البارت 52
ايسر:اااه عرفت اني من كتلي ظل كاعد عالمود هالموضوع ايهم مااخفي عليك وداعت ابني حاب اتشافة وارجع عبالك عاجبني وضعي هيج متدمر اني بس اخاااف من المجهول
ايهم:وشنو يعني نحاول مرة وثنين وعشرة
ايسر:مو من العملية ايهم خايف اتأمل واأملكم تالي تخيب الظنون وتفشل العملية خايف رغد باقية وياية على هالامل وتالي من تفقدة تروح لو تتغير خايف اخسرهة اني نفسي ما مصارحهة بهالخوف بس ماادري ليش هسة جاي احجيلك يمكن لان تعبت هواي شايل هالحمل وحدي
ايهم:لك ايسر من صدك تحجي انتة تتوقع مرتك من هالنوع لو من هالنوع جان ماااتحملتك الفترة الفاتت انتة تدري شكد تعبتهة وكل هذا وماتخلت عنك ولاانطت بيك لو شما تسوي جانت تكوللنا لو حاولنة نهدئهة يمووون ابو حمودي فترة وتعدي
ايسر:اني ماالكة مثلهة لذلك خايف اخسرهة والله ومقدر شكد تعبتهة وكاره روحي بس اني هم تعبااان ومااعرف شتصرف
ايهم:طاوعني بس كول اي وريحنة وريح روحك حتى عالاقل تحس سويت العليك وبقت يم ربك ليش تظل بخوف وندم
ايسر:ماادري ماادري
ايهم:فكر يخوية فكر براحتك بس بغلاة ابنك لا تكول لا يلا خلي ادخلك جوة
ايسر:دخلني ايهم وساعدني اتمدد اباوعلة والله ابتلة بية حتى دوامة صارلة فترة مرتبة باجازة بدون راتب ،راح ايهم وبقيت سهران افكر اتخبط بين الي لازم يصير وبين الي اخاف منة ميصير نمت من التعب والتفكير بس فرحة ابني ورغد تسوة الدنيا
رغد:بقيت يومين بالمستشفى لان جان نبضي متخربط انتضم واتطمنت علية الدكتورة اني واحمد وطلعونة سوة جنت خايفة لاتكلي اطلعي انتي وهو يبقة بس الحمدلله صحتة زينةومايحتاج يبقة اجة ايهم اخذنة وطول الطريق افكر بايسر وردة فعلة وفعلي مااكلكم نسيت السواه لان تعبني وجان ممكن اخسر ابني بسببة بس مكان صغيررون بعقلي دائما يكمز باعذار تخليني اعبرلة مواقف يسويهة ماادري لو شفتة من الراح يغلب عقلي لو كلبي وصلنة للبيت ونزلتني الحجية وريام الي اجتي وياية الصبح باركتلي وطلعت ويانة نزلت وابني شايلتة ريام كدامي فدوة هاي اول دخلتة للبيت ياربي دخلة خير اتلكونة بيت سعد جايين واتفاجأت باطفال حلوين غريب شكلهم وشاب وياهم سلم علية واتحمدلي السلامة رديت مثل الثولة ومااعرفة منوكالت ريام اقدملج اخوية احمد عرفتة هو هذا اخوهم المسافر وجان جاي عالمود ايسر لان بوقت الحادث جان عندة سفرة عمل بغير الدولة العايش بيهة فما سمحولة يجي وهو اساسا حتة كلهة شغل يتصل ٥ دقايق ويقفل دخلت وعيونة تلكتني جان منتظرنة بباب الصالة كل غضبي راح من شفت ابتسامتة الافتقدتهة صار كوومة فتح ايدة واخذ احمد باوعلي وكالي شكرررا وسكت لان كلهة اجتي تبارك البنات وزوجة احمد جان شكلهة لطيف دخلت للغرفة اتفاجأت بشكلهة
ريام:عجبتج
