مشاعر خارج دائرة الصمت

البارت ١٥

رغد:اباوع لخوتهم وشقاهم حلوين الله يحفظهم ويخليهم حسن علاقتة حلوة بامة وخواتة بس عهود وامهة ماارتاحنلي واني بادلتهن الشعور😁الي افتهمتة انه حسن وعهود بين الاهل حجاية انه لبعض بس من الواضح حسن ما طايقهة هي طالبة سادس اعدادي هي وايناس نفس العمر وحسن طالب مرحلة ثانية كلية يداوم ببغداد قسم داخلي بس صدفت انه عطلة كليتهم فنازل لاهلة وعهود عندهة اخو اكبر منهة ومن حسن بعمر اخت حسن الجبيرة اسماء وطبعا هاية متزوجة ابن عمهة وساكنة قريب بس ما التقيتهة اليوم متخرج وموظف بشركة مال نفط بالجنوب
سعاد:اكول انتي شكد عمرج

رغد: اشرتلهة ٢٣

سعاد:اهووو نسيت ماتحجين هسة الي خلك افتهم عالخرسان انوب

ايناس:شبيج خالة ترة ما يحتاجلهة فهم تكلج ٢٣

سعاد: شقصدج ياعوبة ماافتهم

زهرة:ايناس عيب احترمي

سعاد:شفتي طول عمري اكلج منطية لبناتج مجال ماتسمعين

رغد:اعوذ بالله من نفسية سعاد حتى اختهة متسلم من لسانهة اكيد لعد عهود طالعة على امهة ،استاذنتهم ودخلت للغرفة الكالت عمة ام زهرة حضرتهة الي جانت غرفة بسيطة متكونة من سرير وكنتور ابو بابين وميز مراية كالو خاليهة لسماء لو تجي او اخت عهود بس ذيج متزوجة بعيد اسمهة اميرة يعني بين قوسين للضيوف مدري افرح لان حاسبيني مثل بناتهم مدري اضوج لان اني ضيف لازم يمشي ولو ماناوية اطول عندهم لحدما الكالي شغلة واعتمد على نفسي واعيش ،دخلت مددت ومن التعب غفيت ما حسيت الا للعصر متأخر كعدت مستحية لان هالكد نمت طلعت غسلت ورجعت لبست دشداشة وفوكهة جبة لان استحي من حسن وازواج عماتهم الي لهسة ماشايفتهم طلعت لكيتهم بالحديقة يتعللون جاي وكيك وكعك اشرتلي ام زهرة

ام زهرة:تعالي بنيتي بصفي
رغد:رحت كعدت يمهة ورفعت ايدي بسلام ردوا ما عدا عهود النحسة مااهتميت امهة جانت ماكو فالكعدة خفيفة صبولي جاي شربت وسوالفهن عالزرع والبستان وموسم جني الثمار لان جانو زارعي مشمش وفواكه صيفية العرفتة هم بموسم الجني يطلعون كلهم محد يستنكف ويكعد يكولون هاية كاعنة وهويتنة ورزقنة ما نستنكف ابد فاتفقوا بعد يومين يطلعون شوية واجت سعاد وزوجهة وكعدوا يتعللون زوجهة انسان طيب وحباب عكسهة واكبر بالعمر منهة بهواي ظل يرحب بية ويكلي انتي بنص اهلج وانتي من ريحة الحجية وكلشي من ريحتهة نقدرة ونعزة وهو يحجي وسعاد تريد تنفجر وام زهرة تكلة طيب وكلك اصل ياابو صهيب
سعاد:يلا كومن يبنات نسوي العشا
رغد:اشرت لعمة ان زهرة عادي اكوم

ام زهرة:اي بنيتي هذا بيتج ايناااس تعالي بيبي اخذيهة وياجن
رغد:رجعت ايناس وابتسمت وكالت ردت اكلج بس كلت هسة تكول كومني اول يوم يمهم هويت راسي لا واشرت مو هيج اني

ايناس:هاا مافهمتج
رغد:اشرت لاتهتمين بس ضجت ياربي دخيلك ساعدني

امل:وينجن ولجن لا تنتفنة خالة سعلوة اقصد سعودة

رغد:ضحكت على شقاهم جانو بيت خالة زهرة مرحين ينقطون عسل عكس بيت خالة سعاد بس ابوهم حباب عهود وامهة لاااااااااا🤕،كملنة العشا ونقلنا للصالة طبعا هو نظام بيتهم الكعدة واللمة بوسط بيت عمة ام زهرة المتوسط البيوت وبصف على كل جهة بيت واحد لسعاد وواحد لزهرة بس الطرمة وحدة والكعدة وحدة واللمة والهوسة كلهة ببيت عمة ام زهرة حتى الوجبات تنطبخ بمطبخهة يعني بس النوم هناك ببيوتهم نقلنا العشا والتمت كلهة واجة زوج خالة زهرة وخطية هم سلم علية ورحب بية وضلوا طول الكعدة سوالف وشقة وحجي عالشغل همة جانوا موضفين بدوائر الدولة وهم لازمين بستان عمة زهرة الي الظاهر الخير هذا منة كلة جانت لمتهم شي حلو مفتقدتة بعيشتي قبل لدرجة نستني ايسر وسوالفة واذيتة بس ايسر ماناسيني وجان بالمقابل......

ايسر:فجاءة غلق الموبايل بوجهي ركعت الجهاز عالكشن مال السيارة واني اغلي بسيطة اني الج رغد ما تستحين تشردين مني ووين يم منو الزمج واعرف حقيررررة مخليتة محامي دفاع منو هذا اليحرك عشيرة عالمود دمعتج رايحة تتبجبجين يمةةةةة ادب سززززز رررررررررغد مااطلكج لو تموتين كدامي كوة سقت من الغضب والموقف الصرت بي الف فكرة براسي وين راحت وهذا منو ردت انجن وكل شوية اصيح لج تحركين كلبييييييي مو كلت ما اتطين واحب بس اخ من كلبي الا اشيلك واحط صخرة بمكانك لج لييييش وين رحتي مني والله ادور عليج العراق شبر شبر الا ادفنج لو لكيتج وارجع اسكت وكلبي يكلي كون هية بخير وزينة وخاف متأذية ووين صارت اخخخ منك ليش ورطتني بحبهة اااااه ياربي دخيلك وصلت لبيت ريام بالكوة نزلت واني كوة اتنفس من الاعصاب والغضب كمت مااكدر اركز واحس كامت تغوش عيوني فتحت الباب ريام وتفاجات بية

ريام:عزا شبيك ايسر شصاير سودة علية خل اسندك

ايسر:مابية بس جيبيلي كلاص مي كعدت على مصطبة بباب الحديقة الداخلية ماكدرت اكمل وادخل يمكن ضغطي فووول اجتي ريام جايبتلي مي وامي وياهة انخبصت من شافتني هيج كتلهة اتطمني حجية مابية شي شوية اتعصبت دخلت للبيت مددت وشوية ودك تلفوني اخو سهى اخخخخ مو وكتة ادري غلطان من ضربتهة واني الي اتصلت على اخوهة يروح ياخذهة تريح اعصابهة بس ما كتلة ضربتهة رديت كوة الوو

اخو سهى:هاي شنو ايسر مو هذا العشم تالي العمر تضرب سهى لان ماقبلت متزوج عليهة انتة مدمر عائلتك بيدك وجاي تضرب

ايسر:اسمعني مااعرف شسولفلتكم وفرتهة علية بس الصار مو لان متزوج الصار اختك غلطت علية وما احترمتني وجان لازم تتأدب لان مصختهة ولحد يلومني اني اتزوجت على سنة الله ورسولة مااجرمت روحوا لوموا اختكم من هجرت بيتهة وزوجهة شهور ماسألت ميتين عدلين هسة من اتزوجت بظرف صعب اختك الخلقتة تجون تلوموني ماالكم حق لو شفتوا تقصير ذاك الوكت احجوا

اخو سهى:بس انتة هنتهة واي مرة متقبل تنزل عليهة ضرة وجمالة مفضل عليهة وحدة معوقة

ايسر:احتررررم نفسك مااسمحلك تتجاوز على مرتي لاتخليني اغلط بعدين معوقة شبيهة معوقة شو احسن من الف واحد حجية مخربط وما موزون

اخو سهى:قصدك علية

ايسر:شتفهمهة افهمهة وصدك ترة العوق عوق الاخلاق واختك خليهة يمكم كم يوم وامر اخذهة وعقلهة خلي تلم بيتهة وتلتفت النة وتعوف انانيتهة وسديتة واني فاير منهم احس كامت الحرارة تطلع من عيوني دخلت سبحت ورجعت نمت يلا شوية ارتاحيت كعدت المغرب اول ما فتحت عيوني دزيت مسج لرغد بي كلمتين(الكاج لو بسابع ارض انتضري وشوفي) كمت رجعت للبيت وخليت امي يم....

الكاتبة ايه.... يتبع