ولاد الحومة

🙁بارت47🙁

سارة في بيتها طل على سمير
سارة : بفف دالي تليفوني ودرك كيفاه نرجعو وكيفاه نهدر معاه .اعععع انا جبتها لروحي ..
سمير كمل خدمتو لعشية وراح للدار دخل ..شاف يماه مقلقة..
سمير: شبيك يما ؟؟
فطيمة: مكاش ياوليدي هاك عارف حكاية ختك..
سمير: وهذي درك ميهديهاش ربي وترجع لدارها .
فطيمة: والمشكل عندها الستر وقاللها نديك حلفت عليه ميديها..
سمير: اوو علاه؟؟
فطيمة: خافت يديها لدارها وعلى هذي عيطتلك جي تديها .
سمير: قوليلها توجد روحها نديها ..
فطيمة : اوك درك نقوللها..
..
نرجعو لاحمد نهار دوس مع زينب رجع للدار يغلي شافتو يماه.
باية: شبيك احمد وليدي غير الخير؟؟
احمد: مكاش ..
باية؛ كيفاه مكاش ؟؟ وين راهي زينب ؟!
احمد: محبتش جي..قاتلي داري وحدي .
باية: بووه هذي هبلت وين دير دارها ؟!
احمد: حصلت يا يما والله حصلت..قلتلها ابقاي ثم حتى يفرج ربي
باية: هذي هبلت على روحها ولا واش حابة ..وين دارها وحدها ؟؟ ياك راهي شوف الظيق عندنا .
احمد استغفر ومسح على وجهو ..
احمد: يما نقص مالصالون وندير كوزينة . ونغلقها من جيهتكم هكا تولي دارها وحدها..
باية: والله منعرف..
سميرة: يما قلتيلو لاحمد خويا..
احمد: واش ثاني نتي ؟!
باية خايفة ومتردة..
احمد شاف فيهم مستغرب: واش كاين انطقو ؟!
سميرة: حتى انا راني نبني قدام عجوزتي عندي مشاكل ومحتاجة دراهم ؟؟
احمد: ومنبعد؟؟
سميرة: ندي حقي فالدار هذي..
احمد : وشنوو؟! مسمعتش مليح ؟!
سميرة: لي سمعو دارنا غالية خاطر بلاصة مليحة .وانا عندي حقي من دار بابا الله يرحمو..
احمد : نتي بنادم ولا وااش ؟! انا حاصل في روحي ونتي تحوسي على الدراهم ؟!
سميرة: ايه نحوس على حقي والا غير مرتك لي تعرف تبنيلها وحدها ؟! انا ثان من حقي نبني اعطيني حقي ولا نشارعك نبيع الدار ..
احمد مخلوع شد في راسو متوقعش ختو توقفلو هاك..
احمد: يما هذي واش راهي تهدر ؟؟ وكي نبيع الدار يماك وخياتك وين يروحو يالبقرة ؟؟
سميرة: ياك سهام مخطوبة تبقى سلمى ويما ديهم معاك وشوفلهم بلاصة شوية رخيسة ..
احمد: نتي متحشميش الله يلعنك
ومالزعاف شدها ضربها..
سميرة تعيط : والله متحشم حوست على حقي تضربني ..بصح والله اذا موقفتكش في دار الشرع مانيش سميرة..
وخرجت : ايه مرتو يبنيلها وحدها وانا حراام..معليش ...
عيطت لراجلها داها .
واحمد قعد حط راسو بين يديه ماقدر يدير والو ..
.
غدوة منذاك زاد راح هدر مع زينب...وقاللها بلي ممكن راح تتباع الدار وفهمها حكاية ختو وقاللها معندوش باش يخلصها ..
زينب : معليش احمد هذيك سوسة ونعرفها هاك الذهب تاعي بيعو وخلصها احمد: واش راكي تهدري محاال نشد عليك الذهب..
زينب: احمد قتلك شدو وخلصها واذا خصك سلف ويفرجها ربي..
احمد: راح تهبلوني والله ملقيت راسي منين..علاه مترجعيش لدارك يابنت الناس خليتيني وحدي ..
زينب : اعطيتك الحل..قتلك شد بيعو وخلصها ميبقاش بزااف...
احمد: لالا يابنت الناس ذهبك خليه ليك..ندبر جيهة وحدوخرا..
زينب: علاه ماشي داري ؟! راني برانية ؟؟ احمد ياك الذهب للشدة وهذي شدة..
احمد : اذا لحقني الشكوى نتاعها نشوف كيفاه ندير. وامشي معايا للدار .
زينب:منجيش احمد حتى تفرا بيناتكم..
احمد: يابنت الناس راني وحدي راح نهبل ....
زينب تهدر تبكي : منقدرش احمد راه عندي الستر وراني عيانة منقدرش نجي..
احمد مالقلق شدها من يدها يدي ويجيب ختى وجعها ويعيط
احمد: حبيتو تهبلوني ....نهار نموت تريحو مني..
وطلق يدها وخرج..
هي قعدت بقوة فالبنك وتبكي ...
شوية هكاك دخل سمير ...يهدر مع يماه .
حتى سمعها عيطت
زينب: يماا..يمااا اجري ليا الدم الدم راح نمووت
--------------------------------------------------
زعما واش صرااها لزينب ؟
وواش رايكم كي عكاتو الذهب تاعها