سمير دخل شافتو زينب مسحت دموعها وناضت سلمت عليه.. زينب: واش راك خويا لباس؟؟ سمير: لباس ..حمد لله ..نتي لي واش بيك.. زينب هبطت عينيها حشمانة من خوها زينب: مكاش خويا شوية مشاكل هاك تعرف المشاكل تع النسا.. سمير: ممم ..نتوما نسا تحبو المشاكل.. ودخل لبيتو...يبدل..يسمع فيها تهدر مع يماه.. زينب: وين نروح باماما ياك قالك منحملش ريحة الطياب..نظل نرد.. فطيمة: يابنتي هذا هو الوحم واش حبيتيني نقولك.اصبري. زينب: والمشكل عجوزتي تقولي طيبي ..وزيد الماعن منقدرش نغسلهم منحملش الريحة.. فطيمة: بووه..وبناتها؟ زينب: زعما دايرن الدالة بصح الدار ضيقة وريحة الطياب تلحقني حتى لشومبرة..مقدرتش ياماما راني عايشة كوشمار ..كل يووم نفس الحكاية وزيد حتى احمد راجلي ولا يتقلق.. فطيمة: واش حبيتيني نقولك هذي دار الغاشي والعايلة..كون ساكنة وحدك واحد مايقلقك زينب: منين ياحسارااه هو الشومبرا هذيك بسيف باش صحتلو ..الضيق وخياتو فالدار بلا زواج..وختى المزوجات كي يجو مع ولادهم تولي فوضى عندنا يدخلو يڨلبولي كامل الدار ..بففف عيت وكرهت.. فطيمة: معليش ريحي نهارت هنا حتى يفرج ربي..ياك نتي حبيتيه وقلتي نصبر..امالا اصبري.. .. سمير سمع هدرتها كامل..تنهد وحط راسو ورقد... ... غدوة منذاك راح يخدم كيما عوايدو..بجوز على دار سارة فليل وفالنهار ..حاب يشوفها توحشها بصح هي حالفة عليه ميشوفها..وحتى وتقولها يماها نخرجو متحبش تخرج.. حورية: هذا كيفاه حتى وليتي تحبي الدار ؟؟ سارة: مانيش حابة نخرج..خليني نريح فالدار.. حورية تخرج تقضي وحدها ..وسارة حالفة على الخرجة زكارة في سمير . سمير تقلق حاب يشوفها..كلما يشوف باباهم تنفتح يفرح حتى ميلقاهاش هي.. سمير: بففف زعما ماهيش هنا ولا كيفاه؟؟ متكونش برك راحت ضيفة..ولا زعما مزالت مغشة مني.. فليل جاز على دارهم حاب يشوفها..لقا ضو تاع شمبرتها شاعل وخيالها ..عرفها راهي هنا بصح محبتش تخرج. سمير: يا راستك متخرجيش ضرك..تقول نجي نخرج ق**** بسيف.. سارة فايقة بيه بصح محبتش تخرج.. ..... راح للقهوة عند صحابو .. ياسين: واش سمير تلعب معانا الماتش لخر..؟؟ سمير: خسارة عليك..كنت لاهي مع الخدمة فالزوج لي ماتش لخرين...بصح الماتش هذا منراطيهش..لافينال شبيك..ههه ياسين ؛ ههههه هيا لباس كملت ليكيب ...مام نبيل رجلو راهي مليحة.. سمير: اوااه الماتش هذا لازم نربحوه.. ياسين: نربحوه نشالله مدام كملت ليكيب.. سمير قاعد يشرب في قهوتو ويخمم. ياسين: الريزيلتا تاع الباك تخرج نهار السبت سمعت؟؟ سمير: ممم مسمعتش سما نهار الماتش !! ياسين:ايه علاه مقاتلكش سارة؟! سمير: انا نطلع للدار .. ياسين: روح مام انا جاي معاك.. راحو يمشو فليل الصيف البرودة. ياسين لحق عند دار ملاك عيطلها..خرجت ليه عند الباب.. سمير هبط راسو وكمل طريقو..يخمم في سارة لي توحشها وحاب يهدر معاها ويفهمها مي هي سجنت روحها ومعطاتوش فرصة.. لحق عند دارهم..خزر فيها وتنهد عارفها شوفو..ومتحبش طل عليه
أنت تقرأ
ولاد الحومة
Actionقصة باللهجة الجزايرية تابعوها ومتندموش ملاحظة: هاد الكرونيك منقولة من قروب فيس
