تسريع للاحداث
بعد مرور سنتين ..
(( هكذا هي الحياة
الحزن يتجدد والسعاده لن تدوم...
الابتسامة تختفي والدموع لا ...
هكذا هي احاسيسها تنتقم ..💔))
نشوفوا شن صار وشن صاير وشن حيصير
الاء. "في قمة السعاده صارت في اول سنه جامعه
قدرت تجيب نسبه كويسه تحقق بيها حلم حياتها انها تصبح دكتوره في يوم من الايام عايشه بقرب سندها الا ولا يوم سيبها فيه امجد يحبها وتحبه ومتمسكين بحبهم "
امجد. "شخص ناجح في مجال عمله وكل يوم يطور فيه ويتقدم حياته حلوه عنده حبيبه تساند فيه وتخاف عليه اكتر من نفسها في هذي السنيتن زادوا تعلقوا ببعض وحبهم كبر ومقررين يديروا خطوه رسميه "
نور. "المفاجأة عند نور حاليا مخطوبه من اكتر شخص حباته وقدر يرجع ثقتها محمد عجباته حبها وتواصلوا ع اساس صداقه وخلاها حاجه خاصه بيه وملكه وخطبها داروا حفلة خطوبه راقيه وحلوه عبروا فيها علي سعادتهم "
احلام . "الانساها خالة الاء الصغيره حلومه تزوجت من حبيبها وخطيبها ياسر وتوا حامل "
احمد ."اما بالنسبه لاحمد فقرر يسافر من سنتين حاول ينسى حبه ل الاء وحب خوه ليها وقعد مارجعش واحتمال انه يرجع في فتره قريبه جداا "
اول_يوم_جامعي_لبطلتنا 💜🎶
صباح جديد ليوم جديد لبدايه امل جديد
انا. خايفه موووت
امجد. الناس تصبح قبل
انا. صباحو متوتره
امجد. علاش
انا. نسيت اليوم اول يوم في الجامعه
امجد . اوو اسف حبيبي انتي ماقلتيش
انا. عادي شن جوك انت
امجد. الحمد لله كيف وصلت للمكتب وبنفتح
انا. اوكي مانعطلش عليك ربي يعاونك
امجد. حبيبي ديري بالك من روحك خليك مع صاحباتك وحد ماتعرفيشي ردي بالك تكلميه وخاصة اذا كان ولد انتي عارفه لما يجن جنوني شن ندير تكملي محاضرتك للحوش كلمي عمي ولا كلميني
انا. اي حاجه تانيه
امجد . لا سلامتك
انا. سلام
انا. "صكرت من امجد قعمزت نضحك مهبوول قعد زي اول يوم عرفته فيه اعطي اوامره وصكر نضت فطرت ولبست كلمت محمد جي رفعني خشيت للكليه لقيت سما اني وياها بس خشينا طب يعني من صاحباتي "
انا. صباحوو
سما . صباح الورد شنج
انا. خايفه بطني توجع فيا من الصبح
سما . احرف منك
انا. اني مانعرف شي حتى محمد حطني ومشي قال مستعجل
سما. باهي شن نديروا ناخذوا موادنا مفروض
انا. هيا نوضي
انا. "خذينا موادنا واوقات المحاضرات وماخلاش الجو من شويه هبال درنا دوره وروحنا اول ماوصلت رقدت طوول تعبانه ع الاخير وكالعاده نضت علي صوت تليفوني ازعاااج ..
انا. "بصوت مش وحده راقده وحده سكرانه.الوو
امجد. سلام قول من رب رحيم مني انتي
انا. انت الا مني "وشفت للتليفون هذا وين نضت هييي " اهلا امجد
امجد. خيرك شن في خيره صوتك
انا. راقده
امجد. اوواسف غلاتي نوضتك
انا. لا لا عادي
امجد. كنت نبي نطمن عليك شن جو الجامعه
انا. ماشي حالها
امجد. تمام توا اني في المكتب بعد شويه عندي اجتماع نكلمك بعدين
انا. اوكي بالتوفيق
امجد. نحبك
انا. واني
امجد. وانتي شنو
انا. ههههه نمووت فيك
امجد. سلام
انا. "ابتسمت تعودت عليه لازم يقوللي نحبك نهاية كل مكالمه نضت درت قهوه شفت لجدول محاضراتي غدون ماعنديش محاضره اذكرت ان غدوه عيد ميلادي الصراحه يوم ميلادي نتفاءل بيه نحس بسعاده هكي سبحان الله درت دوره علي الحوش وطيبت العشي لماما وبابا وقعمزت ع النت . ..
الساعه 12...
انا. كنت مقعمزه علي النت ونتصفح فجأة بدو يجوني اشعارات ورسائل وتس وفايبر لقيت صحباتي وبنات عمتي واي حد نعرفه قبل من الثانوي وفي ناس يعرفوني من الاذاعه يعني فانز يهنوا فيا بعيد ميلادي ابتسمت حسيت بحبهم ليا رديت عليهم كلهم وشويه وشرين فوني ومن غيرها حبيبة قلبي
❤نور❤
نور. كل عام وانتي بألف خير وصحه وسلامه وتوفيق وخيتي الغاليه ومرت خوي الحلوه
انا. ههههه و انتي بخير
نور. كللبه كبرتي سنه وبديتي عزوزه
انا. في عينك
نور. شنجك شنج الجامعه
انا. الحمد لله ماشيه
نور. نستنى في الساعه 12 باش نتصل بيك
انا. ي كذابه ليها نص ساعه فايته
نور. امجد روح موخر درتله عشاه
انا. يا روحي اكيده تعبان بكري قللي عندي اجتماع
نور. يارووحي مادامك فالحه جيتي شمرتي علي درعانك ودرتيله عشاه
انا. ههههههه وعلاش لا
نور. هيا زيدي غادي بنررقد
انا. مرقد جدي معاد ناض
انا. "هههههه مهبووله بس استغربت امجد الوحيد الا معايدنيش اكيده تعبان او مرات نسي من ضغط الشغل ..."
صباحا ..
انا. مقعمزه نفطر اني وماما وبابا طلع للعمل "
ماما. شن عندك اليوم
انا. شي
ماما. ماعندكش حلقه
انا . لا لا
ماما. وتي روحك
انا. علاش
ماما . خطابه
انا . اوف ياماما كم مره بنقول لا
ماما. نقول للناس لا هكي يجوا ونشوفوهم مرات يصير نصيب
انا. اي تو نشوفوا النصيب الا بيصير
ماما. كلمه هيا وتي روحك والبسي حاجه باهيه
انا. باهي
انا. "نضت ضميت الحوش واماعين الفطور وطلعت للجنان كنت متنرفزه امس قاللي تو نكلمك وماكلمنيش والله نشغلت عليه اكيده صايره معاه حاجه اتصلت مره اتنين تلاته لارد اتأفف
خشيت طيبت الغذي وجي بابا وتغذينا بعدها خشيت دوشت ودرت شعري كنت نبي نلبس لبسه كاجوال لكن ماما اصرت عليا نلبس حاجه باهيه لبست قفطان حوريه علي الاكحل رقبه مصكره ومرسوم ع جسمي كملت..
نسمع في الناس جو نادتني ماما في الكوجينا تفاجأت لقيت محمد خالي معاها طنشت عليه لانه مكلمنيش في عيد ميلادي
محمد. علاش التطنيش الناس تقول اهلا كيف حالك
انا. نعم يا ماما
محمد. بلا تكثير دوة البسي حاجه واطلعي للراجل يستنى
انا. لا مانيش طالعه اصلا حتى امه ماشفتهاش
محمد. بلا تصكير راس يستنى
انا. وخيره جايب التلج يستنى ينوض يروح
ماما. واطي صوتك
محمد. اني في المربوعه تفاهمي انتي وبنتك
ماما. هيا البسي واطلعي
انا. اوووف اووف والله لما نهربه يستنى قالك
انا. "خشيت لبست حاجه فوق قفطاني وطلعت طقيت علي المربوعه مارد عليا حد طقيت المره التنايه كذلك تشجعت فتحت الباب وخشيت من التوتر ماعرفتش شن ندير حاطه راسي لوطه حسيت بحد وقف وجي قدامي وشد كتافي وطبس باس علي راسي وهمسلي بصووت حنون ودافئ
.
.
.
يتبع ❤
يلا يلا شدو العزم من الا في مربوعه والواضح انه يحبها
STAI LEGGENDO
حب بطعم النوتيلا
Casualeرواية ليبية بقلمي الكاتبة الاء عبد الستار فتاة لا تؤمن بالحب وفجأة يظهر لها الهيام بذاته واسرها .. في كل مرة يهمس لها ب احبك يكاد قلبها ان يتوقف ظلت اسيرة عشقه .. حتى نهايتها ...
