Alluring [ ဘာသာပြန် ]

YOU ARE READING

Romance

绝色倾城 ဆိုတဲ့စကားလုံးက အရိုးရှင်းဆုံးဆိုရလျှင် 'မိန်းမောသွားလောက်တဲ့ထိစွဲလမ်းခြင်း' လို့အဓိပ္ပါယ်ရပါတယ်။လူတစ်ယောက်ကိုပဲဖြစ်ဖြစ် အရာဝတ္ထုတစ်ခုကိုပဲဖြစ်ဖြစ် မသိစိတ်ကနေရော အသိစိတ်ကပါ ရူးသွပ်သွားတဲ့အထိစွဲလမ်းခြင်းမျိုးပါ။

#asshole #drama

Chapter 33

Start from the beginning

by xiaochong17

အကြည့်များကိုလွှဲလိုက်ရင်း ပြတင်းမှန်မှတဆင့် မြို့တော်ကြီး၏ရှုခင်းကို လှမ်းကြည့်လိုက်၏။တစ်ခုထက်တစ်ခု ပိုမြင့်သော အထပ်မြင့်တိုက်ကြီးများ ၊ ခမ်းနားကြီးကျယ်လွန်းလှသော အိမ်တော်ကြီးများ ၊ သန်းနှင့်ချီသော လူဦးရေများ ထို့အပြင် မျက်လှည့်ဆရာပင် လိုက်မမှီနိုင်တော့သည့် ကမ္ဘာကြီး၏အလှည့်အပြောင်းများ တဖြည်းဖြည်းနှင့် ကမ္ဘာမြေပြင်ကြီးအထက်သို့ရောက်ရှိသွားကာ မျက်ဝန်းတစ်စုံရှေ့တွင် အဖြူရောင်တိမ်တိုက်များသာရှိနေတော့၏။

လုဝေ့ရှီ၏ပုံရိပ်လေးက သူ၏နှလုံးသားအထက်တွင် အငြင်သာဆုံးထင်ဟပ်နေခဲ့ကာ နေရောင်ခြည်နွေးနွေးအောက်တွင် ခပ်ဖွဖွလေးလွင့်ပျံဝဲနေသည့် ငှက်မွှေးစလေးတစ်ခုလို ၊ ကံကြမ္မာစီရင်စက်ကွင်းအတွင်းမှ လုံးဝပယ်ဖျက်ငြင်းဆန်မရှိတော့မည့် အသံတိတ်သီချင်းတစ်ပုဒ်ကို နားဆင်နေရသလို။

မည်သို့ပင်ထင်ဟပ်နေခဲ့ပါစေ လေတစ်ချက်အဝှေ့တွင် ကန်ရေပြင်ပေါ်ကျသွားရမည့်ပန်းပွင့်ချပ်လေးတစ်ခုလိုသာဖြစ်၏။ ရေပြင်ထက်သို့ဆင်းသက်ချိန်လေးခဏ ရေပြင်နှင့်ပန်းပွင့်ချပ်ထိခတ်လိုက်သည့် သာယာဖွယ်စည်းချက်သံကို ကြားလိုက်ရမည်ဖြစ်သော်လည်း အဆုံး၌ ငြိမ်သက်သွားခဲ့မည်သာဖြစ်၏။

လက်ထဲတွင် ကိုင်ထားသည့် သတင်းစာကိုချပြီး မျက်ဝန်းတစ်စုံကို အငြင်သာဆုံးမှိတ်ချလိုက်၏။

၆လ ကြာပြီးသော်......

ဤမြို့တော်ကြီး၏ ၈လပိုင်းကာလသည်ကား မိုးရာသီဖြစ်လေရာ သည်းကြီးမည်းကြီးကိုရွာသွန်းသည့်အချိန်လည်းဖြစ်၏။မှောင်မှောင်မည်းမည်း စိုစိုထိုင်းထိုင်းဖြစ်နေသည့် နေ့ရက်များကြားမှ ရှားရှားပါးပါး နေသာသည့်နေ့တစ်နေ့ရှိလာသော်လည်း ရာသီဥတုက အသက်ပင်မရှူချင်လောက်အောင် ပူပြင်းပြန်၏။

လင်းလော့ချွမ်က ကားပေါ်တွင်ထိုင်ရင်း ပြတင်းမှန်မှတဆင့် အပြင်ဘက်လမ်းသွားလမ်းလာရှုခင်းများကို ငေးကြည့်နေ၏။အချိန်ကာလ နှစ်တစ်ဝက်ကြာသွားပြီးနောက် ဤမြို့ပြကြီးက အတော်ကြီးကိုပြောင်းလဲသွားခဲ့သည်ဟုဆိုရမည်။နေရာတိုင်းတွင် ပြန်လည်မွန်းမံထားသည့်အဆောက်အဦး အသစ်တည်ဆောက်ထားသည့်အဆောက်အဦးတို့အပြည့်နေရာယူလာကြသည်။