يامبسم كله نور ياعيون مليانه ضيّ

١٢

وقفت بربكه وهي تاخذ كوبها وكوبه : عنادي لحد هنا بجدد قهوتك ، واتركني اجهز قهوة سعود وش طلبه؟
رعد ابتسم غصب عنه من حركاتها : امريكانو بارد ل سعود ، رفعت حاجبينها بذهول واومأت راسها بصمت
انصرفت من جنبه وبنفس الوقت دخل سعود وكان بلبس دوامه ، وقفت لورين بجانب دانيال : خُذ طلبه لعله يغير الكوب البارد الذي يريده
هز راسه دانيال بالايجاب واتجه لطاولة سعود ورعد
دخلت امها من الخلف بعد ما انتهت من سقيّ الورد
وطاحت عيونها على سعود بينما التقت عيون لورين ورعد من بعيد ، التفت سعود وبدا يحس بالغرابه من كل هالصدف مع البنت الواقفه بعيد ، وأمها المُتقدم مرضها
لكنه يجزم بإن بنتها ماتدري عن اي شي
قُطع حبل افكاره من انحنت نوران بوجع على الأرض وتأوهت بصوت مسموع ، قادته رجوله بدون شعور منه ليوقف امامها ويسندها : انتبهي
لورين كانت سانده امها بالجهه الاخرى : فيك شي؟
هزت نوران راسها بالنفي : بس صداع
جلسوها على أقرب كرسي وتصنعت الابتسامه : جاو زبائن جدد يا لورين ، ساعدي دانيال
لورين عقد حواجبها : بس ماما
نوران ناظرتها بنظرة إصرار ولورين تنهدت لتبتعد وتسوي مثل ما قالت لها امها
اما سعود جلس بجنبها يعاينها ويوصيها تزوره هالاسبوع بالمستشفى
.
.
السعوديه ، ثريا :
ضربت الجدار بقوه واعصابها تلفت بشده ، اقتربت من الباب العتّيق يلي كان على وشك السقوط وفتحت بقسوة
ابتسمت من تمهلَّ لها الطريق وطلعت بخطوات حذره
سمعت صوته بالصاله وانسحبت لغرفتها بسرعه ، لبست عبايتها وجهزت اغراضها الاساسيه بشنطتها الصغيره
كانت مصرّه على الخروج وهمست : دامك تبي تلعب يا كاسر اتركنا نلعب !
فتحت الدروج بهدوء ونبضات قلبها تكادُ تسمع وتفضح امرها ، اخذت نفس لتهدأ من روحها ومالقت جوالها بين اي درج ، عرفت انه يا عند كاسر يا امها
رفعت حاجبها وصابها رغبة بالتحدي ، اخذت عقدها الذهب من اول درج ودخلته شنطتها
همّت بالخروج لكنها وقفت من سمعته وقف : شيكي عليها واليوم بجيب احد يغير الباب والنافذه
مسكّه وقفت بسرعه : توني ماره عليها ، والنافذه لاتلمسها ، سكتت لثانيه وكملت بتبرير : تبي تكتمها ؟ مايكفي انه الغرفه اربع جدران وكلها غبار !!
ناظرها بصمت وانصرف ، اما ثريا ما قدرت تودع امها وطلعت من البوابة الأخرى بنهاية الممر
واول ماطلعت من البيت ركضت و ابتعدت قدر المُستطاع ، جلست بتعب على الرصيف : تحملي الله مايكلف نفس اكثر من المستطاع
تحاملت على روحها ووقفت وبدات تمشي ببطئ وعيونها مشتته مره خلفها ومره قدامها لتنتبه للطريق
ومرةً اخرى على السيارات السريعه الماره بجنبها
وصلت المبنى يلي استأجرت فيه وهالمره طلبت تغيير الغرفه بعد ماشرحت لهم الظروف
وصارت بالطابق الثالث الشقة رقم الـ 55 ، كانت مشاعرها عكس اول مره دخلت هالمبنى ، آمالها واحلامها تحطمت بالكامل ، كانت تدري انها بترتاح اقل شي ١٠ ساعات ولكنها فضلت سقف وهواء غير محيط كاسر
،
وبطرف آخر من المبنى ، بالاعلى تمامًا تركوه مرمي بأطراف السطح مغشي عليه وخذو جواله ومحفظته لينزلون بخطوات سريعة ويبقى أديب لوحده
فتح عيونه أول ماطلعوا وكانت مربوطه وابتسم ببرودة اعصاب : نريح عيوننا اشوي لا باس !
.
.
وقفت من يلي تسويه وفصخت المئزر بإنزعاج وهي تقترب من أمها ، والأعراض يلي عليها ماقدرت تتجاهلها اكثر وقررت تتاكد : ماما تعالي ندخل اشوي
سعود ناظرها : اتركيها ترتاح
لورين شبكت يدينها ببعض ورفعت حواجبها : اتركني اعاينها وافهم يلي فيها !!
سعود كان بيتكلم لكن قاطعه رعد وهو يقول بينما يوقف : سعود تعال كمل قهوتك
كانت انظار الكل عليهم بغرابه من لغتهم الغير مفهومه بالنسبه لهم ومن كثرة الاصوات العاليّه
قامت نوران مع بنتها ، لورين اقتربت بخطوات بطيئه ونبضات قلبها بدأت تتسارع
مسكت يد أمها وخايفه من شكوكها تتحقق، رفعت الكم وشافت آثار وكان احد ضاربها ...
تجمعت الدموع بعيونها وأرخت راسها بحضن امها
همست بهدوء : ليه ماقلتي لي ؟
نوران مسحت على رأسها بإبتسامه : اقولك وانتي بتحزني هالقد ؟
لورين رفعت راسها وكل شي ضاق عليها ورغم برودة الجو حست بإنها تحترق : ماما ماعندي غيرك ، مالك حق تسكتين !!
نوران طبطبت على كتفها : كله قضاء وقدر من ربي ، صبري والله بيحسب اجرك
هزت راسها : والنعم بالله
واضافت لكلامها بغصه : بس لاتتكلمين معاي كانك بتودعيني ب اي وقت
نوران رفعت حواجبها وهي تقترب منها بحنيه : بس يابنتي لازم نتقبل وندعي الدعاء يغير احوال !!
رفعت اناملها وهي تمسح على عيون لورين بلطف وتبتسم : ولازم نبكي اذا حسينا اننا بحاجه للبكي
زمت لورين شفايفها وهزت راسها بالنفي وقالت صوت تمليه الرجفه وهي توقف : بتصيرين بخير
تسللت دموع نوران ووقفت هي الثانيه ، مديت يدها ومسحت بقية اثار دمعها : بإذن الله
ربتت على كتف بنتها : عندك ابوك وعندك شادي
عقدت حاجبينها ورمشت ببطئ واول مره تطري ابوها على لسانها حتى لو ماكان بالصريح ، كانت تتفادى نطق اسمه وتتفادى سؤال لورين لها"ليه تركتو بعض؟"
رفعت نظرها ل امها : تبين تقابلينه لو مره !
نوران : مابيسمحون اذا انتي اخر مره قابلتيه لمن كان عمرك ١٠ وذا بواسطه من جدك ابراهيم !!
لورين : واحين ماودك ب واسطة من شادي ؟
هزت رأسها بالنفي لتبعد الفكرة