နတ်ဆိုးအုပ်စုက ငါလေးကို ဖွင့်ပြောချင်နေတယ်

အခန်း ၄၂

42 01

အခန်း ၄၂.၁

"ကြည့်ရတာ ဒီမကောင်းဆိုးဝါးက အဲ့ဒီလက်ထောက် ပြောလိုက်တဲ့ ခွေးအကို ရည်ညွှန်းချင်တာ ဖြစ်လောက်တယ်"

အကွာအဝေး အလွန်ခြားနေသည့်တိုင်အောင် ကုဝူကျိအနေနှင့် ထိုမကောင်းဆိုးဝါး၏ ကိုယ်မှထွက်လာသော ဖော်ပြ၍မရသည့် ထူးခြားသည့် ခံစားချက်မျိုးကို ခံစားရသည်။ ထိုခံစားချက်မျိုးက ကုဝူကျိ မှန်နယ်မြေတွင် မီးဖိုချောင်သုံးဓားကိုသုံးပြီး အလွယ်တကူ ရင်ဆိုင်၍ရခဲ့သော မကောင်းဆိုးဝါးများနှင့် မတူချေ။

ထိုခွေးအဟုခေါ်သော ကြီးမားလှသည့် အကောင်ကြီးက သာမာန်လူတစ်ယောက် ကိုင်တွယ်နိုင်သည့် လူတစ်ယောက် မဟုတ်ချေ။ ကုဝူကျိကပင် မယှဉ်နိုင်ဟု ခံစားနေရသည်။

"ဒီလိုဆိုရင် ဘာလုပ်ကြမလဲ"

ကုဝူကျိက ထိုနေရာတွင် မြဲမြံစွာရပ်လျှက် စိုက်ကြည့်နေသည်။ သို့သော်သူက အထိတ်တလန့် မဖြစ်သွားချေ။ မည်သို့ပင်ဆိုစေ အထိတ်တလန့် ဖြစ်သွားလျှင် စိတ်ရှင်းရှင်းဖြင့် ဖြေရှင်းနိုင်တော့မည် မဟုတ်ချေ။

ဒီအခန်းထဲတွင်လည်း ထွက်ပြေးလွတ်မြောက်စရာ နေရာရှာမတွေ့သည့်အပြင် သူကိုယ်တိုင်ကလည်း ထိုကဲ့သို့ သရဲကဲ့သို့ ဖြစ်တည်မှုများနှင့် အတွေ့အကြုံ အလွန်ကြွယ်ဝသည့်အလျောက် အခန်းအတွင်းမှ ပြောင်းလဲမှုကို သတိထားမိလိုက်သည်။ အရိပ်များက ပုံမှန်မဟုတ်သည့် လှုပ်ရှားမှုမျိုး ပြုခဲ့ဖူးသည့်တိုင်အောင် ထိုမကောင်းဆိုးဝါးကြီးက ပေါ်လာသည်နှင့် ချက်ချင်းလိုလို ပျောက်ကွယ်သွားကြသည်။

"ကြည့်ရတာ ဒီမှတ်စုကိုပဲ အရင်ဖတ်တာ ကောင်းမယ်ထင်တယ်"

ကုဝူကျိက သူ၏အရှေ့တွင် မှတ်စုစာအုပ်ကို ဖွင့်လိုက်ပြီး ထိုမကောင်းဆိုးဝါး၏ အားနည်းချက်ကို ရှာလိုက်သည်။ မီးဖိုခန်းအတွင်းမှ သရဲကမူ သူအသက်ရှင်ချိန်က ထိုမကောင်းဆိုးဝါး၏ အားနည်းချက်က မီးဟုတွေးခဲ့သော်လည်း သူကထိုမကောင်းဆိုးဝါး၏ သတ်ဖြတ်ခြင်းကို ခံခဲ့ရသေးသည့်အတွက် သူ၏အတွေးက မှားယွင်းနေခြင်း ဖြစ်လောက်သည်။ ဒီမှတ်စုစာအုပ်ထဲတွင် တစ်စုံတစ်ရာကို မှတ်တမ်းတင် ထားကောင်းထားနိုင်သည်။