Unicode
အပိုင်း ၂၅.၂
၎င်းကို ကြားသောအခါ လူအများ၏ အသက်ရှူသံများ အောင့်လိုက်ပြီး သူတို့အားလုံးက ကုဝူကျိကို ထူးဆန်းသောအမူအရာမျိုးဖြင့် ကြည့်လိုက်ကြသည်။ သို့သော် သူတို့ မည်သို့ပင်ကြည့်စေကာမူ ခေါင်းဆောင်က သက်ရှိလူသားတစ်ယောက် ဖြစ်နေသေးသည်။
ကုဝူကျိ ဘာများတွေ့လိုက်လို့လဲ။
“သေချာတာပေါ့”
ခေါင်းဆောင်၏လေသံက အေးစက်လာပြီးပြောသည်။
“ငါက ခမ်းနားကြီးကျယ်တဲ့မြင်ကွင်းကို ကိုယ်တိုင်မြင်ရအုံးမှာ ဘာကြောင့် သေရမှာလဲ”
သို့သော်အသံက ဖျော့တော့သွားသည်နှင့် ချက်ချင်းပင် သည်အခန်းတစ်ခုလုံးက တိတ်ဆိတ်သွားသည်။ တစ်ဖက်မှ ပုံရိပ်ကလည်း ပျောက်ကွယ်သွားတော့၏။
“ဘာဖြစ်တာလဲ၊ မင်း ထူးဆန်းတဲ့နေရာတွေကို ရှာတွေ့လိုက်လို့လား”
ချန်းလင်က ကုဝူကျိကို မေးသည်။
“ငါ တစ်ခုခုကို သတိထားမိထားတာ၊ တကယ်တော့ ထူးဆန်းတဲ့နေရာတွေ အများကြီးရှိနေတာပဲ”
ကုဝူကျိက စပြောလိုက်သည်။
“အကြံတစ်ခု ထုတ်ရမယ်ဆိုရင် …”
“အခုက ဒါတွေ တွေးနေရမယ့်အချိန် မဟုတ်ဘူး၊ ငါတို့အရင်ဆုံး ဒီနေရာကနေ လွတ်မြောက်ဖို့ နည်းလမ်းရှာတွေ့မယ်ဆိုရင်တောင်မှ ကြောက်မက်ဖွယ်ကောင်းတဲ့ သရဲတွေအားလုံး သည်နေရာကို ပြုံတိုးဝင်လာမှာပဲ”
ကျန်းကော၏မျက်နှာက ချွေးစေးများဖြင့် စိုရွှဲနေသည်။
“ပြဿနာမရှိဘူး၊ ငါ ဘာလုပ်ရမလဲ ငါ သိတယ်”
ကုဝူကျိက စားပွဲပေါ်မှ စာအုပ်ကိုကောက်ကိုင်ပြီးနောက် ဆင့်ခေါ်ခြင်းအစီအရင်ကို ကြည့်လိုက်သည်။ ယုံကြည်မှုရှိစွာဖြင့်ပြော၏။
“ခေါင်းဆောင် မလုပ်ခင်ပြီးနိုင်မယ်ဆိုရင် နတ်ဆိုးနတ်ဘုရားကို ငါတို့အရင်ဆုံး ဆင့်ခေါ်လိုက်တာက မကောင်းဘူးလား”
သူ၏စကားသံထွက်လာသည်နှင့် အခြားသူများ ဆွံ့အသွားကြသည်။ သူတို့ ကုဝူကျိကို သရဲတစ်ကောင်မြင်လိုက်ရသကဲ့သို့ ကြည့်ကြ၏။
STAI LEGGENDO
နတ်ဆိုးအုပ်စုက ငါလေးကို ဖွင့်ပြောချင်နေတယ်
Horrorဘာသာပြန်သူ - Swae Nyoe Team, ဆုမြတ်လှိုင်
