رغيفْ بنكهة عشگّ {مكتملة}

البارت الثالث والستون

وذاك انا وجرحي اعله حاله
ينام ويندهه الونين

: كاظم اسماعيل الگاطع

...
#رغيف_بنكهة_عشگ
#بقلمي_بصره_الربيعية
#البارت_63...
...

بغداد..

سَلم_فتت من باب المطبخ صارو البنات بوجهي
ركضولي اجت امي على فزعتهن

لزمتني بخوف انه ارجف اريد احچي مابيه
صار صوت سيارات الشرطه قوي

طلعنه كلنه بالباب شفت اخوي مُعمر جاي من بعيد هسة يباوعلي خايف عليه شفنه فاتو وراه الشرطة 
دارلهم ووگفلهم كله
.. مُعمر .... .... گله نعم  تفضل سيدي
صاح الشرطي للي وياه يفتشون البيت وهو اخذ من خصره الگلبچات وكلبچ ايديه امي ركضتله
واحنه هبطنا وحده لزمت بالثانية
ومُعمر صاح الها أم صدوق فوتي جوه أن شاء الله كلشي ماكو وبلغي البنات يحتشمن ويلبسن عبيهن ..دار للشرطي حاچاه .. سيدي من رخصتك  حشمة البيت!

گله هذا امر امي بعدها يمه وانه مصفنه بمكاني ياترى كم صدمه بعد اشوف بهاي الليلة!....مو ليلة مرت لا چانت اشبه بالكابوس!.

احنه چنه منبين لان النخل مغطي علينه ودنيا ليل وبباب المطبخ واكفين ونشوفهم ونسمعهم طلعو الشرطه وكالو اله سيدي كلشي ما اجه بايدنه
كله ميخالف الدليل الي شفناه يقطع الشك المهم الأخ لازم يجي ويانه...أخذووو!..

بهالحظه شفتها هي راحتله تمشي بركض وتتعثر
شمرت نفسها عليه اكيد تمثيل!..
لان بعد ما اصدك بيها!

رجعو جرو الشرطه منها..
ماتحملت طلعت انه بعد ماتركت ايديه كفايه الي چانت لافتني بالعباية وحاضنتني وانه اصلا مو بالبال
بس اجو وراي البنات ، طلعنا شفناهم يريدون ياخذونه

لفينه عليه هذا اخونه وابونه مو شويه علينه
من نشوفه بهالحال
انسان كل المنطقة تحلف باخلاقة بعمره ما أذى احد
بالعكس يساعد الچبير والصغير

امي سودة عليه گعدت بالتراب تنحب
وتنشد على صِدوق تگله وين وليت وعفت اخوك يماااا
گعدنه يمها نبچي وياها ما نگدر نطلع للشارع
نمشي بكلامه ما يحب الرايح والجاي يلمح طولنه

گوه گومناها امي وقبلت تدخل للبيت
اباوع لبدلة عرسي انسحت بالتراب وصارت اطرافها سودة مايهمني هو انه گلبي المفحم ضلت على البدلة!

اتذكرتها والتفتت ما شفتها راحت يمكن هم مايهمني..
گعدنه بالدوانية كل تعب الدنيا محمل على چتافنه
لو امي الي انخطف لونها والله مابينه هم تهدنه وتروح
ربي ساعدنا وعينه وساعدها وگومها بحيلها..

اندك الباب رادت تگوم كفاية رونقه راحت گبلها
اصلا حتى يمكن الباب مفتوح..

شوي واجت هي وخالتي ام مرعي جوارينا
وخالتي ام ماجد ،ثنينهن گابلن امي وأم مرعي گالت الولد لحگو بي ان شاء الله غلطانين بالعنوان ، ماكو شي يما فوضو أمركم لرب العالمين ادعوله داده ادعوله افضل من البچي.