မားက စကားကို တရစပ်ပြောပြီးနောက် အိမ်အပေါ်ထပ်သို့ ခပ်မြန်မြန်လေး တက်သွားလေသည် ။ သူနှင့်ပါးကတော့ သည်အတိုင်းသာ မတ်တတ်ရပ်နေကြ၏ ။ လက်ထဲရှိ ဆွဲခြင်းကို ကြမ်းပြင်ပေါ်သို့ချကာ ပါးကို လှမ်းကြည့်မိပြန်တော့ စိတ်ထဲမကောင်းလှ ။ အစ်မဖြစ်သူကို သိပ်ချစ်သည့်ပါးက ယခုကဲ့သို့ အခြေအနေကို ခံစားနေရလိမ့်မည် ။ နှစ်သိမ့်စကားဆိုရန်လည်း မည်ကဲ့သို့ပြောရမှန်း မသိသောအခါ ပါးစပ်ပိတ်ပြီး ကြည့်နေရန်သာ တတ်စွမ်းတော့၏ ။
ပါးက လက်သီးကို ကျစ်ကျစ်ဆုပ်ထားသဖြင့် လက်ဖမိုးပေါ်ရှိ သွေးကြောများကလည်း ထောင်ထနေကာ အံကြိတ်ထားသဖြင့် ပါးပြင်ပေါ်ရှိ ကြွက်သားများကလည်း တလှုပ်လှုပ် ။ နံနက်ခင်းအချိန်၌ပင် ပါး၏ မျက်နှာပြင်နှင့် ခန္ဓာကိုယ်ပေါ်တွင် ချွေးများအိုင်ထွန်းနေသည်ကို ကြည့်ခြင်းအားဖြင့် ပါး သိပ်ပြီး စိတ်လှုပ်ရှားနေမှန်း သိသာလှသည် ။
" ဟယ်...သားအဖနှစ်ယောက်လုံး ဘာရပ်လုပ်နေကြတာလဲ ၊ ပါးလဲ ရေချိုးလိုက်အုံး ၊ မား ပါးအတွက် အဝတ်ထုတ်ပေးထားတယ် ၊ ပေါင်ပေ့လဲ ပစ္စည်းတွေသိမ်းတော့ "
မား၏ အသံက သူနှင့်ပါး၏ ငြိမ်သက်တိတ်ဆိတ်မှုကို လှုပ်နှိုးလိုက်၏ ။ မားဆီမှနေ၍ ဆပ်ပြာအနံ့ကိုရပြီး မျက်နှာတွင်လည်း ရေစက်အချို့ ရှိနေပုံအရ ရေချိုးလာပုံပင် ။
မားက ပါးကို မျက်လုံးဝေ့ကြည့်ကာ ပါး၏ ပါးပြင်ကို လက်ဖြင့် ခပ်ဖွဖွကိုင်လိုက်၏ ။
" ပါး... အချိန်ကုန်တယ်ကွယ် ၊ ရေသွားချိုးလိုက်တော့ ၊ ပါး စိတ်ပူနေတာကို မား နားလည်တယ် ၊ မားလဲ မကြီးကို စိတ်ပူတာပဲ...ပါး ၊ စိတ်ပူနေတာနဲ့ ပြီးသွားမှာမှ မဟုတ်တာ ၊ အရေးကြီးတာ အရင်လုပ်ရမှာပေါ့ ပါးရဲ့...နော် "
ထိုအခါမှ ပါးက သက်ပြင်းရှည်ကြီးကိုချကာအပေါ်ထပ်ကို တက်သွားပြီး သူကတော့ ခြင်းကိုဆွဲကာ မီးဖိုခန်းထဲသို့ ။
မိနစ်အနည်းငယ်အကြာ
ဝယ်လာသည့်ပစ္စည်းများကို သိမ်းဆည်းပြီးချိန်တွင် သူ့တစ်ကိုယ်လုံး၌ ချွေးများနစ်နေပြီ ။ ထမင်းကတော့ နံနက်အစောကတည်းက ချက်ထားပြီးဖြစ်သဖြင့် ချက်စရာမလိုတော့ပေ ။ မနေ့ညက ကျန်သည့်ဟင်းများရှိနေသဖြင့် ဟင်းလည်း ချက်စရာမလိုချေ ။
![](https://img.wattpad.com/cover/311808485-288-k171455.jpg)
YOU ARE READING
My Green Forest ( Complete)
Romanceကန္တာရထဲက လူတစ်ယောက် ကႏၱာရထဲက လူတစ္ေယာက္ (သက်ကောင်းလူ) ဒီနေ့... မနက်ဖြန်... သန်ဘက်ခါ... ကျန်ရှိတဲ့နေ့ရက်တိုင်းမှာ ကျွန်တော့်အချစ်တွေနဲ့ ထင့်ကို မွမ်းမံပါမယ်...။ (အလက်ဇန်းဒါးထင် ) ပျော်ရွှင်သည့်အချိန်... ဝမ်းနည်းသည့်အချိန်... အားငယ်သည့်အချိန်... အထီ...
Episode (19)
Start from the beginning