My Green Forest ( Complete)

Episode( 3)

Unicode

လှပသောကိုယ်နေဟန်ထားနှင့် ပြီးပြည့်စုံသောမျက်နှာအလှကို ပိုင်ဆိုင်ထားသည့် မိန်းကလေးတစ်ယောက် ။ ဆိုင်ထဲ၌ ခပ်မတ်မတ်ကိုယ်နေဟန်ထားဖြင့် ရပ်နေသော ထင့်ကို မြင်သွားသည့်အခါ ထိုမိန်းကလေး၏မျက်လုံးများက အရောင်လက်သွားပြီး မျက်နှာထားကလည်း ပြုံးမြသွားတော့သည် ။

" ကိုထင်က မေမီကို တကယ်စောင့်ပေးနေတာပဲ "

ပြောလည်းပြော ပခုံးပေါ်ရှိ Gucciအိတ်ကိုဖြုတ်ယူလိုက်ပြီး နောက်ဘက်ရှိ မိတ်ကပ်ဆရာ၏ လက်ထဲသို့ ထည့်ပေးလိုက်သည့် မေမီမိုး ။

" မစောင့်စရာလား မေမီ ၊ မေမီက ကျွန်တော့်ဆိုင်ကို လာပြီးအားပေးတာနဲ့ကို ကျေးဇူးတင်နေရတာပါဗျာ "

ထင့်စကားကြောင့် မေမီ့ဆီမှ မျက်စောင်းနုနုလေးတစ်ခု ဝဲပျံလာလေသည် ။

" သူဌေးကလဲနော်...သိပ်ပြီး နှိမ့်ချတတ်တာပဲ ၊ မသိများမသိရင် ကိုထင့်ဆိုင်က သေးသေးလေးလိုမျိုး ပြောနေတယ် "

ထင်ကတော့ ပြုံးရုံလေးပြုံးလိုက်မိသည် ။ မေမီမိုးလို နာမည်ကြီးမင်းသမီးတစ်ယောက်က သူ့ဆိုင်ကို လာပြီး လိုအပ်သည်များဝယ်ယူသည်က မထူးဆန်းပေ ။ ထိုအရာထက် ပိုအရေးကြီးသည်မှာ မေမီမိုးက ဝယ်ယူထားသည့်ပစ္စည်းများကို သူ့ဆိုင်မှဝယ်ထားခြင်းဖြစ်ကြောင်း အများသိအောင် ကြော်ငြာပေးခြင်းပင် ။ မေမီမိုးပစ္စည်းတစ်ခါလာဝယ်ပြီးသည်နှင့် ထင့်ဆိုင်တွင် ဝယ်ယူသူများလာသည်မှာ အကြိမ်ကြိမ် ။ ထို့အတွက်ကြောင့်လည်း ထင်က မေမီမိုးအတွက်ဆိုလျှင် အမြဲအချိန်ပေးဖြစ်သည် ။

" မေမီ တက်ရမဲ့ပွဲရဲ့ အနေအထားကို ကျွန်တော့်ကို နည်းနည်းပြောပြပါလား ၊ အဲဒါမှ ကျွန်တော်က အဝတ်အစားရွေးပေးလို့ရမှာ "

" ပွဲကတော့ လူငယ်ပွဲပဲ ကိုထင် ၊ အနုပညာအသိုင်းအဝန်းက လူတွေကိုလဲ ဖိတ်ထားတယ်တဲ့ ၊ စီးပွားရေးသမားတချို့လဲ ပါမယ် ကိုထင် "

မေမီမိုး ပြောနေသည့် စကားများကို ထင် အာရုံစိုက်ပြီးနားထောင်နေရင်း မျက်လုံးများကိုလည်း ဆိုင်အတွင်းဝေ့ဝဲကြည့်၍ လိုက်ဖက်မည့်အဝတ်အစားများကို သေသေချာချာ ရှာဖွေနေမိသည် ။ ထင့် မျက်လုံးအာရုံကို ဖမ်းစားသွားသည်မှာ ပြောင်လက်တောက်ပနေသည့် အနက်ရောင်ဂါဝန်တစ်ထည် ။ ချုပ်လုပ်ထားသည့်ပုံစံက ခန္ဓာကိုယ်ကောက်ကြောင်းကို ဦးစားပေးထားသည့်အတွက် မေမီမိုးနှင့်ကွက်တိ ။