| دُجـى في جوف البـغي |

•الفـصل الثالث•

بقيت اتگـلب بمكاني و ما گدرت ارجع انام انما مثـلت النوم
بالـسبعة صار صوت برا بالمطبخ يمكن الحجـيه و الحجي گعدوا
اجيت اطلع بس جودي استوقفتني الي گعدت قبل شوية و هي تگـول

- هسا مجيد و غياث موجودين اخذي من حجاباتي

نسيت موضـوع الحجاب اصلاً
انطتني حجاب و ذبيته على راسي طلعت غسلت و دخـلت للمطبخ
صبحت على الحجـي قاسم و زوجته الي ديتريگـون
بس نظراتهم منصبه على الواگـف عند الطباخ و هو يدندن
خلى طاوة البيـض على الطاولة و گـال بسخرية

- حجـيه نائله عندچ خدامه و انتِ تسوين للحجي ريوگ

و التفت عليه و كمل بذات النبرة

- خدامه چـيس حب

تغاضيت عن الاهانة بصعوبة بسبب وجود الحجي
الي گـال بغضب

- غـياث احترم نفسك عيب شنو هذا الكلام

تجاهل المدعو غياث الحجـي و هو يشـرع بالأكـل
عگدت حاجبي مغتاضه من هذا النرجـسي المغرور
التفتت للباب الي دخل مـنه مجيد
الي بس شاف غياث گـال

- ها ساقط جيت

- هلا بالساقط الصغير المدلل
والله و طالعتلك لحية و شوارب صاير رجال

صب مجيـد مي بگلاص و هو يگـول

- الرجولة مو بالحية و الشوارب

- اي صدگت يا اخوية و الا حتى جودي عدها شوارب

تـزامن كلامه وي دخول جودي للمطبخ الي رمقته بنظرة شزر
و هو ببرود كمـل اكله، نظرات الحجية عليه چـانت كلها غضب
صـابني الفضول اعرف القصة ورا هالرجـال
حضرت گـلاصات لجودي و مجيد و گعدوا يفطرون

و قبل لا يـنهض غيـاث من مكانه باوعلـي و گـال بجدية

- طلعي غراضچ من غرفتـي

تكفل الحجي بالرد و هو يگول

- ما چـنت موجود فـ خليتها تگعد بيها

- والله ما يهمني ان شاء الله تنام بالسطح غراضها متـبقى بالغرفة
بعدين تعالوا هنا انتوا من سمح الكـم تنطوها غرفتي

- هه ليش جحــر الارنب تسمي غرفة

حچاها مجيـد و الاخر رد ببرود متجاهله و موجه كلامه الي

- ما طول ما عندچ شي طلعي اغراضچ لا اقسم بالله اشمرهن بالشارع

و طلع و انـي بقيت اباوعله بنظرات حقد و كره انزرعت بگلبي ناحية هذا الرجال
زفـرت الحجي و گـالت باعتذار

- بنتي طـلعي غراضچ و تاخذين غرفة جودي
و جودي تصعد فوگ بوحدة من الغرف

- احسن حل لان هالـمخبل يروح يسويلنا سالفة

حچـتها جودي و تشكـرتها بهدوء
قبل لا اطلع و اني مغتـاضة و كاره الوضع، خفـفت خطواتي لمن شفته واگـف بالباب مال الغرفة
عگدت حاجـبي و باوعتله بنظرة غيض
فتت للغرفة و بـديت اطـلع بملابسي
اخذتهن و مشيت من گـدامه بس توقفت برعب لمـن گـال بسخرية