قسر الرواسن

بارت ٤٦

هزيت راسي كال .. إذ استمر مستوى الوعي في التدهور، ويختل انتظام ضربات القلب، يحدث فشل كلوي فـ نضطر نشيل كليتها الثانيه

فتحت عيوني ع وسعهن وهو همس .. تكوم بالسلامه ان شاءلله

كعدت وايدي ع راسي ظل الدكتور، يراقب حالتها لمن سمحلي ادخل طبيت شفتها مغمضه واوكسجين ع وجها ،وكانيولا بأثنين ايديها

صدرها يصعد وينزل تتنفس بأنتظام
دخل الدكتور وراي ،كتله .. دكتور هسة هي نايمة !

كال .. اي اول ماصحت، باوعت للغرفه ورجعت غمضت عيونها ومانطقت ولا حرف

- زين دكتور تضل تتنفس، ع الاوكسجين

خبط الابرة وكال .. حسب اذا كعدت، وتكدر تتنفس مايحتاج بس اذا تواجه صعوبه بالتنفس نخليها ع اوكسجين بين مايتحسن وضعها

سكت شوية وكمل .. لا تخاف ان شاءلله زينه

تنهدت وكتله .. الله يطمن كلبك دكتور
طلع وانا سحبت كرسي، وكعدت كبالها سحبت ايديها بستها حيل وشميتها وخرت شعرها عن عيونها وبست كصتها انتظرتها تكعد لكن تأخرت صارت الساعه بـ ٩ بالليل اجه الدكتور كال .. مايصير تبقى نايمة لازم تكعد تاكل تشرب علاجها

كام يكعد بيها ضربها ع خدها مرتين وصحاها فتحت عيونها بتعب باوعتله وغمضت حيل
كال الدكتور .. كعدي بابا يله صارلج نايمه من الضهر

ماردت دار وجهة عليه الدكتور كال .. جيبلها اكل صحي مثل شوربة وعصاير واهم شي مي لان هي طول اليوم ماشاربه

هزيت راسي وكمت جبتلها، اكل وتذكرت هي تحب الكرز هم جبتلها ورجعت لكيت الدكتور يشيل الكاينولا من ايدها وخلة وحدة ضربها بيها وطلع
سحبت الكرسي وكعدت مقابيلها طلعت الاكل

سندتها تكوم وهي صافنه عدلت كعدتها وخليت المخدة ورة ضهرها ،فتحت الاكل ردت اوكلها  همست .. انطيني انا اكل

رديت .. لا انا اوكلج ايدياتج، بيها كانيولا ماتكدرين

نترت .. انااااا اكل ماريد احد يشفق عليه ويوكلني

همست .. رواسن

بعدني مامكمل كالت .. مااكل ،من ايدك لو اموت

تنهدت دنكت راسي قدمت الصينيه قريب منها وانطيتها الخاشوكه اخذت الخاشوكه وايدها ترجف حطتها بالاكل ورفعتها تريد تاكل وايدها ترجف رجف
ويوكع الاكل من الاطراف بحيث توصل الخاشوكه الحلكها خلصانه

حاولت تكمش الخاشوكه بأثنين ايدياتها،بس ماكدرت ايدها ترعش رعش

سحبت الخاشوكه منها وهمست .. انا اوكلج

دنكت راسها غمضت ،عيونها وكمشت الفرشه حيل
صارت دموعها توكع وشهكاتها تعلوا ضليت ساكت
تقربت منها رفعت، راسها وقربت الخاشوكه من حلكها واباوعلها بحنيه همست .. اكلي