قسر الرواسن

بارت ١

دوم نسمع انُ الأهل سند،الاهل محنه
وأكثر الناس حرص همة الأهل
مرة من المرات سمعت وحده بالصالة
تقنع بعروس مجبوره ع الزواج
تكُللها .. اهلج يردون مصلحتج ماكو أب أو أم يأذون أولادهم بأجر عكبة راح تشوفين شكد كلامي صحيح وانُ الأهل دوم ع حق.

ضليت مبتسمه إذن اني الحالة الشاذه في المجتمع واني الحاله الحرجه.
اكبر كذبه اقتنعنه بيها هي انُ كل الاهل يردون مصلحة أولادهم
وماكو ام تاذي أبناءها
وماكو اب مو زين
وماكو اخت تكره اختها
وماكو اخ ياذي أخته
هاي اكبر كذبه سمعناها
ليش؟!

لأن الأهل همٌ الي يحتضنون أولادهم
الام هي الي تربي وتسهر ،وتقلق، وتحط اولادها بعيونها مو كل وحده خلفت صارت ام
والاب الي يكعد ويه أولاده يسمع إنجازاتهم ويشاركهم نجاحاتهم، وماتغفى عينه الا يشوفهم بخير
مو كلمن وفر فلوس وصرف ع ابنائه صار اب
وهو مايعرف وين واصلين ،شكد اعمارهم،شيحبون ،شيكرهون .

اني ما اكول لازم الام والاب يكونون مثالين وانما
اقصد الحنيه والاحتضان شيء كلش كافي.

ليلاً الساعه ٩
وكفت افتر ،والجكارة بيدي واحس راسي يفتر يفتر
وين صارت !!!!
ماتخملت اصبر اكثر رفعت الموبايل دكيت ع نجوى
تأخرت يالله ردت كلتلها .. هااا نجوى جابها هيثم؟

ردت..اي بس مو لهنا

نترت بيها .. ليششش؟

جان تصيح .. شبيج تسودنتي شلون ندخلها بليل

-من الباب الخلفي

كالت .. لا ماكدر اليوم اجو ناس كبار وحتى عصام مشغول بيهم

صحت بنبرة تهديد .. نجوى لا تخبليني جيبيها لا اطلع انا اجيبها

صكت ع أسنانها وردت بتوعد .. اذا طلعتي تعرفين شيصير ف لا تفتحين ابواب جديده عليج كافي الي دتعيشينه

-لعد جيبيها ماأصبر منا الباجر

-مشكلتج لازم تتعلمين الصبر حتى تعرفين تديرين حياتج صح

-نجوى عاد لا تتفلسفين براسي وتجبريني اتصرف تصرف اهجم الدنيا ع راسكم

-لعد هاهي كتلج انا اجيبها، بس مو هسة

نترت .. لعد شووكت

ردت .. باجر بـ٧ صبح اخلي عصام يدخلها من الباب الخلفي

-خليت وسديت الموبايل بوجهه

طفيت الجكارة وتمددت ع جرباية شوية ورفعت راسي الساعه بـ ٩ ونص

جوعانه بس مابيه حيل اطلع اكل تلعب نفسي من هذا المكان
كمت قفلت الغرفة
ورفعت التشيرت شمرته، وطفيت الضوة ونمت

لثاني يوم ندك باب غرفتي، صحت .. منووو
اجاني صوت نجوى .. انا كوومي فتحي الباب اجت ميسم