Unicode
ရှောင်းကျန့်က နေ့ရက်တွေကိုပြက္ခဒိန်ပေါ်ရေတွက်ထားတတ်တယ်။ ဒီနေ့က ဆယ့်ခုနှစ်ရက်မြောက်နေ့ဖြစ်ပြီး ဝမ်ရိပေါ်ဆီကို ရုပ်ရှင်အတူကြည့်ဖို့မရမကတောင်းဆိုထားတဲ့နေ့လည်းဖြစ်တယ်။
မနေ့ညကထိ မသွားဘူး ဆိုပြီးပြတ်ပြတ်သားသားငြင်းထားသူက ဒီမနက်မှာတော့ လက်မှတ်ဖြတ်ပြီးသွားပြီဟုဆိုပြီးရုံကိုခေါ်သွားဖို့ရောက်လာတယ်။ အရင်လိုဆိုင်ကယ်မဟုတ်ဘဲ ကားကိုမြင်ရတဲ့အခါ ရှောင်းကျန့် ပါးစပ်အဟောင်းသား။
" မတက်ဘူးလား "
တစ်ဖက်ကလှမ်းအော်သံကြားမှရှောင်းကျန့်က ကားတံခါးကိုဖွင့်ပြီးတက်တယ်။ အထဲရောက်တာနဲ့ခါးပတ်ပတ်ပြီးခေါင်းအငြိမ်မနေဘဲ လှည့်ပတ်ကြည့်တော့တယ်။
" ဆိုင်ကယ်ကရော "
" ပြင်စရာလေးရှိလို့ .. လျှောက်မကိုင်နဲ့ ဒါသူများကားဌားလာတာ "
ကားတွေအကြောင်းရှောင်းကျန့်မသိပေမယ့် ဒီကားပုံစံကထူးထူးခြားခြားရှိပြီးသာမန်မဟုတ်တာတော့သိတယ်။ ဘယ်လိုလူမျိုးကဌားလိုက်လဲမသိပေမယ့် ရိပေါ်ကိုယုံကြည်တဲ့လူပဲဖြစ်ရမယ်။
ရှောင်းကျန့်ကသူ့လက်နှစ်ဖက်လုံးကိုပေါင်ပေါ်ငြိမ်ငြိမ်လေးတင်လိုက်ပြီး
" ရိပေါ်မှာ ကားလိုင်စင်ရှိတယ်? "
" အင်း ဆယ့်ရှစ်ပြည့်ထဲက "
အာရုံစိုက်မောင်းနေသူကို ရှောင်းကျန့်တစ်ဖက်ကနေခိုးတောင်မကြည့်နိုင်တော့ဘဲ ပေါ်ပေါ်ထင်ထင်ငေးတယ်။ ရိပေါ်က ရိပေါ်ပါပဲ။ ဘာလုပ်လုပ်ကြည့်ကောင်းလွန်းနေတော့ ရှောင်းကျန့်ရင်ခုန်တာပေါ့။
" ရိပေါ်ကားမောင်းတာကိုတစ်ခါမှမတွေ့ဖူးဘူးလားလို့ "
" လိုင်စင်ရသွားတဲ့နောက် ဒါပထမဆုံးမောင်းတာ"
" ဟင် "
ရှောင်းကျန့်လက်က ခါးပတ်ကြိုးကိုတင်းနေအောင်ကိုင်လိုက်မိရက်သား။ ရိပေါ်နောက်နေတာတော့မဟုတ်ဘူးမှတ်လား။ ယုံကြည်ပြီးတက်လာမိကာမှ နောက်မှကားဟွန်းသံတွေဆူဆူညံညံကြားလိုက်ရတဲ့အခါ ရှောင်းကျန့်ဘုရားတရတယ်။