رواية #القائد بقلم / اسماء جمال جمعه

اعلان عن الجزء التانى #القائد

امتى اعرف ان انا في علاقة سوية رغم وجود خلافات
١/ نفسيا بتتحسن و هو عامل مساعد في ده
٢/ ماديا بتتحسن و هو عامل مساعد في ده
٣/ صحيا بتتحسن و هو عامل مساعد في ده

لو ماتوفرش الثلاث حاجات دول يبقى انت مريض علاقه سامه و العلاج يا ف الانسحاب فوراً يا ف اللجوء لاستشارى نفسى تفهم معاه هل المشكلة اللي بينكم هي مجرد اختلافات في الفهم و الشخصية و محتاجين طريقة تخرجوا بيها احسن ما عندكم (ولا انتم في علاقة سامة من الآساس؟!)
دوروا على حلول و ارفضوا دور الضحيه ..

- طب كل العلاقات فيها مطبات ، فيها عراكيل ، نفرّق ازاى بين السكه الغلط و السكه الصح !!

- طب اسمعى ،، علامات تدل ان الراجل اللي في حياتك بيحبك حب صحي ؟!
بيحب يسمعك ويتكلم معاكي و يتونس بيكى
بيحب اللى تحبيهم و يزعل لو حد زعّلك
بيفرح لنجاحك و بيفتخر بيكى و بيحسسك ان قيمته من قيمتك
بيقدم تضحيات عشانك و مستعد يتناقش لمجرد ان الموقف يخصك انتى
شايف الحلو اللى فيكى زى ما شايف عيوبك و فرحان بمميزاتك و مش بينكرها
بيشوفك حلوة حتى ف اسوء حالاتك و دايما ياخد باله و يحس ب اي تغيير عليكي او تعب
مش بيتكلف و هو بيتعامل معاكى و بيتصرف بجزء كبير من العفوية
عايز يجبلك الدنيا كلها ويفرحك
وقت زعله و غلطه بيرجع يراضيكي و يوم ما بتغلطر بياخد موقف حتى لو بحزم لكن مش بتهوني عليه يمشي و ينهي اللي بينكم
بيقولك دايما انك العوض .. ^^

و ف مقابلهم فى (10) علامات تدل ان  علاقتك بشريك حياتك لها تأثير سلبي عليك و على صحتك النفسية

1/ ردود افعالك مبالغ فيها معاه ..حاجة بسيطة ممكن تقلب مودك و تنرفزك عنده صفات بتضغطك و مش عارف تتعامل معاه
2/ بتحس باوقات خنقة كتير اثناء وجودك جنبه وده من احساسك الدائم انه مش فاهمك
3/معندكش طاقة تحاول في الحاجات اللى كنت بتحاول فيها زمان و رصيده قرب يخلص
4/كل مرة بتختلفوا بيبقى الخناق فيه تجريح و ماعندكمش مراعاة لنفسية بعض وقت العضب
5/ بتتعصب مرة واحدة وىتنفعل عليه
6/تفكيرك بقي سلبي عنه و عدد الحاجات السلبية اللى مركز عليها فيه هو الغالب
7/بتفكر دايما ف ذكريات الماضي المؤلمة معاه و بتستمتع اوى انك تقلب على نفسك المواجع و تفتكر المواقف الحزينة و تجدد احساس الألم من جديد
8/عندك مشاكل مع اهل شريك حياتك و مش حابب التعامل مع بعضهم بعد تراكمات كتير
9/عامل اللي عليك و مع ذلك بتحس بالإحباط لانك ممكن تكون بتعمل حاجات بالنسبالك هى الحب بالنسباله هو مختلف
10/ بتحس اوقات ان علاقتك بيه تعلق مش حب صحي

خليكوا صُرحا مع نفسكم و شوفوا عندكم كام نقطة من دول و متعيشوش دور المظلوم ..مفيش في العلاقات حد مظلوم ..
العلاقات عبارة عن طرفين
١/ ناس ظالمة نفسها
٢/ ناس ظالمة نفسها و اللى حوليها

لو شايف انك في علاقة سلبية مش حاببها تأكد انك مش مظلوم و ان حاجات كتير من الاذى الواقع عليك انت مكمل فيه عشان محققلك مكاسب ثانوية ..
زى انك حابب دور المستنزف
او حابب دور الضحية
او فرحان بإستعطافك للناس
حتى لو مكمل في علاقة مؤذية دورك تجاه نفسك انك تكرمها ، ترفع عن نفسك المهانة ، تعزز نفسك ، تبطل تكون شخصية ارضائية ..
تكمل فيها و لكن مش و انت من المستضعفين ..
لو مش هتكون شخص متزن ما تلومش الا نفسك ..
العلاقات مفهاش حد مفعول به الا وهو اللي سمح وحابب الدور ده ..