نجمة : رجعت المملكتي نايمة بمكاني الي ارتاح بي نايمة على اجمل اصوات اصوات دكات گلب محمد نايمة بحضنة ايي حضنة الي اعتبرة مملكتي رجعت الراحتي واماني حضنه راحتي واماني الي نحرمت منها اشهر الي مااشبعت منها غير ايام نايمة على صدرة وايدة مخليهز على بطني محمد : صارلج شكد حامل نجمة : على حساب عمتي تكول بعد اسبوع وادخل شهر الثاني محمد : باجر اخذج للدكتورة تفحص وضعج نجمة : يي عمة حجزت موعد يمها باجر العصر محمد : شتكولين يجينه ولد لو بنيه حلوة مثلج نجمة : لا ولد محمد : عود ليش ولد نجمة : اني متأكدة راح يجيني ولد حلو محمد : بااستغراب عود ليش متأكدة نجمة : لان بابا هو كلي محمد : هاي شبيج حبيبتي شجاب ابوج بالموضوع نجمة : كمت كعدت كباله اسمعني بابا الفترة الفاتت ابداً معافتي ولا تركني جنت من انهضم وانقهر يجيني بالحلم يمسح على راسي ويفرحني لحد مايوم الي عرفت بي اني متهميني بشرفي تعرف شصار بهذا اليوم محمد : شصار نجمة : اسمع ضليت ابجي وابجي واحجي ويا رب العالمين واشهك بحيث الكلمة من تطلع مني تزرف الصخر بيومها نمت واني مهضومة حلمت بابا كلي صلاتج لا تعوفيها وانطاني سبع هيلات محمد : سبع هيلات شنو نجمة : ههههههه هي هاي المفاجئه السبع هيلات سبع ايام سبع ايام وظهرت برائتي وكعدت على عياط مراد محمد : صدك تحجين نجمة نجمة : ييي والله بابا مااعافني ولا دقيقه محمد : زين شدخل ابوج بسالفه الولد نجمة : من عرفت نفسي حامل بابا اجاني بالحلم وانطاني ولد محمد كلش كلش حلو عيونه مثل عيوني وابيض واشكراني وشعرة مثل خيوط الشمس انطاني يا وكلي هذا ابنج ديري بالج عليه واني اخذته بحضني وشبكته قوي محمد : نجمة تحجي واني صافن على كلامها متفاجئ معقوله اكو هيج ترابط بين الاب وبنته كرهت نفسي واشمئزيت من روحي لان ابوها جان يعرف ابرائتها وطهارتها ويجيها بالحلم يخفف عنها شنو هاي كميه الحب الي بيناتهم صح هو ميت ومموجود بالدنيا وحتى مو قريب من نجمة بس روحه وياها وماتركها فكرت الدقايق لو ابوها عايش وشافني هيج مأذي بنته جان شسوى بيه يمكن جان دفني واني عايش نجمة : محمد محمد هذا شبي ليش صفن محمد محمد : هاا حبيبتي نجمة : ليش صفنت محمد : صافن على كلامج حبيبتي نجمة : محمد اريد اطلب منك طلب محمد : كولي نجمة : اريد اوزع ثواب على روح ابويه وكالولي ميصير اسوين ثواب اذا مو زوجج يعرف لان انتي مااعندج مصدر مادي محمد : شتريدين توزعين نجمة : اسوي اكل واوزعه ثواب على روحة محمد : ادللي باجر اسوكلج وعكب باجر اطبخي نجمة : شكراً حبيبي محمد : عفواً حبيبت الروح نجمة : ثاني يوم كعدت من الصبح نظفت البيت ويا البنات وعمتي طارت من الفرح من عرفت اني ومحمذ رجعت علاقتنا مثل قبل وانشالله احسن من قبل وضلت تدعيلنا للعصر بدلت واخذتني عمتي هي ومحمد للدكتورة سويت التحاليل والسونار وطلع كلام عمتي صح صارلي حامل شهرين الا عشر ايام انطتني فيتامينات ومثبتات ورجعت للبيت عمي تغير 180 درجه ويايه من رجعت من الدكتورة يبوس براسي ويدعيلي الله يكومني بالسلامة وبيومها اكتشفت كل شي يصير بي حكمة ورب العالمين كال بكتابه الكريم بسم الله الرحمن الرحيم (عسى انت تكرهوا شيئاً وهو خيراً لكم ) صدق الله العظيم كرهت ايامي الي عشتها وياهم من بعد الكتل والذل والاتهامات بس وراها عمي صار زين ويايه ويحبني ويعاملني مثل بناته واكثر ومحمد صار زين ويايه وبطل يمد ايدة عليه محمد جاب المسواك وثاني يوم بديت اسوي الثواب على روح ابويه عمتي والبنات ساعدني هواي طبخنا برياني ولحم وفاصوليا وجاب محمد صناديك لبن شرب وخضروات كلهن سويناهن بسفري و وزعنا للعالم ويارب يجعل الثواب واصل بيومها اكبر غلطه غلطتها اني فكرت بااهلي كلت هو ثواب والاقربون اولى بالمعروف طلعت جدريه برياني ولحم وجدريه فاصوليا وخصورات وصندوك لبن و وكعت دم دخيل لمحمد علمود يوديني الاهلي اول شي مااقبل محمد : امج تبرت منج وكالت مااريدها شنو انتي ماعندج كرامة نجمة : رايحه اني الخواتي والاخوية مرايحه الامي وهذا ثواب على روح ابويه ورب العالمين وصانا بصله الرحم محمد : واذا امج مستقبلتج نجمة : اكون سويت العليه ورحت الخواتي والاخويه وماا عفتهم محمد : يلاا كومي نجمة : اخذت الاكل ورحت البيت اهلي الطريق كله افكر شلون راح يكون استقبال امي اليه راح تاخذني بحضنها لان ما متت وذبحني محمد لو راح تطردني زين خواتي شلون راح يكون استقبالهن واخويه حسين شلون راح يستقبلني طلعت روحي من الافكار لحد موصلت للبيت نزلت اني ومحمد وراح محمد يدك الباب واني نزلت الاكل طلعتلنا بيبي ام مهدي : ياا هلا اهلا اهلا تفضلوا تفضلوا محمد : يزيد فضلج نجمة : شلونج بيبي ام مهدي : هلا بيبي هاي شجايبه وياج تعالي ادخلي نجمة : اخذت بيبي مني الجداري واني رحت لمحمد اخذ منه صندوك اللبن محمد : اني راح انتظرج بالباب نجمة : ليش متدخل محمد : مااريد اشوف امج نجمة : محمد شبيك محمد : نجمة حبيبتي مطايقها ترى وماريد اشوفها اني راح انتظرج بالسيارة نجمة : محبيت اناقشه دخلت للبيت رحت للمطبخ شفت امي مثل مااهي ماامتغيرة بالعكس اصلاً صايرة احلى وشعرها صابغته عسلي راجعه شباب رحت عليها بوستها شلونج يمة بشرى : الحمدلله انتي شجابج نجمة : والله مشتاقتلكم وطاك كلبي عليكم بشرى : زين جايبه اكل ويجاج نجمة : ردت اكللها هذا ثواب بس ماالحكت لان ملاك اجتي طايرة عليه تحضن وتبوس بيه فرحت كلش بحبها اليه ومين عليها مشتاقتلي ملاك : لج حقيرة كطعتي بيه والله مكانج خالي بالبيت بشرى : لا خالي ولا عمي خلصت منها والبيت شحلاته من دونها ملاك : معليج بيها شعجب اجيتوا نجمة : باوعت على امي كاعدة تاكل من اكل الثواب ومندمجة ملاك : بااعي عليه شبيج صفنتي نجمة : وياج اكلج وين نورس ملاك : نورس ازوجت نجمة : شنوووو شلون تزوج اني ماادري بشرى : ليش انتي ولي امرها نجمة : اني اختها وجان لازم احضر وياها بعرسها بشرى : استبعدناج ماا منج فاايدة نجمة : ملاك ليش مكلتولي ملاك : شسولفلج يا اختي راح انطيج رقم نورس وانتي خابريها وافهمي منها نجمة : راحت ملاك جابت رقم نورس وانطتني ياا واني خليته بالجنطه علمود من ارجع اخابرها ملاك : ماا كلتيلي شعجب اجيتي نجمة : والله مشتاقتلكم وسويت ثواب البابا وكلت اجيبلكم بشرى : شنووووووووو نجمة : من عيطتها فزيت من مكاني شنو يوم بشرى : هذا الاكل الي اكلته ثواب على روح ابراهيم نجمة : ييي سويت ثواب البابا اني كلت هيج هي كاعدة على ميز الطعام وكدامها الجداري بحركه ايديها كلبت الميز والاكل بالكاع بشرى : وانتييي منوووو كلج سوووي ثواب الابووو الكو... نجمة : شبيج يمه غير هو ابويه بشرى : كوووون نمتي يم ابووووج وخلصتيني منج جاااايه علمود تحركين اعصااابي بنت الكو... نجمة :مااسويت جريمة علمود تغلطين عليه بشرى : انتي سويتي الانكس من الجريمة مسووويه ثواااب الابراهيم الكو.. لج اني اريدة يحتررررك بالاخررة ومحد يطفي ارررريدة يتوووسل الرحمة ومحد يررحمة مااااريد احد يذكره ولاااا اريد واحد يكووول عليه الله يرحمه وانتي جاايتني مثل الك... توزعين ثواب على روحة نجمة : هذا ابوية ومن واجبي اكون بارة بي واوزعله ثوابات مو ثواب واحد بشرى : كلتيلي تريدين اصيرين بارة بي مو نجمة : اني كلت اي ومااشوف نفسي غير اني مشمورة بالكاع والراشديات تتصافك على وجهي وجسمي عفت كل شي وحاوطت نفسي علمود ماا انضرب على بطني واخصر ابني ومااحجيت كلمة ولا كلت اخ ولا انطيت ايي رد فعل علمود ماا زيد بضربي عاافتني بعد ماا كطعت شعري رفعت راسي شفتها راحت على صندوك اللبن دارت الابطالة كلها بالسنك وتعيط وتغلط وتفشر عليه وعلى ابوية من خلصت ذب اللبن ضربت الجداري الواكعه بالكاع برجلها وخلت الاكل كله يطافر صار المطبخ كله عبارة عن برياني وفاصوليا متت قهر من شفت الاكل بالكاع هيج مذبوب كمت من الكاع وبدون ماانطق حرف واحد عدلت نفسي وطلعت من البيت على الدعاوي الي دعتها عليه ولو وحده من هاي الدعاوي رب العالمين يستجاب الها جان اني ميته بسببها طلعت من البيت واني مكسورة الخاطر ——————————— هلاوو كيكاتي هذا حساب الانستا مالتي 👇🏻
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
