صباح الورد والاماني المحققه 💕
" لا تبوح بسرك للأخرين ، حاول أن تتذكر ذلك .. لا تتحدث عن أي شيء يخصك للآخرين أبداً ، مرةً أخرى أُعيدها لك لا تقل للآخرين أي شيء أبداً ."
نجمة : اول يوم اليه واني مخطوبة
كعت من النوم اباوع على ايدي
الحلقه موجودة بااصبعي وجبيرة عليه
تفتر داخل اصبعي
يعني هاي الحلقه الصغيرة المصنوعه من معدن
هي دليل على اني صرت على ذمة رجال
وراح اقضي ايام حياتي بااكملها ويا
كمت من فراشي
نزعت حلقتي وخليتها بالعلبة
ونزلت جوة لكيت امي وجدي وبيبي ام مهدي كاعدين يتريكون
نجمة : صباح الخير
ابو مهدي : صباح النور بنتي
ام مهدي: صباح الخير تعالي تريكي
نجمة : اباوع على امي اصلاً ماارفعت عينها من التلفون
كعدت اتريك وياهم
من خلصت الريوك كاعدة الم المواعين
اباوع على امي تباوع على ايدي
عرفتها تباوع على الحلقه
شافتها ماكو بيدي
بشرى : ليش ماا لابسه الحلقه
نجمة : جبيرة عليه
بشرى : يي جيبيها ابيعها واجيبلج اصغر
نجمة : لااا مااريد عوفيها
بشرى : انوب اضيع
نجمة : معليج بيهاااا حتى بالحلقه تدخلين
بشرى : سدي حلكج لااا اجي اسدلج يااا بطريقتي
وانتي تعرفين طريقتي
نجمة :عفتها وصعدت للسطح
نظفت السطح
والغرف الفوك ونزلت على الطابق الارضي كله نظفته
لحد باب البيت والطرمة
ظهري نكسر
رحت سبحت
ودخلت للمطبخ كمت اسوي الغدة
هذا كله واني وحدي
وامي لازمه التلفون لو تطلع للمطبخ لو تدخل الغرفتها
لو تدخل للحمام
اني من كثر التركيز بحياتها وبتفاصيلها
تعبت وعقلي تعب
وحتى جسمي تعب من وراها
خلصت الغدة
وكعدت شويه ارتاح بالمطبخ
دخلت امي الضحكة مااخذه وجهه والحلك مفتوح من الاذن للاذن
بشرى : هاج هذا محمد يريد يحجي وياج
نجمة : شيريد
بشرى : اكلي نعل واحجي ويا عدل
نجمة : هف
اخذت التلفون منها
وهي طلعت
خليت التلفون على اذني
وكلت هلاو من ورى خشمي
اجاني الجواب بعيااط
محمد : احجييي عدل لج لااااا اجي اشكه الحلكج
نجمة : صارت الغصه بلعومي
نهضمت من عياطة
ضليت ساكته
محمد :لوو يمي جاااان عررفت شصرف وياااج طايحه الحظ
يلااا ولي
نجمة : سد التلفون بوجهي
هو سدة واني دموعي نزلت
كلمة وحده حجيت ويا
واخذت كل هذا الكلام من عنده
لو احجي كلمتين شيسوي بيه
بهذا التصرف محمد عباله يسيطر عليه
ويفرض وجوده بحياتي
هو مااجان يعرف بهذا تصرفه خوفني من عنده
كمت افكر شلون اكدر اتعايش ويا
وهو بهاي العصبيه وهذا الكلام
افكر بتصرف محمد وبيدي تلفون امي
ومثل كل مرة
دخلت على الوتساب وشفت المسجات والصور
انقهرت من شفت صورة الها
بسيت مال نوم الي اشترته من الفلوس الي نطتها ام محمد الامي على مود خطوبتي
جان السيت كلش حلو لون بنفسجي طوخ وقصير
وجسمها كله طالع
طلعت من الوتساب وقفلت التلفون
وعفته على الميز
دخل خالي مهدي
مهدي : هااا مسويه غدة
نجمة : يي خالي
مهدي : شمسوية
نجمة: باميا وتمن
مهدي : يلااا صبي وجيبي الغرفه ابويه
نجمة : ماادام طلب الغدة بغرفه جدي يعني
يريد ياخذ فلوس من عنده
وهو خالي مهدي خيرة يسد عين الشمس
كل خوالي خيرهم يسد عين الشمس مو بس خالي مهدي
بس يستحيفون تقاعد جدي ينصرف على بنات ابراهيم
حالهم حال امي
امي تستحيف بينه فلوس ابوية
وهما يستحيفون بينه فلوس جدي
والسبب لان احنا بنات ابراهيم
ولا عبالك هذني بنات ابراهيم
يكونون بناتها البشرى
وبنات اختهم الخوالي
بس لا حياه لمن تنادي
صبيت الغدة
واخذته ورحت الغرفه جدي
وكعد خالي ياكل
اول ماا اكل لكمة كام يعيط ويغلط عليه باابشع انواع الغلط
ولو العياط والغلط يموت جان هسه اني ميته وشبعانه موت
اريد افهم هو ليش يغلط
وبيبي ام مهدي هم تريد تفهم ليش يعيط ويغلط
وعلى عياطة حتى ملاك ونورس نزلوا من فوك
والسبب جان يضحك
وبنفس الوقت يهضم
لان الباميا ناقصه ملح
من عرفت السبب
مااكلت شي بس حسبي الله ونعم الوكيل
صبيت اليه تمن وفوكا مركه وصعدت الغرفتي
صليت وكعدت اكل
وماانزلت لحد ماصاح عليه حسن
باوعت الدنيا ليل
نجمة : هاا حسن
حسن :هذا التلفون الج
نجمة : شسوي بي
حسن : ترى موو من عندي
من محمد
انطاني ياا وكلي انطي النجمة
هاااج
نجمة : اخذته واني فررحانه بي
فرحانه مو لان صار عندي تلفون
لاا والله
فرحانه لان اول مرة تجيني هيج هديه حلوة
اخذته وصعدت النورس تفتحه
نوورس نورس
نورس : هااا عمري
نجمة : باعي محمد جابلي تلفون شلون اشغلة
نورس : شوو جيبيي
نجمة : انطيت التلفون النوري وكامت تفتح بي
نورس : لج يجنن هذا التلفون وحديث وغالي
نجمة : صدك
نورس : يي والله كلش حلو
باعي حتى كفرات جايبلج
شوفي شكد حلوات
نجمة : يااااي شكد حلوات
نورس : هذا بي سيم كارت وبي بس رقم واحد
نجمة :منو هذا الرقم
نورس : حبيب گلبج
نجمة : منو هذا حبيبي گلبي
نورس :اكو غيرة حمودي
ههههههه لج النوب كاتب على الرقم العافية واهلها
نجمة : شوو خلي اشوف
نورس : هاااج عيني هااج
بدت سوالف المخطوبين
نجمة: اخذت التلفون وشفت صدك كاتب على رقمة
العافيه واهلها
ضليت اضحك هذا شوكت صار العافية
نورس : من صار رجلج حبيبتي
نجمة: دولي خلي اكلب بالتلفون
ضليت اكلب بالتلفون واخذني الوقت
لحد مصارت ساعه 12 ونص
دك العافية وهلها
ضليت ارجف وماعرف شسوي
بالاخير جاوبت
اعتبرت هاي المكالمة اول مكالمة بيناتنا
جانت مبنيه على كلام وقرارات
وتفاهم واحترام
عكس مكالمه الصبح
نجمة : الو
محمد : شحلات الالوو من تطلع من حلكج
كون يمي واسمع هذا الصوت واشوف شفتج شلون تنطق الحروف والكلمات
نجمة : خجلت كلش
حتى من كثر الخجل صار جسمي حار ومااعرف شصار بكلبي
اول مرة انسان يسمعني هيج كلام
وهذا مو اي انسان هذا زوجي وخطبيبي
محمد : احجي حبيبتي
نجمة : شحجي
محمد : ايي شي ليش ساكته
نجمة : مادري
محمد : نجمتي الحلوة تعرفين اني احبج
نجمة : شوكت بديت تحبني
محمد : هاي سالفه طويلة
نجمة : سولفلي ياها
محمد : حاظر ياگلبي ادللي
اسمعي يانجمتي اني شايفج قبل مااتجين البيتنا
نجمة : وين مااذكر شايفتك
محمد :تذكرين بيت صديقه ملاك
من صارت عدهم مناسبة
نجمة : رجعت الذاكرتي القبل 8 اشهر صدك اخو صديقه ملاك صار عرسه
وصديقه ملاك عزمتنا ورحنا اني ونورس وملاك
بيومها كلش تونست
محمد : اني اصير صديق براق ورابي بيتهم من الصغر واهله يعتبروني ابنهم
نجمة : براق اخو شذر صديقه ملاك
محمد : ي اعرفها الشذر كلتلج رابي بيتهم ويعتبروني ابنهم
جنت واكف بالشارع ويا الشباب
واجيتي انتي ونورس وملاك
تتمشون اباوع عليج جنتي لابسه عبايه راس
وخواتج لابسات بناطير وفاكات شعرهن
الشباب مااتوا على خواتج واني متت عليج
حشمتج زادتج جمال فوك جمالج
ضليتي وقت العرس كله بعقلي وافكر بيج
الشباب تركص واني كاعد افكر بيج
يااحبيبت الروح
نجمة :هوو يحجي واني ازخ عرك من ورى الخجل
خليت ايدي على كصتي صخنت من كلامة
محمد : اكثر من مرى ردت ادخل للبيت اشوفج
بس اكول يمعود محمد اثكل شيكولون عليك العالم
ماصدكت صار موعد العشا
ودخلنا المناسف للمطبخ
جنتي واكفه انتي والبنات يم الغرفه القريبه على المطبخ
شفتج لابسه فستان اسود قصير
وتركصين ويا البنات
من شفتج بهاي الحاله كلت لازم اخطبج
فات اسبوع على زواج براق واني مزوحر
اريد بس هذا الاسبوع يخلص علمود اشوف براق
وشفت بارق وسألته عليج
ولكيته يمدح بيج وبااخلاقج وبااخلاق ملاك
كلي مااتلكي مثلها
رجعت من بيت براق وفاتحت اهلي بالموضوع
وطلعوا يعرفون اهلج جدج وبيبيتج وامج وخوالج
ابوية الصراحة موافق عليج
نجمة : انصدمت من كلي ابو موافق عليه
ليش موافق عليه شنو السبب
محمد : بااعي حبيبتي راح اكلج كل شي
بس لا يضل بخاطرج
اني اريد اسولفلج كل شي علمود مو بعدين
تكوليلي ليش مااكلتلي
نجمة : محمد كول شكو السالفه خوفتني
محمد : اسمعي ياحبيبت الروح
ابويه من عرفكم مااقبل عليج مو لان انتي بيج عيب
لا والله انتي ست البنات
لكن ماقبل من ورى بيبيتج وامج
نجمة : خفت لا يكون يعرفون بسوالف امي لزمت كلبي قوي لان كام يأذيني
شبيهم بيبي وماما
محمد : يكول عليهن طماعات ويحبن الفلوس اكثر من روحهن
ومستعداد يضحن بكلشي علمود الفلوس
عجز من عندي لان ضليت بس اتعارك ويا
وحتى للشغل كمت ماروح
هو شافني متمسك بيج ورايدج ياحبيبت الروح
كلي اهلها راح يوافقون علمود فلوسك مو علمودك انت الذاتك
كلتله ماايهمني شلون يوافقون عليه
المهم انتي تجين يمي وصيرين بحضني
وافق ابويه لان شاف الكلام ويايه ضايع
وامي كالت خلي اشوفها قبل مااخطبها
امي خابرت على امج وتفقت وياها على اساس اني اشوفج
وامج مااقرت جابتج العرس اختي
وتفاجئنه بردكم السريع كلت على الاقل فد يومين يالا يردون الموافقه
بس رديتوا الموافقه ثاني يوم الطلب
وابوية كلي
مو كلتلك راح يوافقون علمود فلوسك
اني مااهتميت الكلامة المهم حبيبت الروح صارت خطيبتي
وياارب اصيرين ام جهالي
نجمة : متت من القهر من سولفلي محمد
والي قهرني واذاني وهضمني
نظرة العالم النا
يباوعون علينا بالعين الصغيرة
واحنا والله ممحتاجين
املاك ابوية وراتبه يعيشونه ملوك
بس انانيه امي وطمعها وجشعها وحبها النفسها
هي الي خلت الناس هيج تباوعلنا
ضلينا نسولف اني ومحمد للساعه 4 الفجر
راح لان كال عندي شغل الصبح يادوب انام ساعتين
سد الخط محمد
واني هموم الدنيا صارت بيه
والتفكير دمرني واذاني
شلون راح اعيش وياا عالم يشوفوني مثل بيبيتي وامي
شلون اكدر اتاقلم ويا ناس يشوفوني بالعين الصغيرة
ضليت افكر وافكر وافكر
بس مالكيت الحل
قريت ايات قرآنيه
وفوضت امري الرب الكون
ونمت
———————-
طبعاً والله كتبت بارت طويل بس شكل الواتباد ونمسح البارت بااكملة
رجعت كتبت من البداية
لاتنسون النجمة والتعليقات الحلوة
احبكم كومات ❤️❤️
