صباح الجمال واغاني فيروز 🎼🎼
يمكنك أن تنسى الأماكن, الأحداث والزمان ويمكنك أيضاً أن تنسى إنساناً وتنسى حتى ما قد فعله لك, لكن لا يمكنك أن تنسى أبداً ما جعلك ذلك الإنسان تشعر به.
نجمة :من صارت مشكله مراد وشهد مااعرفنا شنو السبب
ومنو هاي البنيه الي جانت تدعي عليها شهد
وليش تدعي عليها
وليش من الاساس مراد يدافعلها
البيت كله صار اعصاب يريدون يفتهمون القصه
وخصوصاً عمي ابو محمد
اخذ البيت بصياحة وعياطة يريد يفهم ليش زعل شهد
عمي كلش يحب جناينه الي هي بنين وشهد اني مو من
ضمن جناينه لان اصلاً ميعتبرني موجود
ابو محمد : فهمني ليش زعلتها
مراد : يابه خلي تولي
ابو محمد : انعل ابوك لابووو البنيه صار سنين مشفنا منها شي جاي هسه تزعلها
مراد : يابه انت ماااتعرفها
ابو محمد : لااااا تكلي ماااتعرفها
اني اعرف البني ادم من نظرة وحدة
مراد : عجل انت ماتعرف شهد ونظرتك غلط بيها
ابو محمد : ابن القندرة ابن الك...
هسه تروح ترجعها المرتك وتبوس راسها
مراد : ماااارجعها لو اشوفها ميته
ابو محمد : عسااك انت ميت وخلصان منك
محمد : يابه اهدأ لا يصير بيك شي
ابو محمد : كو..واحدكم يسوي الي براسه
مااايحترك ولااا يقدر
ولد الك..
خرب بالشريف الي بيكم
نجمة : عمي نزل غلط على ولدة كلهم حتى محمد وميثم مااخلصوا من عندة
ويريدوا بس يهدأ
بالاخير عاف البيت وطلع
ام محمد : ابني هسه فهمني شبيك ويا شهد
مراد : اذا تلحون عليه اطلكها والله
ام محمد : زين منو هااي الي جانت تحجي عليها شهد
فهمني مصادق وحده
مزوج وحدة
مصخم ويا وحدة بس فهمني
مراد : عوووفج منهاااا هاي وحده عدها شرف العالم مثل الزلاطه
ماااتكول اذا اجيب طاري العالم وشرفها اطير بيها رؤوس والدم يوصل للركب
اجتي عليه مثل البلوة وانتقام من ربي
كلها كح... بس هي الشريفه
نجمة : كال اخر كلمة وطلع وركع الباب ورى
وهم ماافهمنا كلامه
ضل اسبوع البيت كله اعصاب من ورى مراد وشهد
لان عمي كل يوم يسوي مشكله علمود مراد يرجع شهد للبيت
وهذا مراد ميقبل يرجعها وماايقبل يفهمنا السبب الي يخلي ميرجعها
وحتى محمد مكاعدة افهم من عندة شي خلال هذا الاسبوع لان حاير بعمي وبالشغل لان يطلع للشغل ابدال عمي
ومن يرجع من الشغل يضل كاعد يمه
وبقت تصرفات عمي وياية مثل مااهي
ويمكن زادت اكثر
لان كام يسمعني كلام على اساس اني فكر
واني الي فكرت مراد وشهد
وهما صارلهم اسنين عايشين سوى ومابيناتهم مشاكل
وشعجب من اني دخلن البيتهم صارت مشاكل ومايقبل يرجعها
واني اسمع واسكت
لو الحايط يحجي اني مااحجي
مااخذه مبدأ ويا عمي
اسمع منا اطلع منا
صح انقهر وانهضم من كلامه بس شسوي
لازم اتحمل ومجبورة اتحمل
ورى الاسبوع جنا كاعدين بالمطبخ العصر
اني ومحمد وعمتي وبنين ومرام ومنار
انسولف ونضحك
دخل علينا مراد وسأل على عمي
مراد:وينه ابوية
محمد : طلع قبل ساعه كال رايح المكان مهم
مراد : يي خابرني وكال روح للبيت
محمد : هسه يجي ونفهم من عندة
مراد : نجمة كومي صبيلي جاي
نجمة : ادلل
صبيته لجاي وضلينا نسولف ونضحك
جمعتهم كلش حلوة
كلهم گلب على گلب
عكسنا تماماً
مااذكر فد يوم كعدنا مثل هاي الكعدة وسولفنا
جانت اني دائماً تنغص علينا
عكس عمتي اباوع عليها
شلون متونسة وتضحك ويا ولدها وبناتها وجناينها
دعيت الله يحفظهم
اقل الساعه ودخل عمي للمطبخ ويا شهد
وتحولت الوجوه من سعيدة ومبتسمة الى وجوه غاضبه وعصبيه
وخصوصاً مراد
اباوع عليه عيونه تريد تطلع منهن شرار
ولو غير عمي مرجع شهد على هذا غضبه جان دفنه بمكانه
بس سكتوا كلهم ومحد حجه حتى مراد
وكعدت شهد يم عمي
وعمي يبوس براسها ويضحك وياها
من شفت عمي هيج يعامل شهد
سألت نفسي سؤال لكن ماالكيت اجابه السؤالي
هل ياترى اذا اني بيوم من الايام صرت بنفس موقف شهد وتعاركت ويا محمد
عمي هيج راح يصرف ويايه
لو راح يخلي محمد يطلكني
ماا لكيت جواب غير علامات استفهام بعقلي
سارت الايام واني صارلي شهر من مزوجة محمد
جنت اكول محمد بهذا الشهر تعويض ربي اليه
تعويض عن الايام الي عشتها ويا امي
وتعويض عن ايام القهر والجوع والحرمان
محمد خلال هذا الشهر انطاني كل شي اتمنى وكل شي احلم بي
لكيت روحي احب انسان اني انجبرت على الزواج من عندة
انتظرة شوكت يرجع من الشغل علمود يسمعني كلام حلو وياخذني بحضنه
احضر نفسي علمود يشوفني بااجمل صورة واجمل منظر
احاول بكل الطرق مااقصر بحقه
وهو فرحان بيه لان كام يشوف بعيوني الحب اتجاهه
لكن مثل كل مرة فرحتي مااتكمل
ومااكملت فرحتي من دخلت الحياتي تبارك
تبارك اصير بنت عم محمد
عم محمد متوفي فجأة توقف عندة القلب ومات
رغم هو جان صغير
وتبارك عمرها جان شهرين
يعني مشايفه شي من ابوها
وراد جد محمد يخلي واحد من عمامها يزوج امها
محد قبل
والي فهمته من مرام
مرام : يي نجمة شتريدين تفهمين
نجمة : اريد افهم ليش متحبون ام تبارك
مرام : احنا معلينا بيها
يعني لا نحبها ولا نكرهه
بس هي سوت مشاكل كومة الامي
لان من مات عمي جان ابويه اغنى واحد بعمامي
وبدايه حياته ويحب يشتغل ويكون نفسه
وماا خلانا بعازة شغله
اراد من عدنا بس ندرس ونهتم بدراستنا
توفى عمي امي جان عدها ميثم ومراد ومحمد واني بس منار بعدها مجايه للدنيا
امي ساندت ابويه بكل شي
وابويه يموت عليها
شفتي شلون يحبها
نجمة : ييي والله اتمنى محمد يحبني مثل مااعمي يحب عمتي
مرام : محد يحب مرته مثل ابويه
لان هي باعت كل شي عدها من ذهب واملاك
وحتى ورثها من اهلها اخذته وانطته الابوية
هو فلوسه على افلوس امي كام يشتري بالعقارات
هاي ام تبارك مرادت واحد من عمامي رادت ابويه
نجمة : عود ليش
مرام :نجمة لاصيرين غبيه عجل صارلي ساعه الغي ليش
غير علمود املاك ابوية
نجمة : ياااا ايي هسه فهمت كملي
مرام : ييي رادت بس ابوية يزوجها
وجان ابويه يكوم ويكعد يكول اني مااكسر ام ميثم واجيبلها ضرة
هي الغاليه الي سندتني شلون اكسرها
هذا ابويه مو يحجي هيج
ام تبارك جانت تموت من غيرتها
وكعدت الامي ركبه ونص
كامت تخلقلها مشاكل من جوة الكاع علمود تخلي ابويه يطلك امي
حتى خلت اخوها يكمز على بيتنا بالليل من جان ابويه مسافر
وخلت ابويه يشوف اخوها بالبيت
نجمة : يمه غززة شنو هااي مجرمة
مرام : يمعودة بعدج مشايفه شي
نجمة : ييي وعمي شسوة
مرام : ابويه مااصدك الي شافه
خصوصاً هو يوثق باامي ثقه عمياء
وكال المرأة الي تسند زوجها بوكت عوزته هاي مستحيل تخون
وهو اصلاً من دخل على امي للغرفه لكاها حاضنتني وحاضنه محمد لان جنه جهال
وميثم ومراد فارشتلهم فراش بالكاع
نجمة : الله ينتقم منها
مرام : ايي من صارت هاي المشكله والكل عرف بالي سوته ام تبارك
قرروا يشترولها بيت باسمها ويكعدوها بي
وينطوها كل شهر راتب
وطبعاً ابويه هو الي اشترالها البيت
لان هو جان بوقتها حالته الماديه زينه
راد يشتريلها بيت يم بيت اهلها
بس هي مااقبلت لان بيت اهلها بالعرب
ودكت رجل ورجعت اسوي مشاكل علمود يشترولها بيت يم بيت جدي
نجمة : بيت جدج بهذاك الوقت جانت المنطقه مالتهم كلش راقيه وغاليه
مرام : ييي هو هذا هدفها
وامي خطيه تعرفيها كلبها طيب
لزمت وباعت كل ذهبها رادت بس تخلص من مشاكلها
وانطتها الابويه وابويه باع سيارته وجمل من فلوسه
واشترالها بيت يم بيت جدي
وكاموا كل شهر ينطوها راتب
نجمة : عجل ليش هسه راح تجي يمنا
مرام : لان ام تبارك الله لا يرضى عليها
باعت البيت
نجمة : عزة اكو واحد يبيع بيت هو عايش بي
مرام : حسب كلام ابوية
تكول باعت البيت علمود تدخل بمشروع وتعيش حياتها هي وبنتها تبارك
بس ناصبين عليها ومااخذين افلوس البيت وطافرين
والراتب مكاعد يكفيهم لان الاجار غالي
وتوسلت باابوية
تريد بس غرفه من بيتنا تعيش بيها هي وبنتها
وابوية يكول مااكدر اذب لحم اخويه بالشارع
خصوصاً تبارك هي ذكرى من عمي
وجدي قبل ميموت وصى ابوية بيها
نجمة : خطيه هاي تبارك
مرام : والله محد غيرج الخطيه
نجمة: ليش
مرام : شايفه مصايب ام تبارك
نجمة : يي الله لايرضى عليها
مرام : تبارك بعد اضرب من امها
نجمة : يعني شلون
مرام : تبارك مصيبه وخبيثه وميوكف بعينها احد
لا عم ولا خال ولا حتى ام
وهسه من تجي راح اشوفيها
نجمة : خوفتيني منها
مرام : عجل خلي اسولفلج
نجمة : ييي سولفي
مرام : باعي نجوم
ميثم اول مااشب جان احلى واحد بالعشيرة كلها
ابوية جان شايف ميثم ومشايف غيرة
خلى يكمل دراسه واشتراله سيارة واحلى الملابس والفلوس بيد ميثم يصرف
وهو حلو وكل اسبوع جان ينزل البغداد جماعته هناك
نجمة : ييي كملي
مرام : بنات العشيرة من عشيرة امي وعشيرة ابوية سون المستحيل علمود يزوجن ميثم او يخلنا يحبهن
هو كان بس يضحك على تصرفاتهن
لحد ماايوم جنا بيت جدي بالعيد
جان ميثم نايم بغرفه عمتي لان راجع من بغداد وجاي تعبان فنام بغرفه عمتي
منحس اذا مو ميثم نزل اعصاب وطلع من بيت جدي
انريد نفهم شبي ماافهمنا
بعدين من رجعنا البيتنا عرفته تبارك طابه لميثم بالغرفه وهو معصب ونازل من الغرفه
نجمة : عزة بعينها
مرام : انتي كضيها عزة وعزة
نجمة :عليك الله مرام هم تبارك مخليه عينها على محمد
مرام : ولي لاتحلفيني
نجمة :بداعت عمي وعمتي احجي
مرام : اييي مخليه عينها عليه
وهسه تعابرج عدوتها
نجمة : ليش
مرام : لان على اساس جدي قبل ميموت كايل الابويه خلي محمد يزوج تبارك
وابوية كايله محمد بعدة صغير
وجدي كايل عجل خلي عينك على تبارك
وهنا لازكات لزك من هذاك الوقت الهذا الوقت
محمد لازم يزوج تبارك
ومن ازوجج بالعرس صارت عركه شكبرها
نجمة : ليش
مرام : على شلون محمد يزوج غير تبارك وجدي موصي وصيه لازم يزوجون
نجمة : ييي كملي
مرام : ييي عاد ابويه كاللهم مااكو هذا الحجي
جدي كايل الابويه اذا تكدر زوج محمد التبارك وابوية من كايله بعدة محمد صغير كاله عجل خلي عينك عليها
لان صدك جان صغير محمد
عمرة جان يمكن 13سنه
نجمة : زين ومحمد هم جان يحبها
مرام : شيحب منها هو غير جان صغير
نجمة : لااا قصدي من كبر مااحبها
مرام : لاا مااذكر كال فديوم احب تبارك
بيوم الي حب كال اني احب بنت ابراهيم
وكوم الدنيا وماكعدها علمود ابويه يقبل يزوجه
نجمة : كلام مرام طلع كله صح
عن تبارك وامها
للمغرب حضرنا الغرفه الي راح تعيش بيها تبارك وامها
وهاي الغرفه هي الي بصف غرفتي الي قريبه على باب السطح
عمتي حظرت العشا
واني واكفه يمها
ودخلت علينه مره بس لالا هاي مو مره
هااي دبابه مصفحى
شطولها وشعرضها
يعني اني وعمتي بالنسبه الها نمله ونحله
وهي فيل
ويا هذا الفيل قصدي ويا هاي المره
بنيه بس اصغر بشويونه من الفيل
يعني الفيل وابن الفيل
هم ضخمة وطويله وبشرتها حنطاويه
مااتشبه امها ابداً
امها سمرة وعيونها صغار
وهي حنطاوية وعيونها كبار
ام تبارك : شلونج ام ميثم
ام محمد : بخير انتي شلونج
ام تبارك : ادمج انتي بخير اني هم بخير
ام محمد : شلونج عمه تبارك
تبارك : الحمدلله عمه انتي شلونج
ام محمد : الحمدلله
ام تبارك : هاااي جنتج الجديدة
ام محمد : ييي هاي زوجة محمد
ام تبارك : ييي مابيها شي
بس ترى ملايكه لمحمد ابداً
تبارك : ييي والله محمد وين وهي وين
ام محمد : كولوا يااالله صح محمد حلو لان هو ابني وطبعاً اشوفه حلو
بس نجمة يمه مثل الكمر
بس بياضها يكفي ويوفي
ام تبارك : جنها مااخذه عقلج
ام محمد :غير مرت ابني والبنيه مطيعه وحبابه واحسن تربيه
ام تبارك : هههههههه ضحكتيني والله ام ميثم
كلتيلي تربيه يااتربيه هاي غير هي امها بشرى
ام محمد : ييي والله مثل مااانتي مربيه بنتج وانتي ماخليتي مشكله ماا ذبيتيها براسي
مانريد نذكر الماضي
تكدرين اصعدين للغرفه ترتاحين بين ميجهز الاكل
مرام كومي يمه دليهن على الغرفه
مرام : حاظر يمة
نجمة : اباوع على عمتي عافتهن ودخلت للمطبخ الثاني
واهنا هزن ايدهن وراحن ورى مرام
واني ضليت صافنه هذني شبيهن حاميات عليه
خلصنا العشا اني وعمتي
وراحت مرام اصيح تبارك وامها
وعمي انطانا تعليمات تبارك وامها ابداً ميشتغلن ولا يشيلن كشايه من الكاع
يعيشن مثل الملكات بالبيت
نزلت ام تبارك وهي دشداشتها فيزون لاطشة على جسمها لون زركة وشامرة الشال شمر
ووراها تبارك هاي مصيبة خلتنا كلنا نفتح حلكنا
لابسه دشداشه قصيرة فيزون لاطشه على جسمها حتى حواز الملابس الداخليه طالعه لون شذري
والدشداشه بيها جااكة من الجهه اليمنه
وفتحه الصدر مخليه مقدمه صدرها مبينه
وملابسه حجاب
الولد مااهتموا كل واحد نزل راسه وكعدوا ياكلون
وكانما شي لم يكن
لان عمي ميقبل واحد يحجي وياها من الولد يكللهم بكيفها
بس اني شلون اسكت واهدي گلبي
واني اشوفها تباوع على محمد
اكلته اكل بنظراتها
محمد ميباوعلها ملتهي ياكل واني مااحطيت لكمة بحلكي من وراها
لان بس تدلع على محمد وكل شويه وكايله
عفية حمودي المي
عفيه حمودي من يمك الخاشوكه
حمودي انطيني الخبز
واني طلع العشا عليه سم من وراها
مااصدكت يخلص العشا واغسل الماعين واصعد الغرفتي
صعدت واني اقنع نفسي محمد يحبني
وميباوع على غيري
وهو تحدى الكل علمود يزوجني
كومة مبررات خلقت النفسي علمود
اريح نفسي من سوالف تبارك
بس مارتاحيت ولا راح ارتاح
&&&&&&&&&&&&&&&&&&&&&
هلاو كيكاتي
لاتنسون النجمة والتعليقات الحلوة
احبكم كوومات ❤️
