صباح الحب والاخبار السعيدة 💕
نجمة : عشت بصراع ويا محمد
ماكدر لا اسمع صوته
ولا اكدر اشوفه
وكل مااكول خلي انهي هذا الزعل
اذكر شجان يسوي بيه
وشلون يعذبني
ويحركني
ويغتصبني
بسرعه انفر من عندة وابعد واكوم اكرهه
ومااطيقه ابداً
هذا الزعل يروح عليه ايام ويرجع ايام
واني ومحمد مكانك راوح ماكو ايي تغير
ولا اكو ايي تجديد
ضليت انام يم عمتي بغرفتها
وكل ماا محمد يجي يريد يحجي ويايه اضل اعيط
واصيح وعمتي اطلعه من الغرفه
وتكله روح لاتجي
محمد : يمة اريد مرتي
ام محمد : شسويلها هي متريدك
محمد : يمه اقنعيها والله تعبت
ام محمد : طبك طب محد كلك صير مطي وامشي ورى كلام الحيايه
محمد :ندمان والله ندمان
ونجمة مكاعدة تعذرني وسامحني
ام محمد : البنيه الي سويته بيها مو قليل
حرام عليك والله راح يحاسبك عليه
وعلى كل دمعه نزلت من عينها
هاي يتيمه وحوبتها تسحك وتلحك وتاخذ ثلثين من الحك
محمد : مااادري يمه شصار بيه
والله غيرتي عمتني وماخلتني افكر
كوليلي شسوي علمود اسامحني
ام محمد : دقيقه اشوفها
نجمة : جنت اسمع كلام عمتي ومحمد
وابجي بقهر
مااعرف شنو اسوي
دخلت عمتي علية
ام محمد : مكافي بجي
نجمة : مااكدر والله ماكدر
ام محمد : حقج يمة
بس اسمعي هو واكف برى يريد يحجي وياج
نجمة : مااكدر اباوع بوجه والله
كل مااشوفه اذكر شسوى بيه
واكرها موو بيدي والله
ام محمد : خلص يمة ارتاحي محد يكدر يضغط عليج
نجمة : طلعت عمتي واسمع كلامهم
ام محمد : اكيد سمعت كلامها
محمد : يي سمعت
اسمعي نجمة
احلفج بروح ابوج اسامحيني
لان والله ندمان واعتذر عن كل اذيه ووجع سببتلج ياا
انتي تعرفيني اني احبج
وروحي بيج
وانتي حبيبه الروح
راح اعوف البيت واخليج براحتج شوكت ماا ترتاحين وتعرفين نفسح راح تكدرين ترجعيني بكلبج وبحياتج مثل قبل راح تلاكيني انتظرج على احر من الجمر
ام محمد : يمة وين راح تروح
محمد : راح اروح البيت صديقي هناك ابات
نجمة : مااهز كياني وخلى گلبي يدك
غير كلمة وحدة من عندة حبيبت الروح
هاي الكلمة الها تأثير كلش قوي عليه
اذكرت اول مرة حجاها
رجعت الايام الخطوبة
رجعت بذاكرتي الحبه واهتمامة
نجمة : هاااي وينه لمحمد كال ساعتين وارجع
شنو مااخابرتي
معقوله رجع وما ذكرني
والله ضل بالي
زين ليش من اخابرة ميجاوب شنو سالفته
ضليت انتظرة ساعتين بالاخير اتصل عليه
الو
محمد : هاا حبيبتي شلونج
نجمة : هااي وينك مااتكلي ضل باالي يمك
محمد : والله التهيت ويا جماعتي ومااحسيت بالوقت
نجمة : وتلفونك ليش مجاوب على اتصالي
محمد : حبيبتي والله نسيته بالسيارة ونزلت
وماا انتبهت للوقت
على سوالف الشباب ونركيله وجكاير نسيت انتبه التلفوني
نجمة : يعني نسيتني مووو مااشي محمد
محمد : هههههه انسى روحي ومانساج
نجمة : مااحجي وياك ومزاعلتك
وراح اروح انام يلا بااي
محمد : تروحين وانتي زعلانه مني
نجمة : عوووفني انتي موو نسيتني يلاا خلي اروح صارت الساعة ب 12
محمد : اوك روحي
نجمة : صدك تحجي
محمد : يي روحي يلاا باي
نجمة : ست الخط وراح
واني ضليت ابجي لان ماهتم الزعلي
يي وفوكاها يكلي احبج وين حبه اليه
كله كذب اصلاً ماايحبني
نص ساعه وخابرني
الو هاا شتريد
محمد : اروح فدوة للزعلان مني
انزلي اني باب بيتكم
نجمة :شنوو شجابك باع الساعه
محمد : مااكدر اعوفج تنامين زعلانة
يلاا بسرعه ترى جمدت من البرد
نجمة : نزلت اركض
فتحت الباب وهو دخل للطرمة
اباوع عليه وجهه يضحك وشايل بيدة بوكس
محمد : هيج الزعلانين يصيرون حلوين
نجمة : عوفني بعد مااحبك
محمد : ييي ولا تحبيني يكفي اني احبج
نجمة : وشنو هاي الابيدك
محمد : ههههه هاي هديه عجبتني وردت اجيبلج ياها باجر
بس انتي زعلتي وماايهون على كلبي اخليج زعلانة
جبت الهديه واجيتج
هااج حبيبتي
نجمة : فرحت بكلامة
اخذت البوكس وفتحته طرت من الفرح من شفته
كمت اكمز بنص الطرمة واضحك
جان البوكس عبارة عن حرفي بي ضوة
ونساتل و ورد وصدفيه مضيئه وفلوس كلش حلو
يووو حبيبي تخبل هاي الهديه
محمد : تستاهل حبيبت الروح
نجمة: شكلت
محمد : شكلت
نجمة :احجي شكلت
محمد : كلت تستاهلين
نجمة : لالا مو هاي قصدي
قصدي الوراها
محمد : حبيبت الروح
نجمة : حبيت هاي الكلمة كلش
محمد : ليش حبيتيها
نجمة : مادري حسيتها لامست گلبي
محمد : دام كلمتي لامست گلبج معناها اني داخل بااعماق گلبج
نجمة : عندك شك بحبي الك
محمد : لا
نجمة : بعد كل مرة من ازعل منك او اضوج كلي حبيبت الروح علمود اصالحك تمام.
محمد : ههههه تمام ياحبيبت الروح والگلب والعمر
لج انتي روحي
نجمة : يلاا روح قبل ما ماما تجي واشوفك
محمد : زين بوسه
نجمة : ماااكو
محمد : حق البوكس
نجمة : هذا البوكس لان زعلانة
محمد : زين الخاطر النستله
نجمة : ههههههه مااكو
محمد : الخاطر الحرف عمي
نجمة : هههههههههه مااكو يلا روح
جنت ادفع بي علمود يروح وهو يضحك
طلع وهو فرحان واني فرحانة
شنو الي تغير نجمة
وين حبكم وضحكاتكم
وين وعودة اليه
ربي ساااعدني وخليني انسى ولو جزء بسيط من الاذيه الي تعرضتلها من محمد
ضليت ابجي بهذا اليوم لحد مااعيوني انفخن وصار نظري يغوش
وماااشوف بوضوح
نمت على تعبي وتفكيري
كعدت ثاني يوم مااكدر احرك نفسي ولا اكدر اكوم من مكاني
الصداع ولعبان النفس ملازمني
لعبت نفسي بقوة
كمت اركض للحمام استفزغ
غسلت وجهي وطلعت من الحمام
المطبخ الداخلي قريب على الحمام وشميت ريحه كلبت معدتي
رجعت ركض للحمام وكمت استفرغ
على صوتي اجتي عمتي وبنين يركضن
ام محمد : شبيج يمه شو وجهج اصفر
نجمة : مريضه عمه
ام محمد : خير شبيج
نجمة : كعدت بس استفرغ ودايخه
بنين :لج خاف حامل
نجمة : لا هاي لان البارحة انقهرت فتمرضت
هاي طبيعتي كل مانقهر اتمرض
ام محمد : دتعاي للمطبخ خلي اسويلج شي دافي
نجمة : دخلت للمطبخ وعمتي سوتلي اعشاب دافيه
شربتها وماافاد بيه
ضليت كل اشويه استفرغ
والدنيا تفتر بيه
ضليت على هاي الحاله اسبوع
وبخلال هذا الاسبوع محمد ماادخل للبيت ابداً
وبقى يم صديقه
واني ماافاد ويايه كل شي
وبنين تكوم وتكعد وتكول انتي حامل
واني اكللها لا
بس على يا اساس اني اكول لا ماادري
لان مااجنت اعرف علامات الحمل ولا جنت افهم من الاساس شلون اكتشف اني حامل
بس جنت اكول لا وخلص
لحد ماايوم عاندت بنين الا اسوي اختبار حمل منزلي
واني اضحك عليها
واباوع على عمتي اشوف الفرحه مااخذه گلبها
مثل الي متأكد بس يسايرني
راحت بنين للصيدليه وجابت اختبار الحمل
هذا شلون استعمله
بنين : باعي هيج اسوين
واذا طلع خطين وانشاالله خطين حمر معناها حامل
واذا طلع خط واحد يعني مو حامل
نجمة : اخذت الاختبار وسويته مثل مااعلمتني بنين
اقل الدقيقتين وطلع خطين بوضوح
انصدمت وضليت لازمة الاختبار وصافنه عليه
يعني شنوو هسه
دقيقه هذا واحد ثاني خلي اجربه
اخذت اختبار ثاني وسويته
وهم اقل الدقيقتين وطلع خطين حمر واضحات
ضليت لازمتهن واباوع عليهن
يعني هسه اني حامل
يعني هسه بداخلي روح وطفل صغير
ههههههه يعني راح اصير ام واحبه وابوسه واللعب ويا
بعدني بضحكتي وفرحتي
واسمع دك الباب وبنين تعيط
بنين : يلااا يمعوده اطلعي
ضل بالنا
ام محمد : عوفيها على راحتها
بنين : عمه كلبي كام يدك اريد اهلهل
ام محمد : والله اذا طلع كلامج صح ونجمة طلعت حامل
انطيج خمسين الف
بنين : احلفي
ام محمد : وروح امي
بنين : لج نجمة يلااااااا اطلعي خلي اخذ الخمسين
نجمة : بااقيه بالحمام واضحك على كلامهم
وفرحتي ماانطيها الاعزاز گلبي
طلعت من الحمام واني اباوع بوجوهم
بنين : هاااا بشري
حامل موو
ام محمد : لج سخيفه انتظر البنيه مصدومة
يمة نجمة حتى لو مو حامل لا ضوجين نفسج
بنين : واني اضوووج اريد الخمسين
ام محمد : طايحة الحظ هسه الي يسمعج يكول مشايفه فلوس
بنين : لا فلوسج بيهن خير وبركه
هسه يلااا احجي
انطقي تعبتينا
نجمة : طلعلي خطين
اني كلت هيج
وعمتي وبنين كامن يهلهلن ويركصن
ويدبجن بالكاع ويصفكن
وعلى حس هلاهلهن طلعن منار ومرام
وعلى الواهس كامن يهلهلن ويركصن
بيومها الفرحة سارت على البيت كله
عمي كام يبوس براسي وحمويني ميثم ومراد باركولي
اباوع الفرحة مبينه على عيونهم
وحتى الولد كاموا يركصون وجهال ميثم هم على الواهس
الفرحه جان ناقصها شخص واحد
الي هو ابو الهذا الطفل محمد
بعد ما خلصت الحفلة والركص
صعدت الغرفتي
اباوع على نفسي باالمرايا
الزم بطني وفرحانه بيها
واريد اغمض عيوني وافتحها واشوف بطني جبيرة
احساس جداً جميل
مااكو مثل هذا الاحساس
اعتبر احساسي بحملي هو اعظم احساس حسيته بحياتي كلها
واكفه واضحك واحجي ويا بطني
واندكت الباب
فتحتها ودخلت عمتي
ام محمد : شلونج
نجمة : فرحانه كلش
تعالي ادخلي عمه
ام محمد : يي ادخل ليش لا
ويارب يجعل ايامج كلها فرح
نجمة : امين يارب
ام محمد : اسمعيني زين نجومة
كلتلج قبل انتي حالج حال مرام ومنار صح لو غلط
نجمة : صح
ام محمد : وهاي اليوم هم راح اكلج انتي حالج من حالهن بنتي واحبج
و واجب الام تنصح بنتها
انتي اليوم عرفتي اكو روح بداخلج ووفرحانه بهاي الروح
وهذا حقج مااكو احلى من هذا الاحساس
الامومه شي عظيم
بس الابوة هم حلوة
نجمة : يعني شنو
ام محمد : يعني ابو هذا الطفل لازم يعرف راح يصير عندة طفل
نجمة : كولولة اني شعليه بي
ام محمد : شلون شعليج بي
الطفل داخلج بعده بااحشائج
واكيد محمد يريد يحس بابنه
نجمة : يعني شنو قابل انطي يااا
ام محمد : ههههه اويلي عليج عقل طفله
الي اقصدة اكسري الزعل
وخليني اخابر محمد وافرح گلبه
انتي تعرفي هو شكد يحب الاطفال مو عاد اكله راح يصير عندك طفل من حبيبتك
نجمة : اخاف هم يجي واشوفه واذكر اسوالفه
ام محمد : اسمعيني زين
الانسان اذا يكول النفسه اني راح اتمرض اني راح اتمرض راح ينطي النفسه والعقلة طاقه سلبية
تتحول نفسيته تلقائياً الى سلبيه ويتمرض
اما اذا يكول النفسه اني راح افرح اني لازم افرح
اني لازم اضحك
عقلة وروحه ونفسيته راح يصير بيهن طاقة ايجابيه
وراح يفرح من ابسط الاشياء
وراح يضحك على اتفه الاسباب
اني كذالك من تكولين النفسج من راح اشوف محمد راح اذكر شلون ضربني وشلون جواني
عقلج راح ينفذ هذا الشي راح يذكر كل ذكرياتج المؤذيه ويا
اما اذا تكولين اني راح اكول لمحمد اني حامل
وراح نفرح
لو راح يجي محمد وهو فرحان لان طلعت اني حامل
وراح نفرح وراح نخطط شلون نربي ابنه وراح نضحك
عقلج راح يبعد كل الطاقات السلبيه
اعتبري احداث الفاتت والايام الي تأذيتي بيها ورقه واحركيها
مراح تكدرين تنسين صح
بس اتناسي
اضحكي على نفسج وكولي اني نسيت
بنيتي نجمة لازم تتعدين هاي الفترة
وافرحي واضحكي ويا زوجج
واعتبري خبر حملج بدايه جديده الحياتج
وهسه اني راح اعرفج واخابر محمد وافرح گلبه
وانتي فكري بكلامي
نجمة : طلعت عمتي
واني فكرت بكلامها
واقتنعت بي
اني الى متى اضل زعلانة وبس ابجي
اني لازم افرح واضحك واتونس
وخصوصاً جاايني قطعه جميلة من روحي
لزمت بطني وحجيت وياها
انت بداية حياتي الجديدة
انت املي وسندي وحبي
راح احميك مثل مااحمي نفسي
احبك اكثر من نفسي
نمت واني فرحانة
**********************
هلاو كيكاتي
صورة البوكس نزلتها بحساب الانستا
لان مادري ليش مكاعدة تنضاف من ضمن البارت
ولاتنسون النجمة وتعليقاتكم الحلوة
احبكم كوومات ❤️
