صباح العافية والتفائل
حته يبين المضموم اتمنى البشر من جام
بس المشكله من طين ماتعرف بكلبه شضام
نجمة : كعت من النوم واني جسمي كله يوجعني
من ورى القهر والهموم
نزلت للمطبخ مثل كل مرة
وكل صباح
شفت امي وبيبي ام مهدي وجدو كاعدين
يتريكون
صبحت عليهم
وسويتلي ريوك ورحت كعدت يمهم
جنت كلش جوعانه
بس من شفت امي نسدت نفسي
جانت فااتحه شعرها
صابغته لون عسلي
ولابسه دشداشه ربع ردن لون ماروني
مبين بياض بشرتها
ولازمه التلفون وتضحك
حالها حال المراهقات
من باوعت عليها
اذكرت كل كلمه كالها محمد وكل حرف
وافكر هم فد يوم اصير مثلها
وابيع بناتي على مود الفلوس
لااا والله بناتي راح يصيراً قطعه من روحي
ابيع الدنيا وماابيعهن
شكد ماايكون الانسان يحب الفلوس
بس ماايفضل الفلوس على اطفاله
واني متأكدة لوو يتقدملي شخص
اغنى من محمد وعندة املاك
راح تخليني افصخ الخطوبه وزوجني للغني
عفت الاكل وكمت
ام مهدي: ليش كمتي مااكلتي
نجمة :ماااشتهي
ام مهدي : اذا مااتشتهين ليش سويتي هذا الريوك
نجمة : انسدت نفسي
ام مهدي : حرام هاي نعمه الله
بشرى : عوفيها يمه هاي طايحه الحظ
نخطبت وكامت تتبطر
متعرف اذا اخلي عقلي بعقلها شسوي بيها
نجمة :اكثر من هذا شسوين مثلاً
بشرى : تندلين مكان ابوج
انبشه وادفنج بي
نجمة : ياريت على الاقل اخلص منج ومن انانيتج
بشرى : طااالعلج السان
ترى ومحمدومحمد اكوملج امسح بيج البيت
نجمة : البيت شبع مسح من وراج
حسبي الله عليج
شفتها كامت
صعدت اركض للغرفه
قفلت الباب وهي ضلت ادك بالباب
بشرى : افتحي الباب ياا ك... يا سا...
جبتلج رجال وطلعلج لسان
لج د... لا عبالج خلصتي مني
لو موو تزوجين لو يصير عندج درزن جهال
هم متخلصين مني
اني مثل خيالج
نجمة : كعدت بالكاع ورى الباب وضليت اسمع كلامها
وابجي
والله كلامها يوجع ويحرك الگلب
وخصوصاً من تحجي على ابوية
نار وشب بيه ابجي واشهك من كل گلبي
نورس :مااتعبتي من البجي
نجمة :مكاعدة اسمعيها
نورس : وانتي ماتعودتي عليها
نجمة : تعبت نورس والله تعب
نورس : ادري والله وحاسه بيج
ومااتخلصين منها لحد ماتزوجين
هاي مو كدامج اني مرتضى يحير شيسوي بيه
واني كاسبته اليه واكول مضل شي واخلص من ضيم امي
انتي هم صيري مثلي
واكسبي محمد وخلي مثل الخاتم بااصبعج
واخلصي
لج اني لو بمكانج جان هجيت من زماان
جان ماااخليت احد يندل مكاني
نجمة :شسويلها فهميني
نورس : لج غبيه جسمج مااتعب من الكتل
والله على يوم تكتلج وشووهج
اصلاً مااستغرب اذا هسه شفت جسمج بي اثار كتل
كاافي جسمج يكول كاافي
خلص روحي ازوجي واخلصي
نجمة : بقيت نفس مكاني ابجي واشهك وكلام نورس صحيح
جسمي كله بي اثار زركه وحمرة وخضرة من ورى ضرب امي
واني مستمرة بالبجي دك عليه محمد
فتحت الخط واني ابجي
محمد : خير يابه شبيج
نجمة : شكله شحجيلة
اكله هذا البجي كله من ورى امي لو. شكله
ضليت ساكته وابجي
محمد : نجمتي شبيج حبيبتي خوفتيني
نجمة : اشتاقيت الابوية
محمد :الله يرحمه
كومي اسبحي وبدلي واني جايج
نجمة : وين نروح
محمد :نروح نزور ابوج يلاا نص ساعه
واني يمج اريدج متحظرة
نجمة :صدك تحجي
بس اني مااندل مكانه وين
محمد :سهله عمامج يندلوا مو
نجمة :يي عمي حارث يندل مكانه
محمد : تمام اخذي رقم تلفون عمج من امج ومن نوصل هناك نخابرة يدلينه
نجمة : تمام
راح محمد
واني مااحجي ويا امي شلون اخذ رقم تلفون عمي حارث
مااعندي غيرها نورس
رحت عليها
نورس اريد رقم عمي حارث اخابرة
نورس : لا تكوليلي راح تهجين وتروحين العمامي
نجمة: لا يمعودة اريد عمي حارث يدليني مكان ابويه
نورس : وشيوديج الابويه الله يرحمه
نجمة : محمد كلي راح اجي بعد نص ساعة
ياخذني للنجف ازور ابويه
نورس : روحي اسبحي وحظري نفسج واني
اروح اخذ الرقم منها
نجمة :نسيت كل شي وجهي كام يضحك
بعد سنين راح اروح ازور ابويه
دخلت سبحت واني فرحانه
وبدلت واني اتخيل نفسي شلون راح اشوف گبرة
وشراح اكول وشراح اسوي
وگلبي شيسوي من يشوف گبر الغالي
من كثر ماافكر بابوية مااحسيت بالوقت وشلون اني مكمله كل شي
حتى الجواريب والعباية
والسبحة
دخلت عليه نورس
نورس : حتى وانتي وجهج يلطم حلوة
نجمة :جبتي الرقم
نورس : يي هذا رقمة سجلتلج يا بهاي الورقه
نجمة : اخذت الورقه ودك عليه محمد
نزلت شفت امي كاعدة بالمطبخ
عفتها وطلعت
مااسألتني وين رايحه
اوو ويا منو طالعه
لو عندج فلوس
اوو ايي شي منها يحسسني اني بنتها وهي خايفه عليه
طلعت شفت محمد
كاعد بالسيارة
من شافني ابتسم
صعدت بالسيارة
هلاوو محمد
محمد : هلاا بحبيبتي
هاي شصاير بعيونج الحلوة
نجمة :ردت ابجي
بس استوقفني كلامة
حس بيه راح ابجي
محمد: بس تبقين حلوة وعيونج احلى شي بيج
نيالي بهذا الجمال
نجمة : خجلتني
محمد : نتوكل على الله
نجمة : نتوكل
جان محمد مثل عادتة اريحي وماامتقيد
يضحك ويسولف ويشاقه
جان لابس دشداشه سودة وغترة بيضه
مااحسيت بالطريق من ورى سوالف محمد
من دخلنا للنجف كام گلبي يدك سريع
گلبي يعرف عزيزة هناا
كامت دموعي عشرة عشرة ينزلن
محمد : كافي حبيبتي بعدنا مواصلين
نجمة : مو بيدي والله خابر خالي حارث عفيه
محمد : جيبي الرقم
نجمة : انطيته رقم عمي حارث
ومحمد دك عليه وسأله
وعمي حارث وصفله مكان ابوية
ورحنا للمقبرة
اباوع على القبور واكول كم گلب محروك بسببهم
وصلنا للمكان الي وصفلنا يا عمي حارث
ماكو ماالكينا مكان ابوية
ضلينا ندور ومااكو القبر
ضليت ابجي وافرفح اريد ابويه اريد اشوفه
مااكو القبر مال ابوية مااكو
وتيزاب وخلوا على كلبي من محمد كلي
محمد : نجمة خلي نرجع مااكو القبر
نجمة :محمد شلون ارجع واني مااشفت ابويه
محمد : ماكو هذا المكان الي كال عليه عمج حارث
ومااكو القبر
وانتي مااتندلي لان اخر مرة اجيتي وانتي صغيرة
شلون يعني نضل هنااا
نجمة : كمت افرفح واكمز والطم على وجهي
واكول شلوون مااشوف ابوية
شلون ارجع واني مشايفته
ومرة سمعت من بيت جوارينا الميت يحس بااهله وناسه
واني من حرگه گلبي ولوعه روحي
عطت بكل صووت بيه
ياااااااااابة ويييييييينككككككك
بننننننتتتتتك تررريدددددك
من قوة عيطتي حتى بلعومي حسيته انجرح
وسبحان الله درت وجهي ومااعرف ليش درت وجهي
وشلون درت وجهي
واشووف صورة ابوية معلكة وگبرة مبين
وكضت بدون وعي على الگبر
ومحمد يركض وراية
اني شفت گبرة واسمه
الشهيد المغدور ابراهيم
شمرت نفسي على الگبر وابجي واشهك
وكل شهكه تطلع من صميم گلبي
اشكيله واحجيله همومي
والضيم الي شاايفته
كل شي حجيتله وكل شي صار ويايه سولفتله
محمد كاعد بعيد عليه يقرأ قرآن
واني امسح على گبرة بيدي واسولف ويا
اذكرت الاية القرآنيه الي تكول
بسم الله الرحمن الرحيم
: ((إذا ضاقت بكم الصدور، عليكم بزيارة القبور)).
صدق الله العظيم
واني جان صدري مليان هموم وقهر
ورحت للغالي خفف عني همي وقهري
خلصت البجي
كعدت اقرأ سورة يس
وطلعنه من المگبرة واني مرتاحة
رحنا زرنا الامام علي عليه السلام
ودخلني محمد بمطعم
وجانت اول مرة ادخل مطعم بحياتي
محمد حس بيه ومااحب يخجلني
بالعكس ضل يضحك ويسولف
من خلصنا اكل هو راح جاب حلاوة الاهله
وجاب الاهلي هم
وعفنا النجف وتوجهنا للفلوجة
كلش تعبت بالطريق وجانت الروحة مو مثل الرجعه ابداً
خلاني محمد انام بالسيارة
وماادري شوكت وصلنا
حسيت وهو محمد يكعد بيه
فتحت عيوني شفت الدنيا ليل
والسيارة واكفه يم باب البيت
سلمت عليه
ودخلت للبيت
ويااريتني ماادخلت
ياريتني بقيت بالنجف يم ابوية
ياريت بقيت يم محمد بالسيارة
بس شيفيد الياريت والياريت
ماايفيد اللوم والعتب
دخلت للبيت لكيت امي كاعدة على كرسي يم باب المطبخ كاعدة
و وراها نورس وملاك وبيبي ام مهدي
من شافتني كامت من الكرسي تتمشى اتجاهي
بشرى : وين جانت الك... طالعه وراجعه هسه
نجمة : جنت يم ابوية
بشرى : جنتي يم ابوج الك..موو
نجمة : يي جنت يم ابوية
بشرى : يعني كلام نورس مجان جذب
نورس : يمه قابل هي وين راحت
غير راحت الابونا
بشرى : انتي انجبي وادخلي
نجمة : صارلي هواي مشايفه ابوية
بشرى : يي وهسه راح اخليج تروحيله
نجمة : مااحسيت على نفسي وغير
امي سحبتني من مقدمه شعري وجرتني قووي
جنت لابسه شال وعباية
وهي جررت الشال والعبايه وشعري بيدها
ودخلتني سحل للمطبخ
خواتي يتعايطن ويتوسلن بيها
وهي مااا همها كلام خواتي
يجرن بيه وهي جر بيه وجرتها تموتني وجع
تركت شعري ولزمتني قوي من ايدي
حسيتها من لزمت ايدي علمود اسيطر علية
شغلت الطباخ
واني كمت اكمزز
وخواتي يكمزن ويايه
حسيت بالوجع قبل ميلوحني
خواتي كامن يجرن بيه علمود مااتجويني
وهي دفعت نورس بيد وحده ولازمتني بيدها الثانيه
مااكو دقايق ومااحسيت غير ايدي على عين الطباخ
وروحي صعدت للسما ونزلت
كمت افرفح
من الوجع
هدتني واني اكمزز وافرفح وابجي
بشرى : هاي ايدج الي لزمتي بيها گبر ابراهيم الكو..
حركتلج ياااها
علمود كل مااتفكرين تروحين الابوج تذكرين ايدج
نجمة : تحجي واني اكمز
واباوع على خواتي يبجن ويايه
صارت الطلعة عليه عزة
حرت بوجع ايدي وخطيه خواتي حارن ويايه
ابجي ويبجن ويايه
ونريد دوة او اكريم يبرد الحرگ مااكو
وملاك ونورس يريدن يخابرن محمد علمود يجيب دوة
واني مااخليتهن
شكله اكله امي الي حركتني لو شكله
نورس : لج شلون لعد اضلين تتفرفحين
ملاك : الله عليها
كون حق هاي اليتيمه يطلع من عيونها
نورس : راح اخابر حسن
ملاك : على اساس راح يجي يركض وبيدة الدوة
نورس : دوخرن وحدتجن تشلع الگلب من الفهاوة
نجمة : اباوع على نورس دخلت وطلعت لابسه عباية
ضليت ابجي وملاك تهفي على ايدي وتبجي وتتحسب على بشرى
ربع ساعه واني افرفح
اباوع على ايدي مصلوخ الجلد
وكل مااباوع عليها ازيد بالبجي
واردد حسبي الله ونعم الوكيل
نورس : وخري ملاك جبت الدوة
نجمة :نورس خلتلي كريم على ايدي واني اكمز من الوجع
وشربتني دوة مسكن الام
نورس وملاك نزعني العباية والشال
وغيرن ملابسي
وصعدني للغرفه
بين البجي والوجع والتعب
نمت واني مهضومة مثل كل يوم
—————————
هلاو كيكاتي اعرف مقصرة وياكم
بس والله معلية اني صوج التلفون
لاتنسون النجمة والتعليقات الي تريح الگلب
احبكم هواي ❤️
