صباح الجمال والورد الاحمر 🌹🌹
بارت مفاجئ😁😁
ولو سألتني يوماً عنك لأخبرتُك أنك جئتَ على مقاس أمنياتي تماماً 💕🎶
نجمة : اليوم سبعه من شهر السابع تموز
يوم الاربعاء
الساعه سبعه واحد وعشرين دقيقه صباحاً
الحنه مالتي
كعدت من الصبح مااانطيت النفسي افكر بشي
نزلت انضف البيت
لان البارحه امي كالتلي
بشرى : لاعبالج باجر الحنه مالتج ومااتنضفين
تكعدين من الصبح تنضفين وتولين ويا عمتج
نجمة : متعوده على كلامها الي صار بالنسبه اليه مثل كلمه شلونج وشخبارج
نضفت البيت كله وهما نايمين
مسحت الربعه وعطرتها
ودخلت اسبح لان الساعه صارت تسعه ونص
وعمتي كالت اجيج بالتسعه ونص
بسرعه سبحت وعطرت جسمي
ولحد الان مااعرف شراح اللبس
لان عمتي كالت اني اجيبلج الفساتين الصبح
رحت للمطبخ اكل كم لكمه قبل متجي عمتي
دخلت شفت امي وبيبي ام مهدي
كاعدات يسولفن
بس صبحت عليهن
وكعدت اكل جبن وخبز بسرعه
اول لكمه وندكت الباب
امي راحت تفتح الباب واني صعدت اللبس العبايه والشال
نزلت وشفت عمتي بالربعه
دخلت سلمت عليها وهي تبوس وشبگ بيه
ام محمد : تعالي نجمة شوفي الفستان مالتج
نجمة : فتحت الجنطه مال الفستان وجان عبارة عن بدله منفوشه اجنن لو حمرة
ام محمد: هاا نجوم عجبتج لو لا
نجمة : عمه اجنن كلش حلوة
ام محمد : ومو بس هاي حبيبتي
نجمة : فتحت جنطه ثانيه وطلعت قفطان تصميم تركي لون احمر مبين غالي وكلش حلو متت عليه
ام محمد :هذا ذوقي عجبج لو لا
نجمة : يخبل عمة والنبي كاعدة تخجليني
ام محمد : لا حبيبتي انت تستاهلين كل خير
هاي تلبسي من يجون الملايات
بشرى : شنو ملايات
ام محمد : حبيبتي ام حسن محمد ابني الصغير
واخر ولدي
و جنايني اهلهن يسولهن مولود ويجيبن ملالي
ومحمد مو اقل من اخوته علمود مرته ميسولها مولود
بس اعرف انتي مراح اسويلها
فقررت اني اسويلها
بشرى : ليش منسويلها لو كايله جان سويتلها احلى مولود
ام محمد : ماكو داعي اكلج حبيبتي ام حسن
انشاالله اني اكفي واوفي
نجوم حبيبتي وهذا القفطان الثاني
نجمة : امي مااعجبها كلام عمتي ام محمد وكعدت على القنفه وخلت رجل على رجل وتباوع بطرف عينها
عمتي ام محمد طلعت قفطان ثاني جان كلش بسيط وشغلة بسيط لون بنفسجي طوخ
عمه هذا شسوي بي
ام محمد :حبيبتي هاي تلبسي ورى ميخلص المولود
علمود تاخذين راحتج بالركص
وهاي صينيه الحنه وكل تجهيزاتها
خلي وحده من خواتج من نرجع من الصالون اجهزها
وهسه خلي نروح للصالون علمود منتأخر
يلا باي ام حسن
بشرى : امم الله وياج عيني
نجمة : عمتي مااا انطت مجال الامي تحجي
تعاملها ويا امي مثل الوجودها وعدمه واحد
وهذا الشي فرحني
لان لو ماا عمتي جان لو حصلت فستان بسيط لو جان مااحصلت
رحت ويا عمتي للصالون
ودخلوني سمكرة طلعوني على البلادي
تقشير بشره ومااسكتت
وتركيب اظافر
والمكياج جان كلش بسيط لان ام الصالون كالت ماريد اتعب وجهج اليوم وانتي باجر عرسج
والتسريحه سوت شعري ويفي ومقدمه شعري سوتي باف
3 ساعات يلا خلصوني
من لبست البدله وشفت نفسي بالمرايا
تعجبت على نفسي
وحبيت شكلي كلش
دكت ام محمد على محمد واجه علينا للصالون
من وصل للصالون دك على عمتي
واسمع عمتي تكله اييي والله اكبتها
ايي مااخلي شي يطلع منها
وصدك عمتي شمرت عليه وشاح يشبه وشاح العقد بس بدون كتابات
وطلعتني
مااشوف شي من ورى الوشاح
حسيت بس على ايد محمد وهو يساعدني
علمود اصعد السيارة
بطلوع الروح صعدت السيارة لان البدله جبيرة
ومايقبل ارفع الوشاح علمود اشوف
صعدني ليكدام وعمتي صعدت ليورة
وهو صعد واول ماصعد
محمد : مراح اتحمل لازم اشوفج
ام محمد : يي شوفها يمه ارفع الوشاح
نجمة : رفع الوشاح شو هذا صفن بوجهي
وفتح حلكه
كل ضني مااعجبته
ام محمد : هاا يمه شو صفنت
محمد : يمه هاي نجمة لو مبدليها
ام محمد : ههههههه يمه هاي نجمة
محمد : صلاوات على الحبيب محمد
شهل جمال
معقوله هذا الجمال اليه
نجمة : خدودي صاراً حمر والخجل خلاني اموع
محمد : عين الله ترعاج حبيبتي
نجمة : ورى هذا كلامه نزل الوشاح عليه
وشغل اغنيه هم عريس هم نشمي وهم ربعه يزفونه
يسوق ويغني وعمتي تهلهل وتصفك
الطريق كله يغني ويركص وفرحان
واني على فرحته فرحت وياا
وصلنا للبيت
ودخلتني عمتي
ام محمد : يمه انشاالله فد بالسته نجي نحنيج والملالي يجون ساعه خمسه ونص
نجمة : تمام عمه
راحت عمتي
واني دخلت للبيت
لكيت زوجات خوالي كلهن جايات
وبناتهن وجناينهم
اول مرة بعمري اشوفهم منجمعين
والسبب مو عرسي لاا
السبب امي كايلتلهم راح اجيب ملالي واهل محمد واح يجيبون عشا على حسابهم تعالوا تونسوا واكلوا
دخلت للربعه لكيت خواتي حبيباتي مسويات الكعده ومجهزات الصينيه وسوالف الحنة
ضلن يصفكن ويركصن ويركصني وياهن
ونضحك ونشاقه وكلش فرحت وياهن
صارت الساعة خمسه ونص دخلت الملالي
ضلن يسولفن ويجهزن نفسهن
وكلمه منا كلمه منا صارت ساعه سته دخلوا اهل محمد
وبدت الملايه بالمولود
الملالي يدكن والبنات يركصن
طلبت الملايه مني اللبس القفطان الثاني
لان تريد اسويلي شلون الذكر
لبسته ودخلت
كعدوني بنص الربعه وخلن البنات الي ممزوجات
يلزمن قطعه من القماش ويرفعنها فوكايه
والملايه بدت اسوي الذكر
وتدعيلي انسعد بحياتي الزوجيه
ويرزقني بالذريه الصالحه
جانت اجواء الملايه كلش حلو
خلصت الذكر ورجعت ادك
من صارت الساعه ب9 كالوا محمد اجه يحني العروس
البنات لبسوا العبي ونستروا
ومحمد دخل تفاجئت بالي لابسه
جان لابس زي انباري
دشداشه سودة وشماغ اسود وابيض
ولابس محزم مال اسلاح
ومحدد لحيته
طالع كلش حلو
دخل كعد يمي
وحجه بصوت شبه مسموع
محمد : شلونها حبيبت الروح
نجمة : زينه حبيبي
انت شلونك
محمد : باجر اصير زين
نجمة :من كال هيج اني كمت ارجف مادري ليش خفت
اجتي عمتي حنتني وحنت محمد الي اصلاً الشباب محني
صارت بال10 بالليل راحوا
وبقوا بس كرايبنه
اني رحت لبست القفطان البنفسجي
وضل يركصون ويغنون
واني التعب بدأ يقرأ عندي الف
اريدهم بس يروحون
صارت ساعه 12 يلا راحوا
اول مطلعوا من البيت بسرعه دخلت سبحت
وصعدت الغرفتي اريد انام
كمت اغفي على نفسي
غمضت عيني
اول مغمضتها اجه بالي كلمه محمد
محمد : باجر اصير زين
نجمة : رجع جسمي يررجف والنومه راحت من عيني
وضليت افكر اني شراح يصير بيه باجر
صح اعرف بالعلاقه الزوجيه
بس مااعرفها بااتم وجهه
ولا افهم شلون ينبدي بيها وينتهي بيها
حالتي جانت مثل الطفل الي يريدون من عنده يقرأ بلباقه وهو مايعرف يربط الحروف
واني ماعندي ام مثل بقيه الامهات الي كعدت فهمتني
او كالتلي هيج يصير ولازم هيج اسوين
لكيت روحي كمت من فراشي ورحت نمت بصف نورس
نورس : شبيج نجمة
نجمة : خايفه
نورس : من شنو خايفه حبيبتي
نجمة : ماكو وحده تكدر تفيدني بهاي السالفه غير نورس
نورس اني ماعرف باجر شيصير بيني وبين محمد
نورس : قصدج العلاقه الزوجيه
نجمة : يي ومااعندي غيرج يفهمني
نورس : ادللي حبيبتي راح اشرحلج الموضوع
نجمة : ضلت اسولفلي نورس وتشرحلي بس بااسلوب كلش حلو وبضحك وابداً مااخوفتني ولا خلتني اقلق
بالعكس بضحكها وشقاها وكل شويه وكايلتلي تخيلي كذا سالفه وتضحك
انطتني الامان وبسطتلي الموضوع كله
ومن خلصت شرحها
نورس : هذا كل الي راح يصير
وهسه نامي لان باجر وراج يوم طويل
نجمة : عادي اني يمج
نورس: نامي حبيبتي اليوم يمي وباجر يم محمد
نجمة : حجتها بضحك وعلى ضحكتها نمت مرتاحه
————————
هلاو كيكاتي
لاتنسون النجمة والتعليقات الحلوة
احبكم كومات ❤️
