صباح التفائل والحب ❤️
أسمر مُخملي يحُبَ الليل والسَهر ويحبني ✨🖤
نجمة : اليوم راح اروح للمدينه السياحيه
كلش فرحانه ومتحمسه شراح يصير
اول مرة بحياتي كلها راح اطلع واتونس
والمدينه السياحية جنت بس اسمع بيها ابداً مرايحتلها
رغم كلش قريبه علينه
اقل النص ساعه ونكون بيها
بس مااجانت امي تقبل اطلعنا
دخلت سبحت واخذت ملابس من نورس
وخليت مكياج خفيف
ونزلت انتظر محمد يجيني علمود نطلع
بشرى :وين موليه
نجمة :للمدينه السياحيه
بشرى :ويامن موليه
نجمة :يعني وياماً اكيد ويا محمد اكو غيرة يطلعني من هذا السجن
بشرى : موو اكصه للسانج طا...
صاير عدها لسان وتحجي
نجمة :مااحجيت شي
بشرى :لا تخليني هسه امسح بيج الكاع واطيح حظج
واخليج متروحين
نجمة : سكتت علمود بس اطلع
ربع ساعه ودك عليه. العافيه واهلها
الو
محمد :هلا بالصوت الحلو
يلاا حبيبتي اني باب البيت
نجمة : اجيتك
سديت الخط وطلعت اركض
شفته بالسيارة يخابر
فتحت باب السيارة وصعدت
هو ضحك وحرك السيارة
وبقى يحجي بالتلفون
الي فتهمته يحجي ويا اخو مراد
لان مااخذ اهله وطالعين قبلنا
ومحمد اجه عليه علمود نروح سويه
الطريق كله يحجي بالتلفون
وكل شويه يباوع عليه ويبتسم
احس عيونه بيهن لمه اجنن
عيونه تلمع وحلوات ضاربه عليهن ضوه الشمس
صاير لونهن ماينعرف
لا هنا صفر ولا هنا شكر ولا هنا جوزيات
هو حس بيه اباوع عليه
لزم ايدي
بس مااعبالك لزمه ايد
لاا
احساس جداً غريب
ايدة ملمسها خشن
واني ايدي ملمسها ناعم
صار بجسمي مثل الكهرباء ورجفه خفيفه
اباوع على ايدي مشابكه الايدة
صايرة مثل اللوحه الفنيه بااختلاف الالوان
اني بيضه ثلج لابسه حلقه ذهب
وهو ايدة سمرة لابسه حلقه فضه
ماادري ليش حبيت شكل ايدينه
من شافني اباوع على ايديناتنا
محمد : دقيقه مراد ثواني واخابرك
هسه مااتأخر بس ثواني شبيك
لاالااا شويه واخابرك
ماشي
الله وياك
نجمتي الحلوة
نجمة : نعم
وكف السيارة ودار جسمه عليه
محمد : شوو خلي ايدج فوك ايدي
نجمة : ليش
محمد : شكد تسألين ورانا طريق
نجمة : تمام
خليت ايدي فوك ايدة
هو فتح كامرة بتلفونه وكام ياخذ صور الايدينه
ماادري ليش ضحكت
وفرحت بنفس الوقت
اخذ كم صورة اني ويا
وراها حرك السيارة ورجع اتصل بمراد
اقل العشر دقايق وكمت اشوف البحر
فد فرحت ردت اكمز بالسيارة من جمال شكله
بعيد ولونه سمائي
عبالك اول مرة اشوف بحر بحياتي
وهو صدك اول مرة اشوف بحر بحياتي
دخلنا للمدينه السياحيه
ومحمد لازم ايدي
شفنا اهله كلهم موجودين خواته ثنين
منار ومرام
واخوانا وامة وابو
وجايه خالته وبنات خالته هم
الي فهمته خالته وبناتها بايتين يمهم صار اسبوع
وخالته هي الي كالتلهم خلي نروح للسياحيه
الكعدة كلش حلوة ومخلين منقله مال مشاوي
والاكل وعمو ابو محمد يضحك ويا الولد والبنات
بس ابداً متقرب من عندي ولا حجه ويايه
اني مااحبيت انغص عليه الطلعه
وحبيت اتونس واعيش اليوم بكل لحضته
محمد : حبيبت الروح تريدين شي
نجمة : لا حبيبي ماريد شي
شو اني كلتله ماريد شي
هذا نزع الفالينه وبقى بالشورت
وراح يسبح ويا اخوانا
ضليت كاعدة ويا خوات محمد منار ومرام كلش
تغدينا وضلينا نسولف
اجه محمد وهو منكع مي
كعد يمنا وخلى راسه بحضني
وحضني انترس مي وضلت خاله ام محمد تضحك عليه
بس خالته ماادري شبيها
تحجي من ورى خشمها ويايه
بس مااهتميت الها
للعصر قبل غروب الشمس جان المنظر حلو
ام محمد : كومي يمه نجمة خلي رجلج بالبحر شويه ويا البنات
نجمة : لا عمه مااريد
ام محمد : دكومي يمعودة وهاي اني راح اكوم هم وياج ومنار انتي هم كومي اني راح اروح قبلجن
نجمة : ماشي خاله
ردت اكوم والحلقه مالتي بس تتحرك خفت عليها
خاله محمد : شبيها حلقتج
نجمة :جبيرة عليه وبس تتحرك
خالة محمد : جيبيها اخليها يمي وروحي انتي
نجمة :من غبائي انطيت الحلقه الخاله محمد
ورحت ويا منار
خليت رجليه بالشط واكو سمجات صغار
يكرصن بااصابيعي ويدغدغني
واني ميته ضحك
محمد كدامي يسبح واني مخليه رجليه بالشط
وهو يسبح بعيد ويرجعلي
كلش تونست وفرحت
بس تعودت ورى كل ضحكه لازم بجيه
صارت الدنيا ليل
وقرروا يرجعون للبيت
لموا الاغراض واني اذكرت حلقتي يم خاله محمد
رحت عليها علمود اخذ الحلقه منها
خاله انطيني الحلقه مالتي
خاله محمد : يااا حلقه هااي
نجمة :حلقتي الي انطيتج يااها قبل ماانزل للشط
خالة محمد :وينننن انطيتيني حلقتج
انتي جااااايه تتبلين عليه
نجمة : على صوت اعياطها اجتي عمتي والبنات منار ومرام ومحمد
وبنات خالته لمحمد
محمد : شكووو ليش تعيطون
خاله محمد : شووف مرتك عيني تكلي انطيتج حلقتي وهي كذابه
تريد اطلعني حراميه
نجمة : خاله والله انطيتج يااها
خاله محمد : لاااا تحلفين الله يااكذابه
نجمة :اجيت احجي بس محمد سكتني
محمد : كافي نجمة خلي ندور عليه اخاف واكعه
نجمة : مااحجيت بس ضليت ابجي
اعرف هي مواكعه واني انطيتها الخالته
بس شسوي وشنو اكول ضلت دموعي هي الي تحجي حالتي
وضلوا يدورون على الحلقه حتى خالته ضلت ادور عليها بس مااكو ملكوها والدنيا ضلمه صارت مااا تنشاف
منار : محمد ترى اني كدامي نجمة انطت الحلقه الخاله
خاله محمد : هيج ياا منار شبسرعه علمتج على الكذب
منار : خاله والله مكاعدة اكذب حتى كالتلج الحلقه جبيرة عليه وانتي كلتيلها انطيني ياها
خاله محمد : يمه يمه منج منار شبسرعه خلتج اصيرين مثلهاا الله اليستر اذا اجتي يمكم شسوي بيكم
محمد : خاله خلص عوفي الحلقه
اني اجيبلها وحده غيرها
خاله محمد : ليش اجيبلها خلي اطلع الحلقه الضمتها
اكيد طالعه على امها تحب الفلوس
محمد : خاله خلص سدي الموضوع
يلاااا نجمة امشي
نجمة : ضليت ابجي من كلمه خالتهم هاي عود هاي اني بعدني ماارحت يمهم وكاموا يعيروني باامي
الطريق كله ابجي
ومامتحمله حرف واحد اسمع
ومحمد هم جان معصب مااحجه شي
بس مبين عليه الاعصاب وبس ينافخ
ويسوق سريع
بس طبكت السيارة يم باب بيتنا
نزلت بسرعه ودخلت للبيت ابجي
لكيت امي ونورس وملاك كاعدات بالمطبخ
بس دخلت للمطبخ وشافن شكلي
كامن خواتي عليه
واني شمرت روحي على ملاك وكمت ابجي من كل كلبي
وهنا بس يسألن شبيه
سولفتلهن الي صار
بشرى : يعنيييي شنووو الحلقه راحت
نجمة : ييي ماااقبلت تنطيها
اني كلت هيج وهي كامت من مكانها
ولزمتني من مقدمه الشال صار الشال وشعري بيديها
وفرتني وركعتني بالكاع
بشرى : بنت الك... بنت القن... بنت الج..
من كلتلج انطيني الحلقه اصغرلج ياااها
مااقبلتي تنطيني ياااها
وبسررعه مثل الك... رحتي انطيتيها الخالته الد...
وثقتي بالغريب وماوثقتي بيه
نجمة : فرك قهري زادتني قهر وضيم
محمد كلي اني اجيبلج وحده ثانيه
بشرى : انعل ابوج لابو الجابج عليه
راحت الحلقه وانتي تكوليلي محمد يجيبلج وحده جديدة
وعود فرحانه مثل الك...
جااان احنااا كلناله ضاااعت الحلقه موووو خالته الدا...
نجمة : ابشع الكلام سمعته من امي
مااكو مسبه وغلط وفشار مكالته
واني كاعدة بالكاع بس ابجي
وهي كعدت على الميز وكل شويه وشامره عليه شي
حتى حشاكم النعال شمرته عليه
نورس : هسه دكاااافي رحمة للنبي
انتي شعليج
محمد وكاللها راح اجيبلج حلقه بعد شكووو
بشرى :تعرفين هذيج الحلقه شكد سعرها
نورس : بملياررر ونص انتي شدخلج
بشرى : احجي عدل لا اركعج بالنعال طايحه الحظ
نورس : دكااافي موو شلعتي كلبها للبنيه
شووكت تزوج وتخلص متج
كووومي انتي الثانيه تموتين على اللطم والبجي
فدوة الج الحلقه
كومي اسبحي وبدلي
ونامي وانعل ابو خاله محمد لابو الحلقه
نجمة : جرتني من الكاع نورس
ودفعتني للحمام
ملاك : حسبي الله ونعم الوكيل على الظالم
بشرى : تتحسبين عليه مووو
اني اعلمج
نجمة : دخلت سبحت واني ابجي واشهك
طلعت بس بدلت ونمت
كعدت بنص الليل اباوع على التلفون ملكيت مكالمه من محمد
متت قهر ونهضمت
ردت بس يخابرني اريد اعرف شصار وياا
بس مااكو ماا متصل
جبرت نفسي على النوم ونمت
كعدت الصبح اريد اشيل نفسي ماكدر
مصخنه وجسمي كله يوجعني
رجعت ابجي بس هل مرة مااعرف على شنو ابجي
ابجي على اللحلقه الراحت
لو ابجي على كلام خاله محمد
لو كلام امي
لو ابجي على محمد الي ماا اتصل ولا حاجاني
كمت من الفراش بطلوع الروح توضيت وصليت
وشكيت الرب العالمين وضليت ابجي على السجادة الصلاة
ملاك : نجمة كومي كافي بجي محمد يريدج
نجمة : بسرعه التفتت الملاك
صدك محمد اجه
ملاك : ييي والله اجه ويريدج بالربعه كاعد
نجمة : نزلت على كيفي لان مااكدر اركض
فرحت لان اجه عليه
دخلت وشفته كاعد بس سمع صوت الباب
التفت عليه
بس مو مثل كل مرة اول ميشوفني يبتسم هل مرة لا
ضل بس يباوع
شلونك حبيبي
محمد : الحمدلله
بس شبيج شنو مريضه
نجمة : يي شويه
محمد : تعالي اكعدي يمي
نجمة : رحت كعدت يمه بس مستغربه من كلامه
محمد : انطيني ايدج
نجمة : انطيته ايديه
لبسني حلقه وياها محبس
محمد : هل مرة جبتها اصغر علمود مااضيع
نجمة : محمد والله مضاعت خا
محمد : لاتكملين سواء ضاعت او لا
هاي جبتلج غيرها وانسي الموضوع
واعتبري مصار
وتعالي خلي ايدج فوك ايدي
خلي اخذ صور
نجمة : ماادري ليش ضحكت على كلامه
وخليت ايدي على ايدة بحماس وضحك
اخذ صور الايدينا
صح الحلقه الجديدة حلوة واحلى من القديمه
بس هذيج انقهرت عليها
محمد : يلاا اني اروح
نجمة : بعد وكت
محمد : عندي شغل بعدين نتخابر
نجمة : تمام
محمد : باي حبيبتي
نجمة : الله وياك حياتي
راح محمد واني ضليت وحدي بالربعه
واباوع على الحلقه
واتحسب على خالته لمحمد
من كلام محمد وتصرفاته عرفته بعدة ضايج
ومقهور وشوف شصاير كلام ابيتهم
حاولت اقنع روحي مصار شي
ومن هذا اليوم قررت اكسب محمد اليه
واحببه اكثر بيه
واخلي يعشقني مو بس يحبني
ولازم اجبر روحي احبه
Oops! This image does not follow our content guidelines. To continue publishing, please remove it or upload a different image.
هاي حلقه نجمتنا الجديدة
لاتنسون النجمة والتعليقات الحلوة
احبكم كوومات ❤️
