A day in Jun3

Page 15

"Mahal ko ang sarili ko
Iingatan ko ang sarili ko
Pagyayamanin ko
Ang turing ko sayo'y sarili ko"

Hindi bat mahalaga sa atin ang ating sarili? Hindi ba't iingatan natin ito anuman ang mangyari? Hindi ba't nais natin kung ano ang makakabuti para sa atin?

Kaya pala.

Kaya pala palagi kang nariyan kapag panandalian akong nanghihina. Kaya pala handa kang sumaklolo kapag pakiramdam ko'y nagugupo ako sa kapaguran. Kaya pala pinalalakas mo ang loob ko. Kaya pala mahal mo ako.

Kaya pala ramdam ko ang lambing ng iyong boses kapag minsan tayong di magkaunawaan. Kaya pala ang bilin mo palagi ang ingatan ko ang sarili ko at huwag akong magpapagutom gaano man ako ka-busy. Kaya pala palagi kang nagpapa-alala na ako ay mag-ingat.

Kaya pala manghang-mangha ako sa husay mo magsalita. kaya pala palagi kang nagbabahagi sa akin ng kuwento, mapa nakakatawa man; nakakalungkot, nakakatuwa at nakaka-inis. Kaya pala tinuturuan mo ako sa maraming bagay. Kaya pala nais mong bumuti ang buhay ko sa hinaharap. Kaya pala palaging ang bilin mo ay mag-aral ako ng mabuti at tumupad lang ng tumupad. Kaya pala nais mong mapagyaman ko ang mga kakayahan ko.

Kaya pala mahal mo ako. Kaya pala pinag-iingat mo ako. Kaya pala tinuturuan mo akong mapagyaman ang sarili ko. Kaya pala, sapagkat ang turing mo sa akin ay sarili mo.

Ayaw mo kamo akong nasasaktan sapagkat nasasaktan ka rin. Ayaw mo kamo akong nagkaka-sakit sapagkat nag-aalala ka rin. Gusto mo kamo akong mag-ingat sapagkat tayo'y magkikita rin. Gusto mo rin kamong pagbutihin ko sapagkat pinagbubuti mo rin.

HIndi na ako magtataka kung bakit ang turing natin sa isa't isa ay iisa. Palagi bagang magkarugtong ang bituka.

Ako ay Ikaw. Ikaw ay ako.

Ikaw at ako.