QUEEN SERIES #3: THE MILK TEA QUEEN [COMPLETED]

CHAPTER THIRTY-ONE

Shane Andrea Juarez

Micah sent me a text message early in the morning. May plans ba ako, kami ni Felina, for the day? Gusto ko raw bang sumama sa kanya papuntang Singapore? Pwede ko rin daw yayain ang friend ko. I was tempted to say 'yes' to a trip to Singapore dahil hindi pa ako nakapunta roon, pero naisip ko naman si Taba. The reason why we came to the resort was because we both had problems. Love life problems. Iyong akin, may kaunti pang problema, pero at least may nakikita na akong liwanag. I just need to make sure Micah was not lying to me and that his family will accept me as warmly as they first did. Pero ang kay Felina, medyo masalimuot. Kaya ayaw ko rin siyang iwanan o gawing third wheel dahil baka lalo niyang ma-feel ang pait ng kanyang karanasan.

"What's up?" Nakisilip si Taba sa texts ko. I closed it and put my phone on the table. "Wala ba kayong plano ni Micah today?" nakangiting tanong niya.

"Magkasama tayong magliliwaliw dito ngayon. Walang iwanan."

"H'wag mo akong intindihin, ano ba? Our motto was not changed, Shanitot. Ganoon pa rin iyon. Love first before friendship. O di kaya'y lust first dot-dot-dot." Humalakhak ito. Nagpakuwento na naman kung paano raw nangyari iyon.

"Ano ba! Naho-horny ka na yata, ah."

"Happy lang ako na at least isa sa atin ay haping-hapi na."

Nawala ang ngiti ko.

"What's the problem?" tanong niya.

"Kung sa iyo nangyari ang nangyari sa amin and the guy's ex came to you para lang sabihin na hindi pa final ang divorce ng bino-boyfriend mo, what will you do?"

"Kung sino ang paniniwalaan ko? Siyempre, si boyfriend. Alam mo naman ang mga exes. Marami riyan ay toxic. Baka this girl is so into your boyfriend kung kaya niya nasabi iyon. Saka, ba't ka naman maba-bother doon? Kung tutuusin, ikaw ang naunang naging misis." At bumungisngis ito.

Natigil kami sa pagpapahid ng strawberry jam sa toasted bread namin nang biglang may kumatok sa pinto. Pagbukas doon ni Felina, bumungad ang isang waiter na may dala-dalang tray ng assorted fruits. Ang ganda ng pagkakahiwa at arrange sa platter. Mukhang masarap din. May mangga, watermelon, grapes, oranges, at mansanas.

"Wala kaming inorder na ganyan," sabi ko agad pagkakita ko roon.

"It's on the house, ma'am. Padala po ni Sir Micah. When you're done daw, pa-text na lang daw po siya. He will personally take you island hopping today."

Na-excite agad si Felina. Magiliw nitong kinuha ang tray sa lalaki at pakembot-kembot pang lumapit sa table namin.

"Sarap magkaroon ng mayamang BF, 'no?"

Nangiti lang ako.

"Oo nga pala, tungkol doon sa kuwento mo noong isang araw, totohanin mo ba ang sinabi mo sa kanyang pagtatayo ng milk tea shop? O tatanggapin uli ang ni-reject mong job na in-offer ng pinsan niya? O iyong managerial position na in-offer din niya sa kanilang milk tea shop sa The Fort?"

"Definitely hindi ko tatanggapin ang job offers nila. I am seriously thinking about the milk tea shop now that you brought it up. Para saan pa't na-adik ako sa milk tea?"

"Kunin mo ako kahit taga-serve lang sa mga customers mo, ha? Sana may pogi kang parokyano."

Napangiti ako sa kanya, pero nalungkot na rin kahit papaano. I could feel she was trying to make everything lighter, pero ang totoo niyan ay may gusto lang kalimutan. Nainis na tuloy ako sa JT Zaldua na iyon. He better give my friend a very good reason for leaving. Kapag bumalik-balik iyon at lolokohin niya uli si Taba makakatikim siya sa akin ng flying kick.