ليش هيج تفاعلكم صفر يعيوني☹️
اصلا تلث بنات الي يعلقن من غير امي ومرت اخوي وخالتي والقصه حلوة وبعدنه ما بدينه بالاحداث الثكيلة يعني بربكم القصص البيها مح وميح وتزوجت والدي وتزوجت اخي وكلهه طياح حظ توصل مليون قارء خلال شهرين والقصص الحلوة تندثر ومحد يشجع كاتباتها ويسويلهن واهس هسه اني اذا اترك القصة مو تزعلون ؟!. چا عود عليش ما تشجعون وتعلقون وتصوتون شراح تخسرون من تدوسون ع النجمة شراح تخسرون من تعلقون بتوقعاتكم الحلوة . . معلسف اي والله معلسف ☹️😔😟
.
.
.
مرت ايام وبدى دوام غدير لحد مامرن شهرين وهيه تداوم منعزلة عن الكل ماعدى اختها الي وياها بنفس الجامعه وبهالشهرين تسمع البنات يحجن عنها على انها شايلة خشمها ومعقدة وماتتحاجه والشباب يشوفوها متكبره ، وبيوم من الايام داومت غدير بدون اختها منسه الي جانت مصخنه وطلبت من غدير تاخذلها اجازة وفعلا اجت غدير لمكتب المسؤؤل حتى تطلب اجازة مرضية لأختها وقبل ماتدخل صادفها شاب مملوح المعاني والقوام ، يجي عمره بالتلاثين چان طالع من المكتب الي بصف مكتب المسؤؤل أول ما شافها بقى واكف بمكانه ويباوعلها بنظرات تفحصية وقبل ما تدك الباب تقدم منها بسرعه وهو يحاجيها .
مُراد: اوكفي وين طابه .
باوعتلة غدير بتفاجئ وهيه تتراجع ليورة
غدير: شنو وين طابة غير مكتب المسؤؤل
مراد: بوية شجابج ع الناظر هذا واحد مايخاف الله بأعراض الناس . . وانتي چن حورية نازلة من السمه وجايتله لوحدج جا غير يبليج بمصيبة لو يبتزج . . ارجعي جيبي وياج زلمة يحاجيه واذا ماعندج احد كليلي شتردين وروحي .
بقت غدير صافنة بوجهه وهيه محتارة وخايفة بنفس الوقت ماجانت تدري اكو هيج ناس قذرين يعني هذا المسؤول شايب ورجليه بالگبر وهيج يستغل البنات ويساومهن ع شرفهن ، بعد دوامة التفكير والتوتر الي حست بيه غدير نزلت عيونها الخايفه من الولد الي تحس الله دزه الها وكالتله .
غدير: اءءء . . يعنيي . . اني ردت اطلب اجازة لأختي مريضة وماكدرت تداوم ومن سألت الاستاذ اشرف كال ترحين للناظر زاهد هو المسؤول .
مراد: هايهيه خيتي اطيني اسم اختج وروحي احسبيها اليوم وباجر اجازة . . وهذا استاذ اشرف ترة مو احسن من زاهد اثنينهم وجهين لعملة وحدة ديري بالج وخليج حذرة لا تثقين بالناس بسهولة ترة مو كل كلوبهم نقية مثل كلبج .
صفنت غدير بوجهة وهيه ماتعرف شتجاوب حست بخجل وتوتر من كلامه والحمرة اكتسحت خدودها طلعت قلم ودفتر صغير من جنطتها وكتبت اسم اختها والقسم وسلمتهن لمراد وطلعت بعجلة من يمه وبقى هوه يباوعلها مبتسم وعيونة تلمع بأمل .
بعد ما رجعت للبيت سولفت لمنسه ع كلشي صار وياها ومنسة تباوعلها بشك وتفكير لحد ما قاطعتها وهيه تسألها .
منسه: اكلج هذا الولد الحاجاج يصير طويل وجسمه مرتب وحنطاوي وعيونة لونهن اصفر ومسحوبات وشعره سرح اسود وبيه لمعة شگار ويكلبه ليورة . . موو ؟؟.
فتحت عيونها غدير على وسعها وهيه تجاوب اختها بسؤال .
غدير: يعني تعرفينه انتي ؟! .
منسه بضحكة: ياا ولج جا غير هذا هوه المهندس مراد الي جاي يبني بالجامعه شگد ثولة انتي كلهه تعرفه والبنات حاطات عيونهن عليه ويتمنن نظرة منه بس على طول هاي السنه ولا عبر وحدة منهناصلا مايحجي ولا يختلط بالبنات بس عده چم واحد يكعد يمهم لمن يجي للجامعه . . بعدين انتي شلون ثولة وترحين لمكتب الناظر لوحدج تردين تسويلنة مصيبة ولج هذا كلهه تعرفه فد واحد مايخاف الله واستاذ اشرف مثل ماكلج مراد نفس زاهد بالاخلاق الموزينة هالنوب استغفرك ربي واحد اسمه زاهد وواحد اشرف وهمه ذرة شرف وزهد ماعدهم .
مرت الأيام على غدير ونفس الروتين اليومي ينعاد وكل مره تداوم بيها برفقة اختها منسه تحس تتنفس مثل البشر وتغير جو لمن تكعد تقره بصف النافورة المكان الي يبتعدون عنه الشباب ويكتفون بجلسات جماعية جوة ظل الاشجار ماعداها هيه الي تحب تكعد قريبة من المي ومقابل الشمس . . وبيوم جانت كاعده بصف النافورة مثل عادتها وفاتحة كتابها تراجع وشافت ظل طويل صار فوك راسها رفعت نظرها وشافته واكف يباوعلها بأبتسامه خفيفة صفن شوية بوجهها وتنهد وكال .
مراد: الله بالخير يابة . . شني ماناوية تغيرين هالمكان مو راح تموعين من الشمس
.
باوعتلة بخجل وارتباك وهيه تدور براسها على رد يكون مناسب لكلامه بس هيهات وهيه تستحي تحجي ويه احد وحتى السلام ترده بتردد وخجل وتلعثم وخاصة بعد كل الي صار وياها خلاها تتحذر وتخاف تحجي وية احد من جنس ادم وشخصيتها صارت اضعف من السابق وبمجرد ما فتحت حلگها وجانت ناوية ترد التحية سمعت صوت اختها .
منسه : اليوم استاذ مراد منور الجامعة . . شلونك استاذ اخبار الاهل .
مراد : منورة بوجودكم الحمد لله بخير اذا انتو بخير .
يحجي وعينه على غدير ومنسة تباوعلهم بتوتر . . تحجج بكم شغلة جاي علمودها ومنسة تجامله وغدير ساكته وعينها بالكاع عافهن وراح وبمجرد ما ابتعد تنفست غدير براحة وهيه تهفي ع وجهها الي اشتعل من الخجل والتوتر ، اندارت على اختها وهيه تسألها .
غدير : اكلج انتي منين تعرفين اهله وتسالينه عليهم .
منسه بحسرة : ولج غير اخته الغثة هنا تداوم وبنفس قسمي وعلى حظي مادري شبيهه وياي تتسودن مني . . وقبل فترة اتهمتني عدي علاقة بولد اسمه عبد الهادي ويانة هذا كلش مايطي وجه لوحدة ولا يختلط بالبنات اصلا وماعده غير صديق واحد مبتعد ع الكل وماهمه بس دراسته مثل حالي وحالج وراحت وصلتها للاساتذة ولدكتورة خالدة ويمكن عرفتيها هاي شكد حقيرة وتشد ويه الطلاب من لا شيء وبأيام بس كدرت فاطمة تغير الكل عليه بحيث حتى صاحباتي بلقيس واسماء ابتعدن عني خوفا من المشاكل وخاف تذبلها بروسهن مصايب ، ووره چم يوم كام المضموم يطلع واجتني البنية الاسمها شروق الكل يدري بعداوتها وية فاطمة وكتتلي الاول والتالي كالت ترة فاطمة عرفت بعبد يريد يتقدملج يخطبج وهيه عينها عليه ومحاولة وياه هواي بس هوه مسولف لصاحبة انو معجب بيج وبأخلاقج ورايدج وجم يوم ويدز اهله عليج وبدت سوالفها وحاربتج واتهمتج وياه ومن يومها الولد لا تقربلج ولا دز اهله لان راد يبعد الشبهة عنج ، اني عاد من سمعت ماسكتت تانيت اخوها يجي واخذت وياي صويحباتي العافني من خوفهن منها ومن اجه للجامعه حجيتله كلشي وكتله تكدر تسال عني بالجامعه كلها والاساتذة وشوف اخلاقي وتجي اختك هيج تسوي والله شنو هيه معجبة بالولد وانقهرت لان رادني ومنو كلها انه اوافق حتى هيه تروح هيج تشوه سمعتي بيومين وتحجي حجي باطل عني ، انهاريت وكمت احجي وياه بعصبية وكتله حطو الله بين عيونكم هيه هم بنية وباجر الله يسلط عليها من لايرحمها اني ماريد مشاكل وماوصلتها لاهلي بس اذا ماحطيت لاختك حد انه ابلغ اهلي بكلشي وعدي الجامعه كلهه شهود ، عاد هوه طكن عيونة حمر وكعد يتعذر مني ويكلي احسبيها عليه وامسحيها بوجهي ، ومن يومها اخته حتى من تشوفنه من بعيد تدنك راسها وما ترفع عينها بعيني ،بوية شكد فرحت من شفتها هيج مخلوسة خلس .
غدير بتثاوب : ولج والله لو ادري جا ماسألتج شكد تهذين لخاطر الحمزة اذاني ماعت . . يلا المهم عرف شلون يدفع بلى اخته عنج هوه احنه بدون هاي وهاي وشابعين ظيم وياساعة نبطل من ورة امنه التمشي ورة حجي فلانه وعلانه هالنوب اذا تسمع بهاي بسرعة تضحي بيج وتبصم بالعشرة وتكلهم اي بتي تسويها .
منسة بحسرة : ايييييه لا عاب حلگج والله حجيج كلام . . اللللله هيج ويجي فارس الاحلام ويخلصني من الظلام . . اقصد من هالعيشة السم .
. . . .
مرت الايام والاسابيع ومراد يتردد ع الجامعة ويتعمد يكعد يم منسة يسولف بس علمود يشوف غدير الي ماتكعد الا بصف اختها يم النافورة مكانهن المعتاد وجانت عكس اختها ماتمتلك ولا صديقة رغم ملحة منسة بس غدير ما جانت تريد تبني علاقة صداقة وتتعلق بصديقة وتفترق عنها وهيه تدري بأمها اذا تخرجت راح تمنعها من التواصل ويه الناس والطلعة والطبه بس لأنها مطلقة وتدري بدوامها جاي يصير غصب عن امها ويومية الصبح تسمع المناكر مالتها وية ابوها وهيه تلومة لان يخلي بنتة المطلقة تداوم جامعة وتنقله حجي الاقارب والجوارين الي يكولون ابو غدير نايم والماي من جواه بته تطب وتطلع وعدها علاقات بالجامعه لان ماتكدر تسوي شي بالمنطقة من خوفها من ابوها وكل هذا تسمعه وتغلس وتسكت لمن تسمع رد ابوها وهو يحذرها من ان تسمع غدير كلمة يدزها لاهلها بدون رجعة وخوف امها من الروحة لاهلها جان يمنعها تحجي بموضوع الجامعة الا ان اجه يوم رجعن غدير ومنسة من الجامعة ومثل كل مرة لمن يرجعن للبيت متعودات وحدة تركض للمطبخ والثانية تسبح وتبدل ع السريع وتجي تستلم من اختها لحد ماتروح تسبح وتبدل وترجع ويتساعدن ع الطبخ والبيت وبليل يخلصنها قراية للثنتين وينامن وهيج مخلصات ايامهن خوفا من حجي امهن ، بيومها من رجعن راحت غدير ركض للحمام وهيه تسحب ثوبها من الحبل وتضحك ع منسة الي مالحكت تجيبلها ملابس وتطب قبلها ، من طلعت راحت للمطبخ وهيه لافة الخاولي ع شعرها الي كلساع يوكع منه وترجعه وقبل ماتدخل سمعت منسه تكول لامهن .
منسة : يمه حرام عليج عوفي البنية تكمل دراستها شستفادت من الزلمة والزواج شو لعبو بيها طوبة وتالي يحجون بلساناتهم يكولون احنه ذبيناها ومانريدها لان ماتخلف بس مانطلك الا تتنازل عن حقوقها . . جا نسيتي الظلم والقهر والذلة الحصلتهه غدير منهم ، هو انه عليمن احجي واتعب روحي وكلنه ندري انتي البراسج تسوينه لو بعد الف سنة وعند الفلوس تعمه النفوس .
زينب بنتر : لا ياطايحة الحظ هاي عليه ولج هاي عود انه مدللتج ومامخليه شي بنفسج وهيج تحجين علي الا اعلمج بس خل يجي ابوج . . هو انتي واختج وجوه فكر مو مال هيج قسمة فلوس وجاه وصيت .
منسة باستهزاء : ايي يمه ايي نفس هذا الحجي بالضبط حجيتي لمن اجو اهل قاسم وشفتيهن مدندشات بالذهب وجابن هداياهن يغرنج . . اخخخ ياربي شوكت تفرجها على قنادر غدير مو انفت كلبي فت عليها وعلى حظي .
زينب : امداجن وامده فركجن اذا انتن وجوه فكر وجاسحات النعمة شلون يغرجها عليجن .
تحسرت غدير على حالها هيه واختها وغمضت عيونها بقهر ورجعت فتحتهن واصطنعت ابتسامة خفيفة وطبت تساعد اختها . . بعد ماتغدو وكلمن نام بغرفته كعدت منسه وحجت لغدير بدون ماتسالها انو اكو ناس جايين عليها ورجال متزوج وعنده ولد وبنات بكدهن واصغر بس حسب كلام اخته انو زوجته ماتقبل تداري امه وبس تسوي مشاكل وهو مأيس منها وعازل الها بيت وحدها وامه باقيه ابيتها ومحد يداريها ويريدله مره تداري امه وتهتم بيه وباحتياجاته وشايفج من ترحين للجامعه وسائل وعارف مطلقة وكاتل روحه يريد غدير وداز اخته على امها تقنعها واذا قبلت غدير بيه يسجل بيت بأسمها ومهرها راح يكون عالي ، كل هذا تحجيه منسه وهيه تترقب ردة فعل اختها بقلق ولمن شافتها
تغيرت ملامحها للحزن والانكسار انهضمت على اختها وكامت من مكانها وكفت على حيلها وكامت تهدد باختها وتحجي عليها وعلى ضعف شخصيتها الي صار بعد ماتزوجت وعانت من زواجها وكامت تلومها وتحذرها اذا بقت هيج رح تقاطعها وتنسه بعد عدها اخت .
ومرت فترة ورجع تقدملها واحد مطلك مرتين . . والي مترمل وعنده اطفال . . والي مايخلف ويريد يتزوجها لان هيه مثل حالته . . والي چبير بالعمر ويريد يعيش حياته ويجدد شبابه وياهه . . وبقت طول فترة سنتين هيه تعاني وتعاني وكل هالمعانات بسبب امها الي ماتركتها تتنفس وشادة وياها تريد تبزعها وتبطلها من الجامعه وتزوجها لان كل قسمة تجيها احسن من الثانية بمنظور امها لان كلهم يجون شبعانين ويدرون الفلوس در ، وهالشي بنظر امها شي ماكو مثله وحظ حلو ونصيب مايتفوت حتى لو جان اكبر من بتها باربعين سنه وحتى لو جان مطلك مرتين وتلاثة وحتى لو جان ارمل وعنده كومة اطفال كلشي جانت تتغاضى عنه لمن تسمع بكم الفلوس الي يمتلكها العريس المتقدم لبتها
وهالشي دمر غدير وخلاها تنهار وتعيش كل ايامها بقهر وبجي وتعب نفسي لحد ما كام يبين على شكلها ورجعت انتكست وصارت اسوأ من قبل لمن جانت ابيت قاسم كامت تذب كل طاقتها بالدراسة وطبعا مراد ما انقطع عن الجامعه وكل يوم يجي ويشوفها لحد ما صار مايكدر يخفي مشاعرة وكل يوم يسال منسه عنها وليش ماتقبل تحجي وية احد وليش متغيرة وتعبانة وذبلانة لحد ما فد يوم رزلتة منسة وصدتة وكالتله انته رجال غريب ومو من حقك يوميه تسال وتحقق وياي بخصوص اختي . . فاجأها مراد برده وهو يكول .
مراد : اعتذر منج خيتي . . بس اني من باب الاخوة والصداقة طول هالسنتين ماحبيت اشوفها هيج ذبلانة وتعبانة وردت اعرف السبب من باب الفضول .
منسة : ومن شوكت اختي عدها صداقة لو اي علاقة وياك حتى تتقصى اخبارها . . اختي حتى وياي حجيها محدود وتواصلها محدود .
مراد : .........
منسة : ليش ساكت خوية احجي ترة لو ما عندك وياي ووية اختي جم موقف حلو وواكفلنه بهواي شغلات هنا بالجامعه ماجان اطيتك مجال وحجيت وياك وارد السلام واجاوب اسألتك . . مو شايف روحك مصختها ويانة وهواي تسال على اختي وتتقصى اخبارها . . خوية منا وغاد بعد لا تجي ليمنه ولا تحاجينه ترة البينة مكفينه وخاصة اختي ترة الدنيا متعبتها واقرب ناسها ماذينها عوفنا ولا تسببلنا مشاكل والله البينه مكفينه خلنه نكمل دراستنا وهاي السنتين تعدي على خير على اختي .
مراد : هايهيه بعد اخوج احسبيني اختفيت وماتشوفين وجهي بعد بس امانة الله لا تخلينها هيج ذبلانة وتعبانة ترة كسرت كلبي واذتني هواي بانتكاستها قسما بالله ماعدي اي غاية مو زينة وياها وماردت حتى افتح وياها موضوع واصارحها بالي بداخلي لان شفتها من البداية وضعها وحالتها مو مال مصارحات وطبعها لا تاخذ ولا تطي بالكلام جنت ناويي .....
منسة : شناوي ؟!.
. . . يتبع . . .
لا تنسو الضغط على النجمة للتصويت ومتابعة حسابي لقراءة باقي القصص
🌹❤️🌹