رفعت ليليان نظرها لوره فيان وأبتسمت للي جان وراهه وكالت بنبرة زادت من قلق فيان اكثر .
ليليان: مدام اجتي اختج رح احجيلكم عن كُلشي وتكدرون تتأكدون من الموضوع اكثر بعد ماترجع امكم من السفر .
صفنت شوية وسرحت بفكرها ثوني ورجعت باوعتلهن وتنهدت بقهر وهي تزفر نفس ثقيل جان جاثي على صدرها كالت .
ليليان: اعتقد جان عمركم ست سنوات او سبعة لمن عافتكم امكم وتزوجت مؤيد ، بذاك الوقت چنت متزوجته وعندي منه ثنين اطفال الكبير "ايهم" والصغيرة "رزان" جانو اطفالي متعلقين ببعض أكثر مما تتصورون لان ايهم عمره 10سنوات يلا اجتي رزان للدنيا فهو صار يلعبها ويهتم بيها وهيه هم تعلقت بيه واذا بجت الا هوه يسكتها ويراضيها لحد ما كبرت رزان وصار عمرها 6سنوات ، اذكر بيومها جانت ذكرى زواجي اني ومؤيد وجنت مجهزتلة مفاجأة ككل ذكرى لزواجنه لأن هو ينساها كل مرة واني جنت اعذره اكول بسبب شغله والتزامته ، طب علينه مؤيد والأبتسامة على وجهه على غير العادة لأنه نادرا مايضحك ومن دخل جان يضحك بصوت عالي حتى الاطفال استغربو جنت بصدد اني اسأله عن سبب ضحكته لكن الي سكتني هو المرا الي دخلت وراه ما انكر من شفتها حسيت بشيء غريب وبألم بقلبي تملكني شعور بعدم الراحه لهذي المرا وصار عندي شك انها على علاقة بزوجي ،مؤيد لمن شاف الكيك والصالة مزينة بالبالونات والنشرات واني كاشخه والجهال كذلك وقره المكتوب بالنشرات عيد زواج سعيد رأسن خلا ايده على جبينه وصار يمسده بتعب ،بعدها اقترب تجاهنا
وكعد ع التخم وكال بشيء من الحزن والشفقة .
مؤيد: سرور أصعدي لغرفتج فوك اريد احجي ويه أم ايهم على انفراد .
لاحضت انه الي اسمها سرور تباوعلي بحقد وعصبية وماقبلت تصعد وبقت واكفة
بمكانها وهالشي نرفز مؤيد الي ميحب احد يعانده وعاط بيها .
مؤيد: سروور اني شحجيت !.
سرور باوعتلي بغضب اكبر من الي قبله وهيه رافعه حاجيها ودارت وجهها بتكبر وصعدت فوك هنا اني استغربت الأمر هيه شلون تعرف البيت وشلون رح تعرف ياغرفة يقصدها مؤيد بس من شفت ثقتها وهيه تصعد وتباوعلي بأبتسامة جانبية مستفزة عرفت انها تندل المكان وتعرف مقصدها كُلش زين ، باوعلي مؤيد بشفقة وهو يحاجي الأطفال .
مؤيد: حبيبي ايهم اخذ اختك وروحو يم لينا اريد احجي ويه امكم بموضوع .
باوعلي ايهم بنظرات تفحصية وهو يريد يعرف اذا اني رح اسمحله يمشي لو لا
لان الصراحه ايهم متعلق بيه بشكل ويعرفني من ملامحي اذا مقهورة لو ضايجه لو اكو شي مأذيني وبذاك الوقت جان بعمر المراهقة يعني جبير ويفتهم ، لمن اشرتله انو يعوفنا هو اخذ اخته وراح ،اشرلي مؤيد اكعد يمه بعد ما تأكد من ابتعاد الاطفال
رغم شكي ومعرفتي بكل الحجي الي راح يكوله الي . . ردت اتأكد لمن اسمعه من شكوكي اكثر حتى ما اتصرف تصرف اندم عليه واظلم مؤيد بسوء ظني وتسرعي ،
كعدت بقربه واني منتظرة اسمع الي راح يكوله واتمنى ما يطلع الي شاكه بيه لان ما اعرف شنو رح تكون ردة فعلي اذا اني من مجرد شك احس جسمي گام يرجف واطرافي بردت والصداع احتل راسي ،
المهم هوه لزم ايدي وكال .
مؤيد: تعرفين بمعزتج عندي وتدرين شكد احترمج واقدرج واعتبرج أمانة امي الله يرحمها بسس . . وتعرفين كذلك ان زواجنا كان بسبب وصية امي وخوفها عليج من انج تبقين وحيدة وتصيرين فريسة سهلة للطامعين بأرثج ، تتذكرين كلامي وياج بيوم خطبتنا وبحضور امي شكتلج . . مو كتلج اني جنت احب بنت ويايه بالجامعه وبعد زواجنا رح اتزوجها واعيشها ببيت منفصل عن بيتج . . وكتلج مارح اخلي احد يدوسلج على طرف طول ما اني عايش . . وكتلج اذا ماراضية على هالأمر وزواجي منها عليج اكدر انهي زواجنا واني احجي ويه امي وما اخلي اللوم يوكع براسج .
هزيتلة راسي بموافقة ،كمل كلامه وهو يتنهد بحزن وأسف .
مؤيد: ليليان صدكيني اني ناسي اليوم ذكرى زواجنا اني وياج . . ما اعرف اذا رح تسامحيني بيوم من الايام او لا لكن فعلا اني مو متقصد الي صار . . انيي . . اني عقدت قراني على سرور اليوم .
رغم جنت شاكه بالموضوع ، لكن القهر والأنكسار الي حسيت بيه لمن عرفت انه تزوج حبيبته بنفس يوم زواجنه واني جنت فرحانه واجهز ومنتظرته بنفاذ صبر وهو يفاجئني بجلب هدية عيد زواجنا الي هيه عبارة عن زوجة ثانية متطيق حتى تباوع بوجهي ، كأنما اني الي اجيت عليها ضرة ثانية مو هيه ، بوقتها ماصيحت ولا عطت ولا انهاريت ولا نزلت دمعة وحده من
عيوني وما اعرف ليش حسيت ببرودة قوية صارت بكل أطرافي ورعشة سرت بكل جسمي ودخت دوخه قوية بشكل، بحيث هو يحجي ويايه بس ما أسمع شيگول لحد ماصرت ما اميز شكله وأغمى عليه ،
ولمن صحيت لكيت نفسي بغرفتي وابني ايهم نايم على طرف سريري وأثار الدموع على عيونه لسه مانشفت ، اول ما حس عليه صحيت كام من مكانه بسرعه وحضني ، مرت بعدها يومين ومؤيد ما اجه ولا سأل عني جان يسمع اخباري من لينا او اي واحد من الخدم، ومن يومها عرفت نفسي ضعيفة ومحد الي غير ابني وبنتي وبالأخص ابني الي صارلي هو السند والعون والاهل وجيشي الأقوى من اي شي ، وعرفت انه مؤيد مو هو الشخص الي اكدر اعتمد عليه واسلمه كُلشي واني مأمنة ، مرت الايام الي جانت تمشي مثل السم ببطئ شديد وبكل يوم منها لازم اسمعلي كم كلمة تسم البدن وتكسر الخاطر من سرور ،اكثر شي جان يقهرني ويدمر نفسيتي هو مجافاة مؤيد الي واهماله وتقصيرة بحقي وما اقصد من الناحية الجنسية ، لا اني جنت شايلتها من راسي بعد ما تزوج حبيبته لكن اقصد بأشياء ثانية مثل لمن اتمرض لمن انغث من شي لمن تتعرضلي سرور او حتى لمن تسمعني كلام جارح بوجوده ، جانت تقهرني بهواية شغلات مثل لمن نكون كاعدين اني ومؤيد بالصالة وهيه تجي تشمر نفسها بحضن مؤيد وتتعمد تسوي حركات مغرية وبعدها تسحبه وراهه لغرفتهم ، جنت اعتبر هالشي عدم احترام تجاهي وانقهر هواية لان مؤيد ميردها ويبلغها انو هالامور عيب تسويها كدامي ولازم تبقى خاصة ابيناتهم كأي زوجين ، المصيبة انها صارت تسوي هالحركات والأمور حتى كدام ايهم واكثر من مرة احاجيها لو اعاتب مؤيد واطلع اني الي اريد اسوي مشاكل بسب غيرتي تحملت كلشي منهم في سبيل اعيش اني واطفالي تحت ضل رجل يحمينا من انياب الطامعين وخاصة الاقارب منهم ، جان ضعفي الوحيد الي مخلاني اطلب الطلاق وابتعد عنه هو كوني يتيمة الابوين وماعندي غير عم واحد عنده اربعة اولاد وبنتين وهالعم اول ماشاف والدي ووالدتي توفو صار يتحكم بيه وبحياتي وخاصة لمن راد يزوجني ابنه بالغصب علمود ياخذ الارث الي ورثته عن والدي ووالدتي ، خالتي ام مؤيد الله يرحمها جانت دوم ترعاني وهيه الي جانت تحميني من خباثة عمي الجشع، لحد ما خلت مؤيد يتزوجني حتى تكدر تأمن عليه وتوفت بعد زواجنا بخمس اشهر كنت حامل بوقتها بأيهم بشهري الاول ، المهم اني تحملت كلشي يبدر من سرور بس حتى منبقى بدون شخص يحمينا من غدر الناس وطمعهم ، لحد ما صار عمر رزان 9سنوات وجان بيومها دنجهز لحفل نجاحها واصرت الا تطلع تختار هديتها ويايه ماكدرت اخرب فرحتها واخذتها ويايه وبطريقنا لبره البيت وكفت سرور كدامنا وسئلتني كم سؤال وبعدها كالتلي هالكلمات الي مستحيل انساها بحياتي .
سرور باستهزاء : وين طالعين
ليليان: دنريد نشتري هدية لرزان بمناسبة نجاحها عندج مانع ؟.
سرور بأبتسامة خبيثة: لااا . . بالعكس . . يلاا . . عصفورين بحجر واحد يبقى عندنا بس حبيب الماما .
ما انكر الشعور الغريب السيء الي حسيت بيه لمن سمعت كلماتها لكن ما افتهمت مقصدها بوقتها لحد ما صعدنا السيارة وطلعنا من البيت وهنا صارت المصيبة الي دمرت حياتي وحياة . .
. . . يتبع . . .
لا تنسو الضغط على النجمة للتصويت
ومتابعة حسابي لقراءة باقي القصص
🌹❤️🌹