بغداد / زيونة
بيت الشيخ رافد . .
جبير عمامه والناس تستعين بيه لحل مشاكلهم ، يمكن اليسمع بيه شيخ رح ياخذ عليه نظرة ويفكر بأنه مثل أغلب الشيوخ الي عندهم أهم شي العادات والتقاليد ،بس الشيخ رافد چان عكس هوايه شيوخ چان أنسان مثقف ودارس وتعبان على نفسه وعلى أبنه الوحيد الي قتلوه بزمن الطائفية سنة 2007 وترك وراه زوجة وأثنين بنات توأم والي هنه "ڤيان" الچبيرة و "إيڤان" الأصغر منها بخمس دقائق
من صار عمرهن 6سنوات أمهن قررت تشوف حياتها وتتزوج سلمتهن لجدهن ورجعت لأهلها لشمال العراق وراهه بأسبوع وصلت الأخبار للجد رافد بأن سرور أم حفيداته تزوجت وبعد ما بحث بالأمر عرف أنو سرور جانت عندها علاقة بتاجر جبير من بغداد ومتفقين يرحون للسليمانية ويتزوجون هناك بحظور أهلها رافد حس بالقهر بسبب أكتشافة لخبث سرور وأنانيتها والي قهره أكثر هوه لمن أكتشف انها بدت بعلاقتها ويه ذاك التاجر بعد 11يوم من استشهاد زوجها "سُفيان" ولهالسبب قرر يروحلها ويخليها تتنازل عن وصاية بناتها وتتعهد ما تقترب منهن بيوم لأنها مو محل ثقة وأمان لحفيداته ،وبعد مرور فترة راح للڤيلا مالت زوجها ببغداد بالمنصور وحاجاها بصراحه تامة گدام زوجها والي ماچان متفاجئ من كلام الشيخ رافد، تنازلت سرور عن بناتها بالمحكمة بعد أيام من زيارة رافد بس حتى تثبت لزوجها انو هيه تحبه ومتريد حتى الضنى من غيره وهالشي مو غريب من مره أنانية تحب نفسها والفلوس فقط .
كبرن فيان وايفان وصار عمرهن 18سنة وبدت صحة جدهن تتدهور بعد وفاة
جدتهن قبل ثلاث سنوات وبيوم كاعدين فيان وجدها والي چان يحبها ويقربها منه أكثر من ايفان البنت الزغيرة المدللة والي جانت مهملة لجدها رغم دلالة الها عكس فيان الي جان كل أهتمامها لجدها ترعاه وتداريه أكثر من نفسها حاجاها جدها حتى تصيح اختها .
رافد: جدو حبيبتي صيحي اختج وتعالي أريدچن بموضوع مهم .
ڤيان: صار.. تأمر
راحت فيان ووراهه بأقل من دقيقة رجعت كعدت يم جدها تنتظر ايفان تنزل، وبعد مرور خمس دقايق نزلت ايفان تتململ وكعدت من الجهة الثانية لجدها وأبتسمتله بتصنع وكالت .
ايفان: جدو حبيبي ردتني
باوعلها جدها بنظرات يتفحصها يدري بذاتها شنو ويدري بيها تستثقل الكعدة وياهم بس سايرها وكال وهو يباوع عليهن اثنينهن .
رافد: جدو حبيباتي انتن كبرتن والحمد لله بلغتن السن القانوني قبل ما اموت .
اول ماذكر الموت فيان لزمت ايده ونظرات القلق بعيونها خايفة منه يكمل كلامه
باوعلها وابتسم وهو يخلي ايده الثانيه فوك ايدها ويطمنها بنظراته وكمل كلامه .
رافد: اظن أكدر هسه احجي وياجن الصراحة وبدون تردد .. مثل ماتعرفن حالتي مو زينة وصحتي كل يوم تسوء وقلبي ضعيف عايش على رحمة الله، والدكاترة أنطوني مدة تخمينية اقصاها شهر .. هنا نزلت دمعة يتيمة من عين فيان .. شد على ايدها وكمل .
رافد: لذلك اني قبل يومين حاجيت المحامي عبد الصمد ولأنه صديقي وثقة، أمنته على حقوقجن ورغم هذا ما اضمن باجر عكبة شيصير لذلك قسمت الاملاك بيناتجن .. هنا ايفان فتحت عيونها على وسعهن وباوعت لجدها بأبتسامة واسعة ولمن حست على نفسها غيرت ملامحها للحزن ولزمت ايده كالتلة .
ايفان: بعيد الشر عنك جدو احنة ميهمنة شي غير صحتك .
باوعلها جدها بطرف عينة ووجه كلامه الها ايفان طبگت حواجبها بتساؤل ؟؟
فكمل جدها كلامه .
رافد: أني قسمت الورث بيناتجن انتن وبس لان ماعندي اي ذرية غير ابوجن الله يرحمه لذلك كل أملاكي سجلتها باسمجن بس مو بالتساوي .
ايفان چنها عرفت بالي راح يگولة جدها انتفضت من مكانها وكالت بصوت عالي .
ايفان: شلوون يعنيي اكيد كُلشي صار لفيان
ليش انته يايوم مافضلتها علية بكُلشي تقدمها علية ووين ماتريد تاخذها واي شي تطلبه يجرالها بس اني بنت البطة السودة حصرة اكول شي لو اطلب شي متوافق بحجة انتي متعرفين مصلحتج وبعدج متسرعة وطايشة ..أريد اعرف شنو الي بيها ومابية ليش هالشكل تفرق بيناتنا ..ليييش ؟!.
هز راسه جدها بعدم رضا وتنهد بتثاقل
وجاوبها .
رافد: هذا ابسط شي يدل على الاختلاف بينج وبينها ولو اشرح منا لبعد سنة مارح تقبلين ولا رح تقتنعين لانج دايما تشوفين نفسج صح حتى لو كنتي على خطأ عندج اهم شي نفسج وطلباتج تتنفذ وميهمج شي ثاني وهذا من هواي اشياء سلبية بيج تخليني ائتمن فيان على املاكنا اكثر منج
اقلها فيان متتصنع الحب الاهتمام والخوف عليه ..اقلها فيان ماعندها طيش واندفاع وغرور وتكبر وانانية مثلج .. فيان لمن اسلمها شغلة اكلها خلصيها دقايق وتنهيها عكسج مالج خلك اي شي ما تحبين شغل الشركات والحسابات ودوم من اوكلج بشغلة تكليلي ماريد اسويها هاي تجيبلي وجع الراس عكس اختج تخلصها بجدارة وتطلعلي كومة ثغرات بالعقود وياما ياما ساعدتني بكشف سرقات وتغيير بأرقام الحسابات واختلاس اموالنا من قبل الموضفين الاداريين .. بالله كوليلي انتي شسويتي من دخلتي جامعه لليوم واني كلما اطلب منج شي متسويه برأيج اكدر ائتمن وحده بمثل طيشج وعدم مسؤولييتج وعدم اهتمامج على شقى عمري وتعبي وتعب ابوج ترديني اسلمج كُلشي حتى تضيعيه بسبب اهمالج وتسرعج وطيشج وشمعرفني بالمستقبل مارح يجي واحد يلعب عليج ويخدعج وياخذ الأول والتالي ويذبج بالشارع بلا سند ولا مال .
قاطعته وهيه تصيح بكلامها .
وشمعرفك مايجي يوم ويجي واحد يقشمر فيان ويخدعها وياخذ الاول والتالي .. ترة اني الي ما انطي مجال لاحد واني الي ما اسكت لاحد اذا داسلي على طرف مو هيه جدو باوع زين من الأقوى بينا اني الي ما اسكت لأحد اذا عال بيه لو فيان الخاضعة الخجولة .. تراجع عن قرارك قبل ما تندم وتضيع مستقبلي وحياتي بسبب تسرعك وثقتك بفيان .. شوفها باوعلها زين هاي الضعيفة الي تخاف من ظلها تريد تسلمها كُلشي .
جاوبها بنفاذ صبر وصوته عالي خلاها ترجع لمكانها تكعد بخوف من ردة فعله .
رافد: لتعلين صوتج عليه وثاني شي مابيها مجال بعد اتراجع لان وقعت وخلص وبمجرد توقيعجن كل وحدة راح تستلم حصتها وحصتج مو شي قليل سلمتج بيت وتلث محلات كبار موقعهن ممتاز ويدرن
الأرباح در ،من غير رصيدج الي بالبنك عفتلج 75مليون بس مال أسلمج شركاتي وأسهمي وعقاراتي وفلوسي وتعبي وتعب ابوج الي جبنه عمرنه نشتغل ليل مع نهار حتى نكون هالثروة تحلمين اسلمجياه ..
احمد الله واشكره اختج الجبيرة طلعت على والدج المرحوم عاقلة ورزنة وذكية بس انتي ااخ يا انتي بالشكل تشبهين اختج بس اطباعج وحتى نفسيتج نسخة طبق الاصل من اطباع امج وتفكيرها .. المهم هذا العلي ابلغج بالموظوع توقعين تاخذين حصتج متوقعين تتحول لاختج وهذا أخر كلام عندي كومي روحي من كدامي يلاااا .. كووومي .
وكفت وعيونها يتطاير منها شرار ومشتعلة غضب تباوع لأختها الي مافتحت حلكها بكلمة وتتوعدلها بداخلها عافتهم وصعدت لغرفتها ، طبت للغرفة كعدت ع سريرها خلت ايديها ع الجهتين مالت السرير ورجليها بالكاع ،تباوع للكاع بغضب لزمت تليفونها وكعدت ترسل رسائلها السرية .
. . . .
عند الجد ...
لزمت أيد جدها وباوعت بعيونة بحزن وقهر مكتوم كالتلة .
فيان: جدو الله يخليك تراجع عن قرارك اني مستعدة اتنازل عن حصتي كلها بسبيل ما اخسر اختي أرجوك جدو خليني اتقاسم وياها الاملاك مناصفة ماريد اخسر ايفان وهيه كل عائلتي من بعدك .
أبتسملها بتعب ومد ايده يمسد على راسها وجاوبها بكل حنية .
رافد: ديري بالج تضعفين گدامها وتستسلمين لطلباتها وتتنازليلها ولو عن جزء بسيط من الي سلمتجياه .. أعتبريها أمانة عندج هالأملاك لحد ما اختج تكبر وتنضج عقليآ وفكريآ وبعدها انتي حرة اذا ردتي تناصفيها بالملك أو لا .. هسة أريدج تنطيني وعد لو شمايصير متتنازلين لا لأيفان ولا لغيرها عن أي شي من الأملاك الي بأسمج .
بعد ماوعدت فيان جدها ونفذت الي رادة وحضرت بعد ايام بمكتب المحامي ووقعت على أوراق الملكية وكذلك أيفان وقعت وانقل الها حصتها وهيه مو راضية عن قسمة جدها لكن ماحبت تجازف وترفض وتخسر الي نطاهياه على الرغم من معرفتها بأنها ماتكدر تسافر ولا تنقل اي شيء من املاكها لشخص بدون موافقة جدها الى حين بلوغها سن ال٢٠ أو بعد وفاته، وهذا چان من ضمن الشروط الي مكتوبة بالعقود والي وافقت هيه عليها عكس عقود فيان الي ماجانت تتضمن هيج شروط بالعكس بعد ما انتقلتلها حصتها من جدها صار بأمكانها تتصرف بيها مثل ما تريد
وهالشي خله ايفان تغضب وتحقد اكثر من جدها .
. . . .
مر شهر ونص وصحة الجد بالنازل لكن الي مفرح فيان هو بقاء جدها على قيد الحياة رغم ان الاطباء انطوه مدة شهر كأطول فترة يعيشها بعد انتكاس صحته وتدهورها ورغم تعب جدها وعدم أستطاعته على الكلام والأكل وحتى المشي فيان چان عندها أمل وماخلت طبيب ما جابته حتى يعاين جدها لكن كل الاطباء جانو يحجولها نفس الكلام ، انه امره ميؤؤس منه وعمره جبير وتعبان مايتحمل عمليات .
لكن الي غير تفكير فيان الايجابي وقطع أملها بتحسن صحة جدها هو لمن سمعت الصوت الي أنتشر يمها بالمطبخ
. . . يتبع . . .
رواية جديدة كتبتها بسبب الملل والضوجة أتمنى دعمكم للرواية أحداثها وفكرتها مختلفة عن كل الروايات الي باللهجة العامية الي قريتوها أضغطو ع النجمة وصوتولها مرح تاخذ من وقتكم شي .. وشكرآ لدعمكم🌹