مشاعر خارج دائره الصمت
البارت 50
ايسر:ضليت الوج لااني الاكدر اكللهة لا ترحين ولااني الاكدر اسكت خاف تسويهة صدك،اباوع لبرودهة واني مشتعل بالنار اجتي للغرفة وهم فرشت بعيد عني متدري عطرهة مسكن للوجع البية اريد اسكن جروحي واسكر بريحتهة وانام ،سكتت وتعبت كدما اكابر كتلهة لا تروحين 1
رغد:شنو داتحاجيني،اسمعة وميتة ضحك جوة الغطا
ايسر:اي لاتروحين للشقة
رغد:ليش كلت للحجية وهو جذب ولا كايلتلهة ولاشي 😅 1
ايسر:امي تعبانة ومابيهة حيل تطلع
رغد:هممممم ماكالتلي شو من سالتهة يلا ماشي ،(😔بعدك تكابر موووو)،يلا ميخالف بلكت باجر ترتاح ونروح من الصبح
ايسر:ماكو روحة هسة اكعدي ببيتج واسكتي لو ما عولتي اجتج فرصة تشردين
رغد:ااااه شسوي ما يعجبة سكتت وسكتي هاي استمرت شهرين اييي اي شهرين دخلت بالسابع وراح اخلصة كلة ومنا تعب الحمل الي ثكلني كلش ومنا هوة عشت بصراع نفسي مااعرفة شيريد ابتعد يعصب واتقرب يصد خلاني اتدمر نفسيا ، بدة يتأقلم وية وضعة يحاول ينهض عالكرسي وحدة وتعينة بنية جسمة القوية حتى السرير جابولة خاص وناصي واني صرت انام عالسرير وحدي الحديقة الي صارت مكان عزلتة يكعد بيهة من الصبح للظهر ومن العصر لليل ويدخل ينام كبل صرت انجن من برودة ولو عاملتة بالمثل ينجن ويتعصب ويكسر ويصيح واخر فترة احس حتى كلبي تعب من كد الكبت والقهر مرات احس نبضي يضعف افكر مرات شنو الحل الى متى هو هيج وشكد عندي طاقة اتحمل لاهو المتقبل الوضع ولاهو الرافضة ويسعى بعلاج ولا هو المرتاح ولا مريحني شكد جنت احبس روحي بالحمام ابجي جوة المي وارتاح اسوي روحي سبحت واطلع الحجية منتبهة وتحاول تهدء علية حتى طلبت مني اروح للشقة ارتاح كم يوم ومن كتلة جاوب ببرود مو كتلج تملين وتشردين ليش زعلتي بساعتهة بس اني مو مليت هو متبع اسلوب يريد يمللني والي زاد اعصابة انه سهى تطلكت منة غيابي المحكمة تممت بسرعة واصلا هم جانوا مقدمين طلب حس هانت رجولتة بس الصراحة ما اعرف شنو الاحساس البداخلي بس هو احساس ابد ما بررلة عصبيتة الي ديفرغهة بينة لان هو من البداية راد يطلكهة وهانهة وطردهة وطلعهة من حياتهة بس نفسة هالاحساس اتحول لحقد عليهة وعلى انانيتهة من ذبت على ايسر بناتة بيوم اندكت الباب العصر وفتحتهة خولة وجانت سهى همزين بيومهة نزل الوحي علية واتعدلت وخليت مكياج خفيف ولبست نفنوف حوامل مرتب مال عصريات مااريدهة تشوفني تعبانة جنت كاعدة اشرب جاي وية الحجية وايسر كالعادة بالحديقة ومايقبل احد يكعد يمة دخلت خولة وكالت سهى برة كامت الحجية واني مااهتميت خاف يفشلني كدامهة يمكن اموتة ساعتهة شوية وسمعت صياحهم علة طلعت وكفت بالطرمة التفتت علية وباوعتلي من فوك ليجوة
سهى:هذني بناتي راح يضلن يم ابوهن وبيبتهن ديربالج تضوجينهن او تزعليهن
ايسر:الحجي وياية لججججج
سهى:اي مو كتلك بناتك الك يتربن يمك مو وصلتهة للمحاكم تريدهن هاي اني جبتهن الك ومتنازلة بالحضانة واني اشوف حياتي مثل ماشفت حياتك ولو مااتوقع شفت بيهة راحة شوووف ربي شلون طلع حقي منك
ايسر:😡ان جان جاية تتشمتين فاشكرج يا بنت الاصول بناتي ما متعاجز منهن وادري برغد بنت الاصول الصدك مثل ما دارتني راح تداريهن واكثر منج اما اذا جاية تحاولين تثيرين غيرة وعبالج اهتم فانسي انتي ماضي مشوه وطويت ورقتة روحي يابة الله يمهلج بحياتج بس انسي بعد الج بنات يمي وكتلج ياسهى اخليج تحلمين تشوفين اضفرهن
رغد:سهى اتنرفزت وتغيرت ملامحهة وكالت انسان مريض همزين الله خلصني منك ودفعت بناتهة الي يبقن يفرفحن وراهة ومشت ركعت الباب وطلعت واني صافنة عليهة شنو من قلب شنو من ام اني بعدة ببطني ومستعدة اوهبة حياتي وهي بعد ما كبرن وصارن كدامهة يلعبن ويضحكن تعوفهن وتشوف حياتهة يا حياة بعد متتخلة الام عن امومتهة باوعتلهن الحجية وحضنتهن وهنة مجلبات بيهة ويبجن صاحهن ايسر وراحن كعدن يمة حضنهن وظل يسولف وياهن ونزلو جهال ايهم واندمجن وياهم العاب ورسم ومكعبات فتت للمطبخ وسويت للعشا بيتزا ادري يحبنهة بس تعبت لان هواية سويت
ملاك:الله بيتزا شكرا بابا وصيتلنة
ايسر:هاية خالة رغد سوتهة الكم
ملاك:شكرا خالة
رغد:اباوع لملاك انسحبت متاكل اكلوا الجهال وقمورة تكمز وكل شوية جاية يمي تمسح بطني وتكلي هنا نونو احبة تاخذ قطعة وابوسهة وترجع تلعب شلت لملاك كلت خليهة تندمج على كيفهة كملنة العشا وقمورة سوت هوسة وعياط تريد امهة والحجية تجرربيهة تنومهة وهي معاندة تالي كتلهة شتكولين لو ننام اني وانتي وملوكة والنونوعلى الجرباية سوة
قمورة:اني بالنص بصف نونو
رغد:ماشي ابتسمت واخذتهة وكلت لملوكة يلا حبيبتي باوعتلي وابتسمت ومشت ويانة
ايسر:اباوع لحنانهة وية بناتي وياية مرات اتخيلهة ملاك ومرات اكول مااستاهلهة لان من تزوجتهة لليوم جبتهة وياهة تعب بتعب احبهة ومااعرف شلون اشرح البكلبي خايف اخسرهة وماجاي اعرف شلون احافظ عليهة اخذت البنات وشوية وطلعت هي وملاك كتلهة شنو نامت
رغد:دخلنة ننام وقمورة صايرة طينة من النعاس شوية سولفتلهن ششتريت للنونو و اسالهن شنو راح يسون لو صار
قمورة:العب بي
رغد:ههههه ميصير هو صغير يبجي ويتمرض
ملاك:لااني احبة واداري لو بجة اهزة يسكت
رغد:عفية بحبيبتي يمة فدوة للبنات الكبار وبستهة باوعتلي مستغربة ابتسمتلهة وباوعنة قمورة نايمة باوعت لملوكة كالت نعست كتلهة بس ماتعشيتي ميصير تنامين بلا اكل
ملاك:هو بقة اكل😓
رغد:شلون مانبقي للحلوة شلت حصتج حبيبتي وكرصت خدودهة يلا حبيبتي نكوم ناكل طلعنة وايسر كاعد على موبايلة كال نامت هزيت راسي واخذت ملوكة اكلت وشربت عصير ووديتهة تغسل غسلت والتفتتلي ابتسمت وكالت
ملاك:ميخالف تبقين هيج حبابة احبج هيج لا تصيرين شريرة
رغد:ههه لامااصير اني احبكم ومااصير شريرة وياكم بس كون تحبوني وتعتبروني ماما خالة بكيفكم
ملاك:اممم اني كمت احبج شوية
رغد:مااشي بس اني اريد هووواي
ملاك:اي باجر يلا نعست
رغد:اخذتهة ودخلنة ننام ايسر جان فايت للغرفة متمدد نومت ملوكة بصف اختهة ورحت اطفي الضوة وفتت من يمة جان يلزم ايدي
ايسر:شكرا لان اتقبلتيهن واهتميتي بيهن انتي انسانة نادرة
رغد:اي اني جوهرة بس بايد فحام للاسف وسحبت ايدي ومشيت طفيت الضوة وتمددت منزعجة بس تصرف كلش لطيف ريحني فزت قمورة باست بطني ورجعت نامت ابتسمت ونمت مرتاحة حسيت بقربهن راحة نفسية جنت مفتقدتهة بفراشي البارد الخالي يومية ومرت اسبوعين على وجودهن واخذتهن وياية للدكتورة شافن النونو بالسونار وكالت اسبوع وتدخلين بالتاسع ويانة ايسر كلش تعدلت نفسيتة بوجودهن يلعب وياهن ويضحك ويتشاقة عصبيتة اختفت تقريبا واني حابة وجودهن اكثر منة انطن للبيت روح بعد ماجان ايسر مكهرب اجوائة وبيوم جنة كاعدين بالليل وايهم فاتح اللابتوب دا يراسل مااعرف منو وجان يكمز اي اي الف الحمد لله لك ايسر ابشرك
ايسر:شنو ايهم شكوو
ايهم:لكيت جراح جبير كلش بالهند قبل يستقبل حالتك ويسويلك عملية هوواية متشافين على ايدة وو.....
ايسر:ومنو كللكم اسوي عملية اني
رغد:من شفتة هيج عفتة وكمت للغرفة واسمع هوستهم علت اخر شي ايسر كال للايهم
ايسر:مااسوي ومالك حق تجبرني واذا اتعاجزت مني روح اني ما اجبرك بية
ايهم:مع الاسف عليك تفكر هيج بية يا اخوية لو اني بمكانك تتعاجز مني
ام ايسر:كافي ايسرر ترة مصختهة لا عبالك ساكتة على سوالفك واكول نفسيتة تعبانة اني راضية على تصرفاتك كلك غلط من ساسك لراسك وهسة على اي اساس انتة ترفض تفرحنة وتردلنة رواحنة بوكفتك
ايسر:ولو ما وكفتك شسوي يمة كليلي ساعتهة اموووت صدك ليش تأملوني بشي منتهي اني اعرف بروحي مالي امل
ايهم:تصبحون على خير
ايسر:اوكف ايهم ،ماسمع وصعد زعلان واسمعة عاط بالجهال وركع الباب نزلن قمورة وملوكة مبرطمات لان اول مرة يصيح بيهن ودخلن يم رغد الي اتعجبت سحبت نفسهة وما اصرت وياهم كلت لامي تصبحين على خير ودخلت لكيت رغد تسولف وية البنات وهن مستمعات للسوالف تسولفلهن على عيشتهة قبل والعابهة شلون تخيطهن امهة الهة بتعب وجهد يلا مددت عالسرير وهي تباوعلي كلت لملوكة كومي غطيني بابا اتقربت رغد وغطتني كتلهة شكرا ودرت وجهي اتصفح موبايلي ووبالي طبعت صورتهة هي وبطنهة لواصلة لخشمهة صايرة دعبلة كوة تمشي حتى نفسهة كوة تسحبة بس احب شكلهة هيج احبهة بكل حالاتهة اكلب بموبايلي بالصور الماخذهن الهة بدون متدري املي عيني بشوفتهة لان مااكدر اطيل النظر الهة عيوني تفضح كل ضعفي بان تعوفني كدامهة
قمورة:يلا خالة سويلنة هسة لعابات مثل مالتج
رغد:مو هسة حبيبتي تعبانة اني ونونو مضوجني..
الكاتبة ايه.... يتبع