الحلقة_70:
نرجعو لسمير وسارة ...لي فرقتهم الضروف وقلوبهم بقاو معلقين بصح كل واحد فيهم يكذب على روحو ..
جازت العطلة تاع الشتا سارة مالدار متخرجش ..كارهة حياتها يعيطلها امير بصح هي تحب تليكيديه ديما وهو فايق بيها بصح حاب يكسبها ليه وماهوش عارف بلي قلبها ماهوش معها وعندو وحدوخر..
سمير يلهي روحو بالخدمة حتى مور العطلة يروح للكيبة تاعو الجديدة.
..
سارة ساعات طل من تاقتها كي شوفو فليل جا ولا فالنهار تبكي عليه وتشبع بكا خاطر توحشاتو بزااف ..وتشد تليفونها باش تعيطلو خاطر حافظة نومروه مي تتراجع كي تتفكر بلي سمح فيها وهي درك راهي مخطوبة..
صعيبة بزاف شوف حبيبها كل يوم قدامها وفي نفس الوقت بعيدة عليه..
..رجعت سارة تقرا خرجت حزينة ولعشية رجعت حزينة ..شافها سمير وجعو قلبو عليها عارفها بلي قبلت من فوق قلبها....بصح مقدر يديرلها والو مع الوقت توالف..لحق الوقت باش يروح ..بقالو نهار ويروح وجد كامل دوزانو وحوايجو...فليل...خرج سهر مع صحابو ضحكو وحكاو ورجع فليل ..شاف جيهة تاقة تاع سارة قلبو وجعو..
سمير: مبقاليش سارة ونغيب عليك مزالي نهار غدوة برك ونودعك..ونخليك تعيشي حياتك علابالي راكي تعذبي كلما شوفيني ..نعرفك وحافظك..
ومشا لدار مقهور وحزين..
....
سارة في بيتها تتقلب مقدرتش ترقد حتى عيطتلها مريا ..
سارة : وي مريا لباس ؟
ماريا: لباس ديزولي عيطتلك هذا الوقت بصح حبيت نسقسيك ..
سارة مستغربة :وي ؟؟
ماريا: ذيك الخطرة سمعتي بلي سمير جماعة كسرولو الطونوبيل ؟
سارة حلت فمها مخلوعة : وقتاش ؟؟ مسمعتش ؟؟
ماريا: عندها وحد الشهر هكاك...
سارة: شهر؟ يعني من وقت تفارقنا ؟ هكاك
ماريا: ايه ..ضربولو ابطونوبيل جماعة يسالوهالو ..سمعت خويا قبيل يهدر مع يما..
سارة: وانا كيفاه مسمعتش ؟؟ كيفاه ماما مقاتليش ؟؟ زعما مسمعتش ؟
ماريا : والله منعرف ..علاه سقسيتك..
سارة: اوك .ميرسي ليك دوك نشوف..
كوبات ماريا..وبقات سارة رايحة جاية في بيتها مقلقة وتخمم وقتاش كسرولو الطونوبيل ؟! الطونوبيل ديما هنا كيفاه كسروها ومفاقتلهاش..
بقات تخمم حتى تفكرت نهار تبعها فالكوس ..صح ثم مكانش بالطونوبيل..
بصح نهار تفارقنا كان بيها..
وفليل جا بيها..!! بصح انا شفت الضو برك مشفتش اذا هو ولا لالا.بففف ماشفتيتش مليح.ااه يااربي..
بقات تغلي في بلاصتها..سما نهار عيطتلو ماسكي مكانش بالطونوبيل ؟..كان فالدار ولا كيفااه ...ااه ياربي يعني انا ظلمتو وشكيت فيه..
واش ندير درك..باش نتاكد نعيطلو ولا كيفاه ..
بقات تتقلب منبعد تنهدت وقرت تعيطلو وتريح راسها
سمير سهران مجاهش النوم يخمم في غدوة يصبح رايح وميشوفش سارة وكان حاب يشوفها قبل مايروح..
سارة عيطتلو مع الفجر مقدرتش ترقد ليل كامل تخمم باش عيطت..
سمير معرفش النومرو..رفد
سمير: الو ..شكون
سارة سمعت صوتو فشلت توحشاتو بزااف...معرفتش واش تهدر..
سارة: الو..سمير..
سمير سمع صوتها فرح متوقعش تعيطلو..
كان راقد ناض قعد : وي سارة لباس ؟
سارة: مانيش لباس ..علاه خبيت عليا ؟
سمير فهم على المروح تاعو لي هي مزال مسمعتش بيه وهي تخمم في حكاية الطونوبيل.
سمير: الله غالب علاه نقولك محبيتش نقلقك..
سارة: كيفاه تقلقني ..حاجة كيما هذيك متتخباش..
سمير: مكان والو بيناتنا ودرك انا رايح نشوف حياتي ونبعد ونتي عيشي حياتك
سارة مخلوعة مفهمتش : رايح ؟ وين رايح ؟
سمير: نتي علمن راكي ؟
سارة: انا راني على كي ضربولك الطونوبيل ؟
سمير: هه حكاية وجازت ..
سارة: علاه مقتليش ذاك النهار ؟ علاه خبيت عليا..وزيد وين راك رايح ومخليني ؟
سمير تنهد : ياسارة نتي درك مخطوبة ومرت راجل..وانا لازم نبعد مليح ليك وليا
سارة حست قلبها محروق وراح يخرج..
مفاقتش دموعها نازلين كيفاه سمير راح يبعد عليها ومتزيدش شوفو
سارة: مترووحش وين تروح واش مالراجل تهدر عليه...منحتاجوش ..
سمير: ساارة خطيك مالهبال قتلك اتهلاي في خطيبك وانساي ق****..
سارة: محاال حابني نهبل ...متروحش سمير..والله نبطلو وندير حاجة في روحي..
سمير: استغفر الله واش هذي الهدرة..؟؟ سارة: الي سمعتو ..منحبوش..
سارة تهدر وتبكي وتشهق رجعت ترجف وسمير كثرمنها محروق ..بقاتلو ساعتين ويديماري..مقلق ..وحاب يشوفها..
سمير: سارة ياك درك تخرجي تقراي..ارواحي نتلاقو ونحكو ...خير..
سارة: بصح توعدني متروحش..
سمير: سارة نتلاقو ونحكو..
سارة: لالا اوعدني
سمير: منوعدك بوالو حتى جي ونهدرو..
سارة: سامط نكرهك نكرهك ..منجيش مانيش حابة تودعني..
وكوبات مخلاتوش يجاوبها..
...
ناضت لبست وراحت تقرا الصبح فالشتا الضلمة مزالت..
تمشي ودموعها في عينيها ..حتى حست يد جبدتها ..شافت لقاتو سمير طلعها طونوبيل وقفل الباب وديمارا
_____________________________________
راني نشوف حتى واحد ما حوس عالبارت تع صباح مولاتش تعجبكم ول وين راه المشكل ؟؟
ولاد الحومة
Door Nihel-nina
قصة باللهجة الجزايرية تابعوها ومتندموش ملاحظة: هاد الكرونيك منقولة من قروب فيس Meer