مشاعر خارج دائرة الصمت

البارت ١٦

مشاعر خارج دائر الصمت

البارت 16

للبيت وخليت امي يم ريام لان محد يداريهة هنا وهي هم تدير بالهة على ريام لان حملهة صعب وخطر ،بدلت وطلعت وية جماعتي لشوية ودك تلفوني مسج من رغد فتحتة وكلي لهفة وغضب حب وكره احساسين يمشن بجسمي واحد ضد الثاني قريت كلامهة وجانت كاتبة

رغد:كملت وية البنات هوسة العشا ومواعينة وكعدت وياهم شوية واترخصت دخلت لغرفتي لكيت مسج من ايسر فتحتة وصدمني محتواه جان تهديد وغضب اكدر المسة من كلماتة واتخيل شكلة وهو يكتبة الظاهر حسن استفزة كتبتلة(مالك حق تحاسبني على رفضي الك اتذكر انتة الرفضتني وطلعتني من حياتك من اول ليلة جمعتنة وماكفاك رجعت تهمتني بالتقصير بدون متسمحلي اشرحلك صدك حسستني بمرضي وعجزي من ماطلع صوتي حتى ادافع عن نفسي لاتتخيل اكدر اكمل وياك بعد السويتة بية مو شوية ومااشوف الة داعي استمرارنة وارجوك اعتقني لوجه الله وريحني)دزيت المسج وحضرت الرقم ونمت مااريد اي اتصال وياه وريام هم لكيتهة داكة علية بس دزيتلهة مسج طمنتهة اني بخير ولا تقلق ونمت واني اقلب بافكاري ومصيري المجهول وكعدتي يم ناس بحساب غربة عني هم حرام وهم مو لائقة وهم مالي مكان حاليا غيرهم نمت وكل هالافكار براسي

ايسر:من وصلني منهة مسج وقريتة احس اشتعلت بالزايد حسيت فجأة وحطت كدامي مراية شفت بيهة كل اخطائي وياهة ووية نفسي ووية بناتي ووية امي الي زعلت لان ضربتهة وضربت سهى وكالت انتة صاير ماتتحاجة وما تحترم رأي الاكبر منك وزوجتك حامل واذيتهة وهالبنية عاجزة واذيتهة كل هالشي خنكني وخلاني اخذ اجازة من شغلي واسافر برة البلد اصفي راسي بعد ما كلفت جماعة يدورولي رغد

رغد:مرت ايام يم عمة ام زهرة عائلة خالة زهرة كله عليهة محبوبين وينحبون حتى اختهم المتزوجة اجتي وترحب بية وتكلي شنو هالجمال حرامات متزوجة اما عائلة خالة سعاد فالعكس عدا ابوهم ليكول عندهة عداوة وياية نابشتلي بكل صغيرة وجبيرة فكلت اشرد منهة واطلع وياهم للبستان اغير جو واشوف بساطة الناس نروح جنة من الصبح اني وعمة ام زهرة وزهرة نطلع للبستان وورة الدوام يلحكونة مرات امل وايناس اما خالة سعاد وبنتهة معتكفين جنة نطلع من الصبح ونرجع للعصر مي وخضار وكعدة خفيفة بدون وجوه تنكد مر على وجودي وياهم اسبوعين وبيوم جنة كاعدين وحجت عمة ام زهرة:اكلج يمة رغدة جانت تحب تسميني رغدة انتبهتلهة:اكول يمة ليش ما سوالج ابوج عملية
اشرتلهة انه ماكو فلوس تكفي

ام زهرة:شكد تكلف

رغد:هزيت راسي ماادري

ام زهرة:يمة زهرة اني مو كتلج ناوية اسويلي عمل خير ينفعني لاخرتي صدقة جارية واني اشوف لو عالجنة هالبنية ورجعنة حسهة هذا اكبر عمل خير

زهرة:يمة والله خوش فكرة يصير

ام زهرة:اي ولج هي مو خرسة من صارت هي مرضت وراح صوتهة وابوهة اخر مرة كالىي لاكي دكتور يعالج حالتهة وجان يجمع عود لعمليتهة بس ماقبل اساعد ابد اوووف شكد نفسة عزيزة سودة علية هايمة رغدة خل نطلع باجر لبغداد

رغد:😭😭بس جابو طاري ابوية شلال عيوني انفتح بداخلي فرحت من كالوا نعالجج بس كلت خاف اثكل عليهم كلش فهزيت راسي بلا مااروح

ام زهرة:يا ليش يمة شجاج ما تكيفين ترجعين تغردين تستحين مني ولج والله اشو ترحين وغصبا ماعليج اني اخلي عمج ابو حسن ياخذنة ونخابر حسن يجينة مناك من كليتة ونوديج لاحسن دكتور وغصبا عليج
رغد:كمت من يمهم وداخلي فرحان واخيرا ارجع احجي ويطلع صوتي واخذ حقي بصوتي وادافع وارد واسولف لان اخر فترة وية ايسر كلش كرهت عجزي عن النطق وادافع عن نفسي بنصهم الله ياربي دخيلك اوكف وياية وكون ترهم ضليت اتمشة وجانت عصرية ومااحس الا جلاب كامت تعوي وصوتهة يقترب صرت اركض ومااعرف حتى الطريق منين احاول اعيط بس صوتي ماكو ميطلع ولو عطت قوي اتأذة مثل ذيج المرة اريد اندل الطريق انثولت التفتت اشوفهم صارن قريبات صرت اركض بسرعة وفجاءة وجان انلطم بحايط مو شاب شاب ضخم وطول بعرض صار هوة المنقذ الوحيد خلاني وراه وطلع مسدسة من حزامة ورمة طلقتين بالهوة وشردن الجلاب بس شنو من رمة اني منا منتهية رعب منهن وانوب صوت الطلق كعدت بالكاع وخليت ادية على اذاناتي وصرت ابجي وارجف من الخوف حتى رجلية متساعدني بعد فجأءة اقترب مني الشاب وزمخ
صهيب:شمطلعج وحدج تتفرفرين المغربية بالبساتين😡وين اهلج

رغد:صرت ابجي اكثر لان مااكدر احجي ولا بية ارفع ايدي واشرلة وهذا يزمخ فوك راسي كل موقف وية احد غريب جاي يخليني اكره عجزي اكثر واكثر

صهيب:كومي لا تبجين انتي طفلة كليلي بتمن انتي وين بستانكم

رغد:كمت كوة ومشيت اريد اندل الطريق حتى ااشرلة وجان يجي وراية

صهيب:تعاي وين رايحة وحدج متنطقين بنتمن وجريتهة من ايدهة التفتت وانتبهت الهة حلوة وغركانة بدموعهة ومخبوصة وانخبصت اكثر من لزمت ايدهة واني انتبهت على نفسي هديتهة وكتلهة اسف ما قصدي بس دليني كولي شي

رغد:بهالاثناء واني مخبوصة ومقهورة ومااندل حتى اوصفلة وجان المح عمة ام زهرة وخالة زهرة ركضت من يمة ولحضن عمة كمت ابجي شلون طفل متيه امة ولكاهة

صهيب:انصدمت هاي ركضت لحضن بيبي وصارت تبجي بي وبيبيتي تهدء بيهة

زهرة:هاخالة صهيب نزلت

صهيب:اتقربت واني ما مفتهم شي كتلهة اي خالة بس منو هاية

زهرة:يا هاية رغد بنت جدك كريم اخو امي بالرضاعة تتذكرة موو بس شبيهة تبجي خاف اخترعت من الطلق ماتعرف شنو هذا

صهيب:مرحبااا قبل لا اكمل اعرفكم عن نفسي شوية لان اقتحمت القصة فجأءة اني صهيب الابن الاكبر لسعاد مواليد٨٩اشتغل بشركات النفط بالجنوب طبعي هادئ بزيادة وصامت جدا مااحجي الا للضرورة اليوم جنت نازل من دوامي وصلت الضهر وبوجهي تغديت ونمت ويعرفوني من اتعب مااحب هوسة وحجي زايد فمحد يحجي وياية حجي مالة داعي كعدت العصر سبحت وبدلت وطلعت بوجهي للبستان مالتنة احب اكعد بي هدوءة حلوو وهوا طيب لفت انتباهي هرجة مال جلاب اكرمكم الله بالطريق لاحكات بنية جنهة فارة تكمز وتركض خايفة منهن خطية ماانتبهتلي من اجيت بطريقهة وانلطمت بية بس شافتني اخترعت وختلت وراية حسيتهة جانت تطلب احميهة رأسا طلعت مسدسي الجان ميفارك حزامي ورميت بالجو رأسا راحن بس التفتت هاية منتهية اريدهة تنطق ماكو شو هاية بلا كلام ولا شكر كامت تروح من حاولت اوقفهة شفت نضرة براءة بعمري ماشايفهة ببنية احس كسرت كلبي عبالك طفلة ومتيهة امهة من سولفتلي خالة زهرة منو هية رأسا تذكرت هي الاعرفة متحجي خطية شكد مسكينة خايفة ومايطلع صوتهة باوعتلهة خاتلة بحضن بيبيتي كتلهة لاتخافين راحن كافي تبجين

ام زهرة: هابيبي شوكت اجيت الحمدلله عالسلامة هاي انتة الحشت هالجلاب منهة همزين الله حطك بطريقهة مو كتلج لاتبعدين يايمة

رغد:يحجون واني مااعرف منو هذا الساعدني بس مبين هاااادئ وراكز لان حتى من احتميت بي جان هدوءة غالب باوعتلة بنضرة شكر وردهة الية بابتسامة وكال....
رغد: ضجت منة ودرت وجهي شعليه هو منو.كالة اعاند افتهمت منهم بالطريق انه هو ابن سعاد الجبير اليداوم بعيد مااهتميت اكيدحالة حال امة واختة لليل عمة ام زهرة فتحت موضوع عمليتي كلهة حبت الفكرة عدا سعاد

سعاد:ليش يمة تبذرين بفلوسج من احفادج هية من عشيرتج حي الله راضعة وية ابوهة متستاهل هالكد فوك ما ملفيهة يمنة راح يصيرلهة شهر
ام زهر:انتي تنلصمين وتسكتين ما ماخذة من فلوسج عود لو كتلج انطيني لا تقبلين فلوسي وانة حرة والهة بيهن مثل ماالج لولا بيبتهة جان متت جوع ورة موتت امي واني ربيت وية ابوهة فتعتبر بنت اخوي وحالهة من حالجن عندي ماكاعدة يمج ولا صارفة من جيسج

سعاد:والله هالادب سزز عرفت شلون تتمسكن عليج وتفر عقلج وتاخذ فلوسج اولهة عملية لهناك محامي يطلكني

ام زهرة:اششش لاتخليني ازعلج واحترمي

رغد:كلش انقهرت من كلام سعاد وعرفت لو انحجت السالفة راح اسمع كلام يغث بس عمري مااتصورت توصل لهدرجة تتجاوز على امهة بس الي لفت انتباهي من كالت سعاد محامي يطلكهة نضرة صهيب الجان يستمع بهدووء اول مانحجت هالكلمة رأسا التفتلي وكال
صهيب:ليش انتي متزوجة

رغد:هزيت راسي بموافقة مالي خلك اشرحلة واني بهالوضع وكمت من يمهم بس وقفني صوت عمة ام زهرة وزهرة يكولولي اكعد ما اتحملت كعدت بصف خالة زهرة ودفنت راسي بجتفهة وكمت ابجي اي ابجي طفلة اني بهذا الموضوع بالذات تنهار كل قوتي واحسة نقطة ضعفي يمكن لان كل عمري كبرت وهو هاجس اهلي الوحيد شلون يخلصوني منة حسيتة كابوس واريد بس اخلص منة قفل وقافل كل حياتي غيري هواي يمكن مو مهم هذا الموضوع لان المحيط بيهم مستقر اني وووووين يتيمة ومالي سلاح غير صوتي وشرفي
سعاد:اي تمسكني اكثر ونزليلج كم دمعة لوتية هن ذني بنات الفكرر لوتيات..

الكاتبة ايه.... يتبع