مشاعر خارج دائره الصمت
البارت السادس
ريام:حقة يستعجل اذا هالكيك كدامة شلون يصبر اكول طول الطريق يوصي كولولهم للخميس كلشي يتم +
رغد:خجلت من كلامهم وكلت بلكت الله حابني وصدك يطلع شاريني ورايدني ويحبني وتكمل فرحتي ولو موضوع هو متزوج مخوفني وردة فعل زوجتة شلون سكتت ردت اسالهم بس ام احمد سكتتني كالت اسالي هوة النسوان ماتنطي حجاية طلعن وكالن لباجر يرجعون وام احمد تبوس بية وتكلي عين العقل نمت وبالليل اجاني بابا بالحلم جان مبتسم وكاللي اول مرة ارتاح من عفتج لليوم هسة انتي بايد امينة فزيت من النوم وابتسمت كلت لعد هاي اشارة انه سعادتي بهالقسمة نمت على امل باجر اشوف ايسر واحاجي واتعرف على مشاعرة الي بداخلي جنت اتمنى يطلع يحبني....
ايسر:يمة اليوم اتفقت وية عمي نروح للبنية ونطلبهة من جيرانهم بيت ابو احمد ونتفق عالغايب والحاضر وتاخذوهة تجهزوهة اريد للخميس كامل كلشي حتى الشقة كاملة ودزيت يرتبوهة وينضفوهة وشمحتاجة نواقص يكملوهن
ام ايسر:اشوفك مستعجل يمة ها وكعت بالبدابة تتعزز علية
ريام:حقة ماما شفتيهة شلون تخبل عبالك جكليتة
ايسر:شوف هاي ام جكليتة والله وداعت ابوية ما مركز بشكلهة بس كل الي بالموضوع انه مناسبتني ومناسبة وضعي ليش مااستعجل
ريام:ايسر وصلني للبيت حباب تاخرت
ايسر:ماشي يلا كومي يمة محتاجة شي شوية وارجعلج
ام ايسر:لايمة سلامتك اصلا صار بية كل الحيل من شفت مريتك
ايسر:هههه بعدهة ماصايرة مريتي الله يديم العافية عليج يمة يلا ريام،اني سابقج للسيارة
ريام:ايسر اكدر احاجيك بموضوع ماردت امي تسمع لان مكيفة خطية
ايسر:كولي ريومة خير
ريام:ليش احسك مافرحان بزواجك هذا اتوقع اليخطي هيج خطوة معناهة لكة الناقصة فيكون الفرحة ما سايعتة بس اشوف العكس احس ضايج ومهموم وماحاب الموضوع كلة
ايسر:تردين الصدك ريام ماحابة ماحابة وماطايقة اصلا بس الضروف جبرتني
ريام:ايسر شدتحجي شنو ماطايقة لعد شنو ذنب البنية خطية لاتصير انتة والوكت عليهة
ايسر:لابالعكس اني وياهة عالوكت اريد استرهة لان وضعهة ميسمح تبقى وحدهة وهم وضعي وحالة امي يخدمني وجودهة بحياتي
ريام:ليش انتة ناوي تاخذهة خدامة شنو ايسر اذا على وضع امي اني مامتململة ابد وامي اخدمهة بعيوني وزوجي مشجعني على بر امي بقت موحجة هاي تتزوجهة حتى تسترهة مااتوقع شكتلك من وضع او جبرتك على وضع حرام عليك هيج مستصغرهة
ايسر:لاريومة اني تدرين بية هيج بس هاي هية قسمتي وقسمتهة واني ماراح اقصر وياهة
ريام:اتمنى واتمنى هم لا تخليهة ابد بمواجهة وية سهى لان راح تفترسهة وهي مبينة هادئة وخجولة
ايسر:اووف اني مشغول بالي بردة فعلهة خايف تاذي البنات
ريام:مستحيل ام تاذي اطفالهة بس صدك هسة تستعدل لكن تظل تحفر للمسكينة لان سهى اعرف طينتهة من جوة لجوة فابد لاتسمعلهة
ايسر:شتدريني امشي بحجيهة هذا الموجود رضت اهلا وسهلا مارضت بناتي الي وخلي تتوكل لان هي الجابتهة لنفسهة
رغد:كعدت من النوم من وكت وسويت حملة تنظيف للبيت رجعت سويت كيك وطبيت سبحت وبدلت لبست فستان بسيط مال محجبات لونةاسود ما قبلت انزع الاسود مع انه ام احمد شكد لحت علية صعبة ابوية هذا وماخليت مكياج بس كحل لعيوني بس كسرت السواد بكب جوة الشال الاسود لونة ازرك طبعا بعد ماخالة ام احمد موتتني وزرفت راسي شوية واندكت الباب ودخلهم عمو ابو احمد للاستقبال جان موجود خطية بهاللحظة نزلت دموعي شصار لو بابا عايش ولو لو بعدة يمكن مستحيل اعوفة نفضت راسي من الافكار من حاجتني خالة ام احمد وكالت دخلي قدمي العصير والكيك كوة دخلت واحس رجلي ترجف وادية كوة لازمة الصينية وضيفتهم وصلت لايسر كوة كمت اتنفس من الخجل
ايسر:من طبت جانت مبينة مستحية وترجف ضلت بكلبي صدك اريد اركز بملامحمهة بس هية مدنكة بارتباك كتلهة مشكورة بس مو اكول فستانج ضيك هي رأسا رفعت راسهة وباوعتلي بخوفة وهزت راسهة شكد جان شكلهة بريئ وحلو وهادئ حتى مكياج مامخلية بس جمالهة طبيعي مريح للنفس كملت ضيافة وطلعت شوية ولبست فستان اعرض باوعتلهة واجت عيني بعينة نزيتلهة راسي وابتسمت هي افتهمت ودنكت بخجل
رغد:ماادري ليش اسمعلة كلام من هسة ما ترفضلة طلب يمكن لان صح وبمحلة وخوفة علية يمكن دليل حب واهتمام جنت اول مرة اركز بشكلة وانتبهلة جان طويل وضخم اوصل لنص جتفة😖😥وعيونة حادات ولونهن عسلي فاتح وخشمة دقيق كلش ومربي شوارب مبينات من صدك ضابط لونة حنطي لاابيض ولااسمر وشعرة مزينة خفيف شكلة جان رجولي كلش اول مرة انتبه لتفاصيلة بدوا يتفقون على المهر ومقدم ومؤخر اشرت لخالة ام احمد تكلهم انه اني ماطالبة مهر غير القران ووعد رجال يصوني ويحترمني طول العمر ومايجي علية ويظلمني يوم كوني يتيمة بدون اهل
ام احمد:يابة البنية ماطالبة اي مهر غير.......
ايسر:شكد كبرت بعيني وحسيتهة صدك عينهة مليانة ومتربية صح بس قهرني شرطهة الثاني من المهر شكد خايفة مني ومن الوكت لعد وهيج تطلب كمت وكفت وكتلهم كدام الكل اوعدكم وعد شرف انه هالبنية اني راح اصونهة واحافظ عليهة واعاملهة بمايرضي الله ومسالة ماالج اهل فهاي اني اكلج يابنت الناس احنة اهلج وناسج وشتحتاجين حاضر
ام ايسر:يمة الله شاهد دخلتي كلبي من اول شوفة وصرت اشوفج حسبة ريام والله لاتحسين غير شي
ريام:انتي اختي ان شاء الله وشتحتاجين كوليلي
ايسر:بس اني مايرضيني مالهة مهر حقهة هذا فعليه مهرهة حالهة حال اختي ١٠ حاضر و١٠ غايب
رغد:شكد حسيت كبروا قيمتي وخلوني بمكانة حلوة بنصهم خصوصا من كال حالج حال اختي كامت الدموع تهل وحدهة قروا الفاتحة وباركولي وبوسوني وطلعوا الكل وريم كالت بعكب باجر امرلج نطلع نجهز اتحضري شكد جنت اتمنى ايسر يظل حتى اصفة برأي وياه شنو وضعي وياه ووية زوجتة بس ارجع واكول مادام سوة هيج معناهة يحبني مرت الايام ركض بين جهاز وملابس وريام وام احمد مستلميني وخالة ام ايسر هم طلعت ويانة من اختارينة الذهب الاايسر ابد مابين ولا مرة جهزت ملابس بيت وكلة ريام اختارت دشاديش قصيرة وتراكات وحاولت وياهن اسود ماقبلن منا هي ومنا ام احمد سكتت وداخلي ماراضي بس كلت خاف اعاند ويقلبون علية اووف شكد اخاف افقد هالاحساس والله اليتم ذلة ياعالم اشتريت مكياجات وعطور ومعطرات وقراصات هالشغلات اموت عليهة واحذية اخذت وجنط ٣ سيتات حذاء فلات ولو الفلات عدوي وية طول ايسر بس شسوي طلعات مرات مترهم بعالي او كعب متوسط يفيدني هيج وشالات وفساتين محجبات لان ايسر موصي ماكو بنطرون وقميص لو تنورة لو فستان واني من ورة ماشاء الله ابد مومال تنورة فالفستان استرلي او جنت بنطرون وقميص طويل وعريض كملت كلشي بجهازي وللشقة كالت ريام ماناقصهة اي شي ايسر مجهزهة من كلشي كلت بداخلي لعد انشغالة هو بسبب الشقة ودايجهزهة مااعرف ليش جنت اخلقلة اعذار بداخلي ورحت الاربعاء للصالون حفيت وجهي لاول مرة وشعري خليتة على لونة ورجعت استلمتني بنت خالة ام احمد خطية اجتي عالمودي شيرة اووف طلعت روحي لليل نمت واني هلكانة واحلم بباجر ياترى ايسر شراح يكول لو شافني شلون طبعة وتصرفاتة شقتي شلون شكلهة يارب اسعدني وانصرني ونمت وكلي امنيات انه من باجر راح تبدي سعادتي وتعويضي بهالدنيا بزوج واب وسند وكلشي كعدت الصبح وتحضيرات ومكياج خفيف ماقبلت هواية وشسورت شعري بس ورجعت من الصالون للبيت لبست فستان اوف وايت وذهبي شي نازك وبسيط ماردت هوسة وزفة وايسر عبالك ما صدك كبل كال لاختة زين تسوي والله ردت اكللهة بس كلت خاف بنفسهة تلبس بدلة بيضة مااحرمهة كتبت بموبايلي لريام وكتلهة ياريام لبوضعي وتوهة مودعة ابوهة وكل دنياتهة وياه مال بدلة بيضة اني لوما الضروف مااتزوج هسة ابد اجوي ايسر وعمة والشيخ وامة واختة اجة عمي ابو احمد والشيخ وسالني اذا اسمعة هزيتلة راسي وكاللي انتي مو قاصر فاخذ موافقتج منج وكام يقرة الايات وكمل وسالني تقبلين ب........ هزيت راسي بالموافقة وهالشي فهمني اياه الشيخ انه مادام اسمع كلامهم فاشارتي بالقبول كافية كمل العقد واني احس كوة كاعدة من التوتر والخوف وباركلنة الشيخ وطلع واجوي البنات وخالة ام احمد وبنتهة سجى وباركولي احس ذولة ناسي وشوية هوست ريام وانوب اشرت لامهة وانسحبوا من الاستقبال وعمهم طلع كال لايسر اروح ودير بالك عليهة مبينة خوش بنية ورجع التفتلي كاللي شتحتاجين كوليلي اني مااقصر ان شاء الله
ايسر:لاعمي لاترجع عشاك يمنة
عم ايسر:لاعمي هسة لو مسوي عرس اخسرك عشا بس راح اظل انتظرك برة نوصلكم للشقة ونرجع
رغد:طلع الكل وبقيت بس اني وايسر شكد خجلت احس صخنت خصوصا من لزم ايدي جانت هاي اول مرة يلزم ايدي رجال كاللي..
الكاتبة ايه.... يتبع