مشاعر خارج دائره الصمت
البارت الخامس
ايسر:بس مايصير هيج العالم تطعن بشرفهة ونسكتلهم خطية وشافوا عليهة شو حتى من تفتحلي الباب بحجابهة +
ام احمد:يايمة بنية وحدهة وبهالدنيا تترجة الناس ترحمهة اني كل همي هسة تتستر وتزوج وتستقر
ابو احمد:ما تتزوجهة وتكسب بيهة ثواب والله بنية ذهب
ام احمد😡ابواحمد شنو تدلل بالبنية بايرة قابل بعدين الرجال متزوج لاتخرب بيتة
ايسر:هاي هية يجرالك عمي واني الايجار كل شهر واصل مني وطلعت واني هالبنية وقصتهة مافاركت بالي وظل فكرة وحدة راسخة ببالي حجاية ابو احمد ليش لا اتزوجهة لخاطر امي تداريهة وتقوم بواجبهة وترتاح اختي من هالوضع واني يرتاح بالي بس من افكر بيهة ابد ماالي نفس بيهة كزوجة رجعت للبيت وسولفت لامي على كل القصة
ام ايسر:والله يايمة مردت كلبي هالبنية عالضيم الشافتة والله اشوف زينة العقل تتزوجهة هم تسترهة وهم تداريك وتقوم بواجبك وهم تكسر عين ذيج الماتخاف الله وعايفتك صار شهرين واكثر
ايسر:بس يمة مامفكر بحياتي اتزوج٢ والبنية ابد ما باوعتلهة غير اخت اني اذا اتزوجهة لخاطر تداريج
ام ايسر:لايمة مااظلم بخت البنية عالمودي بعدين شبية يمة جاي اتعافى وخير من الله بس اني اشوف من حقك بمرة تريح بالك سهى كضيت العمر مشاكل وياهة ودومك طالع زعلان مايسكت المرة غير ضرة وانتة ماناقصك شي وحالتك خير من الله تفتح بدل البيت ٤ بيوت
ايسر:وشمدريج هية احسن من سهى ايجوز تصرفاتهة موحلوة
ام ايسر:لاوالله عالسوالف مبينة خوش بنية وحبابة الشالت ابوهة وخدمة ما تشيلك وتخدمك والله دخلت كلبي قبل لااشوفهة
ايسر:مااعرف يمة حيرتيني افكر افكر
ام ايسر:والله مايحتاج تفكر خوش بنية وام بيت واذا خرسة ارتاح من لسان ذيج جنة مبرد
ايسر:لايمة ابد موابالي هالسالفة عادي هي من تأشرلي افتهم عليهة رأسا بس شغلة مارايدتهة نفسي
ام ايسر:تريدهة بالايام يايمة اذا خوش بنية تكسب كلبك برضاتي عليك اكسب بيهة اجر واخطبهة وخلصهة من هالعالم الماترحم
ايسر:هاي هية يمة التردي يجرالج اخذج انتي واختي وريام على يوم شوفوهة
ام ايسر:ان شاء الله يمة عالخير بس لاتحجي لاحد بشي هسة
ايسر:طلعت واتصلت على سهى ردت ابري ذمتي جنت حاس بذنب تجاهة او كلت لخاطر بناتي اذا قنعت تجي كان بها ماقنعت اتزوج واجيبهة تداري امي
سهى:والله زين واتصلت واتذكرتنة
ايسر:ليش الا باتصال شكم مرة اجي للبنات وانتي ماتطلعين حضرتج مكبرة راسج وتدزيهم بيد اخوج لو امج لاعبالج بهيج تصرفات ارضخ لرغباتج بالعكس ازعل اكثر
سهى:يعني هذا اتصالك مو حتى تكلي موافق على شروطي
ايسر:سهى لاتخبليني شلون ترديني اذب امي يم ممرضة واعزلج عنهة
سهى:لعد ابتليت بس اني مو عندهة ولد غيرك وجناين غيري بس اني
ايسر:يابنت الحلال للمرة الالف اكولج بيوتهم بعيدة وامي مابيهة تظل ملطلطة بالسيارات والله حضرت جنابجن ما تدارنهة هاي امي ماتطلع من بيتهة مادامني اشتم الهوا اعقلي يامرة ولاتخربين بيتج ورجعي انتي والبنات ونوروا بيتكم وان كبرتي عقلج راح تكبرين بنظري والدنيا سلف ودين باجر هم نكبر مانريد يدارونة جهالنة
سهى :على هالوضع ماارجع ايسر انتة حتى صاير ماتحبني ودائما مشاكلنة من امك وهالشي جاي يبعدنة كافي خلينة نرتاح
ايسر:انجبي ادب سزز والله موصوجج اني صوجي كبرت راسج وعبالي ادمية ولج امي يمتة سوتلنة مشكلة شو دائما تنصح بيج وتعقل بيج بس انتي طايحة حظ وماتفتهمين والغيرة عاميتج خووش ظلي ببيت اهلج الااعوفج معلكة ياسهى لاطايلة سما ولاارض وانتي الجنيتي على روحج اتذكري من اول ليلة زوجنة كتلج امي خط احمر واذا حطيتي نفسج بمقارنة وية امي راح تخسريني بس انتي ماتفتهمين
رغد:مرت ايام وايسر ماكو كلت خطية خاف صاير لامة شي او صاير وياه شي خطية كافي وكفتة وياية كعدت بالطرمة العصر واقرة قران واندكت الباب رحت فتحتة وجنت لابسة حجاب الصلاة وتفأجات بالشخص الكدامي ضليت جامدة واطكطك بمكاني
مهاب: السلام عليكم شنو ماكو تفضل اجيت اخذ من خاطرج شلون تخليني واكف عالباب
رغد:تخبلت منة يريد يدخل بيتي ويدري اني وحدي شكد سخيف ونضرتة نفس الحقارة من رحتلة اصلا هو سبب موتت ابوية ماتحمل الصار بية من ورة هالكلب ردت اسد الباب جان ايخلي ايدة ويريد يدفعهة ويدخل ضليت احاول اسدهة بقوة بس هوة لازمهة احس حيلي راح من الخوف انوب الشارع فارغ وكت اذان صارت حتى صوت ماكو حتى اصيح احد ضليت ادعي رب العالمين يخلصني
مهاب:لج افتحي الباب لاتستشرفين براسي هسة صرتي شريفة وانتي شابعة لعب وية الضابط ايسر
رغد:يمة هو كال هالكلمة لو اتخبلت وصرت ادفع بقوة اكثر لحدما سمعت صوت خالتي ام احمد
ام احمد:لك ادب سزز شتسوي هنا بهالمغرب امشي من بعيد واحجي اريدة يتراجع ليش تريد تطب عالبنية الا الم العالم عليك تعال ما شفيت كلبي بيك ذيج المرة هو شافني هيج وانهزم ،،اي انهزم جبان واشيل طابوكة وبنص جامة سيارتة سويتهة طحين
مهاب:لايا مسربتة تكسرين سيارتي تسوة روسكم
ام احمد:هاي عليمن يا قليل الرباية ياااعالم الحكولي هذا الرجال يسب بية ويريد يضربني
رغد:اسمع العالم التمت وهوسة صارت وهو شخط سيارتة ومشة بس تكسر الجام والطابوك بسيارتة فلشوهة الة هااحقير يستاهل عبالة ضليت وحدي وصرت فريسة سهلة وراح انحرف حتى احصل لكمتي مايدري اني رباية ابوية لو اجدي ماافرط بشرفي حسيت ارتاحيت شوية بعد ماام احمد طببتني وشربتني مي لان جنت ارجف كلش وضلت تسولفلي شسوو بية وبسيارتة حتى هو محصلة طابوكة براسة حيل والله برد كلبي
ام احمد:يستاهل هالنذل والله جنت متحلفة بي من موتت المرحوم بس ما صحت فرصة تالي هو اجة برجليه مو اكلج انتي بين اهلج وناسج لاتشيلين هم بس لو تطاوعيني وتجين يمي تعيشين ضالة وحدج هنا
رغد:اشرتلهة لا مااكدر احس هنا ريحة ابوية وذكرياتي وياه والصدك مااريد اثقل عالناس اكثر وجنت ناوية هالايام اطلع ادورلي شغل اي شي المهم بشرف راحت ام احمد وقفلت الابواب بس بعدني خايفة ضلت حجاية مهاب تطن براسي من اجتي ام احمد وراد يمشي كلي
مهاب:لاعبالج اعوفج مادام خليت شي ببالي اخذ الاريدة لو اعرف اخطفج
رغد:احس كلما اتذكر هالحجاية ارجفف هذا واصل وعندة فلوس ونفوذ واني ضليت وحدانية شلون بية لو صدك خطفني واخذ الي يريدة وذبني يمكن اموت روحي والله
ايسر:يمة باجر العصر اخذج انتي وريام لبيت رغد اتعرفوا عليهة اني خابرت جارتهة ام احمد وهي بمثابة امهة راح تكللهة وتكون حاضرة
ام ايسر:هاي هية يمة الله يوفقك ويريحك هالمرة بس كللي خوما لخاطري راح تاخذهة اذا هيج لاتجني عالبنية اذا ماالك نفس بيهة
ايسر:لايمة هي خوش بنية وفقيرة اريد اول شي اكسب اجر بيهة واحويهة ببيتي ثاني شي اريد ارتاح بلكت تطلع خوش بنية وتعرف تريحني وبداخلي السبب الحقيقي هي لخاطر امي ادري بامي تكابر وماتريد تبين مرضهة بس وضعهة بي وماجايسوء لو راحت للحمام تتعب اريدهة تداريهة مقابل اهتمامي ورعايتي لرغد مااريد منهة اي شي ثاني وناوي افهمهة هالشي صح راح تكولون ظلم بس سهى كسرت نفسي بكل النسوان ولعبت روحي واني من النوع الصعب مااقنع باي شي الله كريم للايام
رغد:فاتحتني خالة ام احمد بموضوع ماجنت ابد حاسبة حسابة اشرتلهة انه هو متزوج
ام احمد:يايمة ماعليج بمرتة كال الهة بيت وحد ماثث محد يتقربلهة بي بس اتدارين امة ماطالب غير شي
رغد:يعني ماخذني لخاطر امة
ام احمد:لا لوماالة نفس بيج جان ماتزوج هذا زواج يايمة مو لعب والرجال شاريج ورايدج بالحلال وخوش ولد وحباب ومركز بالدولة وبيت وحد وانتي بعد يايمة مومال تضلين وحدج العالم تطمع بيج شفتي البارحة هالنذل شسوة اخاف عليج يايمة اريدج تنسترين واتطمن
رغد:بس اتذكرت مهاب وتهديدة احس رجف كلبي خوف صدك لو اتعرضلي بعد شسوي خليني اوافق وانستر وصدك ماناقصة شي الولد ومادام بيتي وحد عادي واذا متزوج واذا على امة شكو بيهة اعتبرهة امي واكسب بيهة اجر هواي بنات بمكاني يكيفون على هيج قسمة مو انوب البوضعي وبمرضي خلي لشوف اهلة واصلي اتوكل على الله وصدك للعصر اجني امة واختة وجانن مبينات حبابات ومحبوبات وابد ماحسسوني بنقص او مرضي ومن ااشرلهم يحاولون يفهموني او يباوعون لام احمد توضحلهم حتى لايحرجوني حبيت انسانيتهم بهالموضوع وكلت مادامهم هيج اكيد ماراح انظلم وياهم فتنطيتهم موافقتي وكلت خليهة على الله واهل البيت همة كالوا للخميس الجاي العقد والزفة سوة لان مستعجلين
ام ايسر:هاي هية بنيتي بالمبارك باجر يجي ايسر ويانة وعمة وان شاء الله نتفق عالغايب والحاضر والذهب ونجهز البنية شتحتاج والخميس هو عقد هوة زفة لان ايسر مستعجل..
الكاتبة ايه.... يتبع