مشاعر خارج دائرة الصمت

البارت ٤

مشاعر خارج دائره الصمت

البارت الرابع
لايشك بس مالي نفس انقهرت صدك من الموقف الصرت بي وعلى بابا ووضعة للمغرب اندكت الباب وطلعت جان الضابط ايسر اشرتلة بمعنى تفضل ودخلت فتحت الاستقبال ودخلتة على بابا جانت نومتة بالاستقبال حتى لايكوم ويكعد هواي وقريب للحمام والخطار لو اجاه احد
ايسر:مر شهر وسهى جانت مشاكلهة تزيد متنقص وامك تتعب وجيبلهة خدامة ممرضة اني تعبت وكمت اتعصب واكره تصرفاتهة وانفر منهة وهي متبطل تزود من تشوفني اسكتهة اخر شي تعاركت وياهة وطردتهة لاهلهة وضربتهة حتى وطلعت افور وخابرت اختي تجي يم امي ولو هي ممقصرة خطية بين يوم ويوم بعد سهى من شنو تتعاير وتشكي ضليت افتر بسيارتي للمغرب اخر شي اتذكرت ابو رغد وشلون ارتاحيت لكيتني واكف ادك ببابهم طلعتلي بنتة واشرتلي ادخل جانت تعبانة ووجهة شاحب شكلهة قلقني وشعجب ماطلع ابوهة دخلت ولكيتة متمدد وتعباانة حالتة انقهرت وانمردت عليه شلون صاير كعدت يمة وسالتة عن وضعة وصحتة وكاللي تعبانة حالتة وكلبة جاي يضعف كومتة وكتلة خلي نروح للمستشفى
ابورغد:والله ياابني مااريد اتعبك وازحمك

ايسر:ماكو كل زحمة مو كتلي انتة مثل ابني لعد لاتخليني احس غير شي
ابورغد:ابدل ملابس لعد مشكور وليدي

ام احمد:شبيج يمة رغد من رجعنة من الشركة وانتي مو على بعضج شسوالج هذا المدير الجلب وخلاج ترجفين

رغد: جنت واكفة عالطباخ اسوي الجاي واجتني خالة ام احمد خطية ظل بالهة عليةواني مااتعودت اضم عليهة شي جنت اعتبرهة امي اشرتلهة انه لزم ايدي وراد مني ابات يمة

ام احمد:شلون ناقص عزة العزاه ماكفاه الصار بابوج انوب يريد ياخذ شرفج هالناقص الله لايوفقهم كل طيحة ابوج من وراهم

رغد:اشرت شتقصدين ومااحس الا بابا وكع بباب المطبخ ركضت عليه متخبلة

ام احمد:عزة بس لاسمعني يبوووو

ايسر:جنت كاعد بالاستقبال شوية واسمع هرجة وعياط دكيت الباب الداخلي مال الاستقبال وفتت لكيت ابو رغد واكع ويمة بنتة ومرية بدون وعي شلتة بين ادية وركضت بي لسيارتي ولحكتني بنتة والمرية الوياهة صعدتة ورة وخلت بنتة راسهة بحضنة وتبجي بخنكة شكد قهرني موقفهة والمرية ليكدام وسقت بسرعة للمستشفى وصلنة ودخل للانعاش وهوسة وخبصة طلع الدكتور ورة فترة وكال مع الاسف وصل كلبة متوقف ومالحكناه هي جانت متجية راسهة على جتف المرية وكاعدة بس شافت الدكتور اجتي تركض هو نطق هالكلمات ومااحس الا فقدت الوعي ووكعت للكاع 2

رغد:مااتحملت السمعتة مستحيل ابوية يعوفني منو الية غيرة شلون يخليني غير اموت وراه مااحس الصار لحد ما كعدت واني مخليلي مغذي ضليت مفتحة عيوني احاول استوعب الصار ثواني واتذكرت كعدت مثل المخبلة شلعت المغذي وركضت من الغرفة لاكتني ام احمد

ام احمد:وين يمة ياا شجاج ايدج تصب دم

رغد:مااكدر حتى اأشرلهة واوصفلهة الحالة البيهة اني بس ضليت امشي ماادري وين عبالك اريد اطلع منا وانسى الصار وارجع ادخل بيتنة والكة ابوية كدامي فجأة صار ايسر كدامي

ايسر:جنت امشي باجراءات شهادة الوفاة ومعارفي ورتبتي ساعدني شفت رغد تمشي بالممر بسرعة وام احمد تمشي وراهة تريد تلحكهة جانت فاقدة وايدهة تجري دم وحافية وحتى حجابهة مالافتة والناس تباوع عليهة بيهم بنضرة عطف وبيهم بنضرة وصخة ركضت ونزعت سترة التراك ولزمتهة من ايدهة وضغطت عليهة بكلينس باوعتلي وفكرهة مويمي لفيتهة بالسترة وانطيتهة لام احمد وكتلهة لزمي ايدهة اخذتهة وكعدت على كرسي جان هدوئهة مخيف ماكو ردة فعل صدمة قوية خطية اباوعلهة منو الهة لاام لاخوان اقارب ماكو الظاهر متقاطعين لان لو يتواصلون ماجان عافو الابو بهيج وضع بس خطية جارتهم جانت واكفة وياهة ليكول بنتهة كلنة الاوراق ووقعنة استلام وكلت لاصدقائي نطلع احنة ندفنة لان مالة احد وعمل انساني ماكالوا لا خطية واجوي ويانة الجوارين واجتي ام احمد

ام احمد:حالة البنية تخوف ياخالة وخاف تتخبل من تظل هيج خلي تشوفة تودعة حتى تصدك عالاقل تطلع قهرتهة لاتموت
ايسر:صار خالة وكلت للعالم يوكفون على صفحة وقربنة السيارة للباب ونزلنة التابوت للطرمة وجابتهة ام احمد وهي تريد ترجع عبالك متريد تصدك وتعترف

رغد:دخلت للبيت فارغ معقولة هذا مو حلم لا لااني احلم اي بابا ميعوفني اكيد كاعدة والنسوان تطب تبوسني وتصبرني واني مااريد اصدك لحدما كومتني ام احمد وطلعتني للطرمة جان اكو تابوت انسحبت روحي نفس الموقف من ماتت امي هم جان تابوت بالطرمة احاول ارجع مااريد اصدك وام احمد تجر بية وكفت قريب وجان يفتحة ايسر اباوع كل الخفت منة صار بابا وممدد بالتابوت ميت بلا حركة راح من هالدنيا وبقيت وحدي منو الية وين اروح دموعي كامت تصب و ماحسيت على روحي بعد

ايسر:نضرتهة ودموعهة خلتني اتأكدت هية استوعبت الصار بيهة كلت لام احمد اخذيهة جوة خالة وحاولي تصبريهة ولاتعوفيهة واحنة طالعين ندفنة طلعت للنجف ودفنت الرجال بالقطعة مالتنة وخابرت اختي تطمنت على امي وسهى موتتني اتصالات وارفضة منهة كملنة الدفنة ورجعنة والجيران مسويلة فاتحة خطية وواكفين وعدت بد٣ ايام وكل مااسأل ام احمد على رغد تكلي تظل تملخ بروحهة لحدما تتعب وتنام شوية وتفز تكمل عبالك جاي تنتقم من روحهة وتريد تموت نفسهة وراه كتلهة صيحيهة احجي وياهة زحمة

رغد:اجتي خالة ام احمد شاورتني انه ايسر يريد يحاجيني كمت ردت اتشكرة لان كالتلي عالسواه وشلون وكفلنة وضليت ادعيلة من كل كلبي رحت وكفت بصف خالة ام احمد كوة
ايسر :التفتت وصدمتني بشكلهة جانت شاحبة وصفرة وعيونهة مورمة وحمر والجواهن اسود عجيب الحزن شلون يسحب روح البشر ويخليهم جسد خاوي اشرتلي اشارات افتهمت منهة وية مساعدة ام احمد انه تشكرني على وكفتي شكد قهرتني يعني الانسان فوك قهرة ميكدر يطلع صوت يعبر بي عن مشاعرة كتلهة لا اني كتلة من قبل لايتوفة اني مثل ابنة وهاي اني جاي اكلج اعتبريني اخوج وشتحتاجين اني موجود وهذا بيتج ماتطلعين منة ايجارة واصل كل شهر هو ومسواكج وشتحتاجين اكثر خابريني رقمي يم ام احمد

رغد:عزت علية نفسي يصرف علية بصفتة شنو اشرتلة لا ومااقبل واني راح اشتغل واسدد

ايسر:من افتهمت شتريد كتلهة الناس للناس واذا ماتقبلين عمي اعتبريه دين لحدما تلكين شغل ماردت اناقشهة وهي بهالحالة
رغد:اقتنعت بالكالة واتشكرتة ودخلت

ايسر:مرت شهرين على وفاة ابو رغد واني دفعت الايجار وجنت كل يومين او٣ اتسوك وااودي ادك الباب لبيت ام احمد وتجي وياية المرة تدخلة مرات تطلع رغد وتتشكرني وتأشرلي تذكرني انه كلة دين ابتسم لعزة نفسهة واكلهة مااشي مثل ما تردين وامشي ماخطيت باب البيت ابد وبيوم وصلت وجانت ام ام احمد موهنا فنزلتة للمسواك بالباب ودكيت الباب طلعت رغد اشرلتهة عليه ومشيت ماردت تطلع عالبنية حجاية المسواك ورجعت للعصر اجاني اتصال من ام احمد خلاني انصدم بالسمعتة كتلهة جاي دقايق بدلت عالسريع واختي همزين جانت هنا خطية اتبهذلت بين بيتهة وامي همزين رجلهة ابن اوادم ومقدر وصلت ودكيت الباب على بيت ام احمد......
ايسر:رحت لبيت ام احمد وبالي مشغول لاصاير شي وصلت ودكيت الباب طلعلي زوجهة ودخلني للبيت وضل يتشكر مني على وكفتي وية رغد كتلة عمي ما مسوي شي بعدين الرجال طيب والله على طيبتة هيأ ناس توكف لبنتة بهالاثناء دخلت ام احمد وشايلة صينية الجاي وترحب بية طبعا همة الي عرفتة عنهم ناس على كد حالهم ابوهم عندة محل معيشهم وابنهم احمد عازل عنهم وبناتهم متزوجات فباقين بس المرة ورجلهة كتلهة خير خالتي خابرتيني رايدتني بموضوع +

ام احمد:اي وليدي والله مااعرف شلون افاتك بالسالفة بس صدكني وهذا كلام الله انه هذا الصار

ايسر:خير خالة قلقتيني

ام احمد:والله ياخالة انتة طيب واخلاقك اني اشهد بيهة وماشفنة منك غير كل طيب بس لهنا وكافي لان الناس كامت تحجي

ايسر:بشنو تحجي الناس شصاير

ام احمد:والله ياخالة روحتك وجيتك على رغد خلت العالم تحجي عليهة وطلعوهة فدمرة موخوش بنية ادري انتة ما تعتب البيتهم وكلة بوجودي واعرف نيتك بس الناس الهة الظاهر وماتسكت

ايسر:ليش شيكولون شمسوين قابل

ابو احمد:والله ياعمي كاموا ترس اذني يحجون بيهة من مات ابوهة وهي مصاحبة الظابط ويصرف عليهة ياابني الناس كامت تشكك حتى بفعل الخير فاني اكول بعد لا توصلهة حفاظا على سمعتهة وانتة تعرفهة بنية فقيرة ورايدة الستر وهسة من مات ابوهة تنتظر قسمتهة بعد لو طلعت عليهة حجاية موزينة محد يتقربلهة وتظل وحدهة طول العمر ان جان على مصرفهة ومسواكهة اني اشيلة بعد الحمدلله طلعلي راتب العاطلين وهالمحل وحالهة من حال ام احمد وانتة اذا تريد عمل خير شيل الايجار عنهة واكون ممنونلك..

الكاتبة ايه.... يتبع