#ضلموني
البارت الثامن عشر
بقلم ام مصطفى
اخلاص ..
دقايق صعبه مرت علينا
كولنا ننتظر رجعته
امي طلعت جابت خروف تذبحة جوه رجليها من يرجع بالسلامة
كولها ملتمه جانت عدنه هدى وجهالها
مرت خالي وامل
ريهام واهلها
خابرنه حازم
كال راح اسلم ان شاء الله واستلم
كلنه فرحنه و منتضرين
وره ربع ساعه رجعت خابرت حازم يدك وميجاوب
حاولت مره مرتين ماكو
ضل بالي اكثر
دكيت ع خالي ماكوو
ضل بالنه
هدى دكت منها ماكو جواب
كالت خاف التهو بازهر
يسولفون وياه
كتلها يجوز
بس اني بكلبي كولش خايفه
جنت اسمع هواي يخطفوهم وياخذون فلوس ويقتلوهم
مرات اسئل ليش عود يقتلوه مو اخذوا فلوس
يكولون لان عرفهم واكيد همه عرف
لذالك يخافون ع نفسهم ويقتلوه
....
امل خابرت محمد حصلته
صرخت وسدته
شكو امل شكللولج
بس تصرخ
رجعت خابرت ع محمد من مبايلها
جاول ويبجي اسمع صوت حازم يصرخ يمه
كتله محمد ازهر شبيه
كال قتلوه اخلاص غدروه المايخافون الله
احس طلقه ونصابت بكلبي
شمرت المبايل وصرخت
ازهررررر
لا خويه ع بختك
ريهام صرخت
وامي تصرخ
فقدنا عله صوت صريخنا
التموا الجوارين علينه
امي وكعت اخذوها الجيران
ريهام ملخت نفسها
وتصرخ امها تلزم باديها وهي ماكو
وجهه دمايا صار
امل تحاول تهديني بس مااكدر
اووف لا يشوف ذاك اليوم ع عبد مسلم
اخ يابه احس انكسر ضهري صدك هالمره
شكد ابوي عزيز
بس الاخ الزين اعز بهواي
بيه ريحة امي ابوي اخوي
دخلو علينا بتابوته
خويه ازهر عدمن ودعتنا خويه
خويه وين رايح وعيفني وعايف امي
ومرتك وجهالك
ياهو النه خويه
ريهام : ازهر يانظر عيوني كوم الله عليك
كوم اكعد حاجيني كلي مابيك شي
شلون انطاك كلبك تعوفني
مو كتلي مااعوفج ابد
حبيبي ازهر اموت والله بدونك
انت كل دنياي
امي اجت بيدها المغذي
كالت افتحوا التابوت ارد اشمه وابوسه قبل لا تشيلوه
فتحوه الها باسته
يمه ازهر روح كلبي وربي راضين عليك
محالل وموهب يمه
جهالك امانه يمي لا تخاف عليهم
وليدي
يالمظلوم يمه وسفه ع شبابك يمه يبو طول الحلو .....
😭😭😭😭😭😭😭
الله يرحم كل شهدائنا وكل شاب انقتل مظلوم والله يساعد ويصبر كل وحده فاقده ابن اخ زوج
والله اكتب وابجي ( ام مصطفى )
..................
اتعس واصعب ايام مرينه بيها
هي موتت ازهر كابوس اسود
بعد موتت ازهر بشهرين
ريهام طلعت النه بسالفة
خبلتنه بيها
وهي تريد تسافر وي اهلها وتاخذ الجهال وياها
طبعا كولنه مقبلنه
لان متعلقين بيهم احنه
صارت مشاكل بين ريهام وحازم
حازم جهال اخوي يتربون يمنا ويعيشون بابيت ابوهم
تردين تبقين يمهم اهلا بيج معززه مكرمه انت وجهالج
تصرين ع السفر وي اهلج تعوفين جهال اخوي هنا
ريهام : شلون اعوف جهالي واسافر
مااكدر
لعد لا تسافرين
مااريد ابقى هنا بااعراق كرهته
كرهت العيشه هنا
العراق الاخذ مني ابو جهالي مااريده
اريد اهج لو حتى اهلي ممسافرين
اني جان مابقيت
اختنكت هنا حتى الهوه يخنكني
عوفني اخذ جهالي واروح
واتنازلك عن كولشي
انت عبالج الفوس تهمني لا غلطانه
انطيج كل الورث هسه مالته وفوكاه حبت مسك بس ابقي ابيت اهلي كاعده ع جهالج
مااريد كوه خوما كوه
جهالي من حقي بالشرع وبالدوله
من حقج اذا هنا بس مو تاخذيهم منه
امي حجت يمه ليش هيج تردين تحرميني من جهال ابني
الدنيا حرمتني من ابني
وانتي فوكها تردين تاخذين الجهال
هذول من ريحة وليدي
عمه اهلي راح يطلعون
اني عدمن باقبه هنا
يمي يمةة اني اهلج وهذا بيتج
مااكدر اهلي ميقبلون
يكولون منخليج ونسافر
فدوه عمه اطوني جهالي اهلي متعطلين ع مودي
وابوي بخطر مهدديه بالقتل
لا توكفون بطريقي
اسفه بنتي لو طلبتي عيوني اطيهن الج
بس جهال ابني لا
يعني شنو
يعني لو تبقين ابيتج
لو تعوفين اجهال وتنسيهم
انتو شتحجون
انتم متخافون الله متفتهمون
جهالي اخذهم
صارت مشكله وصياح
طلعت ريهام بدون جهالها
بالليل اجو اهلها
وهم كبت العركه
وصار تهديد وصياح
حازم كلهم ع جثتي تسافر بيهم
امي تموت وراهم غير
واني هم ماارضى جهال اخوي يعيشون بالغربه
صار مداهر بينهم
حازم ضل يهدد ويخوف بأهلها
انو يشتكي عليهم يم حزب بوكته جان معروف
كلهم واالله يدوكم وره الشمس
خصوصا اذا يعرفوك حزبي وخاتل
وتريد تشرد
همه يدورون ع جماعة النظام السابق دواره جايين من ....... حتى بس ينتقمون من امثالك
جان يحجي وي ابوها
ابوها كله تهددني هيج وصلت وياك
مع الاسف عليك
انتم جبرتوني لهالشي
احنه بتكم ماضالميها تعيش وي امي واختي معززه مكرمه
اذا تريد تختار اي بيت يعجبها تكعد بيه وحدها هم ماعدي مانع
بس تاخذ جهال اخوي وتسافر لا ماكو
كال واني بتي مااعوفها هنا
تحت رحمة واحد ضالم مثلك
عمتها مدايمة الها
وعمة الجهال باجر تزوج
وانت واحد متخاف الله
مااكدر اعوفها هنا ومحد الها
صاح ع ريهام كومي امشي
وين بابا وجهالي
عوفيهم لاهلهم
لا بابا مااعوف جهالي شلون تقبلوها
واني هم مااعوف بنتي هنا مااكدر
جهالج يم اهلهم
انت وين اخليج
جرها كومي
لا عفيه بابا
كومي دا اكلج
جرها كومها هو واخوها رحيم
كومي اصعدي لمي ملابسج واغراضج
يله
بابا
بس بله كلمه يله اصعدي
متضرج
دخلت ريهام تبجي
صعدت واحنه نبجي متنا اني وامي
اني شايله حسن
والبنات صعدن وره امهن يبجن عليها
شويه ونزلت بجنطه صغيره مو جبيره
وتبجي
باوعتلي اخلاص وتشهك بجي جهالي
امانة بركبتج فدوه لا تعوفيهم
ادري بيج شكد حنينه وكلبج طيب
ومراح تاذيهم بيوم من الايامو
دنكت ع امي وباستها يشهد الله علي
احبج ع حب ازهر
ورايحة غصب عني
عمة جهالي ذمه بركبتكم
اخذت حسن مني وحضنته حييل وتصرخ
دنكت ع مريم ونرجس
اعذرني ماما
الوكت طشرنا واخذ ابوكم منا
وضلينا بله سند منو يجي يتحكم بينا
ابوها صاح يله ريهام
طلعت وبناتها مجلبات بذيال ملابسها
ماما ماما
جرهن حازم تعالن عمو
نرجس تصرخ اريد ماما
وهي تباوع عليهن بحصره
طلعت
واحنه صارت فاتحه ثانية عدنه
كولنا نصرخ
حتى حازم بجه
بوكتها حسيته حنين
وطلع معدنه الاصلي
حضن البنات ويبجي وينك ازهر خويه
تعال بناتك صفن لا ابو ولا ام
امي احسها تأذت اكثر من مامات ازهر
اني ادمرت الموقف يبجي الصخر
حازم كام
كلها يمه لا تبجين الله يشهد علي هذول جهالي
ومراح اخليهم يحتاجون شي
مدامني عايش
كافي يوم لا تبجين كافي
يمة شلون ماابجي
وذول صفوا ايتام لا ام ولا اب
شنو ذنبهم الدنيا حرمتهم من ابوهم
واحنه نحرمهم من امهم
يوم احنه ماحرمناهم من امهم .امهم هي اختارت اهلها
جبتها بكل طريقه وياها حتى تبقى هنا
حتى عرضت ع ابوها اعقد عليها
من تخلص العده ورفض
شتريدين اسوي بعد
هو لكاها من الله مات ازهر يريد ياخذ بنته
ميكدر يسافر ويعوفها
وهي ضعيفه وماضحت لخاطر جهالها
شسويلها بعد شنسويلها
كومي اخلاص سكتي البنات ونيميهن
سويت لحسن ممه ونومته
خليته يم امي
واخذت البنات
كوه سكتتهن حبيباتي الصبح تجي ماما
انتن مو تنامن كل مره يمي
مو تحبني
كافي لا تبجن ان شاء ترجع الصبح ماما
كل ضني تتراجع وترجع لجهالها
نامن
بس امي تنوح وتبجي يمه رحمه لموتاج كافي يمه
اخذي علاجج ونامي
هسه ترجع مااعتقد تعوفهم وتسافر
ترجع لا تخافين
كوه سكتت امي ونامت
بهاي الفتره اني اتراسل وي مالك
وره وفاة مالك دزلي تعزيه
وبعدين خابر يصبرني
حسيت اني محتاجه احد احجيله واشكيله
بقينه نتراسل ونتخابر
بس بحدود
كل مره يحاول يفتح موضوعنا واسده
اكوله خليك مثل الصديق الي
اني محتاجتك تسمعني
وبس
دزيتله رساله
ريهام عافت الجهال وراح تسافر
دزلي راح اخابرج افتهم
صعدت فوك
خابر جاوبت الو
الو شنو هالخبر
اي والله مالك واني ميته هسه قهر احاول اصير قويه يم امي
احسها ع ساعة اطك وتموت من القهر
كلش تأثرت عبالك اليوم مات ازهر من جديد
حقها والله شنو ذنبهم ينحرمون من امهم وابوهم بنفس الوقت
اي والله
راح اموت مالك شسوي
انت هم ع كيفج وي نفسج
زين ودوامي شلون كلي
شلون اعوفهم وي امي ماتكدر الهم وحدها
هي مريضه
لا تسبقين الاحداث هسه بلكت تتراجع عن قرارها وترجع
اني هم هذا املي اكول بلكت ترجع
والله الصراحه حازم هالمره مقصر بشي
يعني جابها بكل وسيله وطريقه حتى تبقى بس ماقبلت
اصور حتى عارض ع ابوها يعقد عليها وره العده بس ماقابل
حازم زين وي الكل بس ويانه وكف ضدنا وضلمنا وفرقنا
هذا الشي راح وانته مالك انسى فدوه
لو اموت ماانسى واذاكتلج يوم نسيت
فاكذب عليج
مااكدر اعيش بدونج
يله حسن كعد اروح
لا مكعد وادري بيج تتهربين
مع ذالك تصبحين ع خير
وديري بالج ع الجهال خطيه
لا توصي حريص
وللحكاية بقيه ام مصطفى