#ضلموني
البارت الرابع عشر
بقلم ام مصطفى
خلصت الفاتحة وجبت امي ورجعت للبيت محد جان بيه البيت فارغ
ازهر كال اروح اجيب ريهام وارجع
دخلنا جوه امي خطيه تمددت بالغرفه
واني كمت انظف بالبيت
اجت الكهرباء
ايي صلوات
بسرعة شغلت الماطور ترست مي وشغلت الغساله خليت ملابس بيها
دخلت للمطبخ
لكيت ازهر مسوك مخضر من كل شي
تارس المطبخ
اي همزين كمت افتح بالعلاليك
خليتهم بأسلال شغلت الثلاجة
ودخلت المسواك بيها
اجت ريهام
وازهر والبنات حضنوني
عمه
فدوه حبايبي الله يخليكم
سلمت ريهام البقيه بحياتكم
خطيه انقهرت عليه والله شلون هيج صار
طبت ع امي اخذت من خاطرها
وطلعت
كالت مدام اكو كهرباء اصعد انضف غرفتي
اي يله اصعدي
اني هم كمت سويت نواشف
ساعة يمكن وطفت الكهرباء
يله انعم الله من اشتغلت
الملابس ملحكت انشفهن تالي شريتهن هيج بله تنشيف
وكفت اكلي نزلت ريهام كالت عوفي اني اكمل
يله اني راح اسوي السلاطة
اكلج عدنه خبز
لا
يااا شلون نسيت هسه شلون
كتلها اعجني وكثري خمره
لعد شنسوي ماكو فرن مفتح هسه
يله خلي اعجن
راحت تعجن كملت تكلاه خليته ع الكاونتر وقبقتهن اوف راح يبرد حرامات
دخل ازهر بيده علاكة صمون
ايي عاشت ايدك
منين جبت
والله رحت اترس بانزيل من ع الشارع
لكيت فرن مفتح عاد جبت وياي
ريهام كالت عجنت اني
كتلها عوفي لعد يختمر ع راحته تعالي نتغده
صار هواي مماكلين نواشف
خلينه الصينيه وكعدنه
واحد شكد ميطلع مياخذ راحته إله ابيته
للعصر اجو بيت حازم
ضلوالليل يمنا
ابد مكعدت يم هدى حتى مسلمت عليهه
تعشوا وراحوا
مر كم يوم
اجه مالك ومحمد علينا للبيت
وهاي اول مره يطب مالك النه بعد مطرده حازم
استقبلهم ازهر
وهم سوينه غده الهم
طبعا بذيج الايام كلشي متوفر بالسوك
الحصه تنباع المسواك الاغراض
كلشي رخيص
الي عنده فلوس يشتري
احنه الحمد الله عدنه
فمااهتمينا
كل شويه نسوك
سويت غده الهم فتت سلمت عليهم
وامي كعدت يمهم بالصاله كعدوا
مالك اروح ارجع يباوعلي
تغدوا
مالك كال اجيت اسلم عليكم
باجر راح ارجع لديالى
امي كلتله عود جيب امك يمة
عيب خلي تاخذ من خاطر خالك
اي ان شاء الله خاله
هم كلت اني
هي متدري لو تدري جان اجت وحدها
اني اجيت ع وجهي ولا ادري بشغلة عثمان
اي عمت عيني عليه راح الولد بعمر الورد
اووف ياعمة عمة عينيك عليك
اندك الباب
طلعت افتحه
حازم جاي مسوك بيده
كال المن هاي السياره البره
كتله محمد ومالك هنا
شنو شعده هنا
منو سمحله يجي هذا
كتله مو تصالح هو وازهر
وازهر موجود بالبيت
اووو
هاج اخذي المسواك
اخذت من يده
دخل سلم وكعد بتوتر
مالك لاحظ عليه ضايج من وجوده
كام باس امي كالها اترخص خاله
اروح بعد
الله وياك وليدي
وكفوا اسالموا
باوعلي ورمشلي بعينه بحركه
مااعرف شيقصد
المهم طلع
واستلمنا حازم
هذا شعنده هنا اني مو طارده
امي كالتله عيب هيج تحجي
الي فات مات والولد واهله مقصروا
ويانه استضافونه
احسن استظافه
أكثر من أسبوع احنه يمهم
تريدنه نطرده شلون حجي
بعدين هذا بيتي
وبكيفي لا تدخل حازم مو اطيتك مجال تاكلني
الولد ازوج ونسه السالفة
والله لو عدتها انت متلوم إله روحك
كال شبيج يمة كبيتي بيه فد كبه عمي ياحجايه بدي بمكانج
ازهر كله
حازم الناس مقصروا ويانه هناك
وماصدكنه اتصالحنا وتصافت الكلوب
بعدين الولد ازوج ونسه السالفه
انت هم انسى
يله مصار شي
راح باس راس امي وتعذر منها
لا تزعلين يمةةة معبالي مزوج عبالي بعده
وكلت هسه يفتح الموضوع
ياريته مامزوج جان كبعتها اله هسه
لو تشوف شلون عز وجاه عدهم هناك
بس مالنه بالطيب نصيب
يمة عزيش هو واحد مهتلف هو واهله
ازهر لا حازم غلطان
اني هم جنت هيج اصور
بس طلع الولد عنده اهل وعمام
وبيوت ومزارع هناك عدهم خير من الله
ناس شيوخ
يمعود شيوخ تالي وكت دخلي يولي
المهم يمه اتسوكت للبيت وكلت اتسوك
الكم هم
اليوم رحت جمعت فلوس الايجارات
اكلك ازهر
ليش متفتح مكتبك
تره اكو بيوت تنباع هيه بسبل المي
مدام عدنا فلوس
اشتري يمعود
ايي هم كلت اني
زين لعد من تحتاج فلوس عود كلي
