#ضلموني
البارت التاسع
ام مصطفى
طلعنا لديالى
ع طول الطريق انشوف الناس كلها شارده والسيارات محمله
ازداحامات جانت
والناس تنزل وين ماكو مكان فارغ
عبالك يوم القيامة كلمن حاير بروحة
دخلنا لديالى
والعوائل تنزل بالشوارع
كوه تمشي السياره
من الناس
كال ازهر ادري هسه وين نروح
وين ننزل
امي جاوبت
ارض الله واسعة ياابني
انشوف وين مكتوب النه نكعد
بقى يمشي ع الشارع العام
تخبل ديالى
شوارعها وبساتينها
نمشي بشارع
عبالك جنة
من الصفحتين مزارع واشجار وبيوت بنص الاشجار
انفتح كلبي فتحت الجامة مالت السياره
الله شكد حلو ونضيف هواها
اتذكرت مالك
يمكن لان انت تتنفس هنا هواها حلو
صافنه أسمع ازهر يكول هذا
مو خالي ابو عثمان
شعنده واكف ع الشارع هنا
وشجابه
امي كمزت وينه وينه
صار فتره مشايفته
شافته وهي عاطت اوكف ازهر اوكف
شكو
اريد انزل لخالك اسلم عليه
اكلك اوكف صاحت بصوت عالي
وكف ازهر
وامي فتحت الباب ونزلت
خالي تفاجأ من شافها
ها نرجس خير خوما بيكم شي
هي حضنته وتبجي خويه كريم
هيج اهون عليك سنتين واكثر ماتشوفني ولا تسئل علي
باس ع راسها
شلونج ام حازم
شلوني خويه جسد بله روح خلافكم
ان شاء الله سالمه خويه
نزل ازهر سلم ع خالي
وحضن خالي وبجه
الموقف جان كلش حزين ويقهر
حتى رهام بجت
واني دموعي عشره عشره
الى صاح اخلاص
نزلت
خالو
حبيبتي شلونج مشتاقلج بنيتي
خالو واني اكثر
بين مانتسالم
طلع رجال من البستان معكل لابس دشداشه وعكال وعباية وسلاحة ع خصره
ووراه اثنين يمشون
صاح ابو عثمان
ان شاء الله الاهل وصلوا
تقرب من عدنا
صاح اهلا وسهلا
حللتم اهلا ونزلتم سهلا
تفضلوا
تسالم وي ازهر
هله بيكم
اندار ع خالي هو هذا عثمان
كاله لا والله
هذا ازهر ابن حجي حسن
وهاي اختي ام حازم
اندار علينا
بيت حجي حسن يمي
بويه هله بيكم الله يرحم تراب ابوكم
اليوم نزلتكم عدي
ابوكم صاحب افضال علينا ازهر كال
لا شيخ ما نريد نثكل عليكم
وسفة شنو تثكلون علينا
احنه اهل
خالي كله هذا شيخ همام عم مالك
وجان صديق ابوك الحجي
من كال هيج انسلبت روحي
يعني اني قريب ع مالك
مو اكول الهوه طيب هنا
كمت اتلفت يمين ويسار
يجوز ورايه كدامي
ضلوا يحجون
بس اني اذني صوفرت احس
آخر شي
جرتني رهام لج اصحي
يصيحج ازهر
شكوو
صح النوم خيه
باوعت يمشون وره الشيخ
نزل من السده العاليه لجوه بالمزرعة
كتلها شنو راح ننزل عدهم
ايي لج مسمعين الحجي لعد انتي وين صفنتي
امشي امشي
شلت الجنطة وامشي اتلفت
نزلنا جانت اكو نزله
من الشارع للمزرعة أو البستان
نزلت
اباوع استقبال طويله وجبيره معزوله ع صفحة
وكبالها غرف هوايه
بس ممسكف البيت
يعني بنيان اطشر
الشيخ صاح تفضلوا للمضيف
وصاح ام اسماعيل تلكي الخاطر
اجوج خطار
صاحت من جوه هله بالخطار
عين غطة وعين فراش
طلعت شافتنه
هلة بيجن هله تفضلن
