غدوة منذاك الصبح ...
سمير قاعد يشرب في قهوتو الصبح..مناضش بكري عيان..
زينب جات تشرب الما ...سمير خزر فيها وكمل يتقهوا..
يماه توجد فالفطور ....زينب محملتش الريحة تتع الطياب راحت تجري ترد..
فطيمة استغفرت..
سمير: شبيك يما؟؟
فطيمة: مكاش شوية مشاكل مع ختك وراجلها..
سمير: علاه واش بيهم؟؟
فطيمة: مشاكل بزااف..وزيد الضيق عندهم و هي مريضة ...ومحملتش
سمير: ياك هي قالت نتزوج بيه..انا قلتلها الضيق عندهم ودارهم غاشي هي حبت..
فطيمة تنهدت: ايه علابالي بصح ماشي ساهلة ...لازمها تصبر..هذو 3 شهور برك ومزالت عروسة كل يوم المشاكل وراجلها حصل واش يدير..
سمير: واش راح يديرلها...الراجل معندوش هذيك الدويرة لي كاينة .
فطيمة: ايه صح ضرك لي معندوش تاويل ميتزوجش خير .واذا تزوج يشبع مشاكل..
سمير: صح كاينة..شفتي علاه محبيتش نزرب للزواج..
فطيمة: بووه ونتا علاه..الصالون هذاك لي ترقد فيه نرجعوه شمبرتك..ولا نعطيك شمبرتي..
سمير: اواااه لالا شمبرتك تبقا ليك..وانا باش نتزوج زواج الميزيرية هذا محاال ..وزيد خويا ومرتو معانا ...كيفاه تولي الحالة..كل يوم الدوااس والمشاكل
فطيمة: واش دير اصبر عليهم وخلاااص..
سمير: اوااه يما تعرفيني مقلق ..مانيش كيما فاتح خويا نسكت..منقدرش نعيش فالخالوطة..
فطيمة: وواش راح دير؟؟ متتزوجش ؟؟ ومنين جيب باش تبني ولا تشري سكنة.؟!
سمير: يفتح ربي نشالله
فطيمة: سمير وليدي عندك 26 سنة مراكش صغير...وقتاش تبني وقتاش توفر الدراهم هذو..
سمير تنهد: اذا موفرتهمش منتزوجش ..هاني قاعد..
ورفد روحو وخرج..
فطيمة تنهدت عارف الضيق عندهم وزيد ختى بنتها عندها بزااف مشاكل مع ناس دارها وراهي تتوحم وقاعدة عندها..
فطيمة : ياارب افتحها في وجه وليدي سمير وفي وجهم كامل..
...
سمير خرج يدور فالحومة محبش يخدم..
خرج تفكر سارة..في تاقتها وتبسم تفكر ليلة الباارح..
رفد تليفونو وعيطلها..
سارة شافت نومروه جرات لبيتها وغلقت الباب .
سارة: الو صباح الخير..
سمير: صباح الخير راكي نايضة بكري هه
سارة: ههههه بووه عليك راهي قريب 11 وقيل هذاين نضت؟؟
سمير: ههه.. انا بصح عييت البارح ماشي كيفك فارغة شغل فنيانة
سارة : ااا انا فنيانة ؟؟ مالصبح وانا مع الشغل ..
سمير : ههه املاا نزيدلك شغل ؟؟
سارة: واش مالشغل؟؟
سمير: عسي طونوبيل تاعي..
سارة: وشنو وشنووو مسمعتش مليح..
سمير: قتلك عسيها .متكثريش الهدرة بزاااف..
سارة: ونتا علاه شريتها كي متسوقهااش ومخليها فالدار؟!
سمير: انا مشريتهاش ليا...شريتها لمرتي..كي نتزوج نديها فيها هه
سارة: ممم مليح راك تخمم في مرتك.
سمير: نخمم فيها ماشي كيما نتي متخميش في راجلك..متعسيلوش الطونوبيل تاعو..
سارة عوجت فمها : حتى يولي راجلي ..مزال مولاش راجلي..
سمير: وكي ماشي راجلك علاه راكي تهدري معاه؟!
سارة: جابلي ربي هو عيطلي..
سمير: عندك الحق ماليوم ميزيدش يعيط..
وكوبا.
سارة نخلعت..شبيه هذا..هبل؟؟
عاودتلو محبش طفا التليفون..
سمعاتو فتح الطونوبيل ..هبطت تجري لعندو باش تفهمو..
فتحت الباب طلت عليه..
سارة: سمير..
سمير كان ركب طونوبيلتو..شافها ديمارا لحق عندها
سارة: سمير نقصر معاك علاه زعفت؟؟ والله مابقصدي ياك علابالك واش تكون بالنسبة ليا..وشكون راجلي من غيرك..
سمير بقا يشوف فيها بحوايج تاع لدار طلع حواجبو..
سمير: وراجلك تخرجي ليه هكا مشنشفة ؟؟
سارة خزرت في روحها بحوايج تاع الدار سيرفات حشمت وبدات تضحك.
سارة: اعععع هبطت مزروبة مشفتش روحي بلي راني نبهدل
سمير: طيري خفي خيرمن نخطفك...قالو تبهدل..
وديمارا..
سارة بقات طل عليه..شافها مالتروفيزور حبس و طل عليها .
سمير: نجي نخطفك..؟؟؟
سارة ضحكت ودخلت للدار تجري وهو كمل طريقو
ولاد الحومة
By Nihel-nina
قصة باللهجة الجزايرية تابعوها ومتندموش ملاحظة: هاد الكرونيك منقولة من قروب فيس More