مساء الورد ع متابعيني الاعزاء
ابدي وياكم بقصة جديده
اتمنى تنال اعجابكم
#ضلموني
البارت الاول
بقلمي ام مصطفى
خليت راسي ع الجرباية وحسوني بصفي وصفنت لذيج الايام أيام الخير الله جنت انام واني راسي مرتاح وماافكر بشي ..
بابا اخلاص
_نعم بابا
حبيبتي دولكة مي بارد للخطار حبيبتي
صار بابا
دخلت للمطبخ جانت امل بنت خالتي
يمنا خطار
بوكتها حنة اخوي ازهر
والخطار بده يجي
وره الظهر,,,,
اموله حبيبتي
ناوشيني السراحيات
خلي اترسهم مي
طلعت ثلج من المجمده وكسرته
وكعدت اكسر واخلي
امل كالت
اخلاص بس اسئلج سؤال
كولي حبيبتي
مرت اخوج حازم عود ليش شايلة خشمها
ودائما عازلة نفسها حتى مساعدكم هواي
كلة براسج وراس امج
حبيبتي امل هي هاي هدى هيج
طول عمرها شايلة خشمها ومتتحاجه
من يوم الي اجت ع البيت
والي مكبر راسها حازم
منطينها أكثر من حجمها
انت تعرفين امي
من نوع الي ماتحب مشاكل
دكول خليها ع راحتها شعدنه احنه قابل
تدرين حتى جهالها احنه نوكلهم ونغسل الهم
اكثر الوقت يمنا جوه
وامي وابوي متعلقين بيهم هواي
مو مره ابوي كلها
عمو ليش عازله نفسج فوك
ابقي يمنا اكعدي سولفي
جان دكوم وتزعل تكل لحازم شنو يدخل بيه بكيفي وين مااكعد اكعد
وبقت اسبوع منازله
عاد من وكتها احنه ماادخلنه بيها نعتبرها مموجوده
_ بس تره هي مدام عايشة وياكم بالبيت
لازم حالها من حالكم
ميصير هي كاعده وانتن تنظفن
بعد تبقى كلمن وضميره واحساسة اكو جناين ماعدهن احساس ويدورن غلب
ويستكنفن ينظفن ويساعدن ابيت العيال
واكو لا بنت اوادم وتجي من ابيت ابوها
مرباية وتعرف الاصول وتعتبر بيت عيالها بيتها وتشاركهم بكلشي
مو مثل العدنه من وره خشمها إذا سوت شي وعبالك مانة علينا
اووي عوفينا منها
تعالي شيلي وياي الدولكات نطيهم لبابا
ونصعد لغرفتي نبدل ونشسور شعرنا
راح الوكت
يلا. . ..
انطيت لبابا المي
ودخلنا الصالة خالتي وفاء كاعده هي وامي تسولف
وعمتي جميلة يمهن كاعده
خليت يمهن دولكة مي
ماما راح اصعد ابدل واشسور شعري تردين شي
اي بنتي لا تتاخرين
دشوفين خطار يروح ويجي
لا بسرعة بس نبدل
صعدنا فوك بيتنا كولش جبير
جانت مساحتة ٤٠٠ متر
جوه صالتين واستقبال جبيرة
مطبخ جبير غرفتين
وصحيات وكراج وحديقة جبيره
وفوك ست غرف وحولي بنصهم وصحيات ومطبخ صغير هم فوك
غرفتين جانن لبيت حازم
وغرفتي وغرفة لاازهر ..
امل يله تعالي بسرعة نبدل
لاكتنا هدى
هلو منو اجة جوه
خطار رياجيل
وعمتي جميلة و خالتي
هااا
مو اهلي كالوا يجون
عفية اخلاص من يجون اطيني خبر حتى انزل
اي ان شاء الله
دخلت للغرفة وسديت الباب
امل ادردم وتهز بيدها
من يجوون اهلي اطيني خبر وتعوج بحلكها
ههههههه لج دعوفيها شبيج خليتي بالج يمها
وج تقهر والله شنو عبالك نزل عدكم
هسة بالايام العادية مساعد ميخالف
بس عدكم مناسبة هم متنزل
تره حتة الجوارين والمناسبات يجون يساعدون مو عاد اهل البيت
بعد شنسوي خليها ع راحتها
تعالي تعالي
فتحت الكنتور
اني راح البس هذا الفستان
وانتي البسي الي يعجبج من ملابسي
صدك البس منج
اي عادي مو بس هذا اليعجبج اخذي الج
عندي هواي
فدوه لعمرج حبيبتي
امل بنت خالتي حالتهم ضعيفة جانت كولش كاعدين ابيت من بيوت بابا
بس هواي احبهم بيت خالتي عدهم عزة نفس وعينهم مليانة
رغم همة فقره
بس تحسيهم شايفين وعايفين امل اني وياها ميانة وكلشي انطيها
مرات خالتي متقبل عليها بس اني اكلها اني انطيتها
خالتي عدها امل ومالك وعلاوي الصغير
مالك اه حب الطفولة والمراهقة والشباب من احنه صغار نلعب سوه
وكبرنا وصارت نضرات بينا
بعدين اعترفلي يحبني واني هم بادلتة ناس المشاعر
بقت بس نظرات بينا ونلتقي من يجينا نسولف سوالف عاديه ..
امل : وين صفنتي اخلاص
ماكو هيج حسبه يله خلي نلبس
لبسنا وبدت تسحبلي شعري بالشيوار
ونزلنا سمعنا صوت هلاهل
واحنا ع الدرج
لج جوكليت طشوا خلي ننزل
ههههههه عبالك صغار ركضنا نلم
اجتي جوارينا تهلهل واطش جوكليت
خالتي شافتنة صلوات يمة اخلاص شطالعة تخبلين يوم عرسج ان شاء الله
التفتت ع امل عكدت حاجبها
منيلج هذا الكوستم ولج
ماما اخلاص انطتة الي والله ماطلبتة
ليش انت ماعدج ملابس واخذتيه
مو اشتريتلج ذاك اليوم ع مود عرس ازهر
خالة فدوه اني انطيته الها والله مااريده هواية عندي
ميخالف بتي بس مو تطيها كوستم غالي
خاله والله عدي هواي
عفية خاله لاتسويين هيج تره ازعل
اووف امل منج اووف
دمشي امشي
شوية ودخل ازهر
واشتغلت الهلاهل
والهوسات
طالع كلش حلو لابس بنطرون وقميص ومزين فديت اخوي
دخلت بالنص واهوس اخونه خوش اخو يستاهل الهوسة
كالت امي تحضرن دنروح انحني العروس
العروس جانت قريبة علينا بنفس المنطقة ازهر جان يحبها وخطبها
كال بأبا نروح مشي
بسرعة ركضت تحضرت وطلعت اول الناس جنت لا محجبة بوكتها ولا البس عباية
يبووي نسيت اعرفكم بنفسي
اني اخلاص مواليد ٧٧
ساكنة بحي القاهرة ابغداد
خلصة سادس علمي وكعدت طلعتلي محافظات كليتي فماداومت
ابوي راد اروح اقسام داخلية واكمل بس لا امي قبلت ولا حازم وصارت مشاكل
عاد كتلهم مااريد اني اكمل لهنا وكافي
اخواني حازم اكبر مني مواليد ٧٢
وازهر مواليد ٧٥
واني وحيده ماعندي اخوات
ابوي صاحب أملاك وعقارات
وصاحب مطعم معروف ابغداد
جان مثال للأب الحنون يحبني ومدللني
لان بنتة الوحيده
بس ابوي دلل خواني زايد مثل ميكولون
اخواني لا شغل ولا عمل
حتى للمطعم بالصدفة يرحون
معتمدين ع ابوي بكلشي
مصرف ولبس وزواج كله من ابوي
شكد حاول يطلعلهم للمطعم وياه بس ميقبلون
ازهر جان كولش مدلل ويصرف ويتلف
وعزايم وسفرات وحتى يشرب
وحازم شايل خشمة وعصبي وزرة محنة بكلبة ماعنده
عبالك مو اهله هو ومرته نفس الطبع
يدخل يصيح ويطلع يصيح
ويتأمر حتة امي
إذا معجبةالاكل يكلبها للصينية
عكس ازهر صح صراف ويسكر
بس جان هادء وكلبة طيب بس هم جان لا ابالي يعني ما له شغل بالبيت ولا بالمطعم ولا يساعد ابوي باي شي
طبعا هو كلية هندسة يداوم آخر سنة إله
اما حازم مخلص وميقبل يتعين ..
امي مره مستوره فقيره من نسوان قبل
لا تحب المشاكل ولا تدخل بشي
دكول مدام سالمين هاي هي شريد منهم
عدنا خير من الله
وهو أول ع تالي الهم
....؛؛؛؛؛؛؛؛؛؛؛؛؛
طلعنا نمشي لبيت رهام خطيبة ازهر
من بعيد شفت مالك رف كلبي عليه
هو شافني وتبسم
اجة تقرب من عدنا اني وامل
ها بنات شلونكم
يابة العرس كلة الكم شطالعات اليوم
امل حجت هاي اني لو تقصد ع خلوصة
لا اثنينكم
كرصتها اني
صاحت اخخ شبيج يول محجيت شي
هو يقصدج
وج اسكتي
هو استحى ومشى كدامنا
وصلنا لبيت العروس
طالعة حلوه تخبل
وازهر طاير فرح بيها
لبسوا الذهب وكصوا الكيك
والهلاهل مستمره
شكد حلو جنهم بلابل
بعدين حنوها وطلعنا
بقى ازهر يمها واحنه رجعنا
هوسة الخطار
بابا جاب اكل من المطعم مالتة
واني وخالتي وامي وامل انخبصنا
نصب
نزلت هدى اساعدكم
امي كالت الها بكيفج
اي انطوني واني اوزع الاكل
اخذت السفرة وراحت
لا والله مكلفة نفسج
اخلاص يمة بله حجي زايد
شتردين منها
مادامني بيه حيل اني اخلص الشغل شتردين منها
بله مشاكل وقال وقيل
حاضر ماما
كمت اناوشها وهي تخلي
تعشوا ولمينا السفر نضفنا المطبخ
وبدت حنة الولد
صعدنا فوك السطح نباوع عليها من فوك
واهوس وياهم
كلش حلوه حنة الولد
ثاني يوم ابوي حجز الهم بفندق شيراتون
ورحنا كلنا وياهم وصلناهم ورجعنا
من رجعت امي كالت مرت خالج
رادتج لابنها عثمان
وصراحة عثمان خوش ولد دكتور
وعدهم خير
خوش قسمة تره
كتلها ماما مااريد ازوج اني
لايمة شلون متزوجين هاي سنة الحياة
اكو وحده تبقى بله زواج
اي ماما بس هسه مااريد ازوج
جنت بوكتها احب مالك مردت عثمان
ولا احبة اني ثكيل كلش حتى من يجونه مااكعد يمهم
كتلها ماما مااريده عفية مااحب عثمان
ضاجت كالت مو بكيفج انت متعرفين مصلحتج
اني اكولة لابوج وهو يقرر
وللحكاية بقية ام مصطفى
قصة حقيقية من واقعنا
النشر يكون كل يوم بارت واذا اكدر بارتين
والجمعة استراحتي
تحياتي الكم