حيــاكم الله 🩵
شعرك غصن زيتون طگه الهوا
يا بويه يفرگ گلبي من ينفرگ
وك هيه سفره لخصرك ادفى وأرد
لا ما أرد وياك كون أنلزگ
و أصعد بأيدي صاعوود أعجبك تره
چا مو حرام يضوگه غيري العثگ
للشاعر المبدع ( حيدر هواد)
...
شذر
شيصير لو ننسى الحزن ونعيش ايامنا بسلام وتسامح.. مو مهم ننسى المواقف الحزينه اللي مرت بينا بل الأهم هو ان ننسى الشعور اللي حسينه بيه خلال الموقف ..
رب العالمين ما ينسى عباده ابداً عشت حياتي بمرارة وهو الوحيد الشاهد على مرارة أيامي لكن العوض كان چبير .. ظهور شاهين بحياتي ما كان صدفة ابداً بل كان تدبير رب كريم ...
كملنا زيارة القبور وصعدنا بالسيارات اني چنت منهكة نفسياً و روحياً أخذني شاهين وصعدني بسيارته وره وراح ليوسف أنطاه بصمة السيارة وفتح الباب اللي من جهتي وگعد بصفي وسحبني لحضنه وغطاني بسترته عطرها ترس روحي وخلاني أهدأ وإجتاح السكون أطرافي..
همس بأذني وأنفاسه الحارة ضربت بخدي
شاهين: نامي حبيبي ..ارتاحي ..
ضمني حيل لصدره وبدأ يقرأ آيات قريب من اذاني بهدوء ضليت صافنه بالفراغ واستمع لصوته الدافي
صعد عمو ابو شاهين بالصدر وزوجة خالي صعدت يمي من الجهة الثانية سمعتها تبچي بس ما اعرف شاهين سوالها حركه وهيه بعدها سكتت ويوسف صعد وحرك السياره واني شويه وغفيت بحضنه ..
فتحت عيوني لگيت نفسي نايمه على رجليه والسيارة واگفة وماكو بس هو يمي ... فاتح الجامه ومطلع ايده لازم جگارته ودخلها سحب منها نفس ونفخ الدخان على شباك السيارة وتحركت تفاحة أدم برگبته أشتهيت أطبع عليها بوساتي داير وجهه ما حس عليه من صحيت ..
رفعت ايدي ودخلت اصابيعي بلحيته ألعب بيها هو بسرعه نزل راسه الي واخذ ايدي اللي على لحيته و باس كل اصبع بيها بهدوء و عيونه مليانه حب.. وهمسلي..
شاهين : شلون صرتي ي بيتي؟ احسن شويه؟؟
همست: أحبك آني هواااي!
نزل راسه و باسني من شفايفي بهدوء رفع راسه شويه من عندي وگال:
شاهين : يا بعد حيلي واني عطشان عليچ بالعباس مو بس احبچ
شذر: شو ماخذ راحتك انت .. وينهم؟
شاهين: نزلوا يتغدون وگتلهم عوفونه هنا خلو حبيبي يشبع نوم ... خليت يوسف يطبگ السيارة بنهاية الگراج مال المطعم حتى محد يتورج علينا ... جوعانه؟
شذر : لا حبيبي روح أنت اتغدى اذا تريد!
شاهين : اني هم ما اريد عود من نوصل سويلنا شي ناكله او نطلب دليفري مو مهم..
شذر: تمام !
غمزلي: أگوول ...مشتاق اني يول من البارحة أحوص عليك
شذر: ههههه شاهين بطل سوالفك هاي
شاهين(مبتسم) : قصدچ سوالف السرسرية ههههههه
شذر: هههههه
گمت من حضنه عدلت حجابي دگ موبايلي جاوب هو عليه
شاهين: ها حبيبتي ... اي بالمطعم ديتغدون تقريبا ساعه او ساعه ونص نوصل .. اي زينه زينه هياتها يمي ليظل بالچ .. ماشي سلميلنا باي
شذر: منو ؟
شاهين: آيه ... بالها يمج تريد تتطمن عليچ
شذر : رحمة الله والديها ... أگول حبيبي شراح يصير على موضوعها ويه ليث ...
شاهين: بس يروحون الجماعة تصير المشية والله كريم
شذر: ان شاء الله خير الله يسعدهم ..
شاهين: آمين حبيبي ... اي خوش طلعوا الجماعة من المطعم ... حياتي راح أسوق اني صرتي زينه مو؟
شذر: اي حبيبي زينه ما بيه شي سوق انت اذا تريد
شاهين: اي مو هذا يوسف سياقته سريعه قلقني
رجعنا بخير وسلامه للبيت وخالو راكان گال العصر يروحون ضجت عبالي يبقون بعد بس عدهم أشغال وملتزمين بدوامات ...
راكان: تعالي خالو أگعدي عدنا حچي لازم نتفاهم عليه ... وانت هم شاهين تفضل حتى يصير الحچي گدامك
شاهين: خير ابو سردار !
راكان : كل خير ان شاء الله .. الوالد من توفى قسم كلشي بيناتنا قبل لا الله ياخذ امانته ووصاني من اختي ترجع انطيها حقها من الورث و بما انه هيه توفت الله يرحمها فـ شذر هيه اللي راح تستلم ورث امها..
شذر: بس خالو اني ما محتاجة الحمد لله شاهين ما مقصر عليه بشي!
راكان: حبيبة خالو هذا حقچ وهاي الامانه الله شاهد چانت جبل على گلبي والحمد لله هسه راح أرجعها لأصحابها
شاهين : ابو سردار احنا كسبناكم اهل وهاي عدنا اغلى من فلوس الدنيا كلها
راكان: الله يعزك يا حبيبي .. بس يبقى هذا حقها واني ورامان ظلينا محافظين عليه لحد ما الله رزقنا بشذر حتى نرجعلها حقها..
رامان: حقها عماره بيها ٩ شقق مؤجرة صار سنين والإيجار احنه كل شهر نودعه بالمصرف وهسه صار خير من الله الحمد لله وهيه حره تتصرف بيه
گام خالو رامان وانطاني دفتر بيه حساب بالمصرف ما فتحته ظليت حاطته بأيدي وصافنه عليهم
راكان: احنه بلشنا بالمعاملة حتى تتحول بأسمج ان شاء الله العمارة والحساب همين حوالنا بأسمج حتى تتصرفين بيه براحتچ تسحبين او تودعين بيه .. واكو مزرعه وبيها بيت حطينه بيه فلاح وتقريبا بالشهر مرتين اروحله واشوف الاوضاع هاي همين تحولت بأسمج ... وهذا كل حقچ وصلچ...
رامان: واي شي تحتاجين احنه موجودين حبيبتي
شذر: شكرا الكم ما قصرتوا الله يحفظكم وميحرمني منكم
راكان: هذا واجبنا حبيبتي والحمد لله رب العالمين قدرني ووصلت الأمانة لأصحابها... ووهاي هدايا زواجچ لان احنه ما چنا حاضرين بالعرس
گاموا نسوان خوالي وانطوني علب قديفه حجمها كبير فتحت مال زوجة خالو راكان طلع حزام ذهب و الثانية مال خالو رامان طلع بيها سلاح ذهب
شذر: خالو حبيبي تسلمون ليش كلفتوا نفسكم
رامان : انتي نص كرديه لازم عندج سلاح وحزام ههههههه
شاهين: ههههه علامة الجودة
ضحكوا كلهم وخالو راكان گال :وهسه لازم نتوكل ورانا طريق واي شي تحتاجين اتصال واحد تلگينا يمچ زين باباتي
شذر: تسلم خالو ربي يحفظك ويطول بعمرك
شاهين: تسلم ابو سردار ما قصرت
رامان: ما أوصيك عليها شاهين !
شاهين: لا توصي حريص حبيبي
ودعناهم وراحوا وظليت كل شويه أتصل عليهم اشوف وصلوا لو بعدهم... لليل دزولي خبر ووصلوا الحمد لله وكملنا العشا ورتبنا المطبخ اني وسمره وايه گاعده تتراسل ويه حبيب القلب مالتها ليث واني وسمره نتناگر كالعاده
سمر: شذره تره من باچر راح نبلش دراسه بعد ما بيها مجال للتسخيت
شذر: اي ادري گلي شاهين واني بالي كله مو يم الدراسه
سمر: منو شاغل بالچ عيني؟
شذر: اخوچ غييير ههههه
سمر: اييي عيني ليش لا .. حب وكذا يوم الألي واذبح طلي
شذر: بعدچ زغيره على هاي السوالف
سمر: اللي يسمعچ يگول اكبر مني بعشر سنين ولچ هيه سنه وحده وخابصتني
رجع شاهين چان طالع ويه جماعته ودخل للمطبخ وشايل وياه ٣ علاليگ بسرعه گمزت سمره تفتش بالعلاليگ
سمر: الله جايب اشياء تجنن بدون ما أوصيك هالمرة ههههههه
شذر: الله يساعدك حبيبي
شاهين : يسلمچ الله حبيبي هاي مو بس الچ سمره وحده الج ووحده لأية ووحده لشذرتي
سمر: منو اكثر وحده جايبلها؟
شاهين: كلهم بالتساوي ماكو فرق كل انواع الحلويات جبت منا ليومين ما اريد وحده ادكول جيب وياك حلويات
ايه: تسلم حبيبي الله يخليك إلنا
شاهين: الف عافية غلاي
اخذنا العلاليگ وهو صعد للغرفة ظلينا اني وسمره نفتش خاف اكو وحده أكثر من الثانية
أية: ولچن كافي شگد تتناگرن وتالي وياچن ... أمشي انتي مو رجلچ أجى روحي شوفي خاف محتاج شي وانتي الثانية اخذي حلوياتچ وعلى غرفتچ بسرعه راسي صار شكبره من وراچن ...
أخذت علاگتي وانداريت على سمره وگلت والله حقچ أيوو اني صوچي انزل روحي للزعاطيط وسمره بسرعه شالت شحطاتها تريد تشمرها عليه واني طفرت وصعدت الدرج ركض وخربانه ضحك عليها..
فتحت الباب ودخلت للغرفة على السريع وقفلتها وانتچيت بظهري عليها خاف تصعدلي سمره خليت ايدي على كلبي اخفف من دگاته
انداريت لگيته هستوه طالع من الحمام وحاط المنشفة على خصره وواگف ينشف شعره وعينه عليه ومبتسم على شكلي ...
شاهين : شمسويه مصيبه؟
شذر(بإحتيال) : حبيبي ...أختك الحية تريد تضربني بالشحاطة ترضاها؟
شاهين: هههههه وانتي مسكينه مو؟
شذر: انت تدري بيه ورده ميحتاج امدحلك بنفسي هههههه
شاهين: لا يابه ميحتاج سمعتچ سابقتچ
تقربت عليه وصرت ألعب بشعره امشطه بأصابعي وگتله بدلع واضح: زين حبيبي لازم تعاقبها .. والعقوبة انه المرة الجاية اتجيب حلويات اكثر الي حتى اغورها بيهم؟؟ اوكييي؟
مد أيده وره ظهري وسحبني عليه بقوة و ثبت عيونه على شفايفي و بأيده الثانية سحب الشال من شعري و شمره ورجع فتح القراصة و نفتح شعري على طوله وهمسلي..
شاهين: زين .. وأني شوكت أكل حلوياتي؟
لفيت أيديه على رگبته وجاوبت : من تجيبلي حلويات أكثر..
رفعني من خصري وباسني برگبتي وگال
شاهين: باچر اجيبلچ المحل كله
وأخذني وياه لعالمنا المليان حب وعاطفة...
...
يوسف : انتي وينچ من البارحة لليوم ماكو مختفية اتصل و متجاوبين وحتى للكلية ما أجيتي ؟
شروق : ملتهين بأياد غير ...
يوسف: ههههههه خلي ملتهي بروحه
شروق: بس مو هيج شمسوي بيه انت!
يوسف: هااا طبگتي وياه؟
شروق: لا مو قصدي بس انقهرت عليه!
يوسف: اي لا تنقهرين عليه يستاهل واحد عار
شروق: ابن خالتي اخذوا الشرطة يمكن راح يحاكموا على التعاطي..
يوسف: مو گتلچ راح بدرب الزلگ بعد لا تفكرين بيه
شروق: يوسف بديت أخاف منك ...
يوسف: اني اللي يندگ بيه او بشخص يهمني ما يلوم الا نفسه ...
شروق: يعني شنو!
يوسف: شوفي ما اگولچ اني خوش ادمي وماكو مني لا أكو هواي أحسن مني بس بوية من اشوفچ گلبي كلش يدگ ..
و أحس حتى العسل يغار من لون عيونچ ومتقصد لبستچ النظاره حتى محد يشوفهن غيري حتى الشمس !
شروق: واذا أذيت گلبي بيوم؟
يوسف: أطلع مو كفو وما محسوب على الزلم
شروق: حشاك!
يوسف: أگلچ ما تنطيني بوسه!
شروق: يوسف!!!
يوسف: أعتذر هذا يوسف السرسري اللي بداخلي قفز بالنص معليچ غلسي !
شروق: واضح من بدايتها!
يوسف: أحبچ وغصبا عليچ تحبيني!
شروق: معليه!
يوسف: مو أجي تره!
شروق: وشتسوي!
يوسف: أكسر...
شروق: شنو؟
يوسف: ضلوعچ بحضني !
..
فهد
صار الليل واني بالمحل مال شاهين بعد شويه وانعزل صار يوم ونص ما متحاچين اني وياها... و أحس روحي تلوب عليها ..
گاعد احسب الوارد واجمعه والولد يرتبون بالمجوهرات حتى نعزل ونطلع وچان تدخل هيه و صديقتها للمحل ...
و وگف ميل الساعه وگلبي و أختفت كل الناس و بقت بس هيه بعيني .. باوعت على الساعه بالعشرة ونص بالليل أحترگ دمي .. صديقتها راحت يم واحد من الولد تريد تشتري محبس و إجت هي وتقربت مني
مريم: شلونك؟
فهد: ولچ انتي أخوچ ميسأل عليچ طالعه بهالوكت ميخاف عليچ... ماكو غيره براسه!!
مريم: ليش عصبي؟ فوگ ما جايه اشوفك!
فهد: شهالبرود البيچ لچ حتخبل من وراچ
مريم: اخوية مسافغ ويه أصدقائه.. وأُمي طالعه ويه خالتي ضجت بالبيت وحدي طلعت!
فهد: وين چنتي ؟
مريم: بالمول
فهد: صديقتچ ترجع وياچ؟
مريم : لا امها وياها اني اغجع وحدي للبيت!
فهد: أمشي يلا خلي ارجعچ للبيت...
مريم: لااا تصييغ زحمه عليك اني أخذ تكسي وأغجع !
فهد: مررريم تره وصلت حدها وياچ ... امشي گدامي ولا تعاندين..
وصيت الولد يقفلون المحل ويروحون وهيه سلمت على صديقتها وطلعنا
صعدنا بالسيارة وبس شغلت السيارة چان ادكول
مريم: بس لحظة خلي أكنك على السيارة حتى اشغل أغاني..
فهد: لا عوفي الاغاني خلي تولي !
مريم: افففف شبيك فهد؟
فهد: عوفي الاغاني خلي نسولف شنو رأيچ؟
مريم : انت بس تغيد تغيغني بأي طريقة؟
فهد : اتمنى !
مريم: ليش؟
فهد: حتى تحسين بالراحة!
مريم : ليش اني ما مرتاحة؟
فهد : لا ما مرتاحة و تحسين نفسج وحيدة وتصرفين هاي التصرفات حتى تجذبين نظر الاخرين وادگولين اني موجودة !
حسيتها انصدمت بكلامي وتلعثمت وخدودها صارت حمر جاوبتني بعصبية : انت ششايف روحك طبيب نفسي؟
فهد: الله سبحانه وتعالى افضل طبيب نفسي .. ويداوي روحچ بدون تمنن ... بدون ذلة.. بدون رجاء ...
مريم: اني ما محتاجة طبيب نفسي ... اني تايهه !
فهد: طريق رب العالمين واضح واذا مشيتي بيه مراح تضيعين... واذا تقربتي من الله ما راح تحسين بالوحدة نهائياً ...
مريم: و شلون اتقغب منه؟
فهد: الصلاة يا مريم هيه البوصلة الحقيقية للتقرب الى الله لا تخلين تلاهي الحياة و ألوانها البراقة تبعدچ عن الطريق القويم... وصدگيني من راح تسجدين الى الله راح ينزاح كل همچ و حزنچ وتتخلصين من طاقتچ السلبية ...
أسألچ سؤال شنو تسوين اذا راح تلتقين بشخص تحبيه بموعد معين؟
مريم : أسبح و أكشخ و اتعطغ..
فهد : وهذا اللي راح تسوي قبل كل صلاة لان هذا لقاء مع رب العالمين راح توگفين بين ايدين رب السماوات والأرض... اتخيلي عظمة هذا اللقاء و استشعريها بروحچ راح تلگين نفسچ الضايعه.. وراح ينزرع بداخلچ أمل جديد وراح تستقر روحچ ..
مريم : وانت ليش تحاول تساعدني؟
فهد :الله سبحانه وتعالى يهدي من يشاء و يضل من يشاء وهو مسبب الاسباب !
مريم : اذا هو يهدي من يشاء و يضل من يشاء لعد ليش يحاسبنا ؟
فهد: من اسباب هداية الله لعبده وتثبيته له هو إقبال العبد على الهداية واجتهاده بتحصيلها وعمله بما علم.. اذا تسأليني شنو هيه وسائل الثبات جوابي الچ هو الدعاء و صحبة الناس الخيرة و تشتغلين بالاعمال الصالحة و دعوة الآخرين للاستقامة و تحضرين او على الاقل تستمعين لمجالس العلم و الوعظ و تزكية النفوس..
مريم: قصدك اذا واحد طلب الهداية الله غاح يهدي؟
فهد: بالضبط مثل قوله تعالى( والذين اهتدوا زادهم هدى وآتاهم تقواهم) ..
مريم: وشلون الواحد يطلب الهداية؟
فهد: اولا بالتوبة عن المعاصي اذا كان الشخص مرتكب لهاي المعاصي لا سامح الله او التوبة عن اي ذنب او إثم مرتكبه بماضيه.. وثانيا يطلب الهدايه من الله وان يوفقه الى الثبات والاستمرار بالهدايه
مريم: وصلنا هذا فرعنا !
فهد: راح اوگف هنا وانتظرچ تفوتين للبيت يلا أروح ما أگدر اوصلچ لباب البيت خاف تجيچ حچاية..
مريم : شكغاً فهد ... على كلشي ..
فهد: لا شكر على واجب ادللي..
مريم: مو تگطع وما تسأل..
فهد: بأي وقت تحبين تحچين اني موجود ..
مريم: باااي..
فهد: في أمان الله !
...
شذر
چنت نايمه على صدره ومغمضة عيوني وهوحاضني لصدره و يلعب بشعري بهدوء خلاني انعس غصباً عني وارفع الراية البيضا للنوم..
سألته بصوت نعسان: شاهين لازم اروح طبيبة نسائية؟
شاهين: ليش حبيبي ؟ بيچ شي ؟
شذر: شاهين تره اني كلشي ما اعرف شلون ناخذ احتياطتنا شي على موضوع الطفل مو اتفقنا منسوي علمود دراستي ... شنو نسيت؟
شاهين: ان شاء الله حبيبي بس يصير عندي مجال أخذج ونروح تمام
شذر: أستعجل عفيه أخاف يصير حمل
شاهين: اذا صار كل هلا بيه رزق هذا حبيبي
شذر : لااا شاهين مو وگته ابد خلي ببالك اذا صار أجهضه ما اخلي !!
رأساً مزاجه انگلب وحسيته تعصب كلش .. شال ايده من جوه راسي وبعدني من صدره وگام من السرير واخذ منشفه ودخل للحمام.. اني ظليت صافنه هذا شبي !!
وره شويه طلع سابح نشف شعره ولبس فانيلا وشورت وتمدد على السرير و دار وجهه للجهة الثانية وانطاني ظهره..
شذر: ليش ضجت؟
جاوبني بنتر و عصبية: لان متعرفين شلون تحچين!
شذر : وليش دتصيح اني ما گلت شي غلط ... حذرتك اذا صار أجهضه حتى تستعجل و تاخذني للطبيبة ..
اندار عليه وعيونه تجدح نار من العصبية: حذرتك شنو ولچ؟ انتي منو وتحذريني ؟؟؟ شبيييچ شو گمتي متعرفين شلون تحچين؟
شذر : بس اسمـ... ( قاطع كلامي وگال)
شاهين: مووو بكيفچ تجهضين ... احنه متفقين منسوي جهال هسه بسبب دراستچ لكن اذا الله راد و رزقنا تريدين تروحين تجهضيه واني شنو اظل صافن عليچ؟؟؟
شذر: تفضل حياة أبنك على مصلحتي و شهادتي شاهين؟
شاهين: لچ بابه هو وينه أبني وأفضله عليچ تخبلتي انتي؟؟ غير أخاف عليچ شنو عبالچ الإجهاض فد شي سهل ؟
شذر : واني شمدريني سهل لو صعب؟
شاهين : خلص لعد لا تسولفين بشي متعرفيه
تمدد ودار وجهه وانطاني ظهره ضجت كلش وانقهرت منه ..
شذر: شاهين
شاهين: ما اريد أسمع صوتچ ولا كلمه!
حضنته من ظهره لزگت روحي بيه و شاورته بأذانه بهمس أعرف بهاي المنطقة كلش حساسه عنده
شذر: حبيبي تعوفني أنام زعلانه .. ( بوسته برگبته) تره ازاعلك وبعد ما أحبك وأرجع أكرهك مثل قبل!
شاهين: يامااا أكرهك... بيها شگد احبك!
شذر: أكرهك !
بسرعه گلب جسمه عليه ورفع اديه فوگ راسي وقيدهم بأيده وحاط ايده الثانية على خصري وسألني
شاهين: تعيديها بعد هاي اللغوة مالتچ؟
شذر: لا شاهين ههههه ما أعيدها بعد بس لا تدغدغني حباب هههههه ( دغدغني واني صرخت هو سد حلگي)
شاهين : لچ منا العالم بنت الاوادم!
شذر: مااا بكيفي أعيط لعد تريد تدغدغني وأسكت
گال ماشي وعضني من خصري حسيت روحي طلعت فرفحت وگمت ابچي رفع راسه من خصري وهمس
شاهين : گزگزت ما گدرت الزم روحي اسف حبيبي
شذر( بدموع) : بعد لا تسوي هيج !!!
شاهين : لا طيبه راح اظل أسويها !
شذر: شاهيييين!
شاهين : روحه لشاهين ( و سوه هجوم على شفايفي حتى يسكتني وما اظل ادردم عليه)
...
ثاني يوم رحنا اني وسمره للمحاضرات وبلشنا دراسه من صدگ ... اني حاطه هدف واحد گدامي أجيب معدل عالي حتى اختار اختصاص زين والتوفيق من الله ...
خاله ام شاهين خطية ما قبلت نشتغل اي شي بالبيت كالت انتبهوا على دراستكم وكلشي ما اريد منكم فما عندي شي بس غرفتنا نظفتها و رتبت كلشي وگعدت ادرس ...
چنت منتچية على تاج السرير و ضامه رجليه لصدري والملزمة على رجليه واقره بيها و ما حسيت الا على شاهين راجع من الشغل ...
فتح الباب جايب وياه علاگة يمكن بيها حلويات ذبها على ميز التواليت وتوجه عليه سحبني من رجليه نومني وحط راسه على بطني و حضني من خصري ..
صرت ألعب بشعره سواده فاحم و سرح كلش يغري اي شخص انه يداعبه ...
شذر: شبيك حبيبي؟
شاهين: تعبان!
شذر: متغدي؟
شاهين: ما أشتهي
شذر: حياتي اسويلـ...
قطع كلامي: عوفيني نايم هيچ وانتي كملي دراسه
شذر: تاخذني اليوم للطبيبة صارلك شگد تأجل ما دام عندك مجال اليوم .. خوما نظل هيچ!
شاهين : لااا مو اليوم ما بيه حيل ابد
شذر: انت مصخن تدري بنفسك لو لا!
شاهين : امممم
ذبيت الملزمة و ظليت العب بشعره لحد ما حسيت بيه نام رفعت نفسي منه شويه شويه وخليت المخدة بمكاني ..
غطيته ونزلت جوه سويتله شوربه و صعدت گعدته واكل شوية صار أحسن ودخل سبح فكته الصخونه وگضاها بقية اليوم كله نايم من وره الصخونه تروح وترجعله...
ثاني يوم الفجر حسيت بيه يبوس برگبتي ابتسمتله
شذر: شلون صرت حبيبي خوفتني عليك!
شاهين: گومي بدلي خلي نطلع!
شذر: وين نروح بعدها الشمس ما طالعه !!
شاهين: يلا صحصحي لتصيرين كسوله
سحبني من ايدي ورفعني من السرير حطيت راسي على صدره و مشينا سوه للحمام وغسل لي وجهي شويه صحيت
شذر: زين بس گولي وين نروح؟
شاهين: أخطفچ! يلا يلا حبيبي بسرعه قبل لا يفوتنا الوكت..
بدلنا وطلعنا من الغرفة بهدوء حتى محد يحس علينا شاهين فتح باب الكراج وصعدت اني بالسيارة وشغل السيارة طلعها من البيت وسد باب الكراج چان يتصل بيه أبوه..
شاهين: هاا يابه .. صباح النور.. لا ماكو شي حبيبي طالعين نشتم هوا انتظرك تجي ويانه؟؟ ... ههههه لا يا عرسان صرنا قديمين .. هههههه الله يحفظك حبيبي عود راح أجيب گيمر ويايه حتى نتريگ كلنا سوا ... الله وياك
اخذ ايدي وباسها اني ضحكت والنومة بعدها بعيني احس على شوية واغفى وگال ...
شاهين: ما ينشبع منها البوسة مالته يااااربيييي
ضحكت بقوة وسألته: حبيبي بعدك مصخن؟؟
شاهين : أني مصخن بحبك حبيبي
شذر: هههههه أحلف عليك مو صاحي اليوم ابد
وصلنا على الجسر وطبگ السيارة نزلت وشكل النوارس وهيه تحلق فوگ روسنا يجنن .. يرسم الضحكة على وجوهنا غصبا علينا ... راح هو اشترى سميد من رجال حچي واگف على الجسر ..
انطاني منه وصرنا نشمر القطعه فوگ وتاخذها النوارس وهيه طايرة واني أگمز وياهم فرحااانه انملى گلبي سعاده حط ايده على چتفي وهمسلي
شاهين: گلبي ..مثل هاي النوارس هيچ يرفرف عليچ ..!
شذر: أحبك ..
شاهين: أموووع اني أموووع عالترافه!
الذكريات هيه الكنز الحقيقي للأنسان لو مهما كانت بسيطة بس تكون مصنوعه بحب و طالعه من الگلب تظل بالعقل ومستحيل نگدر ننساها لو مهما مر بينا العمر ...
لازم نصنع ذكريات ولو بأبسط الاشياء ونترك آثر جميل كلما تضيق بينا الدنيا و تمر علينا الايام الصعبة راح تكون ذكرياتنا الحلوة هيه قارب النجاة بالنسبة إلنا وهيه الخزان اللي نستمد منه قواتنا للاستمرار بهاي الحياة ...
...
مرت ٣ اسابيع تقريبا وصار يوم المشية مال اية وليث وكملنا كل الامور من تجهيزات للكوشه مالتهم وصينا بنيه تشتغل هاي الترتيبات
وصارت كوشتها تجنن و رتبنا التوزيعات كلها اني والبنات قبل بيوم جهزنا كلشي بس ما حسيت بأي تعب لان تعب الفرح دائماً يكون حلو..
وخصوصا من اشوف عيون آيه شلون فرحانه وما سايعتها الدنيا دعيت رب العالمين لكل بنيه تعيش قصة حب يكون حبيبها من نصيبها و يتكلل حبهم بالزواج ...
خلال هاي الفترة خديجة ما إجت لبيت اهلها ابد ولا سمعت عنها شي مجرد تخابر امها و خواتها بس ابد ما الها علاقه بالبيت وشديصير بيه نهائياً وهذا الشي اللي استغربته مو من عوايدها ...
بس اجت قبل يوم المشية مال آيه وجهزت ويانه كلشي و بنات عمهم هم اجونا قبل بيوم ومن ضمنهم حنين اللي ما دخلت البيت من يوم اللي طردها بيه شاهين بس مالها حچايه ويايه بس تباوعلي من بعيد لبعيد وأحس بعيونها حچي هواااي ...
بيومها باتوا كلهم يمنا ... بالليل طلعت بالحديقة اشتم هوا ضايجة وشاهين لحد الان ما راجع طالع ويه اصدقاءه ظليت گاعده اتمرجح بالمرجوحه وعيني على نارنجة بالشجرة .. صارت نفسي بيها أريدها بس شلون اوصللها وأگطعها..
جبت كرسي وصعدت أريد اگطعها ودخل شاهين من الباب على هذا المنظر ...
شاهين: هااا حبيبي هاي وين صاعده؟
شذر: اااا شسمه ... موو هذا..
شاهين: تريدين النارنجة ؟؟
شذر: اي شكلها حلو
شاهين: انزلي حبيبي لا توگعين ( لزمني من خصري ونزلني وگطعها وراح غسلها بالحنفيه مال الحديقة وگشرها وانطانياها)
گعدت على المرجوحة وبديت أكل بيها عبالك برتقاله وهو صافن عليه ..
شذر( احچي وحلگي مليان بالگوة تطلع الحچايه منه): هممم شبيك صافن؟
شاهين: لا حبيبي بالعافية ههههه تريدين بعد؟
شذر: اممم گطع بعد شبيك وحده متكفي!
شاهين: هههههه صار بس خاف مو زين عليچ
شذر: زين زين گطططع يلااا شمنتظر راح تخلص اللي بيدي
شاهين: اي بالعافية حبيبي ( گطع اثنين بعد وغسلهم وگشرهم وحطهم گدامي واني أكل وهو صافن عليه مصدوم بيه شلون أكلها عبالك برتقاله)
شذر: ياااااي شاهين متتصور شگد طيب هذا النارنچ أكل ويايه شوفها شگد طيبه
شاهين: لا بالعافيه حبيبي ( باسني بشفتي واني أكل) اي صح كلش طيبه
شذر: هههههه مو گتلك
شاهين : اموووع اني على اللي يمطگع من ياكل ههههههه
شذر: شاهيييين لا تقلد عليه
شاهين: لا ما أقلد بالعكس طالعه تخبلين ... اگووول حبيبي !!! ( وأشرلي بعينه وحواجبه على بالكون غرفتنا بمعنى امشي نروح للغرفة)
شذر: مااا ..معليه اريد أكل نارنج
شالني بأثنين أيديه وكال: امشي نروح للغرفة انتي تاكلين نارنج واني أكل غير شي
شذر: هههههه شاهين متبطل سوالفك
شاهين: لااا وداعتچ ما أگدر !
فات للمطبخ وهو شايلني وخربانين ضحك اني وياه چان نتلاگه ويه حنين بالمطبخ باوعت علينا وچان ادگول
حنين: شلونك شاهين؟
شاهين: هلا .. ( وكمل طريقه وهو شايلني وهيه مشت ورانه لباب المطبخ تباوع علينا .. عيبت عليها بلساني وسويتلها حركة بأديه وره رگبته بمعنى على عنادچ بس شاهين ما شافني داير ظهره وصعدنا بالدرج ودخلنا لغرفتنا ورحنا بعالمنا الوردي المليان حب)
.
.
انتهى.
لاتنسون التصويت حبايب اذا البارت نال اعجابكم ورضاكم عن طريق الضغط على علامة النجمة ⭐️
احببببكم 🩵
مع خالص الود والمحبة